Jehová Dios llaquishpa jahuan jahuan carashcatami cuenta japircanchi

ÑUCA taitaca Arthur shutimi carca. Paica ashtacatami Taita Diostaca juyan carca. Joven cashpaca, Metodista nishca Iglesiapi ñaupaman pushangapaj munarca. Shinapash, Bibliamanda Yachajujcunapa publicaciongunata liishpa, paicunapa tandanajuicunaman rishpaca Metodista Iglesiapi cangapaca ñana munarcachu. 1914 huatapimi 17 huatacunata charishpa ñuca taitaca bautizarirca. Primera Guerra Mundial punllacunapica guerraman richunmi ñuca taitataca cayarca. Shinapash na rircachu. Chaimandami Kingston-Canadá llactapi 10 quillacunata carcelman cacharca. Carcelmanda llujshishpaca colportor nishcami tucurca. Chai punllacunapica precursorcunatami colportor nin carca.

1926​pimi ñuca taitaca ñuca mamahuan cazararca. Ñuca mamaca Hazel Wilkinson shutimi carca. Ñuca mamapa mamaca, 1908 huatapimi Jehovata rijsirca. Ñucaca 24 de abril de 1931 huatapimi nacirircani. Chuscupura huahuacunami carcanchi. Ñuca taitaca ashtacatami Bibliataca alicachishpa, Bibliapi imata nijta respetan carca. Ñucanchicunamanbash chaitallatami yachachirca. Ñuca familiaca Jehovata sirvinatami pundapi churan carca. Chaimandami tucuillacuna huasin huasin rishpa villachin carcanchi (Hechos 20:20).

1939 huatapimi Segunda Guerra Mundial tiai callarirca. 1940 huatapica, Canadá llactapi villachina, tandanajunaca Testigocunapaca prohibidomi carca. Chai punllacunapica, escuelapi huahuacunaca banderata saludana, himno nacional nishcatami clase ucupi canda carca. Ñuca panica Dorothy shutimi carca. Profesorcunaca ñucatapash ñuca panitapash banderata saludana, himno nacionalta candana ratocunapica clasesmanda llujshichun saquinllami carca. Shinapash shuj punllaca, pingaichingapaj munashpami ñuca profesoraca canga manllaisiquimi cangui nihuarca. Huasiman tigrajujpica ñuca cumbacuna japishpami macahuarca, alpaman shitahuarca. Shinapash na desanimarircanichu. Chaipa randica, ‘Taita Diostami runacunatapash yali ashtahuan cazuna cani’ yarcani (Hechos 5:29).

Julio de 1942 huatapimi, 11 huatacunata charishpalla shuj haciendapi tiashca tanque yacupi bautizarircani. Escuelapi vacaciongunata aprovechashpami precursor auxiliar tucun carcani. Shuj huataca, quimsa huauquicunahuan tandanajushpami, Ontario llactapi jatun quirucunata urmachishpa chijtajcunaman villachingapaj rircanchi.

1 de mayo de 1949 huatapimi precursor regular tucurcani. Chai punllacunapica, Canadá llacta sucursalpi construcción ruranacuna tiajpimi chaiman invitahuarca. Jipamanga chai sucursalpi sirvichunmi invitahuarca. Chaipica, imprimina maquinacunata manejanata yachajushpami imprimishpa trabajan carcani. Testigocunata imashina catiriashpa llaquichinajujta parlaj tratadota imprimingapami, huaquin semanacunataca tuta entero trabajan carcani.

Jipamanga Departamento de Serviciopi trabajachunmi churahuarca. Shuj punllaca, Quebec llactapi sirvingapaj rigrinajuj precursor huauquipanicunatami shuj entrevistata rurarcani. Quebec llactapi huauquipanicunaca ashtacatami llaquichi tucunajurca. Precursorcunata entrevistajushpaca, Edmonton-Alberta llactamanda Mary Zazula shuti panigutami rijsircani. Paipa taitamamacunaca Ortodoxa nishca Iglesiamandami carca. Chaimandami Marypash paipa rucu turipash Bibliata estudianata na saquingapaj munajpica, taitamamacunaca huasimanda llujchishpa cacharca. Marypash paipa turipash, junio de 1951 huatapi bautizarishpami, 6 quillacuna jipaca precursorcuna tucushcarca. Entrevistata rurajushpami chai paniguca Jehová Diosta ashtacata juyashcata cuenta japircani. Cai huarmiguhuanmi cazarangapaj munani yashpami, 30 de enero de 1954​taca paihuan cazararcani. Rijsirishcamanda 9 quillacuna jipallami cazararcanchi. Cazarashcamanda shuj semana jipallami superintendente de circuito cachun nishpa, Jehovapa organizacionga yachachi callarihuarca. Ishcai huatacunatami Ontario llacta jahua ladoman tiaj congregaciongunata visitarcanchi.

Mundo enteropi villachina mirajujpimi shuj llactaman rishpa villachijcuna minishtirijurca. Chaimandami ñuca huarmiguhuanga pensarircanchi, cunuj punllacunapi chuspicuna micujtapash, o chiri chiri punllacunapi chiritapash ñami aguantai ushashcanchi. Shinaca Jehovapa organización maijan llactaman cachajpipash aguantai ushashunmi nishpa. Shinami, Galaad Escuelapa clase 27man rishpa, julio de 1956 huatapi graduarircanchi. Noviembre quillataca ñami Brasil llactaman chayarcanchi.

Brasilman chayashpaca portugués shimitami yachajui callarircanchi. Pundapica gentecunahuan parlai callaringapami huaquin shimicunatalla yachajurcanchi. Jipamanga revistacunata gentecunaman saquingapami shujlla presentacionda de memoria yachajushpa villachingapaj llujshircanchi. Uyangapaj munajcunamanga, Diospa Reino mandajpi ima bendicionguna tianata parlaj shuj textota liina yuyaihuanmi rircanchi. Shuj mishagu ali uyajpimi Apocalipsis 21:3, 4​ta liircani. Jipamanga uma muyujpimi alpaman shitarishcarcani. Yapa calortaca na aguantai ushanllu carcani. Cunangamanbash calortaca na yapa aguantai ushanichu.

Chai jipaca, Río de Janeiropi Campos nishca pushtupi sirvichunmi cacharca. Cunanbica 15 congregaciongunami chaipica tian. Shinapash ñucanchi chayashca punllacunaca shuj uchilla grupogullami tiarca. Shinallata, caru llactamanda sirvingapaj shamushcacunapa shuj huasimi tiarca. Chai huasipica Esther Tracy, Ramona Bauer, Luiza Schwarz, Lorraine Brookes shuti panicunami causarca. Cunanbica cazada caimandami Lorraine Brookes paniguca Lorraine Wallenmi can. Chai huasipica ropata tajshashpa, yanuchun yandata mascangapaj rishpami ayudan carcani. Shuj lunes tutaca, Villajun revistata yachajushca jipallami, ñuca huarmiguhuanga chai punlla imata rurashcata parlanajurcanchi. Ñuca huarmiguca shuj sillonbi saunata churashpami samajurca. Jatarijpica, ñapashmi shuj culebra sauna ucumanda llujshirca. Culebrata ñuca huañuchingacamanmi ñuca huarmica manllarishpa caparijurcalla.

Portugués shimita ña shuj huatata yachajushca jipami, superintendente tucushpa congregaciongunata visitai callarircanchi. Michapash illaj pushtucunapimi sirvircanchi. Puñuitapash alpapimi puñun carcanchi. Huaquinbica caballopi, o carretapimi rin carcanchi. Shuj punllaca caru pushtupimi villachina carcanchi. Chaimandami urcu ladollapi tiaj shuj pueblogumanga trenbi rishpa shuj cuartoguta arrendarcanchi. Sucursalca villachichun nishpami 800 revistacunata cachamurca. Chaimandami revista cajacunata apamugringapaca, cutin cutin cartacunata cachaj ucumanga rircanchi.

1962 huatapimi Escuela del Ministerio del Reino nishcaca Brasil llactapa shuj shuj pushtucunapi tiarca. Chaimandami 6 quillacunataca ñucalla chaicunamanga rircani. Manaos, Belém, Fortaleza, Recife, Salvador nishca pushtucunapimi yachachingapaj rircani. Manaos llactapi cashpaca, jatun tandanajuita shuj teatro ucupi charingapami arreglocunata rurarcani. Ushashcata tamiajpimi, jatun tandanajui punllacunapi ufiangapaj limpio yacupash tucurirca, tiarishpa micuna pushtupash huaglirca. Chaimandami soldadocunata mandajhuan parlarcani. Paica cushillami carca. Ashtahuangarin, jatun tandanajui punllacunapi yacuta charichunmi ñucanchitaca ayudarca. Yanuna ucuta, micuna ucuta charichunmi huaquin soldadocunatapash ishcai jatun carpacunata churachun cacharca.

Shina purijungacamanga, ñuca huarmiguca negociocuna tiaj pushtupimi villachijushcarca. Chaipi gentecunaca Portugal llactamandami carca. Negociomandallami Brasilpi carca. Chaimandami uyangapaca na munan carca. Ñuca huarmiguca ashata desanimarishpami huaquin huauquipanicunamanga, “Portugal llactapica nimamanda na causangapaj munaimanllu” nishcarca. Shina nishcamanda asha tiempo jipallami, Portugal llactapi sirvingapaj rina invitacionda chasquircanchi. Chai llactapica villachinaca prohibidomi carca. Portugalman rina invitacionda ricushpaca, ñuca huarmiguca manllarishpami na imatapash ni usharca. Shinapash ari nishpami Portugal llactapi sirvingapaj rircanchi.

Agosto de 1964 huatapimi Lisboa-Portugal llactaman chayarcanchi. Chaipi policiacunaca chai llactapi huauquipanicuna imata ruranajujta yachangapami pacalla investigaciongunata ruran carca. Chaimandami yarcanchi, Portugalman chayashcandica na huauquicunata mascanachu canchi nishpa. Callaripica, shuj uchilla cuartogutami arrendarcanchi. Visa papelcunata cujpimi ashtahuan jatunlla cuartota arrendarcanchi. 5 quillacuna jipami sucursalmanda huauquicunahuan parlarcanchi. Tandanajuiman ri ushashpaca cushijushcapachami carcanchi.

Testigocuna villachina, tandanajunaca prohibidomi carca. Chaimandami Tandanajui Huasicunaca vichashca carca. Huauquipanicunapa huasicunapimi tandanajun carcanchi. Policiacunaca Testigocunapa huasicunaman yaicushpami imacunatapash mascan carca. Ashtaca huauquipanicunatami tapuchingapaj prezo apan carca. Ñaupaman pushajcunapa shuticunata villachunmi macan carca. Chaimandami huauquicunaca apellidocunata na villashpa shutipilla parlan carca.

Llaquicunata aguantai ushachunmi huauquipanicuna publicaciongunata chasquichun munan carcanchi. Chaimandami ñuca huarmiguca Villajun revistapi yachajuna temacunatapash, shuj publicaciongunatapash máquina de escribirpi copian carca. Escribishpaca shuj copiacunatapash llujchinalla papelpimi escribin caparca.

Junio de 1966 huatapica shuj jatun juiciomi Lisboa llactapi tiarca. Feijó congregacionmanda 49 huauquipanicunataca, prohibishca cajpipashmi shuj huasipi tandanajushca nishpa juiciota catinajurca. Huauquicuna juiciopi aliguta parlai ushachunga, abogado cuenda tucushpami huaquin tapuicunata rurashpa repasarcanchi. Shinapash juiciotaca na ganarcanchichu. 49 huauquipanicunatami huaquingunataca 45 punllacunata, shujcunataca picha quilla chaupita carcelman cacharca. Shinapash chai juicio tiashcamandami ashtaca gentecunaca ali villaicunata uyai usharca. Juiciopi cashpaca, ñucanchi abogadopashmi Bibliapi Gamaliel shuti runa imata nishcata parlarca (Hechos 5:33-39). Noticiacunapipashmi chai juicio tiashcataca llujchirca. Ñucanchi abogadocarin Bibliata yachajui callarishpami, tandanajuicunamanbash ri callarirca.

Diciembre de 1966 huatapica, superintendente de sucursal cachunmi churahuarca. Chai llactapi testigo de Jehovacuna tranquilo villachichun, tandanajui ushachunmi sucursalmandaca ayudan carcanchi (Filipenses 1:7). 18 de diciembre de 1974 huatapimi testigo de Jehovacuna tranquilo villachina, tandanajuna ley chai llactapi llujshirca. Chai cushijuipi cumbangapaca huauqui Nathan Knorr, shinallata Frederick Franz shuti huauquimi testigo de Jehovacunapa ashtahuan jatun Betelmanda shamurca. Oporto, Lisboa llactapica shuj jatun tandanajuitami charircanchi. Chaimanga 46.870 gentecunami shamurca.

Jehová Diospa ayudahuanga, Portugal llactapa Azores, Madeira, Cabo Verde, Santo Tomé, Príncipe nishca islacunapipashmi villachinaca mirarca. Chai islacunapi Testigocuna miranajujpimi ashtahuan jatun sucursalta charina minishtirirca. Chaimandami shuj mushuj sucursalta rurarca. Milton Henschel huauquimi 23 de abril de 1988 huatapica, cai sucursalca Jehovata adorangapami nishpa shuj discursota curca. Chai discursotaca 45.522 huauquipanicunami uyarca. Paicunapuramanda 20 huauquipanicunaca punda huatacunapi Portugal llactapi villachingapaj rishcacunami carca.

Cai tucui huatacunapica, Jehovata ali sirvij huauquicunamandami ashtaca cosascunata ñucapash, ñuca huarmigupash yachajushcanchi. Shuj ejemplota parlapasha. Shuj punllaca, Theodore Jaracz shuti huauquimi shuj llactapi sucursalta visitangapaj rirca. Ñucaca paita cumbashpami rircani. Ñucanchi visitanajuj sucursalpica shuj jatun problemami tiashcarca. Sucursalta ñaupaman pushaj huauquicunaca chai problemata arreglangapaj munashpami ashtacata esforzarishcarca. Shinapash, na arreglai ushashpami ashata desanimarishcacuna carca. Chaimandami Theodore Jaracz huauquica animashpa nirca: “Cunanga espíritu santo ayudachunmi saquina canguichi” nishpa. Cutin shuj punllaca Brooklyn Betelta visitajushpaca, ñucapash ñuca huarmigupashmi Frederick Franz huauquitaca shuj consejoguta carahuai nircanchi. Shina nijpimi paica nirca: “Cai Alpapi Jehová Diospa organizaciondaca, ima pasajpipash nunca na saquinachu canguichi. Cai organizacionllami Jesús mandashca shina Diospa Reinomanda ali villaicunata villachijun” nishpa.

Frederick Franz huauquipa consejota catimandaca ñucapash, ñuca huarmigupash ashtacatami cushijushcanchi. Shinallata mundo enteropi shuj shuj sucursalcunata superintendente cuenda visitangapaj rimandaca ashtaca ali experienciacunatami charishcanchi. Chaicunapica shuj shuj huatacunata charij huauquipanicunata rijsishpami cushijushcanchi. Paicunataca, Jehová Diosca alicachishpami ricujun nishpami yarichin carcanchi. Shinallata, Jehová Diosta sirvishpami catina canguichi nishpami siempre animan carcanchi.

Cunanbica ñucapash ñuca huarmigupash ñami 80 yali huatacunata charinchi. Ñuca huarmiguca ungushcami can (2 Corintios 12:9). Shuj shuj llaquicunatapashmi charishcanchi. Shinapash chai llaquicunami ñucanchi feta shinlliyachichun, Jehová Diosta sirvishpa catichun ali decisiongunata agllachun ayudashca. Jehová Diosta imashina sirvishcata yarishpami, Jehová Dios ñucanchita llaquishpa ninanda ayudashcata cuenta japishcanchia (notata ricupangui).