Testigo de Jehovacunaca ¿ciertopachachu cristianocuna can?

Testigo de Jehovacunaca ¿imamandata ciertopacha cristianocunami canchi nipanchi? Ñucanchi crishcacunataca ¿maimandata japipashcanchi? ¿Imamandata testigos de Jehová shutita charipanchi? Randimanda juyarishcatapash ¿imashinata ricuchipanchi?

1. Testigo de Jehovacunapa crishcacunaca ¿maimandata japishca can?

Jesusca paipa Taitamanga cashnami nirca: “Quiquinba parlashca shimicunaca ciertomi can” (Juan 17:17). Testigo de Jehovacunaca Jesushnami ñucanchi crishcacunataca Taita Diospa Shimimanda japipanchi. Shinapash testigo de Jehovacuna imashina tiai callarishcata ricupashunchi. Más o menos huata 1870​pimi huaquin Bibliamanda yachajujcunaca Bibliata aligutapacha estudiai callarirca. Paicunaca Bibliapi nishcacunata catishpami iglesiacunapa yachachishcacuna panda cashcata ricuchi callarirca. Chai jipaca shujcunamanbashmi chaicunataca villachi callarirca.a

2. ¿Imamandata testigos de Jehová shutita charipanchi?

Jehová Diosca paita sirvijcunatami testigo nishpa rijsin. Paimanda cabalta yachachinajushcamandami paicunataca shina nin (Hebreos 11:​4–12:1). Por ejemplo, Bibliata escribij tiempocunapica Taita Diosca paita catijcunamanga cashnami nirca: “Cangunami ñucamanda villajcuna [o testigocuna] canguichi” nircami (Isaías 43:​10, liipangui). Jesustapashmi ‘villachun mingashcatapash aliguta pactachij’ cashcamandaca “Testigo Fiel” nishpa nin (Apocalipsis 1:​5). Chaimi huata 1931​mandaca testigos de Jehová shutita agllapashcanchi. Chai shutita chasquishcamandaca ninandami cushijupanchi.

3. Jesushna shujcunata juyashcataca ¿imashinata testigo de Jehovacunaca ricuchin?

Jesusca paita catijcunata shuj familia cuenda ricuimandami paicunataca ninanda juyan carca (Marcos 3:​35, liipangui). Cunanbipashmi testigo de Jehovacunaca shuj familia cuenda mundo enteropi capanchi. Chaimandami huauqui, pani, turi o ñaña nishpa trataripanchi (Filemón 1, 2). Pero ashtahuanbachaca ‘tucuilla huauquipanicunata’ juyanami capanguichi nishcatami pactachipanchi (1 Pedro 2:17). Chai juyaitaca testigo de Jehovacunaca llaquicuna ricurijpi mundo enteromanda huauqui panicunata ayudashpami ricuchipanchi.

ASHTAHUAN YACHAJUPASHUNCHI

4. Ñucanchi crishcacunaca Bibliamandami can

Jehová Diosca Bibliamanda cabal yachachishcacunaca ashtahuan ashtahuan intindirina cashcatami nirca. Daniel 12:4​ta TNM Bibliapi liishpa, cai tapuita contestapangui:

• Jehovata sirvijcuna Bibliamanda ashtahuan yachajujpica ¿imashi ‘ashtahuan ashtahuan intindirina’ carca?

Charles Russell, Bibliamanda shuj yachajujcunapash imashina Bibliata estudian cashcata ricupai. VIDEOTA ricushpa, cai tapuita contestapangui:

VIDEO: Taita Diosmanda cabal yachachishcacunatami ashtahuan ali intindi callarirca (7:​45)

• Videopi ricushcashnaca Charles Russell, Bibliamanda shuj yachajujcunapash ¿imashinata Bibliata estudian carca?

¿Yachaparcanguichu?

Huaquin viajecunatami ñucanchi crishcacunataca mushujyachina o actualizana tucupashcanchi. ¿Imamandashi shina rurana tucuparcanchi? Imashinami tutamandata indi asha asha tucuilla pushtucunata punchayachin, shina cuendami Jehová Diosca paipa Shimitaca asha asha intindichun ayudashca (Proverbios 4:​18, liipangui). Shinapash Bibliaca nunca na cambianllu. Pero Bibliata ashtahuan aliguta intindishcamandami ñucanchi crishcacunatapash mushujyachishpa catipashcanchi.

5. Testigo de Jehovacuna cashcataca ruraicunahuanmi ricuchipanchi

VIDEO: Testigo de Jehová shutitami charinchi (2:40)

• Testigos de Jehová shutitaca ¿imamandata agllapashcanchi?

Jehová Diosmandaca ashtaca llullacunatami shuj gentecunaca nishca. Chaimandami Taita Diosca huaquin gentecuna paipa Testigocuna tucushpa paimanda cabalta yachachichun agllashca. Shinapash shuj religiongunaca na shina rurashcachu. Cunanga Taita Diosmanda ima llullacunatalla nishcatami ricugripanchi.

Huaquin religiongunaca, imagengunata o santocunata utilizashpami Taita Diosca adorachun munan nishpami yachachin. Shinapash ¿chaica ciertochu can? Levítico 26:1​ta liishpa, cai tapuicunata contestapangui:

• Cai textopi ricushcashnaca ¿imagengunataca utilizanachu canchi? Imagengunamandaca ¿imatata Taita Diosca nin?

Huaquin religiongunapica, Jesusca Taita Diosmi can nishpami yachachin. Shinapash ¿chaica ciertochu can? Juan 20:17​ta liishpa, cai tapuicunata contestapangui:

• Cai textopi ricushcashnaca, Jesusca ¿Taita Dioschu can?

• Jehová Diosca paipa Testigocunamanga paimanda, paipa Churi Jesusmandapash gentecunaman cabalta yachachichunmi mingashca. Chaimandaca ¿imatata yuyapangui?

6. Caishujmanda chaishujmandami juyaripanchi

Cristianocunataca ñucanchi cuerpopa diferente partecunahuanmi Bibliapica chimbapuran. 1 Corintios 12:25 y 26​ta liishpa, cai tapuicunata contestapangui:

• Shuj huauquipanigucuna sufrinajujta ricushpaca ¿imatashi ciertopacha cristianocunaca rurana can?

• ¿Testigo de Jehovacuna randimanda juyarijtaca ricupashcanguichu?

Shuj llactamanda Testigocuna llaqui apanajujta ricushpaca mundo enteromanda huauquipanicunapashmi ayudangapaca listo can. Imashina chaita rurashcataca cai VIDEOPI ricupai. Chai jipaca cai tapuicunata contestapangui:

VIDEO: Haití llactataca Matthew nishca shuj jatun acapanami llaquichirca (5:​29)

• Testigo de Jehovacuna llaqui tiempocunapi shujcunata ayudashpaca ¿imatata ricuchin? ¿Imamandata shina nipangui?

YARINGAPAJ

Testigo de Jehovacunaca ciertopacha cristianocunami capanchi. Ñucanchicunaca mundo enteropimi shujllashna Jehová Diostaca alabapanchi. Ñucanchi crishcacunaca Bibliamandami can. Shinallata Jehová Diosmandaca cabaltami yachachipanchi.

¿Imatata yachajupashcanchi?

• ¿Imamandata testigos de Jehová shutita charipanchi?

• Caishujmanda chaishujmanda juyarishcataca ¿imashinata ricuchipanchi?

• ¿Testigo de Jehovacuna ciertopacha cristianocuna cashcataca cripanguichu?

CAITAPASH RICUPAI

Testigocuna imashina tiai callarishcata ricupai.

Testigo de Jehovacunaca shinlli feta charishcatami ricuchirca. Parte 1: Bibliapa yachachishcacunatami ashtahuan ali intindi callarirca (1:00:53)

Shujcuna pandacunata yachachinajushcata testigo de Jehovacuna imashina ricuchishcata ricupai.

Diospa llactaca Diospa shutitami jatunyachin (7:​08)

Testigo de Jehovacunamanda quiquin charishca tapuicunapa respuestacunata ricupai.

“Gentecunaca Testigo de Jehovacunamandaca cashnami tapurin” (jw.org paginapi ricupangui)

Stephenga shujcunata millanayachishcamandami nali juchacunata rurarca. Shinapash testigo de Jehovacunata rijsishpa imamanda paipa causaita cambiashcata ricupai.

“Ñuca causaica nalipachami carca” (Villajun revista, 1 de julio de 2015)