Jehová Diostaca nunca na saquinachu capanchi

Ciertopacha cristianocunaca Jehová Diosta ama adorachun pipash jarcachunga napacha saquinatami decidishca capanchi. Quiquinbash shinallata yuyajtaca seguromi capanchi. Y Jehová Diosca quiquin paita na saquinata decidishcamandaca ninandami cushijun (1 Crónicas 28:9, liipangui). ¿Ima problemacunallata Jehová Diosmanda caruyachita ushanman? ¿Imashinata chai problemacunataca mishaita ushapangui?

1. Jehová Diosta saquichunga ¿imacunatallata shuj gentecunaca ruranga?

Huaquin gentecunaca Jehová Diosta ama sirvichunmi imacunatapash ruranga. ¿Picunata Jehová Diosmanda caruyachingapaj munanga? Por ejemplo, Jehová Diosta sirvinata saquishcacunami Jehová Diospa organizacionmanda llullacunata nishpa ñucanchitaca pandachingapaj munanga. Paicunaca apostatacunami can. Shinallata religiongunata ñaupaman pushajcunapashmi Jehová Diospa organizacionmandaca huaquin llullacunata nishpa gentecunaman panda yuyaicunata crichishpami Jehovamanda caruyachingapaj munan. Jehová Diospa contracunahuan parlana, paicunapa librota internetpi imacunatapash churashcata ricuna o paicuna llujchishca videota ricunaca peligrosomi can. Jehová Diosmanda caruyachingapaj munajcunamanda parlashpaca Jesusca cashnami nirca: “Paicuna imata ninajujpipash saquichilla. Paicunaca ñausacunami can. Shina cashpapashmi maita rina ñanda shujcunaman ricuchinajun. Shuj ñausallata chaishuj ñausata maita rinata ricuchijushpaca, ishcandimi utujupi urmanga” (Mateo 15:14).

2. ¿Ñucanchipa ima decisiongunata Jehová Diosmanda caruyachita ushan?

Jehová Diosta juyaimandami panda religiongunahuan chapuringapaca na munapanchi. Chaimandami ñucanchi trabajo o shuj ruraicunapash panda religiongunahuanga na chapurishcachu cana can. Jehová Diosca paita sirvijcunataca Importante Babilonia o panda religionmandaca ‘llujshinami canguichi’ nishpa advirtin (Apocalipsis 18:2, 4).

ASHTAHUAN YACHAJUPASHUNCHI

3. Llullacunata nishpa yachachijcunahuan cuidadota charipashunchi

Jehová Diospa organizacionmanda imapash nalicunata uyashpaca ¿imatata rurana capanchi? Proverbios 14:15​ta liishpa, cai tapuita contestapangui:

• ¿Imamandata tucui nishcacunataca na crina capanchi?

2 Juan 9-11​ta liishpa, cai tapuicunata contestapangui:

• ¿Apóstata gentecunahuanga parlanallachu capanchi?

• Apostatacunahuanbacha na parlashpapash ¿imashinata paicunapa yuyaica ñucanchita afectaita ushan?

• Jehová Diosmanda y paipa organizacionmanda nalicachishpa parlaicunata uyajujpica Jehová Diosca ¿imashinashi sintiringa?

4. Shuj huauqui o shuj pani shuj jatun juchata rurajpica ñucanchicunaca Jehová Diostami primero cazuna capanchi

Shuj huauqui o shuj pani shuj jatun juchata rurashcata yachashpaca ¿imatata rurana capanchi? Israelitacunaman Jehová Dios imata mandashcata ricupashun. Levítico 5:1​ta liipangui.

Cai textopi ricushcashnaca shuj huauqui o shuj pani jatun juchata rurashcata yachashpaca huauqui ancianocunaman villanami capanchi. Pero ancianocunahuan nara parlashpallatami juchata ruraj huauqui o panitaca ancianocunaman paicunallata tucuita villachun animana capanchi. Shinapash ancianocunahuan na parlangapaj munajpica ñucanchimi Jehová Diosta juyaimanda ancianocunaman villana capanchi. Caita rurashpaca:

• ¿Imashinata Jehová Diosta juyashcata ricuchipanchi?

• ¿Imashinata juchata ruraj huauqui o panita juyashcata ricuchipanchi?

• ¿Imashinata congregacionmanda huauquipanicunatapash juyashcata ricuchipanchi?

5. Panda religionba ruraicunahuanga ama chapuripashunchichu

VIDEO: Panda religionba ruraicunata ama rurashpa catipai (5:06)

Lucas 4:8 y Apocalipsis 18:4 y 5​ta liishpa, cai tapuicunata contestapangui:

• ¿Maijan religionbi cashpapash ñuca shutica registrashcarachu can?

• ¿Panda religiongunahuan ricunata charij imapash organizaciongunapi participanichu?

• ¿Panda religionba imapash ruraicunapica ñuca trabajohuanga apoyajunichu?

• ¿Panda religionbi na chapurishcataca ñucapa tucui rurashcacunahuanllu ricuchijuni?

• Cai tapuicunamanda maijandapash nara pactachishpaca ¿imatata rurana cani?

Shinaca imata rurajushpapash ñucanchi conciencia tranquilo cachun y Jehová Diostapash cazujushcata ricuchingapami shuj decisionda agllana capanchi.

YARINGAPAJ

Jehová Diosta cazushpa catingapaj munashpaca Jehová Diosmanda llullacunata parlajcunahuanga na llevarinachu capanchi.

¿Imatata yachajupashcanchi?

• ¿Imamandata apostatacunapa panda yachachishcacunataca na uyana capanchi?

• Shuj huauqui o shuj pani jatun juchata rurashcata yachaj chayashpaca ¿imatata rurana capanchi?

• Panda religionmanda caruyaitapachami caruyana canguichi nishpa mandashcata cazungapaca ¿imatata rurana capanchi?

CAITAPASH RICUPAI

Testigo de Jehovacunamanda llullacunata nishpa juchachinajujpi imata rurana cashcata ricupai.

“Na tucuita crinachu capanchi” (Villajun revista, agosto de 2018)

Imapash organización o imapash ruraicuna panda religiongunahuan chapurishca cajtaca ¿imashinata yachai ushapangui?

“Tucurimui punllacunapica ashtahuan villachipashunchi” (Villajun revista, octubre de 2019, párrafos 16-​18)

Ñucanchicunata pandachingapaca Jehová Diospa huaquin contracunaca ¿imatata rurashca?

Ama pandachi tucupashunchichu (9:32)

“Huahuamandapachami Taita Diostaca mascajurcani” nishca temata liishpa, shuj sacerdote sintoísta imashina panda religionda saquishcata liipai.

“Bibliami gentecunapa causaita cambiashca” (Villajun revista, 1 de julio de 2011)