Ñucanchi tandanajuicunaca ¿imacunapillata ayudapanga?

Tauca gentecunaca paicunapa iglesiacunapi espiritualmente na ayudajpi, na cushilla sintichijpimi chai iglesiacunaman ña na ringapaj munan. Shinaca ¿imamandata testigo de Jehovacunapa tandanajuicunaman rinaca ali canman?

Juyaita ricuchij gentepurapi cachun. Apostolcunapa punllacunapica Jesusta catijcunaca Diosta alabangapaj, Diospa Shimita yachajungapaj, paicunapura animaringapami congregaciongunapi tandanajun carca (Hebreos 10:​24, 25). Huauquicunahuan panicunahuanga amigocunashna tandanajushpami juyaita ricuchirin carca (2 Tesalonicenses 1:3; 3 Juan 14). Ñucanchipash paicunapa ejemplota catishpami cushilla sintiripanchi.

Bibliapi mandashcacunata imashina pactachinata yachajuchun. Cunanbipash jaricuna, huarmicuna, huahuacunapashmi tandanajupanchi. Chaipica ali intindichij huauquicunami Bibliapa mandashcacunata imashina ñucanchi causaipi pactachinata yachachin (Deuteronomio 31:12; Nehemías 8:8). Tandanajuipica canticocunata candashpa, shuj huauqui tapuicunata shinashpa yachachijpi comentariocunatapash cushpami Jehová Diosta alicachishpa jatunyachita ushanchi (Salmo 35:18).

Diospi ashtahuan confiachun. Apóstol Pabloca shuj congregacionmanga escribircami: ‘Cangunata ricungapami munani. Cangunapash ñucapash paitallata crij cashpami, ashtahuan aliguta catingapaj, shujmanda shujmanda yarichirinajungapaj munani’ nishpa (Romanos 1:​11, 12). Tandanajuicunapi huauquicunahuan cashpami ñucanchi fe ashtahuan shinlliyajpi, Dios munashcashna causangapaj esforzaripashun.

Tandanajuicunaman rishpa chaipi imashina cashcata quiquinllata ricuchunmi animapanchi. Cushicushpami chasquishun. Tandanajuicunapica culquita cuchunga na obligapanchichu.

• ¿Picunashnata ñucanchica tandanajupanchi?.

• Tandanajuicunaca ¿imashinata ñucanchita ayudan?