Taita Diosmi Sarataca ‘jatun mandajcunapa mama’ nirca

HUASIPI ruranacunata punlla entero rurashca jipami, Sara shuti huarmiguca shayarishpa caruta ricujun. Paica huasipi cosascunataca aligutami ricuriajunata yachan. Paita sirvijcunapash ocupado, cushillacunami can. Shinapash paica, na maqui cruzashca tiajunllu. Maquita ama ashtahuan nanachun jacurijushpapash pensarijunmi. Paipa carpa huasiguca, chivo caracunahuan rurashcami can. Tauca huatacunata shuj shuj ladocunaman rishpa causajushcamandaca, chai chivo caracunapash tamiahuan, indihuanga ña maucayashcangami. Tal vez chai maucayashcacunata sirashpandimi tiajushcanga. Shinapash, ña chishajunmi. Indipash quilluta shitashpami, ña huashajui callarijun. Abrahána tutamanda rishca ñandallatami Saraca ricujun. Shina ricujujpillatami carutaca sombralla ricurimun. Paipa cusa Abrahán cajta ricushpami, ninanda cushijun.

Abrahanbash, paipa familiapash Canaán alpacunaman chayangapaj, Éufrates yacucunata chimbashpa rishcamandaca, ñami 10 huatacuna yalishca. Jehová Diospa munaita pactachingapaj paipa cusa shuj churiguta charinata, jatun llacta tucunataca alimi Saraca yacharca. Chaimandami, na rijsishca llactacunaman rina cajpipash, paipa cusataca siempre tucui shunguhuan apoyajurca. Shinapash ¿imashinata Saraca Jehová Diospa munai pactarichun ayudaita ushana carca? Saraca huahuacunatapash na chari usharcachu. Ñami 75 huatacunata charirca. Chaimandami pensarijushcanga: “Abrahanba huarmi ñuca cashpa catijpica ¿imashinashi Jehová Diospa munaica pactaringa?” nishpa. Shinaca razonbimi Saraca preocuparijushcanga.

Huaquinbica, ñucanchicunapashchari pensarinchi, Jehová Diospa nishcacunaca ¿ima horashi pactaringa? nishpa. Uchalla pactarichun yashpa shuyajujpicarin, pacienciata charinaca na facilchu can. Shinaca ¿imatata cai huarmigupa shinlli femandaca yachajuita ushapanchi? Ricupashun.

Abrahanbash paipa familiapash Egiptomanda tigrashpami, Betel nishca llactapa ladolla llactaman chayashcarca (Génesis 13:1-4). Chai llactaca lomalla, jatun llactami carca. Chai llactatami cananeocunaca, Luz nishpa rijsin carca. Chai lomalla alpacunamandami Saraca, Jehová Dios carasha nishca alpacunata ricujushcanga. Saraca, Mesopotamia jatun llactapa Ur nishca llactapimi viñashcarca. Chai llactaca, 1.900 kilometrocunata carupimi carca. Chaipica, jatun plazacuna, almacengunami juyailla cosascunahuan tiarca. Huasicunapash pircacunahuan rurashca juyailla huasicunami carca. Yacupash huasitami yalijushcanga. Shinapash Saraca, chai tucuilla cosascunatapash, paipa tauca familiacunatapash saquishpami rirca. Shinaca pensaripai, chai tucuilla cosascunataca ¿llaquishpacha Saraca yarijurca? Na. Paica nunca na shina pensajushcangachu. Paica Jehová Diosta tucuipi ali sirvij huarmigumi carca.

Chaimandami apóstol Pabloca, Jehová Dios yuyachijpi nirca: ‘Paicuna saquishpa llujshishca llactaman cutin tigranata yarinajushca cashpaca, tigraita’ ushanmanmi carca nishpa (Hebreos 11:8, 11, 15). Sarapash, Abrahanbash Ur llactapi imata saquishcataca, na llaquishpa yarinajurcachu. Llaquishpa yarinajushpaca tigranmanmi carca. Tigrashpaca, Jehová Diospa munai pactarichun ayudana bendiciondaca, na charinmanllu carca. Ashtahuangarin, ashtaca gentecunaman shuj ali ejemplota saquinapa randica, pipash paicunataca na yarinmanllu carca.

Ñaupa punllacunata yarishpa causajunapa randica, shamuj punllacunatami yaria causarca. Chaimandami Saraca, huañungacaman paipa cusata apoyashpa, shuj shuj ladocunaman rishpa carpa huasigucunapi causarca. Cada maiman rinatami carpa huasiguta safashpa, cutin shayachishpa, animalcunatapash cuidashpa ayudan carca. Shinapash shuj llaquicunatapash charinarami carca. Jehová Diosca paipa munaicunata pactachishami nishpami, cutin Abrahanhuan parlarca. Shinapash Saramandaca, na imatapash nircachu (Génesis 13:14-17; 15:5-7).

Chaimi Saraca, pai imata pensajushcata Abrahanman parlarca. Shinaca ¿imatashi pensashcanga? Bibliapica ninmi, Saraca Abrahandaca nircami: ‘Mandaj DiosIlatami ñucataca, huahuata na tarij huarmita rurahuashca. Chaimanda, ñucata sirvij huarmipi chayapai’,b paihuan huahuacunata charipai nirca. Saraca ¿shinami Taita Diospa munaica pactaringa yashpachu shina nirca? Na yachapanchichu. Chai punllacunapi jaricunaca, shuj huahuaguta charingapami cati huarmita japinalla carca. Ñucapa sirvij huarmihuan shuj huahuaguta charipai nishpaca, shungu ucucamanmi Saraca llaquirishcanga. Shinapash, paipa llaquitapash ladoman saquishpami Abrahandaca shina nirca. Bibliapi nishca shinaca, Abrahanga Sara imata ‘mañashcata uyarcami’ (Génesis 16:1-3).

Shinaca ¿Jehová Dios yuyachijpichu Saraca Abrahandaca, ñucata sirvij huarmiguhuan huahuata charipai nirca? Na. Saraca paipa yuyaillami shina nirca. ¿Imamandata shina ninchi? Saraca Jehová Dios llaquichijpimi huahuacunataca na chari ushani yarca. Jehová Dios paipa munaita pactachingapaj imata ruranataca, yaitallapash na yarcachu. Ninanda llaquirishpapash, paipa munaicunata huashaman saquishcatami ricuchirca. Cunan punllacunapi gentecunaca, paicunapilla pensarij gentecunami can, paicunapa munaicunata huashaman saquingapaca nimamanda na munanllu. Shinaca, ñucanchi munaicunata huashaman saquishpa, Taita Diospa munaita pundapi churashpaca, Sarapa ejemplotami catinajupanchi.

Agar ña vijsayu cashpaca, Saramanda ashtahuan jatun sintirishpami, Sarataca nalicachishpa tratai callarirca. Shina pasajpica, ninandami Saraca llaquirishcanga. Saraca Jehová Dios ayudajpi, Abrahanman villashpami Agartaca llaquichirca. Imashina llaquichishcataca na yachanchichu. Shinami Agarca, Ismael huahuaguta ungurca, tauca huatacunapash yalirca (Génesis 16:4-9, 16). Sara ña 89 huatacunata charijpi, cutin Abrahanga ña 99 huatacunata charijpimi, Jehová Diosca cutin paipa nishcata yarichirca. ¿Imatata nirca?

Cutinmi Jehová Diosca canba miraita mirachishami nishpa, Abrahanmanga villarca. Chaipimi Abrandaca, Abrahán shutiman Jehová Diosca cambiarca. Abrahán shutica, “ashtacacunapa taita” nisha ninmi. Ashtahuangarin, chaipimi Jehová Diosca, paipa munaita Sara imashina pactachinataca chaira villarca. Chaipimi Sarai shutica, Sara shutiman cambiarca. Huaquin gentecunaca ninmi, Sarai shutica “Fiñachij” nisha ninmi nishpa. Sara shutica, “jatun mandajcunapa mama” nisha ninmi. Shinapash ¿imamandata Jehová Diosca Sara shutiman cambiarca? Jehová Diosca Abrahandaca nircami: “[Sarata] bendiciashpami, paimandapash churita canman carasha. Ari, [Sarataca] bendiciashapachami. Shinamandami, llactacunapaj mama tucunga. Paimandami gentecunata jatun mandajcunapash miranga” nishpa (Génesis 17:5, 15, 16).

Sarapa churigumandami tucui llactacuna bendiciai tucuna carca. Taita Diosca chai huahuagutaca Isaac shutita churangui nircami. Isaac shutica “Asina” nisha ninmi. Jehová Diospa bendicionhuan Sara shuj huahuaguta charinata uyashpaca, ‘alpaman chayajta cumurishpami’ Abrahanga ‘paipa shungupi asirca’ (Génesis 17:17). Abrahanga manllarishca, cushijushcapachami carca (Romanos 4:19, 20). Cutin ¿imatata Saraca rurarca?

Jipamanga, ushashcata indijuj punllatami quimsapura jaricunaca Abrahanba, Sarapa carpa huasiguman chayarca. Paicunaca mayorllagucuna cashpapash, visitangapaj chayamujcunataca uchami ali chasquirca. Abrahanga Sarataca nircami: “Quimsa batea ashtahuan ali jacuta ucha japishpa masai. Chai jipaca, tandata rurashpa ninapi cusai” nishpa. Chai punllacunapica, visitangapaj chayajcunata atindinaca shinllimi carca. Chaimandami Abrahanga, Sarata ucha ayudangapaj rishpa, paipash shuj shicu huagraguta huañuchishpa cusai callarirca (Génesis 18:1-8). Chai quimsa jaricunaca angelcunami carca. Chaita yarishpami apóstol Pabloca cashna nishcanga: “Mingachinatapash, na cunganachu canguichi. Huaquingunaca, maijan cajta na rijsishpapash, cushijushpa mingachishpami, angelcunata mingachishca” nishpa (Hebreos 13:2). Tucuicunallatami Abrahanba, Sarapa ali ejemplota catishpa shujcunata mingachi ushapanchi.

Shuj angelca Abrahanmanga nircami, canba huarmiguca shuj huahuagutami charinga nishpa. Shina nijtaca, Saraca carpa huasi ucumanda uyajurcami. Chaica maitashi cierto canga yashpami, Saraca paipa shungu ucupi asishpa pensarca: ‘Ñucaca, ña cashna payayashca cashpatachu, ¿ñuca cusa ñucapi chayachun munaita charisha? Ñuca cusapash ñamari rucu’ nishpa. Shina pensajujpimi angelca nirca: “¿Taita Diospaca, imapash na ushanalla tianllu?” nishpa. Ángel shina nijpimi, Saraca ashata manllarishpa nirca: “Na asircanichu” nishpa. Shina nijpimi angelpash ‘na chashnachu, asircanguimi’ nirca (Génesis 18:9-15).

Saraca ¿feta na charimandachu asirca? Na. Saraca shinlli fetami charirca. Chaimandami Bibliapica nin : ‘Abrahanba huarmi Sarapash crishcamandallami, huahuata tarinata na yachashpapash vijsayu tucurca. Huahuata carashami nishpa villaj Diosca, pactachingapachami yashpami tarirca’ nishpa (Hebreos 11:11). Saraca alimi Jehová Diostaca rijsirca. Paipa nishcacunata Jehová Dios pactachi ushanatapash alimi yacharca. Ñucanchicunapurapica ¿pita Sarashna shinlli feta charinchi? Tucuicunallatami Jehová Diosta rijsingapaj esforzarina capanchi. Shinami, tucuita pactachij Jehová Diospi, imamandata Sara confiashcata ñucanchipash yachajui ushashun. Huaquinbica, ñucanchi na crishca cosascunatapash pactachishpami, Jehová Diosca ñucanchitapash cushijuimanda asichishca.

Saraca pai munashca shinami, 90 huatacunata charishpa shuj jari huahuaguta charirca. Abrahanbash ñami 100 huatacunata charirca. Abrahanga Taita Dios mandashca shinami, chai huahuagutaca Isaac nishpa shutichirca. Saraca nanaihuan ungushpapash, cushijushpami nishcanga: ‘Taita Diosmi ñucataca asichihuashca. Maijambash caita uyashpaca, ñucatapash asihuangami’ nishpa (Génesis 21:6). Jehová Dios shuj huahuaguhuan bendiciajpimi, Saraca paipa tucuilla causaipi cushijushca carca. Cushijushpapash shuj responsabilidadcunatapashmi pactachina carca.

Isaac 5 huatacunata charijpica, chuchumanda anchuchishca punllami, shuj jatun micuita rurarca. Shinapash shuj llaquimi tiarca. Bibliapi nishca shinaca, Isaacta Agarpa churi Ismael ‘asispa ricujujtami’, Saraca cutin cutin llaquirishpa ricujurca. Chai punllacunapica, ñami Ismaelca 19 huatacunata charirca. Shinapash, na pugllaimandallachu Isaactaca asishpa ricun carca. Paica burlarishpami Isaacta asishpa ricujun carca. Ashtaca huatacuna jipaca, Jehová Dios yuyachijpimi apóstol Pabloca nirca, Ismaelca catiriashpami Isaactaca llaquichijurca nishpa. Chaimandami Saraca, Ismaelca ñuca churita huañuchingami yashpa, difindin carca. Shinapash, na mama cashcamandallachu difindin carca. Taita Diospa munai pactarinami can yashpami, Isaactaca difindin carca. Chaimandami, manllaitapash ladoman saquishpa paipa cusa Abrahandaca nirca, Agartapash paipa churitapash caimanda llujchishpa cachapai nishpa (Génesis 21:8-10; Gálatas 4:22, 23, 29).

Shina nijpica ¿imashinata Abrahanga sintirirca? Bibliapica ninmi: ‘Paipa churi Ismaelta chashna nishcamandaca, Abrahanbaca ninan llaquipachami ricurirca’ nishpa. Abrahanga paipa churitaca juyarcami. Taita caimandacarin, ima pasajujtaca na cuenta japingapaj munarcachu. Chaimandami Jehová Diosca Abrahandaca nirca: ‘Ama ninanda llaquirichu. Sara imata nishcata rurailla. Isaacmanda miraicunallami, canba miraicuna ni tucunga’ nishpa. Ashtahuangarin Jehová Diosca nircami, Agartapash, paipa huahuatapash cuidariajushami nishpa. Chaimi Abrahanga Sara ima nishcata uyarca (Génesis 21:11-14).

Saraca alipacha huarmimi carca, paipa cusataca alimi ayudajurca. Abrahán imata uyangapaj munashcatallaca, na parlanllu carca. Ashtahuangarin, shuj problema ricurishcamanda, paipa familia llaquipi cana cajpica, jipa punllacunapi pensarishpami, imata yuyajushcataca respetohuan paipa cusamanga parlarca. Apóstol Pedrocarin, Sara huarmiguca tucui shunguhuanmi cusataca respetarca nishpami, Sarataca alicachishpa parlarca (1 Corintios 9:5; 1 Pedro 3:5, 6). Ima problema tiajta ali yachashpapash, na villashcamanda familiapi problemacuna tiajpica, cusata na tucui shunguhuan respetashcatami Saraca ricuchinman carca. Saraca respetohuanmi imata ninataca nirca.

Ashtaca huarmicunaca, Sara paipa cusaman imatapash na pacashpa, respetohuan parlashcamandami alicachin. Huaquin huarmicunaca, imashinami Jehová Diosca Sara huarmiguman imata ruranata huaquinbica nirca, shinallata nichunmi munanman. Na shina pasajpipash, Sarapa ejemplota catishpami shinlli feta, juyaita, pacienciata chari ushan.

Jehová Diosllatami Sarataca, ninanda alicachishpa jatun mandajcunapa mama nirca. Shinapash, Saraca tucuicuna paita alabashpa tratachunga na munarcachu. Saracac 127 huatacunata charishpami huañurca. Ali huarmigu cajpimi, Abrahanga ninanda llaquirishpa Saramanda huacarca (Génesis 23:1, 2). Paica, paipa juyashca huarmigutaca ninandami faltachishcanga. Jehová Diospash, Sara huarmigutaca yariami canga. Cai Alpa shuj paraíso tucujpica, paitapashmi causachinga. Shamuj punllacunapimi Saraca cushilla, unai unaita causanga. Ñucanchicunapash Sarapa ejemplota catishpaca, shinallatami shamuj punllacunapica cushilla, unai unaicaman causashun (Juan 5:28, 29).