Unai unaicaman Jatun Mandaj Jehová Diosta adorashunchi

1, 2. a) ¿Pitata causaita causaicaman o unai unaicaman Jatun Mandaj Rey nin? b) ¿Imamandata unai unaicaman Jatun Mandaj Rey nina capashcanchi? (Cai paginapi dibujota ricupangui.) c) ¿Imamandata Jehová Dios mandachun munapanchi?

SUAZILANDIA llactamanda rey Sobhuza II shutica casi 61 huatacunatami mandarca. Pipash na chai tucui huatacunata mandashcachu. Shinapash Bibliapi nishca shinaca, ‘causaita causaicaman Jatun Mandaj’ reymi tian (1 Tim. 1:17). Chai Jatun Mandaj Reypa shutimanda parlashpami salmistaca nirca: ‘Mandaj Diosmi [“Jehová Diosmi”, NM] na tucurij causaita causaicaman Jatun Mandaj’ can nishpa (Sal. 10:16).

² Jehová Diosca tucui gentecunata ashtahuan yali causaita causaicaman o unai unaicaman Jatun Mandaj Dios cashpapash aliguta mandaj Diosmi can. Aliguta mandajpimi Jehová Diostaca ninanda alicachinchi. Rey Davidca 40 huatacunata mandajushca jipami Jehová Diostaca ninanda alicachishpa nirca: ‘Mandaj Diosca ninanda llaquij, ali shungu, na ñapash fiñarij, ninanda juyajmi. Mandaj Diosmi jahua pachapica pai mandashpa tiarinata churarca. Paica tucuicunatami mandajun’ nishpa (Sal. 103:​8, 19). Jehová Diosca ñucanchi Jatun Mandaj Rey cashpapash ñucanchi jahua pachapi Taitami can. Shinapash ¿imashinata ñucanchi Taita cuenda cashcata ricuchishca? Adán y Eva paita na cazujpipash ¿imashinata Jehová Diosca mandashpa catijushca? Cai tapuicunata cai temapi yachajushpami, Jehová Diosman ashtahuan quimirishpa paita tucui shunguhuan sirvingapaj munashun.

 3. a) Jehová Diosca ¿pitata pundapica rurarca? b) ¿Picunatapashta Diospa churicuna nin?

³ Paipa punda Churita rurashpaca ¡ninandami Jehová Diosca cushijushcanga! Paipa Churitashnallapacha juyashpami ashtaca millón angelcunata rurashun nirca. Shinami Jehová Diosca paipa Churihuan igual shayarishpa angelcunata rurarca (Col. 1:​15-17). ‘Diospa munashcata ruraj’ angelcunaca cushijushpami Jehová Diosta sirvin. Jehová Diospash paicunata ninanda alicachishpami paicunataca “churicuna” nin. Paicunaca tandanajushpami Jehová Diostaca sirvinajun (Sal. 103:​20-22; Job 38:7).

 4. ¿Imashinata Taita Diospa familiaca ashtahuan mirarca?

⁴ Jahua pachatapash cai Alpatapash rurashca jipaca paiman rijchatami Jehová Diosca Adandaca rurarca. Shinami cai Alpapi gentecunapash jahua cielopi angelcunahuan shujlla shina Jehovata sirvina carca (Gén. 1:​26-28). Tucuita Ruraj Dios caimandami Jehová Diosca Adán paita cazuchun munarca. Shinallata taita caimandami Jehová Diosca juyashpa, llaquishpa imata rurana cashcata nirca. Jehovapa mandashcacunaca libre causachunmi ayudajurca (Génesis 2:​15-17, liingui).

 5. Muyundi Alpapi gentecuna mirachunga ¿imatata Jehová Diosca rurarca?

⁵ Ashtaca reycunaca paicunapa sirvijcunataca na familiata cuenda tratanllu. Shinapash Jehová Diosca paipa sirvijcunataca familiata cuendami tratan. Chaimandami paicunapi confiashpa paicunamanbash mandana autoridadta cun, imapi trabajanatapash ricuchin. Adanba ejemplota ricupashun. Jehová Diosca Adanmanmi mingarca, canmi animalcunata ricushpa mandangui nishpa. Shinallata tucuilla animalgucunaman shutita churana trabajotami Adanmanga curca (Gén. 1:26; 2:​19, 20). Ashtahuangarin, Jehová Diosca ashtaca gentecuna muyundi Alpapi causachunmi munarca. Pai munashpaca jucha illaj ashtaca gentecunata rurashpa muyundi Alpapi churanallami carca. Shinapash gentecuna paicunallata mirachunmi munarca. Chaimandami Adanmanga shuj jucha illaj huarmita rurashpa paipa cumba tucuchun curca (Gén. 2:​21, 22). Shinami Adanga paipa huarmi Evahuan huahuacunata charishpa muyundi Alpapi gentecunata mirachina carca. Shinallata cai muyundi Alpatami shuj juyailla paraíso Alpaguta rurana carca. Shinami cai Alpapi gentecunapash jahua cielopi angelcunapash shujlla shina Taita Diostaca sirvina carca. Taita cuenda caimandami Jehová Diosca Adanman, Evamanga chashna ali causaita carasha nijurca.

 6. a) Jehovata na cazungapaj munaimandaca ¿imatata Adanbash Evapash rurarca? b) ¿Imashinata yachanchi, Jehová Diosca Jatun Mandaj Rey cashpa catishcata?

⁶ Jehová Diosta cazunapaj randica shuj nali angeltami Adán y Evaca uyarca (Gén. 3:​1-6). Diablopa lado tucushpa Jehovata na cazuimandaca paicunapash paicunapa huahuacunapash ashtaca llaquicunata, huañuitami tarirca (Gén. 3:​16-19; Rom. 5:12). Chai punllacunapica Diosta cazuj gentecunaca ñana tiarcachu. Shinapash Jehová Diosca Jatun Mandaj Rey canataca na saquircachu. Jatun Mandaj Rey cashpa catishcamandami Adanda Evataca jardín de Edenmanda llujchishpa cacharca. Ashtahuangarin, Adán y Eva ama tigramuchun nishpami jardinman yaicunapica ishcai angelcunata shayachirca (Gén. 3:​23, 24). Jehová Diosca jahua cielopi sirvijcunatapash cai Alpapi sirvijcunatapash taita cuenda juyaimandami ‘miraita’ cachamushami nirca. Chai ‘miraimi’ Diablotapash juchatapash tucuchina carca (Génesis 3:​15, liingui).

7, 8. a) Noeca ¿imashina gentecunapa chaupipi causajurca? b) Gentecuna cai Alpapi causashpa catichunga ¿imashinata Jehová Diosca cai Alpata limpiarca?

⁷ Jipa huatacunamanga Abel, Enoc, shinallata huaquin gentecunallami Jehovata tucui shunguhuan cazungapaj munarca. Cutin ashtaca gentecunaca Jehová Dios paicunapa Rey, paicunapa Taita cachunga na munarcachu. Noepa punllacunapicarin, ‘ninan llaquicunahuan jundami’ cai Alpapica causanajurca (Gén. 6:11). Shinaca ¿ñanachu Jehová Diosca shuj Jatun Mandaj Rey cuenda mandajurca? Bibliapi ricupashun.

⁸ Bibliapica ninmi, Noepash paipa familiapash salvarichunmi Jehová Diosca shuj jatun arcata rurangui nirca nishpa. Ashtahuangarin, chai arcata ali rurachunga ima medidacunahuan ruranatapashmi Jehová Diosca villarca. Gentecunata juyaimandaca ‘alita rurashpa causaj’ Noetami Jehová Diosca cacharca, Taita Diosca nali gentecunata tucuchigrinmi nishpa villachun (2 Ped. 2:5). Arripintirichi nishpa villajpipash gentecunaca na cazurcachu. Cazunapaj randica gentecunaca ashtahuan millayashpa, huaglishpami catirca. Noepash paipa familiapash ashtaca huatacunatami chai nali gentecunapa chaupipi causarca. Jehová Diosca Taita cuenda cuidariajuimandami Noetapash paipa familiatapash salvashpa ninanda bendiciarca. Jatun manllanai tamiahuan nali gentecunatapash, na cazuj angelcunatapash tucuchishpami Jehová Diosca Jatun Mandaj Rey cashcata ricuchirca (Gén. 7:​17-24).

 9. Jatun manllanai tamia tiashca jipaca ¿imatata gentecunaca ruranalla carca?

⁹ Arcamanda llujshishpaca Noepash paipa familiapash shuj frescolla airegutami respirarca. Alpapash limpiomi carca. Jehová Dios cuidashcamandaca ninanda agradicishpami Noeca shuj altarta rurashpa animalgucunata Jehovaman sacrificarca. Chaita ricushpami Jehová Diosca Noetapash paipa familiatapash bendiciashpa nirca: “Ninanda mirashpa, ashtacacuna tucushpa, cai pachapi jundaichi” nishpa (Gén. 8:20–9:1). Shinami gentecunaca cai Alpapi mirashpa, shujlla shina tandanajushpa Jehová Diostaca adorai ushana carca.

10. a) Jatun manllanai tamia tiashca jipaca ¿maipi, imashinata gentecunaca Taita Diosta cutin na cazungapaj munarca? b) Paipa munai pactarichunga ¿imatata Jehová Diosca rurarca?

¹⁰ Jatun manllanai tamiahuan nali gentecunata tucuchishca jipapash gentecunaca juchayucunarami carca. Diablopash paita catij ayacunapash gentecunata controlangapaj munanajurcarami. Chaimandami huaquin huatacuna jipaca Noepa nieto Nemrodca Diospa jatun contra tucurca, Taita Dios mandachunga nimamanda na munarcachu. Nemrodca Babel llactata, shuj jatun llactacunatapash shayachishpami ‘Sinar llactapi mandai callarirca’ (Gén. 10:​8-12). Muyundi Alpapi na causachun saquishpa shujlla pushtupi gentecunata charingapaj munajpica ¿imatata Jehová Diosca rurarca? Jehová Diosca tucui gentecunapa parlotami cambiarca. Shinami gentecunaca paicunapura na intindirishpa cai Alpapica ‘caiman chaiman’ separarirca. Caiman chaiman separarishpaca cada unomi paicunapa religionda, imashina mandana yuyaicunatapash apashpa rirca (Gén. 11:​1-9).

11. Abrahanda tucui shunguhuan juyaimandaca ¿imatata Jehová Diosca rurarca?

¹¹ Jatun manllanai tamia tiashca jipaca, ashtaca gentecunami yanga dioscunata adoranajurca. Shinapash huaquingunaca Jehovatami adoranajurca. Abrahanba ejemplota ricupashun. Paica Ur llactapi ali causaita saquishpami carpa huasicunapi caiman chaiman rishpa ashtaca huatacunata causarca (Gén. 11:31; Heb. 11:​8, 9). Jatun shinlli llactacunatami Abrahanga yalin carca. Shinapash Taita cuenda caimandami Jehová Diosca Abrahandapash paipa familiatapash cuidariajurca. Chaimandami salmistaca nirca: ‘Paicunata llaquichinajuchunga na saquircachu. Paicunamandami jatun mandajcunatapash llaquichirca’ nishpa (Sal. 105:​13, 14). Paipa amigo Abrahanda tucui shunguhuan juyaimandami Jehová Diosca nirca: “Canmandami, jatun mandajcunapash llujshinga” nishpa (Gén. 17:6; Sant. 2:23).

12. a) Jehová Diosca ¿imashinata faraondapash yali ashtahuan Jatun Mandaj Dios cashcata ricuchirca? b) Jehová Diosca ¿imashinata israelitacunatapash ayudarca?

¹² Jehová Diosca Abrahanba churi Isaacman, Abrahanba nieto Jacobmanbashmi nirca, cangunamandami mandajcuna llujshinga nishpa (Gén. 26:​3-5; 35:11). Shinapash reycuna ricurina tiempo chayamungacamanga Jacobpa familiacunaca Egipto llactapimi esclavocuna carca. Shinapash Jehová Diosca paipa nishcata pactachircami. Ashtahuangarin Jatun Mandaj cashpa catishcata ricuchishpami Jehová Diosca pai agllashca tiempopica nali faraonmandapash ashtahuan yali poderta charishcata ricuchishpa israelitacunataca salvarca. Israelitacunaca Jehová Dios salvanapimi confiarca. Chaimandami Jehová Diosca Mar Rojomanda israelitacunataca salvarca. Shinallata Taita cuenda cuidariajuimandami Jehová Diosca paipa poderta ricuchishpa israelitacunataca salvarca (Éxodo 14:​13, 14, liingui).

13, 14. a) ¿Imatata israelitacunaca candarca? b) Jehová Diosca ¿imatata rey Davidmanga nirca?

¹³ Egipciocunamanda salvajpica, Jehová Diosta alabashpami israelitacunaca Éxodo capítulo 15​pi shimicunata candarca. Éxodo 15:18​pica, ‘Mandaj Diosmi causaita causaicaman tucui causaipi mandajungalla’ ninmi. Shinami Jehová Diosca israelitacunapa Rey tucurca (Deut. 33:5). Shinapash israelitacunaca Jehová Dios jahua cielomanda mandachunga na munarcachu. Chaimandami casi 400 huatacuna jipaca, cai Alpapi reytami munanchi nirca. Paicunaca yanga diosta catij llactacuna cuenda cangapami munarca (1 Sam. 8:5). Israelitacunata gentecuna mandachun saquishpapash Jehová Diosca israelitacunapa Jatun Mandaj Reymi cashpa catirca. ¿Imashinata yachanchi? Chaipaca rey Davidpa punllacunata yaripashun.

¹⁴ Rey Davidca Taita Diospa arca del pacto nishcatami Jerusalenman apajurca. Chaipimi levitacunaca Jehová Diosta alabashpa, cushijushpa 1 Crónicas 16:31 shimicunata cashna nishpa candanajurca: ‘Mandaj Diosmi mandajun’ nishpa tucui llactacunapi villaichi’ nishpa. Jehová Diosmi mandajun nishpaca pitapash agllashpa paipa munaita rurachun churashcatami nijun. Shinapash ¿imamandata Jehová Dios mandashpa catijushcataca aliguta intindina canchi? David nara huañujpica Jehová Diosca nircami: “Cambaj churicunamanda shujtami, can mandajushca llactapica shinllitapacha churasha” nishpa (2 Sam. 7:12, 13). Jehová Dios nishca shinaca, huaranga yali huatacuna jipami Davidpa churicunamanda shuj churi mandai callarirca. Chai churica ¿pita carca? ¿Ima horata rey tucurca?

15, 16. a) Jesusca ¿ima horata Rey tucungapaj espíritu santota chasquirca? b) Cai Alpapi cashpaca ¿ima arreglocunatata shamuj punllacunapi mandangapaca Jesusca rurarca?

¹⁵ Huata 29pimi Bautizaj Juanga “jahua pachamanda shamuj mandanaca, ñami pactamushca” nishpa villachi callarirca (Mat. 3:2). Chai huatapi Jesusta Juan bautizajpimi Jehová Diosca paipa espíritu santota cushpa ricuchirca, Jesús Mesías cashcata, Diospa Reinopi Jesús mandanatapash. Ashtahuangarin Taita cuenda juyaimandami nirca: “Caimi ñuca juyashca Churigu. Paimandami ninanda cushijuni” nishpa (Mat. 3:17).

¹⁶ Jesuspash paipa Taitataca ninandami alicachirca ( Juan 17:4). Chaimandami Diospa Reinomanda villachirca (Luc. 4:43). Shinallata Diospa Reino ucha chayamuchun mañanguichi nishpami paipa catijcunamanga yachachirca (Mat. 6:10). Ashtahuangarin Diospa Reinopi Rey canata ali yachashpami nirca: “Taita Diosca ñamari cangunapa chaupipi mandajun” nishpa (Luc. 17:​21, Mushuj Testamento Quichua Imbabura). Shinallata huañungapaj ashalla horascuna faltajujpica Jesusca cangunapash ñucahuan mandanguichi nishpami paipa apostolcunahuanga shuj pactota rurarca (Lucas 22:​28⁠-30, liingui).

17. a) Jesusca ¿imashinata huata 33pi mandangapaj autoridadta chasquishcata ricuchirca? b) ¿Imamandata Jesusca mandangapaj shuyanara can?

¹⁷ Jesusca ¿ima horata Diospa Reinopi Rey cana carca? Apostolcunahuan pactota rurashcandica na Rey tucurcachu. ¿Imamandata shina ninchi? Apostolcunahuan pactota rurashca cayandi chishi Jesús huañujpimi apostolcunaca caiman chaiman rirca (Juan 16:32). Shinapash Jehová Diosca quimsa punllacuna jipa paipa Churita causachishpami Jehová Dios mandashpa catijushcata ricuchirca. Ashtahuangarin Pentecostés huata 33pimi paita catij congregacionda callarichirca (Col. 1:13). Shinapash na chai punllacunapichu Jesusca mandai callarirca. Jehová Diosca Jesustaca nircami: “Canda fiñajcunata cambaj chaqui ucupi ñuca churangacaman, ñuca ali ladopi tiari” nishpa (Sal. 110:1).

18, 19. a) ¿Imatata rurangapaj munapanchi? b) Shamuj temapica ¿imatata yachajupashun?

¹⁸ Ashtaca ashtaca huatacunatami jahua cielopipash cai Alpapipash Jehová Dios ama mandashpa catichunga trancangapaj munashca. Shinapash Jehová Diosca siempremi mandajushca. Shuj ali Taita cuenda caimandami paita sirvij Noeta, Abrahanda, Davidtaca ninanda juyashpa ricuriajurca, cuidariajurca. Jehová Dios ñucanchipa Rey cashcata yachashpaca ¿nachu paita cazushpa, paipaman quimirina cashcanchi?

¹⁹ Cunan punllacunapica ¿imashinata Jehová Diosca ñucanchi Rey tucushca? ¿Imashinata paipa Reinopi sirvijcuna tucuita ushanchi? ¿Imashinata Jehovapa jucha illaj huahuacuna tucushpa Diospa rurashca angelcunahuan shujlla shina tandanajushpa sirvishun? Canba Reino ucha chayamuchun nishpaca ¿imatata mañanajunchi? Cai tapuicunataca shamuj temapimi yachajupashun.