Jehová Diosta ashtahuan rijsishpa catipashunchi

1. Jehová Dios tucuita yachashcata, alipacha cosascunata rurashcata yachashpaca ¿imashinata sintiripanchi?

JEHOVÁ DIOSCA tucuitami yachan. Paica tucuicunamanda yalimi ali yachaita charin. Shinallata ashtaca alipacha cosascunatami rurashca. Chaimi Jehová Dios imashinapacha cashcapi, imacunatalla rurashcapi pensarishpaca manllarishca quidapanchi. Apóstol Pabloshnami talvez sintiripanchi. Paica: “Taita Diospa bendiciongunapash, paipa ali yachaipash, pai imata yachashcapash sumajpachami can. Pai imashina juzgajtaca pipash na cabalta intindi ushanllu. Pai imata rurajtaca na tucuita ali yachai ushanchichu” nircami (Rom. 11:​33, 34).

2. Jehová Diosta rijsi ushashcataca ¿imashinata yachapanchi?

² Jehová Diosmandaca nunca na tucuita yachajui ushapashunllu. Shinapash paimandaca ashtaca cosascunatami yachajuita ushapanchi. ¿Imashinata chaitaca yachapanchi? Por ejemplo, rey Davidca paipa churi Salomonmanga cashnami nirca: “Cambaj taitapaj Taita Diostaca, pactarallapash cunganguiman. Paitaca, ali shunguhuan, tucui munaihuan servishpa causangui […]. Can paita mascashpaca, taringuimi” nircami (1 Crón. 28:9). Ashtaca tiempo jipaca apóstol Juanbash huauquipanicunamanga “ciertopacha Taita Diosta” paicuna rijsi ushashcatami ricuchirca (1 Juan 5:20). Shinallata Jesuspash paipa ‘Taitata alipacha rijsichunga’ gentecunata ayudanatami nirca (Mat. 11:27).

3. Cai temapica ¿imatata yachajugripanchi?

³ Jehová Diosta sirvijcunaca paimandaca ñami ashtaca cosascunata yachajupashcanchi. Shinapash Jehová Diosmandaca siempremi ashtahuan ashtahuan yachajushpa catipashun (Juan 17:3). Por ejemplo, Jehová Dios cushilla sintirichun o Jehovapi ashtahuan confiangapaj imacunatalla rurai ushashcatami ashtahuan yachajuita ushapanchi. Mashna tiempota Jehovata sirvijushpapash tucuicunallatami cai tapuicunapi pensarina capanchi: Jehová Diosta rijsinaca ¿imatata nisha nin? ¿Imamandata paita ashtahuan rijsingapaj esforzarina capanchi? Y Jehová Diosta ashtahuan rijsingapaca ¿imatata rurana capanchi? Cai temapica cai quimsa tapuicunamandami yachajugripanchi.

JEHOVÁ DIOSTA RIJSINACA ¿IMATATA NISHA NIN?

4. Jehová Diosta rijsinaca ¿imatata nisha nin?

⁴ Jehová Diosta rijsina imapacha cashcata ashtahuan ali intindingapaca Jerusalenman tigragrinajuj judiocunaman Jehová Dios imata nishcatami yarina capanchi. Jehová Diosca: ‘Ñucataca, Mandaj Dios cajta rijsichunmi, cangunamanga ali shunguta cusha’ nircami (Jer. 24:7). Chai judiocunaca Jehová Diosmandaca huaquin cosascunataca yacharcami. Shinapash Jehová Diosta ciertopacha ali rijsingapaca pai imashinapacha cashcata yachajungapami tucui shunguhuan esforzarina carca. Bibliamanda parlaj shuj libropica cashnami nin: “Shuj libropi enamorarishcacunamanda liinahuan y ñucanchipacha enamorarishca canahuanga diferentemi can. Shina cuendallatami Diosmanda huaquin cosascunata yachanahuan y Diosta ciertopacha rijsinahuanga diferente can” ninmi. Shinaca Taita Dios tiajta o paipa shutita yachanallaca na suficientechu can. Paita ali rijsingapaca pai imashinapacha cashcatami yachajuna capanchi.

5. Jehová Diosta ali rijsinamandaca Josiaspa ejemploca ¿imatata yachachin?

⁵ Shinallata Jehová Diosta ali rijsingapaca pai imata gushtajta, imata na gushtajtami yachana capanchi. Rey Josiaspa ejemplota yaripashunchi. Bibliapica: ‘Josías shuti runaca, ña 8 huatata mandajushpapash, chaira huambrarami carca. Shina cashpapash, paipaj ñaupa taita Davidpaj Taita Diostami mascai callarirca’ ninmi (2 Crón. 34:3). Josiasca Taita Diosmanda yachajuitallaca na yachajurcachu. Ashtahuangarin pai yachajushcacunataca paipa causaipimi pactachirca. Chaimandami profeta Jeremiasta utilizashpa Jehová Diosca Josiasmanda parlashpaca cashna nirca: ‘[Paica] aliguta mandashpami, [alita] rurajurca’ nircami. Shinallata: ‘Llaquichi tucunajujcunata, imagupash illajcunatami’ difindirca nircami. Chaita nishca jipaca Jehová Diosca paita rijsij gentecuna Josiashna ali cosascunata rurashpa causana cashcata ricuchingapami: “¿Nachu ñucata rijsishpaca, chashna causana [can]?” nircami (Jer. 22:​15, 16).

6. Jehová Diosta ashtahuan rijsishpaca ¿imata pasanga? (Salmo 9:10).

⁶ (Salmo 9:10​ta liipangui). Jehová Diosta ashtahuan rijsishpaca ashtahuanmi paipi confiapanchi. Apóstol Pablohuanga chaimi pasarca. Pabloca Jehovamandaca ashtaca cosascunatami yachajushcarca. Shinallata Jehová Diosca Pablotaca ashtacatami ayudashcarca. Chaimandami Pabloca Jehová Diospi tucui shunguhuan confiarca. Chaimi Pabloca carcelpi cashpa, pai huañuna punllapa ashalla faltajujpi cashna escribirca: “Na pinganayachinichu. Porque Taita Diospimi crini y paitaca alimi rijsini” nishpa (2 Tim. 1:12). Apóstol Pabloca Jehová Diosta tucui shunguhuan sirvishcamanda Jehová Dios paita na cunganata y jipaman paita causachinataca seguromi carca.

¿IMAMANDATA JEHOVÁ DIOSTA ASHTAHUAN RIJSINGAPAJ ESFORZARINA CAPANCHI?

7. Tiempohuanga ¿imata pasaita ushan?

⁷ Jehovamanda yachajui callarishpaca paimanda ashtaca cosascunata yachajungapami esforzariparcanchi. Shinapash tiempohuanga Bibliata liijushpa o tandanajuipi cashpaca Jehová Diosmanda ashtahuan yachajushpa catingapaca talvez ñana ashta esforzaripanchichu. Chaipa randica, chai yachajushcacunata ñucanchi causaipi imashina pactachinata o chai yachajushcacunahuan imashina shujcunata ayudanatami ashtahuan ricupanchi. Y Bibliapillatami chai cosascunata yachajuchun animan (2 Tim. 3:​16, 17). Shinapash Jehová Diosmanda yachajunami ashtahuan importante can (Sal. 25:​8-10). Shinaca Bibliapi imatapash liishpaca siempremi cashna pensarina capanchi: “Cai textoca ¿imatata Jehová Diosmandaca yachachihuan?” nishpa.a

8. Jehová Diosta ashtahuan rijsishpaca ¿imata pasanga? (Salmo 73:​24-28).

⁸ Jehová Diosta ashtahuan rijsishpaca paihuanga ashtahuan ali amigomi tucupanchi. Por ejemplo, Bibliata liishca jipa, JW Broadcasting^® programata ricushca jipa o shuj asambleaman rishca jipaca Jehová Diosman ashtahuan quimirishcatami sintipanchi. Chai cosascunata rurashpa Jehová Diosmanda ashtahuan yachajushcamandami chashna sintiripanchi. Y chashna sintirijuimandami Jehová Diosta alabangapaj, agradicingapaj munapanchi. Asaf runagushnami sintiripanchi. Asafca Jehová Dios paita ninanda juyashcata pensarishpami cashna nirca: “Jatun Rumishna Diosca, ñuca shungupi ushaita carajmi. Taita Diosca, tucui causaipimi imagutapash carahuan” nircami (Salmo 73:​24-28​ta liipangui). Shinaca Jehová Diosta ashtahuan rijsingapaj esforzarishpaca Jehová Dios ñucanchi alipacha amigo cashcatami yaripanchi. Chaimandami paitaca tucui shunguhuan agradicingapaj munapashun.

9. Jehová Diosta yarishpaca ¿imamandata ali decisiongunataca japipashun? Shuj ejemplomanda parlapai.

⁹ Bibliapica: “Imata ruragrijushpapash, Diostami yuyarina cangui” ninmi (Prov. 3:​5, 6). Shinaca Jehová Diosmanda imata yachajushcata y ñucanchi ruraicunahuan Jehová Diosta llaquichita o cushichita ushashcatami yarina capanchi. Chaita yarishpami ashtahuan ali decisiongunata japita ushapashun. Cai ejemplopi pensaripashunchi: Ashtaca huauquipanigucunaca paicunapa cusapa o huarmipa fotoguta siempre ricui ushangapami escritoriopi, billeterapi o celularpi charin. Chaita rurashpaca cusata o huarmita ninanda juyashcataca siempremi yarita ushan. Chaita ruranami cusata o huarmita cushichingapaj, paita ama llaquichingapaj imapash decisiongunata japichun ayudan. Chashna cuendallatami Jehová Diosta siempre yarishpaca paita cushichingapami ali decisiongunata japishun (Sal. 19:​13, 14).

10. Jehová Diosmanda ashtahuan yachajushpaca ¿imatata ruraita ushapashun?

¹⁰ Jehová Dios gentecunata paiman parecidota rurashcamandami paipa ejemplota catita ushapanchi (Gén. 1:26). Shinaca Jehová Diosmanda ashtahuan yachajushpaca paipa ejemplotaca ashtahuan alimi catita ushapashun. Escribacuna, fariseocunaca Taita Diospa ejemplota imashina catinataca na yachajurcachu. Jesús nishcashnaca paicunaca Moisesman Cushca Leypi menos importante cosascunata pactachinajushpapash ‘Leypi minishtirishca mandamientocunataca ladomanmi saquishcarca. Chaimi alita ruranata, shujcunata llaquinata, Taita Diospi confianatapash ladoman saquishcarca’ (Mat. 23:23). Chai escribacunashna, fariseocunashnaca na cangapaj munapanchichu. Chaipa randica, Bibliapi consejocuna, mandashcacunapash Jehovamanda imata yachachishcatami pensaringapaj munapanchi. Shina rurashpami Jehová Diospa ejemplota catita ushapashun (1 Juan 4:​8, 11).

JEHOVÁ DIOSTA ASHTAHUAN RIJSINGAPACA ¿IMATATA RURANA CAPANCHI?

11. Quiquinga ¿imashinata Jehová Diostaca rijsiparcangui?

¹¹ Quiquinga ¿imashinata Jehová Diostaca rijsiparcangui? Talvez quiquinba taitacunami Bibliapi historiacunata utilizashpa o Jehová rurashca cosascunata ricuchishpa Jehovamanda yachachishcanga. Na cashpaca shuj testigo de Jehovami Cushilla causapashunchi nishca librota o shuj publicacionda utilizashpa yachachishcanga. Quiquinba yachachijca Jehová Dios imashina cashcata yachajuchunga Bibliapa historiacunapi, Jehová rurashca cosascunapi pensarichunmi ayudashcanga (Neh. 8:8; Hech. 14:17).b Imashina cashca cajpipash tucuicunallatami Jehová Diosmanda yachajushpa catina capanchi. Chaita rurangapaca quimsa yuyaicunata ricupashunchi.

12, 13. Bibliata liishpaca ¿imatata Jehová Diosmandaca yachajuita ushapanchi? Shuj ejemplomanda parlapai (Jeremías 39:​15-18; dibujotapash ricupangui).

¹² Callaripica, imashinami ña yachajuparcanchi, Bibliata liishpa, estudiashpami Jehová Diosmandaca ashtahuan yachajuita ushapanchi. Huaquinbica Bibliapica Jehová Dios imashina cajtaca claritomi ricuchin (Éx. 34:​6, 7). Shinapash Bibliapica gentecunamanda, paicunapa decisiongunamandami ashtahuanbachaca parlan. Chai historiacuna Jehovamanda imata yachachishcata cuenta japingapaca imata liishcapi aliguta pensaringapami tiempota llujchina capanchi.

¹³ Shuj ejemplota ricupashunchi. Jeremías 38:​6-13​ta liishpaca Etiopía llactamanda Ébed-Mélec shuti runagumandami yachajuita ushapanchi. Paica difícil cajpipashmi Jeremiastaca ayudarca. Chaita rurashpaca Ébed-Mélec runaguca na manllashcata, Jehová Diosta shuj sirvijcunata juyashcatami ricuchirca. Shinapash chai versocunapica ¿imatata Jehová Diosmandaca yachajupanchi? (Jeremías 39:​15-18​ta liipangui). Por ejemplo, Jehová Dios agradecido, alita ruraj cashcata, tucuicunata igual tratashcataca ¿maijan versocunapita ricuita ushapanchi? Chai versocunapica ¿Jehová Diosmandaca imatata ashtahuan yachajuita ushapanchi? Bibliata liishpaca Jehová Diosmanda imata yachajui ushashcataca siempre pensaripashunchi. Chai jipaca Jehová Diosta mañashpa shuj ali Dios cashcamanda paita agradicishcata, paita ninanda juyashcata nipashunchi.

14. Jehová Dios rurashca cosascunata ricushca jahuapash ¿imatata ashtahuan rurana capanchi?

¹⁴ Catipica, imashinami ña yachajuparcanchi, Jehová rurashca cosascunapi pensarishpami paimandaca ashtahuan yachajuita ushapanchi (Sal. 145:​9, 10). Shinapash Jehová Dios rurashca cosascunata ricuitallaca na ricunachu capanchi. Huaquin gentecunaca paicunapa tucui causaipimi animalcunamanda, plantacunamandaca yachajun. Shinapash paicunaca Taita Dios chai cosascunata rurashcata, Taita Dios imashina cashcataca na intindinllu. Chaimi apóstol Pabloca cashna nirca: “Taita Diosta na ricui ushashpapash, cai mundota imashina rurashcata yachajushpami paita rijsita ushashcanchi. Shinallata, Taita Dios imacunatalla rurashcata yachajushpami, pai imashina cajtaca yachai ushanchi” nircami (Rom. 1:20). Español shimipi El libro del Pueblo de Dios nishca Bibliapica Taita Dios imashina cajtaca ali yachaita charijcunami ricuita ushan ninmi. Shinaca Jehová Dios imashinapacha cajta intindingapaca aliguta pensaringapami tiempota llujchina capanchi.

15. Patrick huauquiguca Jehová Diosta ashtahuan ali rijsingapaca ¿imatata rurashca? ¿Imashinata paipa ejemplota catita ushapanchi? (Fototapash ricupangui).

¹⁵ Ashtacacunaca ñucanchi causanajuj pushtupica animalcunata, plantacunataca na ashta ricui ushapanchichu. Chashna pushtupi causashpapash Jehová rurashca cosascunamanda imata yachajui ushashcata ricupashunchi. Patrick huauquiguca República Democrática del Congo llactamanda Brazzaville nishca jatun ciudadpimi causan. Paica ninmi: “Cada punllami Jehová rurashca imapash cosasguta ricungapaj esforzarini. Jurucuna, pajarogucuna micunaguta, maipi causanata mascanajujtami ricunata yachani. Shuj viajeca huaquin pajarogucuna shuj tazinda imashina ruranajujtami ricurcani. Paicunaca uchilla cosascunata tandachishpami paicunapa huahuacuna chai tazinbi gushtuta cachun ruranajurca” ninmi. Shinapash Patrickca na chaita rurashpallachu quidarca. Paica chaita ricushpaca Jehová Diospi pensaringapami tiempota llujchirca. Paica ninmi: “Jehová Dios paipa tucui rurashcacunata alipacha cuidashcatami yachajurcani. Uchillagucuna cajpipash paicunataca cuidanmi. Chaita ricunaca Jehová Dios ñucata na cungashcata y ñuca tucui minishtirishca cosascunata caranata seguromi cachunmi ayudahuarca” ninmi.

16. Jehová Diosta ashtahuan ali rijsingapaca Mariaca ¿imatata rurarca? ¿Imashinata paipa ejemplota catita ushapanchi? (Fototapash ricupangui).

¹⁶ Ultimopica, Jehová Dios ñucanchita imashina ayudashcapi pensarishpami paimandaca ashtahuan yachajuita ushapanchi. Jesuspa mama Mariami chaitaca rurarca. Mariaca Jehová Diostaca alimi rijsirca. Paipa ñaupapipash alimi ricurirca (Luc. 1:30). Jehová Diosca Mariamanga paipa Churipa mama cana jatun responsabilidadtami mingarca. Shinapash María tranquila sintirichun, paita shinllichichunga Jehová Diosca ángel Gabrielta y Mariapa familia Elisabettami utilizarca. Chai jipaca Mariaca Jehová Dios paita ayudangapaj imatalla rurashcapimi pensarirca. Chaipi pensarishpami Mariaca Jehová Dios ashtaca poderta charishcata, tucui gentecunata llaquishpa tratashcata, shinallata shujcunapa ñaupapi na importanteshna ricurij gentegucunamanda preocuparishcatapashmi ashtahuan intindita usharca (Luc. 1:​46-55). Jehová Diosca ñucanchicunatapashmi ‘minishtijuj tiempopipacha ayudan’ (Heb. 4:16). Chaimi María rurashcashnallata ñucanchicunapash Jehová Diostaca ninanda agradicipanchi. Shinaca Jehová Dios ñucanchita ayudashcata ricushpaca cashna pensaripashunchi: “Caica Jehová Diosmandaca ¿imatata yachachihuan?” nishpa.

SIEMPREMI YACHAJUSHPA CATIPASHUN

17, 18. ¿Imamandata Jehová Diosmandaca siempre yachajushpa catipashun?

¹⁷ Paraisopica Jehová Diosmandaca ashtaca cosascunatami yachajui ushapashun. Chaipica Jehová Diosca mushuj rollocunatami cunga. Chai rollocunapimi Jehová Dios ñucanchicuna imashina causachun munashcata ricuchipanga (Apoc. 20:12). Shinallata Jehová rurashca cosascunamanda alipacha yachajushpami paitaca ashtahuan ali rijsita ushapashun (Is. 11:​6-9). Chai tiempopica Jehová Diosca ñucanchi huañushca familiacunatami causachinga. Shinallata ñucanchicunataca asha asha perfecto tucuchunmi ayudanga. Jehová Dios ñucanchicunata chashna ayudashcata ricushpaca paitaca ashtahuan alimi rijsita ushapashun.

¹⁸ Shinapash Jehová Diosmandaca siempremi yachajushpa catipashun. Jehová Dios siempre tiashcamandami ‘paipa yachaica, na tucurin’ (Sal. 90:2; 147:5). Chaimandami ‘gentecunaca, callarimanda tucuringacaman Taita Dios imatalla rurashcataca na yachaita’ ushan (Ecl. 3:11). Shinaca Jehová Diosta asha tiempota o ashtaca tiempota sirvinajushpapash paita rijsishpa catingapaj siempre esforzarishpa catipashunchi.