Marcos

13 Taita Diospa templo huasimanda Jesús ña llujshijujpica, paipa discipulocunapuramanda shujca nircami: “Yachachij, Taita Diospa templo huasitapash, chai juyailla jatun rumicunatapash ricui”. 2 Shinapash Jesusca nircami: “¿Chai jatun templo huasita ricujunguichu? Chai templo huasipa rumicunaca shuj rumillapash na chaipillata quidangachu* tucuillami urmachishca canga” nirca.

3 Jesusca templo huasi chimbapurapi tiajuj, Olivos shuti lomapimi tiajurca. Chaipimi Pedro, Santiago, Juan y Andrespash paicunalla rishpa Jesustaca tapunajurca: 4 “¿Ima horashi cashna cosascunaca pasanga? ¿Ima señalta ricushpashi cai tucui cosascuna ñalla tucurinataca yachashun? Chaitaca ñucanchiman villayari”. 5 Chaimi Jesusca nirca: “Yaipimi cana canguichi. Pipash cangunata pandachichunga na saquinachu canguichi. 6 Tauca gentecuna shamushpami, ñuca shutita yanga utilizashpa ‘ñucami Cristo cani’ ninajunga. Shinami ashtaca gentecunata umachinajunga. 7 Cangunaca, shuj shuj pushtucunapi guerracuna tiajtami uyanguichi. Pero na manllarinachu canguichi. Porque chai cosascunaca pactaringapachami. Pero tucurimuica nara chayamungachu.

8 ”Gentecunaca paicunapurami macanajunga. Llactacunapash paicunapurami macanajunga. Terremotocunapash shuj shuj pushtucunapimi tianga. Ninan yarjaipashmi tianga. Pero, chai tucui llaquicunaca callarillami canga. Ashtahuan jatun llaquicunami tianga.

9 ”Cangunaca yaipimi cana canguichi. Gentecunaca juezcunapa maquipimi cangunataca saquinga. Shinallata, sinagoga huasicunaman apashpami macanga. Ñucata catimandami gobernadorcunapaman, reycunapaman a la fuerza apai tucunguichi. Shinami, paicunapash ñucamanda uyanga. 10 Ashtahuangarin, tucui llactapi gentecunamanmi primeroca ali villaicunata predicana can. 11 Pero autoridadcunapa ñaupaman cangunata apajpica, imatata nisha nishpaca na pinarijunachu canguichi. Chai ratopi imata ninataca Taita Diospa espíritu santomi yuyachinga. Shinaca na cangunallaca parlanguichichu. Sino Taita Diospa espíritu santomi canguna parlai ushachun ayudanga. 12 Shinallata, huauquillatami paipa huauquitaca huañuchichun entreganga. Taitapashmi paipa churitaca huañuchichun entreganga. Huahuacunapashmi paicunapa taitamamacunapa contra tucushpa huañuchichun entreganga. 13 Tucuilla gentecunami cangunataca ñucata catijushcamanda na ricunayachinga. Ashtahuangarin ultimocaman aguantajcunatallami Taita Diosca salvanga.

14 ”Shinaca, tucuita tucuchij millanai llactaca* na shayarina pushtupi shayajujtami ricunguichi. (Caita intindingapaca, caita liijujca aligutami pensarina can). Chaita ricushpaca Judea llactapi cajcunaca urcucunapi pacajungapami calpana can. 15 Huasi terrazapi cajcunapash, paicunapa charishcacunata japingapaca na huasi ucuman uriajunachu can. 16 Pambapi trabajanajujcunapash, na paicunapa jahualla churajunata mascangapaj tigranachu can. 17 Chai punllacunapi vijsayu* huarmicunalla y huahuata chuchuchinajuj huarmicunalla, aij imachari tucunguichi. 18 Chiri chiri punllacunapi ama pacajushpa rina tucungapami, Taita Diostaca cutin cutin mañariajunalla canguichi. 19 Porque chai punllacunaca, llaqui tiempomi canga. Chashna llaqui tiempoca, cai mundota Taita Dios rurashca punllacunamandapacha cunangamanga nunca nara tiashcachu. Y cutinbash na tiangachu. 20 Chai tiempota Jehová* Dios unaicaman tiachun saquijpica, pipash na salvarinmanllu. Shinapash pai agllashca gentecunamandami chai llaqui tiempo catichunga na saquinga.

21 ”Shinallata ‘Cristoca caipimi can’ o ‘chaipimi can’ nishpa pipash nijujpica na crinachu canguichi. 22 Porque Cristomi cani nij tucujcunapash y llullashpa villachij profetacunapash shuj shuj jatun milagrocunata rurashpami, Taita Diospa agllashcacunatapash pandachingapaj munanga. 23 Shinaca yaipimi cana canguichi. Cai cosascuna nara pasajpillatami, tucuita cangunamanga ña villashcani.

24 ”Shinapash chai punllacunapica, chai llaquicuna jipami indipash amsayanga y lunapash ñana punchayachinga. 25 Estrellacunapashmi jahua cielomanda urmanajunga. Jahua cielopi ima tiashcacunapash caiman chaimanmi cuyurinajunga. 26 Shinallata, Runapa Churitaca* fuyu jahuata ninan poderhuan shamujujta y punchapamba shamujujtapashmi ricunguichi. 27 Paimi Taita Diospa agllashcacunata tandachichun paipa angelcunata cachamunga. Chai angelcunami cai mundopa chuscundi ladocunamanda* cielo callarijuj pushtumanda, cielo tucurijuj pushtucaman, shinallata alpa callarijuj pushtumanda, alpa tucurijuj pushtucaman Taita Diospa agllashcacunata tandachinga.

28 ”Higos yuramanda parlashca comparacionmanda yachajuichi. Higos malquishpa llullu fangacuna llujshi callarijpica, tarpuna tiempo ña chayamujujtaca alimi yachanguichi. 29 Cangunapash, cai tucui cosascuna pasajujta ricushpami, Runapa Churi* ñalla chayamunataca* seguropacha cana canguichi. 30 Ciertopachami cangunataca nini, cai tiempopi gentecuna* nara huañujpillatami cai tucui cosascunaca pactaringa. 31 Jahua cielopash y cai alpapash yalingami. Pero ñuca rimashca shimicunaca nunca na tucuringachu.

32 ”Caicuna ima punlla, ima hora* chashna pasanataca pipash na yachanllu. Jahua cielopi angelcunapash na yachanllu. Taita Diospa Churi ñucapash na yachanichu. Solo ñuca Taitallami yachan. 33 Cai cosascuna ima hora pasanataca na yachanguichichu. Chaimandami na puñushpa chaparianshna causana canguichi. 34 Chaica caru llactaman rigrijuj runagushnami can. Paica paipa huasita cuidachunmi paipa esclavocunaman mingashpa saquirca. Shinallata, cada esclavomanmi shuj trabajota mingashpa saquirca. Ashtahuanbash portero runagutaca aliguta cuidashpa ricuriapangui nishpami mandarca. 35 Shinaca, huasi dueño ima hora shamunata na yachaimandami, siempre chaparianshna causana canguichi. Tuta* chaupi tuta* gallo candajuj horas* o tutamandata* shamunataca na yachanguichichu. 36 Na yashcapi shamushpaca canguna puñunajujtami japij shamunga. 37 Siempremi chaparianshna causana canguichi nishpaca, na cangunatallaca nijunichu, sino tucuicunatami nijuni” nirca.