¿Imamandata Jesusca sufrishpa huañuna carca?

Para siempre causangapaj munanguimanllu nishpa tapujpica ashtaca gentecunaca ninmi, para siempre causangapaj munashpapash shuj punllaca tucuicunallatami huañuna tucunchi nishpa.

Shinapash, cunanllata huañungapaj munanguimanllu nijpica, casi tucuicunami na ninman. Ashtaca llaquicunahuan causashpapash tucuicunallatami causashpa catingapaj munanchi. Bibliapi nishca shinaca, gentecunata Taita Dios rurashpaca para siempre causana munaihuanmi rurarca. Chaimandami Bibliapica nin: ‘Diosca cai pachapi causajcunapa shungupica causaita causachunmi churarca’ nishpa (Eclesiastés 3:11).

Shinaca ¿imamandata huañunchi? Gentecuna para siempre causachunga ¿imatata Taita Diosca rurashca? Chai tapuicunamanda Biblia imata yachachijta intindinami cushilla sintirichun, Jesús imamanda sufrishpa huañushcatapash ali intindichun ayudanga.

Génesis libropa callari capitulocunaca Adanman, Evaman para siempre causaita Taita Dios carashcata, chai causaita ama chingachingapaj imata rurana cashcatapashmi parlan. Shinallata, Taita Diosta na cazushpa Adán y Eva para siempre causana oportunidadta chingachishcatapashmi parlan. Chai yuyaicunata jahualla shimicunahuan intindichijpimi, ashtaca gentecunaca na cierto cangachu, yanga parlollami canga nin. Shinapash Mateo, Marcos, Lucas, Juan librocunashnami Génesis libropash cabalta parlan.a

Adán na cazushcamandaca ¿imata pasashca? Bibliapica ninmi: “Juchata ruranaca, shujlla runamandami cai pachapica callarirca. Chai juchamandami, huañuipash callarirca. Shinallatami tucuicuna juchata rurashcamandaca, huañuipash tucuicunapajman yalijun” nishpa (Romanos 5:12). Taita Diosta na cazushpaca Adanga jatun juchatami rurarca. Chaimandami, para siempre causana oportunidadta chingachirca. Jipamangarin rucuyarca huañurcapash. Ñucanchipash Adanba huahuacuna caimandami juchayucuna canchi. Chaimandami irquiyanchi, rucuyanchi, huañunchipash. Chai yuyaitami cunan punllacunapica herencia genética nin. Shinaca, Taita Dios imata rurashcata ricupashun.

Adán na cazujpipash Taita Diosca Adanba huahuacunamanga para siempre causana oportunidadtami cungapaj munarca. Chaipaca ¿imatata rurarca?

Bibliapica ninmi: ‘Juchata rurashpa causajcunamanga huañushpa chingagrinami’ tian nishpa (Romanos 6:23). Shinaca, Adán juchata rurashcamandami juchapash, huañuipash tiai callarirca. Chaimandami ñucanchipash juchayucuna canchi, huañunchipash. Shinapash, ñucanchita ninanda llaquimandami Taita Diosca paipa Churi Jesusta ñucanchicunata juchamanda salvachun cachamurca. ¿Imashinata chaitaca rurarca?

Adanga jucha illaj cashpapash jipamanga juchayumi tucurca. Shinami, tucui ñucanchicunamanbash juchata, huañuitapash yalichirca. Chaimandami Taita Diosta tucuipi cazuj, jucha illaj gente ñucanchita salvachun minishtircanchi. Bibliapica ninmi: “Shujlla runa na cazujpimi, ashtacacuna juchayu tucushca. Shinallata shujlla runa cazushcamandami, ashtacacuna imatapash cashcatapacha rurajcuna canga” nishpa (Romanos 5:19). ‘Shujlla runaca’ Jesusmi can. Paica jucha illajmi carca.b Jesusca ñucanchita salvangapami cai Alpaman shamushpa huañurca. Jesús huañushcamandami Taita Diospa ñaupajpi ali ricuri ushanchi, para siempre causana esperanzatapash charinchi.

¿Jesuspachachu huañuna carca? ¿Nachu Taita Diosca Adanba huahuacunataca ninalla carca, cangunaca para siempre causaita ushanguichimi nishpa? Ari. Shinapash, chaita rurashpaca Taita Diosca paipa Leytallatami na valichijunman carca. Paica nircami, juchata rurashpaca huañunguichimi nishpa. Chai Leytaca na yangamanda cambianallachu carca. Chai Leyca ima ali o nali cashcata ricuchingapami minishtirishca carca (Salmo 37:28).

Taita Dios paipa Leyta na valichishca cajpica, paipa nishcacunata pactachinataca na crinchimanllu. Shinallata, Adanba huahuacunamanda picunalla para siempre causana cashcata agllashpaca nalitami ruranman carca. Ashtahuangarin, paipa tucui nishcacunata na pactachij cuendami ricurinman carca. Shinapash, Taita Dios paipa Leyta pactachishpa ñucanchicunata salvashcamandami, tucui paipa nishcacunata pactachinata tucui shunguhuan crinchi.

Taita Diosca Jesús huañushcamandami gentecunamanga cai Alpa shuj paraíso tucujpi para siempre causana oportunidadta cunga. Jesusca nircami: “Taita Diosca, cai pachapi causajcunata ninanda juyashpami, paipaj shujlla Churita caramurca. Pipash paita crishpaca, na chingaita chingagringachu, ashtahuangarin causaitami causagringa” nishpa (Juan 3:16). Jesús ñucanchimanda huañuchun cachamushpaca, Taita Diosca alita ruraj cashcata, ñucanchita ninanda juyashcatami ricuchirca.

Shinapash ¿imamandata Jesusca llaquinaita sufrishpa huañuna carca? Llaquinaita huañungacaman Taita Diosta cazushpaca, Jesusca Diablopa nishcacuna llulla cashcatami ricuchirca. Diabloca nircami, ali causashpallami gentecunaca Taita Diostaca cazun. Llaquicuna ricurijpica saquinllami nishpa (Job 2:4, 5). Adán na cazujpica Diablopa nishcacunaca cierto cashcashnami ricurirca. Shinapash, Jesusca jucha illaj cashpapash, ninan llaquicuna ricurijpipash tucuipimi Taita Diosta cazurca (1 Corintios 15:45). Shinami, Jesusca ricuchirca Adán munashpaca Taita Diosta cazunalla cashcata. Shinallata, Jesusca shuj ali ejemplotami ñucanchimanga saquirca (1 Pedro 2:21). Ashtahuanbash, Taita Diosca Jesusmanga jahua cielopi na huañushpa causana bendiciondami curca.

Jesusca ciertopachami huañurca. Chaimandami, shamuj punllacunapica para siempre causaita ushashun. Shinaca ¿para siempre causangapaj munapanguimanllu? ¿Imatata rurana capangui? Jesusca nircami: “Na llullaj shujlla Taita Dios cashpami, cambaj Churi Jesucristotaca cachamuhuarcangui. Shina cajta rijsishpallami, pipash causaita causagringa” nishpa (Juan 17:3).

Ñucanchica Jehová Diosta, paipa Churi Jesustapash rijsichunmi munanchi. Quiquinba llactapi testigo de Jehovacunaca cushijushpami ayudanga. Internetpi jw.org direccionbipash ashtaca informaciondami tari ushapangui.