LECCIÓN 09
Taita Diosta mañanami paiman ashtahuan quimirichun ayudan
¿Quiquinba causaipi imata rurana cashcata pipash nichunllu minishtipangui? ¿Quiquin charishca tapuicunapa respuestatachu mascajupangui? ¿Pipash quiquinda animachichunllu minishtipangui? ¿Jehová Diosman ashtahuan quimiringapaj munapanguichu? Taita Diosta mañanami ñucanchicunataca ayudaita ushan. Shinapash ¿imashinata mañana capanchi? ¿Taita Diosca tucui mañaicunatachu uyan? Taita Dios quiquinba mañaicunata uyachunga ¿imatata rurai ushapangui?
1. ¿Pitata mañana capanchi? ¿Imatata mañana capanchi?
Jesusca Taita Diostallami mañana canguichi nishpami yachachirca. Cai alpapi cashpaca Jesuspashmi Jehová Diostalla mañan carca. Jesusca, Taita Diosta mañanajushpaca “Jahua cielopi tiajuj ñucanchi Taitalla” nishpami mañana canguichi nircami (Mateo 6:9). Jehovata mañashpami paiman ashtahuan quimirinchi.
Taita Diosta mañajushpaca shuj shuj cosascunatami mañai ushapanchi. Shinapash Taita Dios ñucanchi mañaicunata contestachunga pai munashcashnami mañana capanchi. Chaimandami Bibliapica, “Taita Diospa voluntadhuan de acuerdo cajpica, imaguta mañajpipash paica uyanmi” ninmi (1 Juan 5:14). Jesusca Taita Diosta imacunatalla mañai ushashcatami yachachirca (Mateo 6:9-13, liipangui). Por ejemplo ñucanchi minishtishca cosasgucunamanda mañashca jipaca, Taita Diostaca tucuimandami pagui nishpa agradicina capanchi. Shinallata shujcunatapash ayudapai nishpapashmi Taita Diostaca mañai ushapanchi.
2. ¿Imashinata mañana capanchi?
Bibliapica Taita Diospa “ñaupajpica, tucui shungu mañaichiyari” ninmi (Salmo 62:8). Shinaca Taita Diosta mañanajushpaca shungumandami mañana capanchi. Shinallata parlashpa o shungu ucupillatami mañai ushapanchi. Mañanajushpaca siempremi Jehová Diosta respetashcata ricuchina capanchi. Taita Diostaca imahora cashpapash o maipi cashpapashmi mañai ushanchilla.
3. Taita Diosca ¿imashinata ñucanchi mañaicunataca contestan?
Taita Diosca paipa Shimi Bibliata utilizashpami ñucanchi mañaicunataca contestan. Bibliata liinaca ‘alipacha yachajushcacuna’ tucuchunmi ñucanchitaca ayudanga (Salmo 19:7; Santiago 1:5, liipangui). Shinallata problemacunahuan cajpica Jehová Diosca tranquilo sintirichunmi ayudan. Huaquinbicarin huauquipanicunata utilizashpami ñucanchitaca ayudan.
ASHTAHUAN YACHAJUPASHUNCHI
Cunanga Taita Dios imashina mañachun munashcatami ricugripanchi. Shinallata paita mañana quiquinda imashina ayudajta ricupashun.
4. Taita Dios munashcashna mañapashunchi
Taita Dios ñucanchi mañaicunata uyachunga ¿imashinata mañana capanchi? VIDEOTA ricupangui.
Jehová Diosca paitalla mañachunmi munan. Salmo 65:2ta liishpa, cai tapuita contestapangui:
‘Mañaicunata uyaj’ Taita Diosca ¿quiquin paita mañachunllu munan? ¿Imatata nipanguiman?
Taita Dios ñucanchi mañaicunata uyachunga paita cazushpami causana capanchi. Miqueas 3:4 y 1 Pedro 3:12ta liishpa, cai tapuita contestapangui:
Taita Dios ñucanchi mañaicunata uyachunga ¿imatata rurana capanchi?
Ishcai grupo soldadocunaca guerrapi macanajushpa ganangapami Taita Diostaca ayudahuai nishpa mañaita ushan. Shinapash ¿Taita Diosca contestangacha?
5. Shungumandami mañana capanchi
Ashtaca gentecunataca cutin cutin chaitallata nishpa mañanata o chaitallata nishpa rezanatami yachachishca. Shinapash ¿Taita Diosca chai mañaicunataca uyanlla? Mateo 6:7ta liishpa, cai tapuita contestapangui:
Taita Diosta mañajushpa ama ‘chaitallata chaitallata nishpa’ mañajungapaca ¿imatata rurana capanchi?
Cada punlla quiquinba causaipi ima bendiciongunatalla charishcapi pensarishpa Jehová Diosta agradicipai. Shina rurashpaca semanapica shuj shuj cosascunamanda Taita Diosta mañashcatami cuenta japipangui.
Shuj taitaca paipa huahuagu shungumanda parlachunmi munan. Shinallatami Jehovapash shungumanda tucuita villashpa mañachun munan
6. Taita Diosca paita mañana bendiciondami cushca
Llaquicunahuan o problemacunahuan cajpica Taita Diosta mañanaca ¿imashinata ñucanchicunataca ayudan? VIDEOTA ricupai.
Bibliapica Taita Diosta mañanami ñucanchicuna tranquilo sintirichun ayudan ninmi. Filipenses 4:6 y 7ta liishpa, cai tapuicunata contestapangui:
Llaquicunahuan cashpaca ¿imashinata Taita Diosta mañanaca ayudan?
Quiquinga ¿imacunamandallata mañapanguiman?
¿Yachaparcanguichu?
“Amén” shimica mañashcahuan “de acuerdomi cani” o “shina cachun” ningapami munan. Bibliata escribij tiempomandapachami Taita Diosta mañai tucuchishca jipaca “amén” nishpa tucuchin cashca (1 Crónicas 16:36).
7. Taita Diosta mañangapami tiempota llujchina capanchi
Huaquinbica ocupado caimandami Taita Diosta mañanatapash cunganchi. Pero pensaripai ¿Taita Diosta mañanaca Jesuspaca importantechu carca? Mateo 14:23 y Marcos 1:35ta liishpa, cai tapuicunata contestapangui:
Taita Diosta mañangapaca ¿imatata Jesusca rurarca?
Quiquinga Taita Diosta mañangapaca ¿imashinata tiempoguta llujchita ushapangui?
HUAQUINGUNACA, “Mañashpaca tiempotallami perdinchi. Ñucanchi mañaicunataca pipash na uyanllu” ninmi.
Quiquinga ¿imatata nipanguiman?
YARINGAPAJ
Shungumanda mañanaca Taita Diosman ashtahuan quimirichunmi ayudan. Shinallata tranquilo sintirichun, Jehová munashcashna causangapaj esforzarichunmi ayudan.
¿Imatata yachajupashcanchi?
¿Pitata mañana capanchi?
¿Imashinata mañana capanchi?
Mañanaca ¿imashinata ñucanchicunataca ayudan?
CAITAPASH RICUPAI
Taita Diosta mañanamanda huaquin gentecuna imacunatalla nishcata ricupai.
“Oracionda ruranamanda siete tapuicuna” (Villajun revista, 1 de octubre de 2010)
Taita Diosta mañana imamanda importante cashcata, imashina Taita Dios munashcashna mañana cashcatapash ricupai.
“Diosta mañanaca ¿imamandata minishtirishca can?” (jw.org paginapi ricupangui)
Pita mañana cashcata Bibliapi imata yachachijta ricupai.
“¿Santocunata rezanaca alichu can?” (jw.org paginapi ricupangui)
Maipi cashpapash Diosta mañai ushashcataca cai cántico videopi ricupai.