LECCIÓN 18

Ciertopacha cristianocunataca ¿imashinata rijsi ushapanchi?

Imprimishca libropica cashnami ricuripan

Ashtaca gentecunami cristiano o crij canchi nin. Shinapash huaquingunaca Jesuspa mandashcacunataca na catinllu. Shinallata Jesús mandashcashnaca na causanllu. Shinaca ¿imashinata ciertopacha cristianocunataca rijsi ushapanchi?

1. Ciertopacha cristianocunaca ¿imashinata can?

Cristianocunami, Jesusta catijcuna o discipulocuna can. (Hechos 11:26, liipangui). Shinapash paicunaca ¿imashinata Jesusta ciertopacha catinajushcataca ricuchin? Jesusca: “Ñucapa yachachishcacunata catishpa causashpaca, ñucapa discipulocunapachami canguichi” nircami (Juan 8:31). Cai shimicunaca ciertopacha cristianocuna Jesuspa yachachishcacunata cazuna cashcatami ricuchin. Jesús yachachijushpaca Bibliapa nishcacunatami yachachin carca. Chaimi ciertopacha cristianocunapash chaitallata rurana can (Lucas 24:27, liipangui).

2. Ciertopacha cristianocunaca ¿imashinata shujcunata juyashcataca ricuchin?

Jesusca cashnami paita catijcunamanga mandarca: “Imashinami cangunata juyashcani, shinallatami cangunapash caishuj chaishuj juyarina canguichi” nircami (Juan 15:12). Jesusca ¿imashinata paipa discipulocunata juyashcataca ricuchirca? Jesusca paicunata cushichingapaj, ayudangapami tiempota llujchin carca. Ashtahuanbash paipa discipulocunamanda paipa causaita cushpapashmi paicunata juyashcataca ricuchirca (1 Juan 3:16). Ciertopacha cristianocunaca, “shujcunata juyanchimi” nitallaca na ninachu can. Jesushnami ruraicunahuan ricuchina can.

3. Ciertopacha cristianocunca ¿imatata ashtahuanbachaca rurana can?

Jesusca “Diospa Gobiernomanda ali villaicunata” predicachunmi paipa discipulocunamanga mingarca (Lucas 9:2). Punda cristianocunaca na solo templocunapillachu predican carca. Paicunaca huasin huasin rishpa, plazacunapipash, shuj shuj pushtucunapipashmi predican carca (Hechos 5:42; 17:17, liipangui). Cunan punllacunapipashmi cristianocunaca maipi cashpapash Diospa Gobiernomanda tucui gentecunaman predican. Shamuj punllacunapi ali causaigu tianata, Bibliapa ali consejocunata yachachingapami paicunapa tiempota, fuerzata utilizan. Shinami shujcunata juyashcataca ricuchin (Marcos 12:31).

ASHTAHUAN YACHAJUPASHUNCHI

Cunanga ciertopacha cristianocuna Jesusta catinchi nij tucushcacunamanda imapi diferente cashcatami ricugripanchi.

4. Bibliapa cabal yachachishcacunatami catin

Primer siglopi causashca ishcai huauquicunami shuj rollopi Bibliapa cabal yachachishcacunata mascanajun. — Punda cristianocunaca Bibliataca ninandami valichin carca

Na tucui Jesusta catinchi nijcunachu Bibliapa nishcacunataca pactachin. VIDEOTA ricushpa, cai tapuita contestapangui:

VIDEO: Jesuspa ali yachachishcacunataca ¿imashinata panda yachachishcacunahuan chapui callarirca? (5:11)

Jesusta catinchi nij tucushca huaquin iglesiacunaca ¿imashinata gentecuna Jesuspa yachachishcacunata ama yachajuchunga jarcarca?

Jesusca, Taita Diospa shimi Bibliamandami cabalta yachachirca. Juan 18:37ta liishpa, cai tapuita contestapangui:

Taita Diospa ‘cabal yachachishcacunata pactachishpa causajcunataca’ ¿imashinata rijsi ushapanchi?

5. Bibliapa cabal yachachishcacunatami predican

Primer siglomanda huauquipanicunami huasin huasin rishpa predicanajun. — Punda cristianocunaca shujcunamanbashmi predicarca

Jesús jahua cieloman nara rishpaca, shuj alipacha trabajotami paipa discipulocunamanga mingarca. Chai trabajotaca cunangamanmi pactachinajupanchi. Mateo 28:19 y 20 y Hechos 1:8ta liishpa, cai tapuita contestapangui:

Cai textocunapi nishcashnaca ¿ima horacaman, maijan partecamanda predicana capanchi?

6. Bibliamanda yachachishcataca paicunapa causaipipashmi pactachin

Bibliamanda cabalta yachachij religionda tarishcataca ¿imamandata Tom huauquica seguro carca? VIDEOTA ricushpa, cai tapuicunata contestapangui:

VIDEO: Religiongunamandaca ñana imatapash yachanayarcachu (5:20)

Videopi ricushcashnaca, Tom huauquiguca ¿imamandata religionmandaca ñana yachangapaj munarca?
Tom huauquica ¿imamandata Bibliamanda cabalta yachachij religionda tarishcataca seguro can?

Imaguta cashpapash ruraicunahuanmi ricuchina canchi. Mateo 7:21ta liishpa, cai tapuita contestapangui:

¿Jesuspaca crinchimi ninalla o crishcata ruraicunahuan ricuchinachu ashtahuan importante can?

7. Caishujmanda chaishujmandami juyarin

Primer siglopi causashca cusahuarmimi shuj familiaman micunaguta caranajun. — Punda cristianocunaca randimandami juyarin carca

Ciertopacha cristianocunaca ¿paicunapa huauquipanicunata ayudanamandaca paicunapa causaita cungapaj dispuestochu can? VIDEOTA ricushpa, cai tapuicunata contestapangui:

VIDEO: Shuj huauqui peligropi cajpica huañuna cashpapashmi difindingapaca dispuesto carca (2:55)

Huauqui Lloydca ¿imamandata paipa causaita peligropi churashpa huauqui Johanssonda ayudarca?
¿Ciertopacha cristiano cashcatachu ricuchirca?

Juan 13:34 y 35ta liishpa, cai tapuicunata contestapangui:

Ciertopacha cristianocunaca ¿imashinata shuj llactamanda gentecunataca tratana can?
Guerra tiaj tiempopica ¿imashinata chaitaca pactachina can?

HUAQUINGUNACA, “Cristianocunaca millanai cosascunatami rurashca. Maitashi paicunaca ciertopacha Jesusta catijcuna canga” ninmi.

Ciertopacha cristianocuna picunalla cashcataca ¿Bibliapa maijan textohuanda ricuchipanguiman?

YARINGAPAJ

Ciertopacha cristianocunaca Bibliapa nishcacunatami catin. Shujcunata juyaimandaca paipa causaitapash cungapami dispuesto can. Shinallata Bibliapi cabal yachachishcacunatami villachin.