‘Aliguta yariashpa rijchariashnami Diostaca mañajunalla canguichi’

1, 2. a) ¿Imamandata ‘rijcharia’ ña pacarijujpi cuenda Taita Diostaca mañariana capanchi? b) ¿Ima tapuicunapita tucuicunallata pensarina capanchi?

PUNDA velashpa trabajadorca nircami, tuta entero pacarijushpaca madrugado tucujuj horascunami ninanda puñunayan nishpa. Ashtaca gentecunapash nishcami, madrugado tucujuj horascuna rijcharia canaca shinllipachami can nishpa. Diablopa nali mundopash shuj yana yana tuta cuendami can. Shinapash ñallami tucuringa (Rom. 13:12). Chaimandami ‘aliguta yarishpa, rijcharia’ ña pacarijujpi cuenda Taita Diostaca mañariajuna canchi (1 Ped. 4:7).

² Nali mundo ñalla tucurina punllacunapi causajushcamandaca tucuicuna tapuripashunchi: “¿Imashinata Jehová Diostaca mañajuni? ¿Ima laya oraciongunatata rurajuni? ¿Cutin cutinllu Jehovataca mañajuni? ¿Shujcunamanda mañanichu o ñucapa minishtirishcacunatallachu mañanata yachani? ¿ Jehovata mañaimanda salvarinata crinichu?” nishpa.

 3. ¿Ima laya oraciongunatata rurana capanchi?

³ Éfeso llactamanda huauquicunataca apóstol Pabloca nircami: “Tucui laya oraciongunatami” rurana canguichi nishpa (Efes. 6:​18, NM). Ñucanchi minishtirishcacunamanda, llaquicunamanda mañajpica Jehová Diosca cushijushpa, llaquishpami ñucanchi mañashcacunataca uyan (Sal. 65:2). Shinapash tucui laya oraciongunata rurashpami: 1) alicachishpa alabana, 2) pagui nina, 3) ninanda mañana capanchi.

 4. ¿Imamandata Jehovataca cutin cutin alabashpa mañana capanchi?

⁴ Jehová Diostaca ‘ashtaca ashtaca jatungunata rurashcamandami alicachishpa alabana’ canchi (Salmo 150:​1-6, liingui). Salmo capítulo 150​pica 12 viajemi Jehovataca alicachishpa alabashpa mañan. Cutin shuj salmistaca nircami: ‘Aliguta ricushpa can mandashca shimicunamandami, punllapica canchiscaman candaca alicachijuni’ nishpa (Sal. 119:164). Jehová Diosca jatun Diosmi can, tucui podertapash charinmi. Shinaca ¿nachu Jehovataca alicachishpa alabashpa punllapi cutin cutin mañana cashcanchi?

 5. ¿Imamandata Taita Diostaca pagui nishpa mañana capanchi?

⁵ Mañajushpaca pagui ninami canchi. Apóstol Pabloca Filipos llactamanda huauquicunataca nircami: ‘Ima illajpipash na chaitalla yariashpa llaquilla causanachu canguichi. Ashtahuangarin Taita Diosmanmi imatapash villashpa ninanda mañana canguichi. Tucui imamandapash pagui nishpa mañaichilla’ nishpa (Filip. 4:6). Shinapash ¿imamandata pagui nishpa mañana canchi? Cai tucuri punllacunapica “pagui” ninata na yachaj gentepuracunapimi causanajunchi (2 Tim. 3:​1, 2). Na cuidarishpaca chai gentecunashnallata tucushpami Taita Diosta agradicinataca na yarishun. Ashtahuangarin ima llaquicunamandapash Taita Diostarami fiñashpa nalicachishpa rimanajushun (Jud. 16, NM). Huahuacunapash Taita Diosta agradicinata yachajuchunga taitamamacunami Taita Diosta pagui nishpa oraciondaca rurana can.

6, 7. a) Ninanda mañashpaca ¿imashinata mañana capanchi? b) Imacunamandallata Jehovataca ninanda mañana capanchi?

⁶ Taita Diostaca ninandami mañana canchi. Ninanda mañashpaca tucui shunguan o huacashpapashmi mañanalla canchi. Huaquinbica ungushca cashpa, Testigo caimanda pipash llaquichijujpimi Taita Diostaca ninanda mañana canchi. Shinapash ¿imacunamandallata mañana canchi?

⁷ Jesuspa oracionda yaripashunchi. Jesusca Taita Diospa shutimanda, Reinomanda, Taita Diospa munai pactarichunmi mañarca (Mateo 6:​9, 10, liingui). Cai mundopica ashtaca nali gentecunami causan. Gobiernocunapash gentecuna imata minishtishcatallapash na cui ushashcachu. Chaimandami ñucanchica Taita Diospa shuti santificado cachun, Diospa Reino Diablopa nali mundota tucuchichun mañana canchi. Shinallata Taita Diospa munai jahua cielopishna cai Alpapipash pactarichunmi mañana canchi. Imashinami ricupashcanchi, tucui laya oraciongunata rurashpami rijcharia cuenda causana canchi.

 8. Jardín de Getsemanipica apóstol Pedropash cumbacunapash ¿imata tucurca?

⁸ Apóstol Pedroca ‘rijchariashnami Taita Diostaca mañajunalla canguichi’ nishpapash shuj punllaca puñushpami quedarca. Jardín de Getsemanipica Jesusca nircami, ama puñunguichichu, rijchariami cana canguichi nishpa. Shina nijpipash apóstol Pedroca cumbacunandimi puñushpa quedarca (Mat. 26:​41, 45a).

 9. Jardín de Getsemanipi apóstol Pedro paipa cumbacunapash puñushcamandaca ¿imamandata na rimana capanchi?

⁹ Apóstol Pedropash paipa cumbacunapash jardín de Getsemanipi na rijcharia cashcamandaca nalitami rurashca nishpa ¿rimanachu canchi? Pensaripashunchi. Chai punllaca Pascuata yaringapaj nishpami paicunaca tucuita ucha segurarca. Chai jipaca Pascua fiesta punllatami yarirca. Chai jipapash, shamuj punllacunapipash chashnallata rurachun nishpami Jesusca tandata, vinota yalichishpa shuj mushuj pactota paicunahuan callarichirca (1 Cor. 11:​23-25). Ashtahuangarin ‘candashca jipaca’ Jerusalenba quichiji ñangunata chaquilla rishpami Olivos shuti urcumanga chaupi tuta yalita chayarianga (Mat. 26:​30, 36). Shinaca ñucanchicuna jardín de Getsemanipi cashpaca ¿nachu shaijushpa puñunayachinchiman carca? Paicuna shaijushca cashcata intindishpami Jesusca apóstol Pedrotapash paipa cumbacunatapash na rimarca. Ashtahuangarin nircami: ‘Cangunapa espirituca Diosta mañangapami munan. Ashtahuangarin cangunapa cuerpoca shaijunllami’ nishpa.

10, 11. a) Jardín de Getsemanipica ¿imatata apóstol Pedroca yachajurca? b) Apóstol Pedromandaca ¿imatata yachajupangui?

¹⁰ Jardín de Getsemanipi cashpaca Jesusca nishcarcami: ‘Cunan tutallatami tucui cangunaca ñucata na crishpa pandaringuichi’ nishpa. Shina nijpipash Pedroca nircami: ‘Caishujcuna canda na crishpa tucuilla pandarinajujpipash ñucaca napacha pandarishachu’ nishpa. Quimsa viajetami ñucataca na rijsishachu ningui nijpipash Pedroca nircami: ‘Canhuan huañuchi tucunapacha cashpapash na rijsinitaca napacha nishachu’ nishpa (Mat. 26:​31-35). Jesús nishca shinaca, Pedroca quimsa viajetami Jesustaca na rijsinichu nirca. Chaita cuenta japishpami Pedroca “ninandapacha llaquirishpa huacarca” (Luc. 22:​60-62).

¹¹ Apóstol Pedroca paillata llaqui apashpami na paipillata yapata confiana cashcata yachajurca. Paica Jehová Diosta mañanami ali can yashpami cashna nishcanga: ‘Aliguta yariashpami rijchariashna Diostaca mañajunalla canguichi’ nishpa. Shinaca ¿apóstol Pedropa consejota catinajupanchichu? ¿Cutin cutin mañashpachu Jehová Diospi confiashcata ricuchinajupanchi? (Sal. 85:​8.) Shinallata apóstol Pabloca nircami: ‘Maijanbash shinllipacha crijmi cani nijushpaca aliguta yaringuichi, pactara urmanguichiman’ nishpa (1 Cor. 10:12). Cai consejotapash yariami causana canchi.

12. ¿Imashinata Nehemiaspa ali ejemplota catina capanchi?

¹² Cunanga Nehemiasta yaripashunchi. Nehemiasca Persia llactamanda rey Artajerjespa coperomi carca. Paica Jesús shamungapaj casi 450 huatacuna faltajuj punllacunapimi trabajan carian. Shuj punllaca judiocunata tucuchigrinajujta yachashpami tauca punllacunata ninanda llaquirishpa micuitapash na micushpa ‘jahua pachapi Taita Diostaca mañariajurca’ (Neh. 1:4). Llaquilla purijujta ricushpami rey Artajerjesca ¿imamandata llaquilla cangui? nishpa Nehemiastaca tapurca. Shina ‘[“nishcandimi”, NM] jahua pachapi causajuj Taita Diosta mañarca’ (Neh. 2:​2-4). Shina mañajpimi Jehová Diosca Nehemiaspa oracionda uyashpa judiocunata ninanda ayudarca (Neh. 2:​5, 6). Jehová Dios uyajpica Nehemiaspa feca ninandami shinlliyashcanga.

13, 14. Diablo desanimachingapaj munajujpica ¿imatata rurana capanchi shinlli feta charingapaj?

¹³ Nehemiaspa ejemplota catishpa cutin cutin mañashpaca shinlli fetami charishun. Diabloca ñucanchicunataca na llaquinllu. Chaimandami ñucanchicuna ungushca cajpi o llaquilla sintirijujpica ashtahuan cushijushpa ninanda llaquichin. ¿Nachu huaquinbica, “cai quillaca huaquin horasgucunatallami villachishcani” nishpa Taita Diospa ñaupajpica nali sintirishcanchi? Shinallata ¿nachu punda tiempocunapi nali pasashcacunata yarishpa nali sintirishcanchi? Diablomi ñucanchitaca imapapash na valinichu, na sirvinichu nishpa pensachun munan. Ashtahuangarin llaquilla cajta ricushpami Diabloca ñucanchita espiritualmente chiriyachingapaj munan. Shinapash Taita Diosta cutin cutin mañajushpaca shinlli fetami charishun. Chai shinlli feca shuj jatun escudoshnami canga. Chai jatun escudomi ‘Diablopa flecha pundapi ninata japichishpa shitamushcacunataca huañuchinga’ (Efes. 6:16).

¹⁴ Taita Diosta cutin cutin mañariajushpaca cungashcapi imapash pruebacuna ricurimujpica na manllarinajushunllu. Pruebacuna ricurimushpa Taita Diosmanda caruyachingapaj munajpica, Nehemiaspa ejemplota catishpami tentacionguna ricurijhuan Jehová Diostaca mañana canchi. Shina rurashpallami tentaciongunata mishashpa ñaupajman catita ushashun.

15. ¿Imatata tapurina capanchi?

¹⁵ Jesusca Taita Diostaca mañarcami Pedrotaca aliguta crishpa catichun ayudapangui nishpa (Luc. 22:32). Apostolcunapa punllacunapipash Epafrasca Jesuspa ejemplota catishpami Colosas huauquipanicunamanda mañarca. Apóstol Pabloca nircami, Epafrasca ‘cangunamandaca na cungashpami Diosta ninanda mañariajun. Taita Dios munashcashna shinllipacha shayarishpa, ima pandatapash na rurashpa causachunmi mañajun’ nishpa (Col. 4:12). Shinaca tapuripashunchi: “¿Mundo enteropi huauquipanicunamandaca ninandachu mañajuni? Shuj llactacunapi ninan jatun llaquicuna tiajta yachashpaca ¿chai llactapi huauquipanicunamanda mañajunichu? Cai punllacunapica ¿Cuerpo Gobernantemanda, Comité de Sucursalmanda, ancianocunamanda o shuj huauquicunamandapash mañajushcanichu? Congregacionbi huauquipanicuna llaqui apanajujta yachashpaca ¿paicunamanda mañataca yariachu causajuni?” nishpa.

16. ¿Imamandata shuj huauquipanicunamandapash mañana capanchi?

¹⁶ Shujcunamandapash mañashpaca ninandami paicunataca ayudanchi (2 Corintios 1:​11, liingui). Jehová Diosca ashtacacuna cutin cutin mañajpi chai oracionda uyana obligaciondaca na charinllu. Shinapash tucui shunguhuan cutin cutin mañajujta ricushpa, paipa munaita pactachingapaj munajujpica chai oraciondaca uyanmi. Ama cungapashunchichu, shujcunamandapash mañanami canchi. Ashtahuangarin shujcunamanda Jehová Diosta mañanaca alipachami can. Epafraspa ejemplota catishpa shuj huauquipanicunamandapash tucui shunguhuan mañashpaca, ‘carajpi japijcunatapash yalimi ninanda cushijushun’ (Hech. 20:35).

17. Cutin cutin Taita Diosta mañanaca ¿imashinata ayudan?

¹⁷ Apóstol Pabloca nircami: ‘Tutaca ña pacarijunmi, punllayamujunmi. Rijcharina horasca ña chayamushcami. Ñucanchi cringapaj callarishca punllata yarijpica, cunanga ashtahuanmi quishpichi tucuna punllaca chayamujun’ nishpa (Rom. 13:​11, 12). Shinaca ñalla ñallami Taita Dios cusha nishca paraíso Alpagupi causashun. Ñallapachami ñucanchi salvarina punllapash chayamunga. Chaimandami espiritualmente na puñurina canchi. Shuj cosascunapira ocuparimanda Jehovata mañanataca na cunganachu canchi. Ashtahuangarin cutin cutin Jehovata mañashpami ‘tucui shunguhuan yariashpa, paipalla causana canchi’ (2 Ped. 3:​11, 12). Shinami espiritualmente rijcharishca cashcata, cai nali mundo ñalla tucurinata yaipi charishcatapash ricuchishun. Shinaca ‘Taita Diosta mañanataca na saquinachu canchi’ (1 Tes. 5:17). Jesuspa ejemplota catishpa Jehová Diosta sololla mañangapaj tiempota mascapashunchi. Pipash japigrijujpishna ñapash ñapashca na mañanachu canchi. Shinami Jehová Diosmanga ashtahuan quimirishun (Sant. 4:​7, 8). ¿Nachu Jehovaman quimirinaca shuj jatun bendición can?

18. Jesuspa ejemplota catishpaca ¿imashinata huaquinbica mañana capanchi?

¹⁸ Bibliapica ninmi: ‘Cristo cai pachapi causajushpaca, ninanda mañashpa caparishpa huacashpami, huañunamanda quishpichita ushaj Diostaca mañajurca. Manllaihuan cazujushcata ricuchishpa mañashcamandami paitaca uyarca’ nishpa (Heb. 5:7). Jesusca huacashpa ninanda Taita Diosta mañashpami huañungacaman Taita Diostaca cazurca. Chaimandami Taita Diospash Jesusta causachishpa jahua pachapi causachun churarca. Jesusmanga na huañushpa causana causaitami curca. Shinaca ñucanchicunapash cutin cutin Taita Diosta mañashpaca ima pruebacuna, ima tentacionguna ricurijpipash Taita Diosta cazushpami unai unaicaman causaita ushashun.