Taita Diospa valishca regaloca ¿imamandata valishca can?

Pipash autoridadta charij o pitapash alicachishca gentecuna shuj regalota carajpica ninandami alicachinchiman. Shinallata ñucanchi familia o shuj ali amigo carajpica na yapa valishca cajpipash chai regalotaca alicachishpami charinchiman. Callari temapica Russell shuj regalota carajpi, Jordan chai regalota ninanda alicachishpa charishcatami parlarcanchi. Shinapash chaica, Taita Dios paipa Churipa causaita cushpa gentecunata salvashcahuanga ¿imatata ricunata charin?

Punda yuyai, Bibliaca ninmi: ‘Causaita causagrinata ñucanchi japigrichunmi Taita Diosca, paipaj shujlla Churita cai pachaman cachamushca’ nishpa (1 Juan 4:9). Taita Diosmanda yalica pipash ashtahuan autoridadtaca na charinllu. Chaimandami paipa Churita Alpaman cachamushpaca valishca regalota carashcata ricuchirca. Salmo librota escribijca nircami: “Gentecuna yachachun, canba shuti Jehová cajta, canllami tucui Alpamanda Ashtahuan Jatun Dios cangui” nishpa (Salmo 83:18, Traducción del Nuevo Mundo Biblia). Taita Dios shina carashcataca ni pipash na carai ushanllu.

Cati yuyai, Diosca ‘ñucanchi Taitami can’ (Isaías 63:16). ¿Imamandata shina ninchi? Diosmi ñucanchimanga causaita curca. Imashinami shuj taita paipa huahuacunamanda preocuparishpa cuidan. Shinallatami Diosca ñucanchicunatapash cuidan. Punda tiempopi Efraín nishca llactamanda parlashpaca Diosca nircami: “Efraín llactaca, ¿ñucapaca nachu juyailla huahuagushna capan? Paitaca llaquishapachami” nishpa (Jeremías 31:20). Cunanbipash paita sirvijcunataca Taita Diosca shinallatami juyan. Tucui ñucanchicunata Ruraj, tucui ushaita charij, juyaj Taita, ali Amigomi can. Chaimandami pai imata carashcapash valishca regalo can.

Huaquin regalocunaca juyaimanda carashca caimandami valishca ricurin. Tucui shunguhuan carajcunaca imatapash tigrachichun yashpaca na caranllu.

Taita Diosca ñucanchita juyaimandami paipa Churipa causaita curca. Bibliapica ninmi: “Causaita causagrinata ñucanchi japigrichunmi Taita Diosca, paipaj shujlla Churita cai pachaman cachamushpa, ñucanchita juyajushcata ricuchirca” nishpa (1 Juan 4:9). Taita Diosca shina rurana obligaciondaca na charircachu. Shinapash ‘Taita Diosca, paipaj shujlla Churita cai pachaman cachamushpami, ñucanchita juyajushcata [o llaquishpa jahuan jahuan carashcata, NM] ricuchirca’ (Romanos 3:24).

Taita Dios paipa Churita ñucanchicunamanda cushpaca ¿imashinata ‘ñucanchicunata juyashcata [o llaquishpa jahuan jahuan carashcata, NM] ricuchin’? Bibliapica ninmi: “Taita Diosca, paipaj juyaitami ñucanchiman ricuchimujun. Ñucanchi juchayu cajpipash, Cristomi ñucanchimanda huañurca” nishpa (Romanos 5:8). Gentecuna juchayu caimanda imatapash na rurai ushajpipash, juyaimandami Taita Diosca ayudarca. Shina ayudashcamandaca imashina tigrachitapash na ushashunllu. Chai regalota carashcami tucui tiempocunamanda yali ashtahuan valishca regalo can.

Huaquin regalocunaca carangapaj ninanda esforzarishcamandami valishca ricurin. Pipash ninanda alicachishpa imatapash charishcata ñucanchiman carajpica, chai regalotaca ninandami alicachinchi.

Diosca ‘paipa shujlla Churitami caramurca’ (Juan 3:16). Taita Diosca tucuita yali juyashca Churitami ñucanchimanda curca. Ashtaca ashtaca millón huatacunata Taita Dios tucuita rurajujpica, Jesusmi ayudajurca. Chaimandami paitaca ninanda juyarca (Proverbios 8:30). Jesusca, Diospa juyashca churimi “pipaj ñavipipash na ricurij Taita Dios imashna cajtami ricuchijun” (Colosenses 1:13-15). Dioshuan, Jesushuan randimanda juyaita charishcataca ni pipash na igualanllu.

Shinapash, Jehová Diosca paipa Churita ñucanchimanda huañuchunmi cachamurca (Romanos 8:32). Diosca paipa ashtahuan juyashca Churipa causaita ñucanchicunaman cushpami, paipa ashtahuan valishca regalota cararca.

Imatapash minishtijujpipacha carajpica ninandami alicachinchi. Yuyapashun, quiquinba causai peligropi cajpi, doctorhuan shuj tratamientota catingapaj na culquita charishcanguiman. Chai horaspacha pipash chai tratamientota ñuca pagasha nijpica, ¿nacha ninanda agradicinguiman?

‘Imashinami Adanba miraicunaca tucuicuna huañunajun. Chashnallatami Cristomandaca tucuicuna causachi tucunga’ (1 Corintios 15:22). Adanba huahuacuna caimandaca tucuicunami “huañunajunchi”. Chaimi ñucanchicunaca ungüicunamanda, huañuimanda salvaritaca na ushanchi. Taita Dioshuan ali caita, paipa ñavipi ali caitapash na ushanchichu. Juchayu gentecuna caimandaca pitapash “causachitaca” na ushanchichu. Bibliapica ninmi, ni pipash “imahuanllapash shuj huauquita quishpichitaca, napacha ushangachu. Pai quishpiringapajpash Taita Diosman cuitaca na ushangachu” nishpa (Salmo 49:7, 8). Chaimandami ñucanchicuna salvaringapaca uchalla ayudachun minishtinchi. Ñucanchillata imatapash rurashpa salvaritaca na ushanchichu.

Gentecunata ninanda juyaimandami Jehová Diosca shuj “tratamientota” pagashpa cuenda, paipa Churipa causaita cushpa ñucanchicunataca huañuimanda salvashca. Shinapash ¿imashinata gentecunataca salvan? ‘Paipa churi Jesucristopa yahuarca, ñucanchipa juchacunataca tucuillatami maillan’. Shinaca Jesús paipa causaita cushcapi feta charishpallami, juchacunamanda perdonai tucushpa para siempre causaitapash ushashun (1 Juan 1:7; 5:13). Dios paipa Churipa causaita cushpa salvashcamandami, ñucanchi huañushca familiacunapash beneficiaringa. Bibliapica ninmi: ‘Shujlla runamandami huañuica callarirca. Shinallata shujlla runamandami [Jesusmandami], huañushcacuna causarinapash callarirca’ nishpa (1 Corintios 15:21).a

Jesús ñucanchimanda huañushpaca tucui regalocunamanda ashtahuan valishca regalotami carashca. Taita Diosmi ñucanchicunata ninanda juyaimanda shina rurashca. Jehová Dios shina ñucanchita juyashcataca ni pipash na ricuchishcachu. Juchamanda, huañuimanda salvangapaj minishtirishcapacha regalomi carca. Ima regalopash chaicunamanda salvaitaca na ushanllu. Imashinami ricushcanchi, Taita Dios paipa Churipa causaita cushpa salvashca regaloca ashtaca valishcami can.