Ali ejemplocunata catingapami munarcanchi

ÑUCACA 10 de diciembre de 1936 huatapimi Estados Unidos-Wichita, Kansas llactapi nacirircani. Ñuca taitaca William shutimi caparca. Cutin ñuca mamitaca Jean shutimi caparca. Paicunaca Jehovata tucuipi cazushpami causarca. Ñucami 4 huahuacunapuramandaca mayor carcani. Ñuca taitaca cunanbi coordinador de ancianos cuendami congregacionbi carca. Ñuca mamamanga paipa mamita Emma Wagnermi Bibliataca yachachirca. Ñuca abuelita Emmaca Gertrude Steele shuti panigumanbash shuj gentecunamanbashmi Bibliata yachachirca. Gertrude Steele panica Puerto Rico llactapimi misionera carca.a (Notata ricupangui). Shinaca, ashtaca huauquicunapa, panicunapa ali ejemplotami chariparcani.

Shuj sábado chishica 5 huatacunata charishpami ñuca taitahuan villachinajurcanchi. Ñucanchica La Atalaya revistahuan, Consolación nishca revistacunahuanmi callepi villachinajurcanchi. Consolación revistaca cunanbica ¡Despertad! revistami can. Chai punllacunapica Segunda Guerra Mundialmi tiarca. Chai llactapi gentecunaca guerracunapi chapurishcami carca. Shinapash, ñuca taitaca guerrapica na chapurircachu. Revistacunahuan villachinajujpica shuj machashca doctor shamushpami ñuca taitataca, “canga na jari cashpami guerramanga na ringui” nishpa rimarca. Chai jipacarin, ñuca taitapaman ashtahuan quimirishpami nirca: “Jari cashpaca huactahuayari” nishpa. Ñucaca manllarishcami shayajurcani. Shinapash ñuca taitataca alicachishpami ricurcani. Chai machashca doctor rimajujpipash ñuca taitaca ricujuj gentecunamanmi revistacunahuan villachishpa catirca. Chai horas shuj policía yalijujpimi machashca doctorca caparishpa nirca: “Cai na valitaca imatapash rurai” nishpa. Shina nijpimi policiaca doctortaca nirca: “Machashcami cangui, ri huasiman” nishpa. Shina nishca jipami ishcandillata rirca. Ñuca taita tranquilo cachun Jehová Dios ayudashcata ricushpami cushijushca carcani. Ñuca taitaca ishcai peluqueriatami Wichita llactapica charirca. Machashca doctorca ñuca taitapa clientemi carca.

Ñuca 8 huatacunata charijpimi ñuca taitamamacunaca huasitapash, negociocunatapash jatushpa shuj apashpa rinalla huasita rurarca. Chai jipami, publicador minishtirijuj pushtuta mascashpa Colorado-Grand Junction llactapi causangapaj rircanchi. Ñuca taitamamacunaca precursorcunami carca. Paicunaca tarpushpa, animalcunata viñachishpami huaquin punllacunatalla trabajan carca. Jehová Diospa bendicionhuan, paicunapash ali esforzarimandami chaipica shuj congregación tiai callarirca. 20 de junio de 1948 huatapimi ñuca taitaca shuj jatunlla larca yalijuj pushtupi ñucatapash Billie Nichols huauquitapash paipa huarmitapash, shujcunatapash bautizarca. Jipamangarin Billie Nichols huauquica superintendente de circuito shina sirvishpami paipa huarmindi congregaciongunata visitarca. Paicunapa churipashmi superintendente de circuito tucushpa paipa huarmindi congregaciongunata visitarca.

Ñucanchica Jehovata pundapi churashpa paita sirvij amigocunahuanmi llevarin carcanchi. Ashtahuanbachaca Steele familiahuanmi llevarircanchi. Paicunaca Don, Earlene, Dave, Julia, Si, Martha shuticunami carca. Paicunahuan Bibliata ashtahuan estudiashpami cushilla yalin carcanchi. Paicunami ñucataca ashtacata ayudarca. Paicunahuanmi yachajurcani, ciertopacha cushilla, ali causangapaj munashpaca Jehovata pundapi churana cashcata.

Ñuca 19 huatacunata charijpimi Bud Hasty huauquica ¿nachu Estados Unidos llactapi ñucahuan cumba tucushpa villachingapaj ringuiman? nishpa tapuhuarca. Superintendente de circuitopash ñucanchitaca nircami, Ruston-Luisiana llactapi sirvingapaj richi, chaipica ashtaca huauquipanicunami chiriyashca. Pipash na rijpipash cada semanami tandanajuicunata rurashpa catina canguichi nishpa. Shinami, tandanajuna pushtuta mascashpa tandanajuicunata rurai callarircanchi. Shinapash ashtaca tiempotami tandanajuipica ishcandilla carcanchi. Pipash na shamunllu carca. Shuj yalijpica chaishujmi tucui tapuicunataca contestan carcanchi. Demostracionda rurana cajpica, pipash illajpipashmi ishcandi ñaupaman yalishpa ruran carcanchi. Jipamanmi shuj mayorlla panigu shamui callarirca. Jipamangarin, Bibliamanda yachajujcunapash, chiriyashca huauquipanicunapashmi tandanajuicunaman asha asha shamui callarijpi shuj congregación tiai callarirca.

Cutin shuj punllaca ñuca cumbahuan villachinajushpami shuj religionmanda pastorhuan tuparircanchi. Chai pastorca ñuca na yachashca textocunamandami parlarca. Chaimandami ñucamandallata culirarishpa, ñuca imata crishcapi ashtahuan aliguta pensari callarircani. Chai pastorpa tapuicunata ali contestangapami shuj semana enterota cada tuta ashtacata Bibliata estudiajurcani. Chaita rurashpami ñucapa feta ashtahuan shilliyachishpa shuj pastorcunahuanbash parlangapaj munarcani.

Jipamanga superintendente de circuitoca tapuhuarcami, ¿nachu El Dorado-Arkansas llacta congregacionbi sirvingapaj ringapaj munangui? nishpa. Ña chaipi cashpaca Colorado llactapi cuartel oficinamanmi cutin cutin rin carcani. Shuj punllaca tauca precursorcunahuan carropi rinajushpami Texas llactapi shuj accidenteta charircanchi. Carroca huaglijpimi shuj huauquita cayarcanchi. Paica paipa huasiman apangapaj shamushpami tandanajuimanbash aparca. Ashtahuangarin, ñucanchicuna llaqui apashcatami congregacionman villarca. Chaipi huauquicunaca asha culquihuanmi ayudarca. Ashtahuangarin chai huauquica, ñucapa huaglishca carrotapashmi 25 dolarpa jatushpa ayudahuarca.

Shinami jipamanga Wichita llactapi ñuca familiapa amigota visitangapaj ri usharcanchi. Chai amigoca McCartney shuti huauquimi carca. Paitaca Doc nishpami rijsin carcanchi. Paica precursormi carca. Frank, Francis shuti ishcai gemelo churicunatami paica charirca. Paicunaca cunangamanmi ñucapa ali amigocuna can. Paicunapa rrucu carrotami, ñucapa huaglishca carropa preciopillata 25 dolarpa jatuhuarca. Chaita ricushpami cuenta japircani, Jehová Diosta pundapi churajpica, ñucanchi imata minishtijujpi ayudajta. McCartney huauquica Bethel Crane shuti cushilla, ali panigutami rijsichihuarca. Chai panigupa mamaca Wellington-Kansas llactapimi tucui shuguhuan villachin carca. Paica 90 huatacunacamanmi precursora carca. Casi shuj huata jipallami Bethel paniguhuanga 1958 huatapi cazararcani. Chai huatamandami El Dorado llactapi ishcandi precursorcuna shina sirvi callarircanchi.

Ñucanchicunaca shuj huauquipanicunapa ali ejemplota ricushpami viñarcanchi. Paicunapa ali ejemplota catingapaj munashpami nin carcanchi, Jehovapa organización imapash asignacionda cujpica chasquishunllami nishpa. Jipamanga Walnut Ridge-Arkansas llactapi precursor especialcuna shina sirvichunmi ñucanchitaca cacharca. 1962 huatapicarin, Galaad Escuelapa clase 37man richun invitajpimi cushijushcapacha carcanchi. Chaipica Don Steele huauquipash canata yachashpami ashtaca cushijurcanchi. Galaad Escuelamanda graduarishca jipaca Nairobi-Kenia llactamanmi ñucanchitaca cacharca. Nueva York llactamandaca llaquillami rircanchi. Shinapash Nairobi aeropuertoman chayashpaca tauca huauquipanicuna shuyanajujta ricushpami ashtacata cushijurcanchi.

Kenia llactatapash chaipi villachinatapash ñapashmi alicachircanchi. Ñucanchi punda yachajujcunaca Chris y Mary Kanaiya shuticunami carca. Paicunaca cunangamanmi tiempo completopi chaipi sirvinajun. Shuj huata jipaca Kampala-Uganda llactapi sirvichunmi cacharca. Ñucanchimi chai llactapica punda misionerocuna carcanchi. Chaipi villachinaca alipachami carca. Ashtacacunami Bibliata yachajushpa ñucanchi huauquipanicuna tucurca. Quimsa huata chaupi yalita África llactapi causashca jipami, ñucanchicunaca Estados Unidospi ñucanchi huahuacunata viñachingapaj tigrarcanchi. Africamanda rijushpaca Nueva York llactamandapash ashtahuan yali llaquillami rircanchi. África llactamanda gentecunataca ashtacatami juyarcanchi. Ima horapash cutin tigrangapami munarcanchi.

Ñucanchica ñuca taitamama causajuj llactaman rishpami Colorado llactaman rircanchi. Chai jipallami ñucanchi punda ushiguca nacirirca. Paitaca Kimberly shutitami churarcanchi. Huata chaupi jipaca shuj ushigutapashmi charircanchi. Paitaca Stephany shutitami churarcanchi. Ñucanchipaca paicunata aliguta viñachinaca importantepachami carca. Paicunaman uchillagumandapacha Bibliamanda yachachingapami shinllita esforzarircanchi. Imashinami shujcunapash ñucanchiman shuj ali ejemplota ricuchirca, shinallatami ñucanchipash paicunaman shuj ali ejemplota ricuchingapaj munarcanchi. Ali ejemplota ricushpapash viñashpaca huahuacunami ricun, Jehovata sirvinata o na sirvinatapash. Ñuca jipa huauquipash panipashmi Jehovamanda caruyarca. Shinapash, ima punllaca paicunapash shuj huauquipanicunapa ali ejemplota cutin catichunmi munapani.

Ñucanchica cushijushpami ñucanchi ushigucunataca viñachircanchi. Siempre imatapash igual rurangapami esforzarircanchi. Aspen-Colorado llactapi causaimandaca hielopi llushpishpa pugllangapami tucuilla rin carcanchi. Shinami paicunahuan parlangapaj aprovechan carcanchi. Shinallata pambaman rishpami tutaca yandata japichishpa huahuacunahuan parlanajun carcanchi. Paicuna ña jatunlla cashpaca ninmi carca: “Ashtahuan viñashpaca ¿imatashi rurashun? ¿Pihuanshi cazarashun?” nishpa. Jehovata juyachunmi huahuacunaman yachachingapaj esforzarircanchi. Tiempo completopi sirvinata yaipi charichun, Jehovata paicunashna sirvingapaj munajcunahuan cazarachunmi siempre animarcanchi. Yapa joven cazarana nali cashcata intindichunmi ayudarcanchi. Cutin cutinmi nin carcanchi, “23 huatacuna jipa cazarashpaca alimi canman” nishpa.

Ñucanchi taitamamacunapa ejemplota catishpami tucui tandanajuicunaman ringapaj villachingapaj llujshishpapash chuscundi ringapaj esforzarircanchi. Tiempo completopi sirvinajuj huauquipanicuna huasipi mingarichunmi invitan carcanchi. Shinallata, misionero cashca punllacunata tucui shunguhuan alicachishcatami huahuacunamanga parlan carcanchi. Ima punllapash chuscundi África llactaman ringapami munarcanchi.

Siempremi familiahuan Bibliata igual estudian carcanchi. Colegiopi cumbacuna tapujpi imata ninata yachachunmi, ñucanchica paicunapa cumbacunashna tucushpa tapuicunata ruran carcanchi. Cutin paicunaca testigo de Jehovacuna imashina contestajta pensarishpami contestan carca. Shinami paicunaca cushijushpa yachajun carca. Paicuna ña jatunlla cashpaca, familiahuan yachajunataca quejarinmi carca. Shuj punllaca desanimarishpami paicunataca “cuartoman richi, tucuilla familia tandanajushpaca na yachajugrinchichu” nircani. Shina nijpimi ñuca ushicunaca manllarishpa huacai callarishpa nirca, ñucanchica tandanajushpa Bibliata yachajungapaj munanchimi nishpa. Shina nijpimi cuenta japircanchi, paicunataca Jehovamanda yachajuchun ayudajushcata. Jipacunamanga, tucuilla familia tandanajushpa Bibliata yachajunataca alicachircami. Paicuna imashina sintirishcata, imata pensashcatami parlanllami carca. Huaquinbica, Bibliapi nijujca na ciertochu canga nijta uyashpaca ninandami llaquirin carcani. Shinapash paicuna imamanda shina nijujta intindingapaj esforzarishpami, paicunata pensachishpa intindichircanchi, Bibliapi mandashcacunaca ali cashcata.

Huahuacunaca ñapashmi viñarca. Jehová Diospa organización yachachijpi, ayudajpimi huahuacunamanga Jehovata juyanata yachachi usharcanchi. Colegiota tucuchishpalla ishcandi ushigucuna precursora tucujpi, paicunallata mantiniringapaj esforzarijta ricushpaca ashtacatami cushijurcanchi. Paicunaca Cleveland-Tennessee llactapi publicadorcuna minishtirijujta ricushpami shuj ishcai panigucunahuan cumba tucushpa chaipi sirvingapaj rirca. Paicuna rijpi llaquirinajushpapash tiempo completopi sirvinajujta ricushpami cushijurcanchi. Jipamanga cutinmi ñuca huarmiguhuanga precursorcuna tucurcanchi. Chaimandami superintendente de circuito sustituto cana, shinallata jatun tandanajuicunapi ayudana oportunidadtami charircani.

Tennessee llactaman nara rishpaca ñucanchi ushicunaca Londrés-Inglaterra llactaman puringapaj rishpami chai llacta Betelman rirca. Chaipimi ñuca ushi Stephanyca Paul Norton shuti joven betelitata rijsirca. Stephanyca 19 huatacunatami charirca. Jipaman cutin viaje rishpaca ñucapa chaishuj ushi Kimberlymi Paul Nortonba betelpi cumbata rijsirca. Chai cumbaca Brian Llewellyn shutimi carca. Stephanyca 23 huata yalita charishpami Paulhuan cazararca. Cutin shuj huata jipaca 25 huatacunata charishpami Kimberlyca Brianhuan cazararca. Paicunaca 23 huatacamanmi na cazarashpa shuyarca. Ñucanchi ushicuna ali cusata agllashcamandaca cushijushcapachami carcanchi.

Ñucanchi ushicunaca nircami, cangunapa, ñucanchi abuelocunapa ejemplomi culqui faltajujpipash Taita Diospa Reinota pundapi churachun ayudarca nishpa (Mateo 6:33). Abril de 1998 huatapimi Paultapash Stephanytapash Galaad Escuelapa clase 105man invitarca. Graduarishca jipaca Malaui-África llactapi sirvichunmi paicunataca cacharca. Chai punllacunapillatami Briandapash Kimberlytapash Londres Betelpi sirvichun invitarca. Jipamanga Malaui-Betelpi sirvichunmi paicunataca cacharca. Ñucanchi huahuacuna paicunapa causaipi Jehovata sirvinajujta ricushpaca ninandami cushijunchi.

Enero de 2001 huatapimi, cai tema callaripi nishca shinaca Izak Marais huauquica telefonopi cayarca. Paica Departamento de Traduccionba superintendentemi can. Paica nircami, mundo enteropi traductorcunaman inglés shimita aliguta intindichingapami shuj cursota ruragrinchi nishpa. 64 huatacunata charijpipash, instructor cachunmi ñucataca yachachingapaj munanajurca. Chaimandami ñuca huarmiguhuanga imata ruranata yachangapaj Jehovata mañarcanchi, ñucanchi mamacunahuanbash parlarcanchi. Paicunaca ña mayorllagucuna cashpapash, ñucanchi ñana ayudai ushana cajpipash rilla nircami. Chaimi ñucaca Marais huauquita cayashpa nircani, quiquin nishca shina rishunllami nishpa.

Chai punllacunapimi ñuca mamaca cáncer ungüita charishcata yachaj chayarca. Chaimi ñuca pani Lindaca nirca, ñucapash mamata cuidashpa ayudashallami nishpa. Ñuca mamaca nircami: “Canguna na rijpica ashtahuanmi ungusha nishpa. Ñuca panipash richilla nircami. Paicuna shina nishcamanda, shuj huauquipanicunapash ñuca mamata cuidashpa ayudashcamandaca ashtacatami agradicini. Patterson llactapi Centro Educativo de la Watchtower nishcaman ri callarishcamanda shuj punlla jipami ñuca pani Lindaca, mamitaca huañurcami nishpa cayarca. Ñuca mamita munashca shinaca, Pattersonbi aliguta yachajungapami esforzarircanchi.

Pundapica Malaui Betelmanmi cacharca. Chaipimi ñucanchi ushicunapash paicunapa cusacunapash sirvinajurca. Paicunahuan cutin tandanajushca cashcamandaca cushillami carcanchi. Jipamanga Zimbabue, cutin chai jipaca Zambia llactapi yachachichunmi ñucanchitaca cacharca. Quimsa huata chaupita cursocunata cushca jipami Malaui llactaman tigrashpa, chaipi huauquicuna politicapi na chapurishcamanda ima llaquicunata charishcata escribircani.b (Notata ricupangui).

2005 huatapica cutinmi Africamanda llaquilla rircanchi. Basalt-Colorado llactamanmi tigrarcanchi. Chaipimi ñuca huarmigundi precursorcuna cashpa catinchi. 2006 huatapimi Brianbash Kimberlypash paicunapa ishcandi ushigucunandi ñucanchi huasi ladopi causangapaj shamurca. Cutin, Paulpash Stephanypash Malaui llacta Betelpimi can. Paulca Malaui llactapa Comité de Sucursalpimi can. Cunanbica ñami casi 80 huatacunata charini. Joven huauquicuna ñuca rurashca responsabilidadcunata pactachinajujta ricushpaca ashtacatami cushijuni. Ñucanchi ushicunaman, nietacunaman shuj ali ejemplota ricuchingapami ñucanchipash shujcunapa ali ejemplota catingapaj esforzarinchi. Chaita rurashpami ñucanchica cushilla caita ushanchi.