Jehová Diosmi “shinlli cachun” ayudanga

 1. Jehová Diosta punda sirvijcunaca ¿imamandata shinlli, na manllajcuna carca?

BIBLIAPI Jehová Diosta ashtaca sirvijcunamanda parlashpaca shinlli, na manllajcuna cashcatami nin. Shinapash paicunaca na siemprechu shina sintirirca. Por ejemplo, rey Davidca huaquinbica na manllaj, shinlli shinlli shuj ‘jatun urcushnami’ sintirirca. Cutin huaquinbica fuerza illa, ninan manllaihuanmi sintirirca (Sal. 30:7). Shinallata Sansón runaguca Jehová Dios paipa espíritu santota cujpillami ashtaca fuerzata charirca. Shinapash Jehová Dios chai poderta na cujpica ‘imata ruraitapash na ushashpa, caishuj runacunashnallata tucun cashcatami’ yacharca (Juec. 14:​5, 6; 16:17). Shinaca Jehová Dios paicunata ayudashcamandami paicunaca shinlli, na manllajcuna carca.

 2. Apóstol Pabloca ¿imamandata “fuerza illashna cashpami ashtahuan shinlli cani” nirca? (2 Corintios 12:​9, 10).

² Apóstol Pablopash Jehová Diospa ayudata minishtishcataca alimi yacharca (2 Corintios 12:​9, 10​ta liipangui). Ñucanchishnallatami apóstol Pabloca huaquinbica irquiyan carca (Gál. 4:​13, 14). Ashtahuanbash alita rurangapapashmi ninanda esforzarina carca (Rom. 7:​18, 19). Shinallata huaquinbica llaquilla o paipa causaihuan ima pasanata na yachaimanda manllaihuanmi sintirin carca (2 Cor. 1:​8, 9). Shinapash paica: “Fuerza illashna cashpami ashtahuan shinlli cani” nirca. ¿Imamandata shina nirca? Jehová Diosmi paimanga minishtirishca fuerzata cararca. Chaimandami na manllaj, shinlli caita usharca.

 3. Cai temapica ¿imatata ricugripanchi?

³ Jehová Diosca ñucanchicunamanbash fuerzata carasha nishpami prometishca (1 Ped. 5:10). Shinapash Jehová Dios ñucanchita ayudachunga ñucanchicunapashmi esforzarina capanchi. Cunanga shuj carropi pensaripashunchi. Shuj carro rita ushachun shinlli motorta minishtinshnallatami ñucanchicunapash Jehová Dios fuerzata cushpa ayudachun minishtipanchi. Shinallata chai carrota manejaj persona aceleradorta na sarujpica motorta charishpapash chai carroca na rita ushangachu. Shina cuendallatami ñucanchicunapash Jehovapa ayudata charishpapash na esforzarishpaca na ñaupaman catita ushashunllu. Shinaca shinlli, na manllajcuna cachunga Jehová Diosca ¿ima ayudacunatallata carashca? Y chai ayudacunata ali aprovechangapaca ¿imatata rurana capanchi? Chaita yachangapaca profeta Jonasta, Mariata y apóstol Pablota Jehová Dios imashina shinllichishcata ricupashunchi. Shinallata cunan punllacunapipash Jehová Dios paita sirvijcunata imashina shinllichishcata ricugripanchi.

 4. Jehová Dios ñucanchita shinllichichunga ¿imatata rurana capanchi?

⁴ Jehová Dios ñucanchita shinllichichunga paitami mañana capanchi. Jehová Diosca “gentecuna na chari ushashca ushaita” carashpami ñucanchi mañaicunataca contestan (2 Cor. 4:7). Shinallata Bibliata liina y liishcapipashmi pensarina capanchi (Sal. 86:​11, TNM). Bibliapi Jehovapa nishcacuna ‘ashtaca poderta charimandami’ ñucanchitaca shinllichin (Heb. 4:12). Shinaca Jehová Diosta mañashpa, Bibliata liishpami aguantangapaj; paita cushilla sirvishpa catingapaj o shuj difícil responsabilidadta pactachingapaca fuerzata chasquipashun. Cunanga profeta Jonasta Jehová Dios imashina shinllichishcata ricupashun.

 5. Jonasca ¿imamandata ayudata minishtirca?

⁵ Jonasca ama manllangapaca ayudatami minishtirca. Jehová Diosca Jonastaca shuj llactaman richunmi mandarca. Shinapash chai llactaman rinata manllaimandami shuj ladomanra ringapaj barcota japirca. Jonás shina rurashcamandami shinllita huairashpa mar yacu ninanda jatarijpica Jonás y chai barcopi caj shuj gentecunapash cazi huañurca. Barcomanda Jonasta shitajpica shuj jatun jatun pescadomi paitaca langarca. Chai pescadopa vijsa ucupi cana manllanai cashcamandaca Jonasca ¿imashinata sintirishcanga? ¿Chaipi huañugrinata, Jehová Dios paita saquishcatachu pensashcanga? Imashina cashca cajpipash paica llaquilla, ninan manllaihuanmi sintirishcanga.

 6. Pescadopa vijsa ucupi cashpa shinllichi tucungapaca Jonasca ¿imatata rurarca? (Jonás 2:​1, 2, 7).

⁶ Pescadopa vijsa ucupi cashpa shinllichi tucungapaca Jonasca ¿imatata rurarca? Jehová Diostami mañarca (Jonás 2:​1, 2, 7​ta liipangui). Jonasca Jehová Diostami na cazushca carca. Shinapash arrepintirishca caimandami Jehová Dios paipa mañashcata uyanataca seguro carca. Shinallata Jonasca Diospa Shimipi imata liishcapimi pensarirca. ¿Imashinata chaita yachapanchi? Porque Jonás capítulo 2​pica Jonás runagu Salmos libropi nishcacunata utilizashcatami ricui ushapanchi (Jonás 2:​2, 5​ta, Salmo 69:1 y 86:7​huan chimbapurashpa ricupangui). Shinaca profeta Jonás Salmos librota ali ali rijsishcatami cuenta japipanchi. Chai textocunapi imata nishcapi ali ali pensarishcamandami chai llaquita charishpaca Jehová Dios paita ayudanataca tucui shunguhuan confiarca. Jonás runagu pescadomanda ña llujshishca jipaca Jehová Diospa mandashcata cazushpa pactachingapaca listomi carca (Jon. 2:10–3:4).

7, 8. Llaquicunata charijuj horaspi shuj huauquigu shinlli cachunga ¿imata ayudarca?

⁷ Llaquicunahuan cajpica Jonaspa ejemplomi ayudaita ushan. Taiwán llactamanda Zhimingb huauquiguhuan ima pasashcata ricupashun. Paica irquillagumi can. Shinallata Jehová Diosta sirvijushcamandami paipa familiaca ninanda llaquichin. Jehová Dios paita shinllichichunga ¿imatata ruran? Chaipaca Jehovata mañanata y Bibliata estudianatami yachan. Huauquiguca: “Huaquinbica problemacuna ricurijpica ashta preocupado, llaquilla caimandami estudio personaltaca na fácil rurai ushani” ninmi. Shinapash huauquiguca esforzarishpami catishca. Chaimandami paica: “Callaripica Jehová Diostami mañani. Chai jipaca audifonocunata churajushpami canticocunata uyai callarini. Huaquinbica tranquilo sintiringacamanmi alilla candani. Chai jipami Bibliata estudiai callarini” ninmi.

⁸ Zhiming huauquigutaca paipa estudio personalpi yachajushcacunami minishtirijuj horaspipacha fuerzata cushpa ayudashca. Shuj viajeca shuj peligroso operaciondami rurana tucurca. Operarishca jipagullami shuj enfermeraca: “Glóbulos rojostaca ashagutallami charingui. Yahuarta churanami minishtiringa” nircami. Shinapash huauquiguca nara operarishpallatami paishnallata operacionda charishca shuj panigupa experienciata liishcarca. Paniguca cai huauquigumandaca ashtahuan ashalagutami glóbulos rojostaca charishcarca. Panigu yahuarta na churarishca cashpapash alimi ali tucurca. Chai experienciata liinami huauquigutaca Jehová Diosta tucuipi cazuchun ayudarca.

 9. Llaquicunata charishpa, fuerza illanshna sintirishpaca ¿imatata ruraita ushapangui? (Dibujocunata ricupangui).

⁹ Llaquicunata charishpa, llaquilla o ninan preocupado cashpaca ¿Jehová Diosta mañana dificilchu capashca? Na cashpaca ¿Bibliata estudiangapaj fuerzata na charinshnachu sintiripashcangui? Quiquin imashina sintirijushcata Jehová ali yachashcatami yarina capangui. Chaimandami shuj uchilla oracionda rurajpipash Jehová Dios quiquin imata minishtishcata caranataca seguro caita ushapangui (Efes. 3:20). Quiquinba saludhuan nali cashpa o emocionalmente nali caimanda Bibliata liina y estudiana difícil cajpica Bibliapa y publicaciongunapa audiocunata uyanami ali canman. Shinallata jw.org paginapi canciongunata y videocunata ricunami ayudaita ushan. Jehovata mañana y pai imashina contestajta yachangapaj pai carashca informaciondami mascana capangui. Shina rurashpaca, “Jehová, fuerzata carahuai” nijunshnami can.

10. Huauquipanicunaca ¿imashinata shinllichishpa ayudaita ushan?

¹⁰ Jehová Diosca huauquipanicunahuanmi ñucanchitaca shinllichishpa ayudan. Imapash problemacunahuan, llaquicunahuan cajpi o jatun responsabilidadcunata na fácil pactachi ushajujpica huauquipanicunami ñucanchitaca ‘ninanda cushichita’ ushan (Col. 4:​10, 11). ‘Llaqui punllacunapimi’ ñucanchi amigocunataca ashtahuan minishtipanchi (Prov. 17:17). Fuerza illashna sintirijujpica huauquipanicunami ñucanchimanda imagutapash rurashpa emocionalmente o espiritualmentepash ayudaita ushan. Cunanga María huarmiguta shujcuna imashina shinllichishpa ayudashcata ricupashunchi.

11. Mariaca ¿imapata ayudata minishtirca?

¹¹ Mariaca Jehovapa voluntadta pactachingapaca Jehovapa ayudatami minishtirca. Ángel Gabriel “shuj huahuagutami charigringui” nishpa Mariaman villajpica, “chai responsabilidadtaca ¿pactachi ushashacha?” yashpami preocupada cashcanga. Mariaca na cazarashca cashpatami vijsayu quidagrijurca. Huahuaguta viñachina experienciata na charishpapashmi Mesías tucuna huahuaguta viñachina tucugrijurca. Pihuanbash na pacta igual puñushca cashpapashmi shuj huahuaguta charigrijurca. Chaitami José runagumanga villana carca (Luc. 1:​26-33).

12. Lucas 1:​39-45​pi nishcashnaca María huarmiguca paipa responsabilidadta pactachingapaca ¿imashinata fuerzata chasquirca?

¹² María huarmiguca paipa responsabilidadta pactachi ushangapaca ¿imatata rurarca? Shujcunapa ayudatami mascarca. Por ejemplo, Jehová Dios imata rurachun mandajushcata ashtahuan yachangapami ángel Gabrieltaca Mariaca tapurca (Luc. 1:34). Jipamanga caru caruta rishpami Judá llactapi paipa pariente Elisabetta visitagrirca. Elisabetta visitanaca paitaca ninandami animarca. Elisabetca María huarmiguta felicitashpa, Taita Diospa espíritu yarichijpi chai huahuagumanda shuj cushichij profeciatapashmi nirca (Lucas 1:​39-45​ta liipangui). Chashna felicitajpica María huarmiguca: Jehová Diosca “paipa poderhuanmi jatun ruraicunata rurashca” nircami (Luc. 1:​46-51). Jehová Diosca ángel Gabrielhuan y Elisabethuanmi María huarmigutaca shinllichishpa ayudarca.

13. Panigu Dasurí huauquipanicunapa ayudata mañajpica ¿imata pasarca?

¹³ María huarmigutashnallatami huauquipanicunaca quiquindapash shinllichishpa ayudaita ushan. Bolivia llactamanda Dasurí panigupa ejemplota ricupashun. Paipa taita na jambirinalla unguita charishcatami doctorcunaca villarca. Chaimandami taitataca hospitalizana tucurca. Panigu Dasurica paipa taitataca usharishcacamanga ali cuidangapami munarca (1 Tim. 5:4). Paipa taitata cuidanaca na siemprechu fácil carca. Chaimandami shujcunapa ayudata minishtijurca. Paniguca ninmi: “Ashtaca viajecunatami ñana ushanshna sintirircani”. Shinapash callaripica pitapash ayudataca na mañarcachu. Imamanda chaita rurashcatami paniguca nin. “Ñucaca turiñañacunata molestangapaj, paicunapa shuj cargashna cangapaca na munarcanichu. ‘Jehová Diosmi ñucataca ayudahuanga’ nishpami pensarin carcani. Shinapash turiñañacunapa ayudata na mascashpa paicunamanda caruyashpaca ñucapa problemacunahuan ñucalla luchajushcatami cuenta japircani” ninmi (Prov. 18:​1, TNM). Chaita cuenta japishpami panigu Dasurica paipa situacionmanda huaquin amigocunaman villangapaj escribirca. Paniguca ninbashmi: “Ñuca juyashca turiñañagucuna ñucata ninanda shinllichishpa ayudashcamandaca ninandami agradicipani. Paicunaca hospitalman micunaguta apamushpa, Bibliamanda textocunata liishpami ñucataca ayudahuan carian. Turiñañacunapa ayudata charishcamandaca ninandami cushijupani. Jehovapa organizacionbica shuj jatun familiatami charipanchi. Paicunaca llaquicunahuan, llaquilla cajpi imaguta minishtijujpi ayudangapaca chaipimi canga” ninmi.

14. ¿Imamandata ancianocunapa ayudataca chasquina capanchi?

¹⁴ Jehová Diosca anciano huauquicunatapashmi ñucanchita shinllichishpa ayudangapaca utilizan. Paicunaca ñucanchita shinllichishpa consolachingapaj Jehová Diosmanda cushca shuj regalomi can (Is. 32:1; 2, TNM). Shinaca imamanda preocupado cashpapash paicunahuanmi parlaita ushapangui. Y paicunapa ayudatapash cushijushpa chasquipangui. Jehová Diosca ñucanchita shinllichingapaca paicunatami utilizan.

15. Tucui cristianocunaca ¿ima esperanzatata charipanchi?

¹⁵ Bibliapi Jehová Dios carasha nishca promesacunaca shinlli tucushpa catichunmi ayudan (Rom. 4:​3, 18-20). Tucui cristianocunallatami cielopi o cai alpapi para siempre causana esperanzata charipanchi. Chai esperanzata charinami ñucanchicuna predicashpa catichun, llaquicunata aguantachun, congregacionbi responsabilidadcunata pactachichunbash ayudan (1 Tes. 1:3). Cunanga chai esperanzallata apóstol Pablota imashina shinllichishcata ricupashun.

16. Apóstol Pabloca ¿imamandata ayudata minishtirca?

¹⁶ Apóstol Pabloca ñaupaman catingapaca shinllichishpa ayudachunmi minishtirca. Apóstol Pablo Corinto llactamanda huauquicunaman escribishca cartacunapica: “Faquirinalla vasogushnami cani” nircami. Pabloca catiriashpa llaquichi tucushcata, imatapash na rurai ushanshna sintirishcata, imatapash ruranata na atinashcashna sintirishcatami villarca. Y ashtaca viajecunatami paipa causaipash peligropi carca (2 Cor. 4:​8-10). Apóstol Pabloca predicangapaj quimsa viajecunata viajashca jipami caicunataca escribirca. Chai cartata escribijushca horasca ima llaquicunata ashtahuan charinataca na yachashcangachu. Chai viajajushca tiempopillatami ashtaca gentecunaca apóstol Pablotaca macarca. Shinallata barcopi rijujpipash barco cazi pambarimandami cazi huañurca. Shinallata carcelmanbashmi churai tucurca.

17. 2 Corintios 4:​16-18​pi nishcashnaca apóstol Pablotaca llaquicunata aguantashpa catichunga ¿imata ayudarca?

¹⁷ Apóstol Pablotaca aguantashpa ñaupaman catichunga ¿imata ayudarca? Apóstol Pablo aguantashpa ñaupaman catichunga Jehová Dios carasha nishca promesacunapi pensarinami ayudarca (2 Corintios 4:​16-18​ta liipangui). Pabloca Corinto llactamanda huauquipanicunamanga: “Ñucanchi cuerpo gashtarinshna rucuyashpa catijpipash” na desanimarishpami shinlli tucushpa ñaupaman catinchi nircami. Paica shamuj punllapi shuj ali causaiguta charinapimi pensarishpa catirca. Apóstol Pablopaca jahua cieloman rina esperanzata charinaca tucuimanda yali valishcami carca. Chai bendicionda chasquingacaman ima pasajpipash aguantashpa catingapaj dispuestomi carca. Pablotaca Jehová Dios carasha nishca promesacunapi pensarinami paipa ‘yuyaita cada punlla ashtahuan mushujyachishpa catichun’ ayudarca.

18. Tíjomir huauquiguta y paipa familiataca Jehová Dios carasha nishca promesaca ¿imashinata ayudashca?

¹⁸ Bulgaria llactamanda Tíjomir shuti huauquigutaca Jehová Dios carasha nishca promesacunapi pensarinami shinlli tucushpa ñaupaman catichun ayudarca. Huaquin huatacuna huashamanga paipa huauqui menormi shuj accidente de transitopi huañurca. Shina pasashcamandaca Tíjomir huauquiguca ninan llaqui llaquimi quidarca. Cashna llaquihuan cajpi paita y paipa familiataca ñaupaman catichunga ¿imata ayudarca? Paicunataca huañushcacuna causarina esperanzata charinami ninanda ayudashca. Huauquiguca: “Ñuca familiacunahuanga ñuca huauquigu causarijpi maipi chasquinata, ima micunaguta paiman yanunata, shuj fiestata rurashpa picunatalla invitanata, tucurimui punllacunapi pasashca cosascunamanda maijan cosascunatalla villanatami pensarircanchi” ninmi. Jehová Dios huañushcacunata causachisha nishca promesapi confianami paita y paipa familiatapash aguantashpa catichun ayudashca. Shinallata Jehová Dios paipa huauquiguta causachingacaman shuyashpa catichunbashmi ayudashca.

19. Jehová Dios cushca esperanzapi ashtahuan confiangapaca ¿imatata rurai ushapanchi? (Fotota ricupangui).

¹⁹ Jehová Dios carasha nishca promesapi tucui shunguhuan confiangapaca ¿imatata rurana capanchi? Cai alpapi para siempre causana esperanzata charishpaca Bibliapi paraíso alpagumanda imata nijujta liishpa ña chaipi cashcashna pensaripangui (Is. 25:8; 32:​16-18). Quiquinga ¿paraíso alpagupi cashcashnachu pensaripangui? Shina pensarijushpaca ¿pitata ricupangui? ¿Imashinashi sintiripangui? Ñucanchi publicaciongunapi paraisomanda llujshishca dibujocuna, fotocunami paraíso alpagupi causai imashinapacha canapi pensarichun ayudan. Shinallata Paraisoca ñallami chayamunga, Muy cerca o Paraisopi causanatami cushijushpa shuyajuni nishca cántico videocunata ricunapashmi ayudanga. Paraíso alpagupi causai imashina canata pensarina costumbreta charijpica ‘ñucanchi charishca llaquicunaca ratopalla y fangallami’ ricuringa (2 Cor. 4:17). Jehová Dios carasha nishca promesacunami shinlli tucushpa catichun ayudanga.

20. Ñana ushanshna sintirijuj tiempocunapica ¿imashinata shinlli tucushpa ñaupaman catita ushapanchi?

²⁰ Jehová Diosmandami ñana ushanshna sintirijun tiempocunapica shinlli tucushpa ñaupaman catita ushapanchi (Sal. 108:​13,TNM). Ñucanchicuna shinlli tucushpa ñaupaman catichunga Jehová Diosca ñami ayudacunata cushca. Chaimandami shuj responsabilidadta pactachina, llaquicunata aguantana o Jehová Diosta cushijushpa sirvina difícil ricurijujpica tucui shunguhuan Jehová Diosta mañashpa, Bibliata estudiashpa pai ayudachun saquipangui. Shinallata huauquipanicunapa ayudata chasquishpa Jehová Diospa promesacunapi confiashpa catingapaj esforzaripangui. Shina rurajpimi Jehová Diosca ‘paipa ninan poderhuan shinllichi tucushpa ñaupaman catichun, cushijushpa, pacienciahuan tucuita aguantai ushachun’ ayudanga (Col. 1:11).