Taita Diosca ¿paillata llaquipi canshnami sintirin?

Paillata llaquipi canshna sintirijcunaca, shujcuna imashina sintirijta cuenta japishpami ali intindin. Rick Hanson doctorca ninmi: “Gentecunaca ñucanchillata llaquipi canshna sintirina yuyaihuanmi nacirinchi” nishpa.

PENSARIPAI: ¿Imamandata gentecunaca, ñucanchillata llaquipi canshna sintiri ushanchi, cutin animalcunaca na? Bibliapica ninmi, Taita Diosca paiman rijchajtami gentecunataca rurarca nishpa (Génesis 1:26). Shinaca, paiman rijchajta rurashca caimandami gentecunaca, ñucanchita ruraj Jehová Dioshna shujcuna imashina sintirijtaca intindi ushanchi (Proverbios 14:31).

Taita Diosca ñucanchicuna llaquipi cajta ricushpaca, paillata chai llaquipi canshnami sintirin. Shuj ejemplota ricupashun. Israelitacuna Egiptopi sufrinajujpi, 40 huatacunata chaquishca pambacunapi juyaipata purinajujpica, Taita Diospashmi “ninanda llaquirijurca” (Isaías 63:9). Israelitacuna sufrinajujta ricujushca jahuapash, paipacha chai llaquipi canshnami Jehová Diosca sintirijurca. Paica ninmi: ‘Maijanbash cangunata llaquichishpaca, ñuca ricujuj ñavita tujsinshnami llaquichin’ nishpa (Zacarías 2:8). Shinaca, pipash ñucanchita llaquichijpica, paitapacha llaquichijpishnami Jehová Diosca sintirin.

Bibliapica ninmi, ñucanchi shungupi ninanda llaquirijujpipash, ‘Taita Diosca ñucanchi shungutapash yalimi yachan. Paica tucuitami yachan’ nishpa (1 Juan 3:19, 20). Paica alipachami ñucanchitaca rijsin. Ñucanchicuna tucui ima pasajujta, imata pensanajujta, imashina sintirinajujtapash tucuitami ali yachan. Paipacha shina pasajunshnami sintirin.

Bibliapica ninmi:

• ‘Ñucata mañajpimi, Mandaj Dios ñucapash candaca uyasha. Can caparijpica: “Caipimi cani nishami”’ nishpa (ISAÍAS 58:9).

• ‘Cangunaman ñuca imatalla ruranata yarijushcataca, ñucami yachani. Casilla ali causaita caranatami yarijuni, llaquicunataca na cachashachu. Canguna shuyanajushcatami caragrini ninmi Mandaj Diosca. Shina rurajpimi, ñucata mañanguichi. Ñucapaman shamushpa mañajtaca, ñucapash uyajushami’ nishpa (JEREMÍAS 29:11, 12).

• ‘Ñuca viquitaca, cara muchilapi tandachishpa charijupangui. Chaicunaca ¿nachu canba libropi escribishca?’ tiajun nishpa (SALMO 56:8).

Taita Dios ñucanchita intindijta yachashpami, problemacunata aguantai ushanchi. Mariapa ejemplota ricupashun.

Mariaca ninmi: “18 huatacunata charishpa ñuca churigu ishcai huatata cancerhuan sufrishpa huañujta ricushpaca, ninandapachami llaquirircani. Chaimi Jehová Dioshuanra culirashpa pensarin carcani: Imamandata cashnapacha sufrichun saquihuashca nishpa.

”Jehová Diosca na juyahuanllu yarcanimi. 6 huatacuna jipaca, ñuca imashina sintirijushcatami congregacionbi shuj ali amigaman parlarcani. Paica tauca horascunata aliguta uyashpami 1 Juan 3:19, 20​pi shimicunata yarichihuarca. Chaipica ninmi: ‘Taita Diosca ñucanchi shungutapash yalimi yachan. Paica tucuitami yachan’ nishpa. Chai jipami chai ñañaguca, Jehová Diosca quiquin sufrijujtaca intindinmi nishpa ricuchihuarca.

”Shinapash risintirishcarami carcani. Chaipimi Salmo 94:19​ta liircani. Chaipica ninmi: ‘Ñuca shungupi ashtaca yuyaicunahuan musparijujpica, can cushichishcacunami, ñuca almatapash cushichihuarca’ nishpa. Chaitallami minishtijushcarcani. Jipamanga Jehová Dios ñucata uyajujta, intindijta crishpami paita mañarcani. Chaimi tranquila, ali sintirircani” nin.

Ñucanchicuna llaquipi cajpi, Taita Diospash llaquirijujta yachashpaca ¿nachu tranquilo, ali sintiripanchi? Shinapash ¿imamandata ashtaca llaquicuna tian? ¿Imapash juchamandachu Jehová Diosca castigajun? ¿Ima punllapash llaquicunata tucuchingachu? Chai tapuicunataca cati temacunapimi yachajupashun.