¿Taita Dioschu llaquicunata cachamushpa castigajun?

LUCIACA LLUQUI CHAQUIGUHUAN JANGASHPAMI PURIN. Uchillagu cajpi, poliomielitis ungüi japishpa paipa nervio angugucunata atacajpimi jangagu quedarca. 16 huatacunata charijpica, paita trabajachij huarmica nircami: “Canba mamata na respetashpa, na cazujpimi Taita Diosca janga quedachun candaca castigashcanga” nishpa. Shina nijpi llaquirishcataca cunangamanmi Luciaca yarin.

DÁMARIS UMAPI TUMORTA CHARISHCATA YACHAJ CHAYASHPAMI paipa taitaca nirca: “Can imapash nalita rurajpimi Taita Diosca castigajunga” nishpa. Chaita uyashpaca ninandami Damarisca llaquiyarca.

Ashtaca huatacunatami gentecunaca crishca, ungüicunaca Taita Diospa castigomi can nishpa. Usos y costumbres de las tierras bíblicas nishca libropica ninmi: “Jesuspa tiempopi gentecunaca crinmi carca, ungushcacunallata, o paicunapa familiacuna juchata rurashcamandami ungüicunahuan castigai tucun” nishpa. Punda tiempo ungüicunamanda parlashpaca shuj libropica ninmi: “Huaquin gentecunaca crinmi carca, gentecuna juchata rurajpimi Taita Diosca ungüicunata cachashpa castigan” nishpa. Shinaca, 1300 huatacunapi Europa llactapi tiashca ungüica ¿Taita Diospa castigochu carca? ¿O jipaman investigadorcuna nishca shinaca, virus nishca uchilla jurucuna gentecunaman chimbaimandachu chai ungüica tiarca? Tal vez pensaripanguipashchari ¿ciertochu Taita Diosca juchacunamanda castigashpa ungüicunata cachamun? nishpa.a

PENSARIPAI: Gentecunata castigangapaj munaimanda, llaquicunata, ungüicunata Taita Dios cachamushca cajpica ¿imamandata Jesusca ungushcacunata jambirca? nishpa ¿Nachu jambishpaca, Taita Diosta na cazujuj cuenda canman carca? (Mateo 4:23, 24). Jesusca siempremi paipa Taitata cazurca. Chaimi paica nirca: ‘Pai alicachishcata punllandi rurajujpimi, ñuca Taitaca na ñucatalla saquihuashca’ nishpa (Juan 8:29; 14:31).

Bibliapica ninmi, Jehová Diosca alitalla rurajmi can nishpa (Deuteronomio 32:4). Shuj ejemplota ricupashun. Taita Diosca ¿shujlla pasajerota castiganaimandachu, avionda accidentachishpa avionbi tucuilla pasajerocunata llaquichinman? Na. Abrahanga chaita ali yachashpami nirca, Taita Diosca alita rurajtaca nalita rurajhuanga nunca na tucuchingachu nishpa (Génesis 18:25). Bibliapica ninbashmi: ‘Nalita ruranaca, Tucui Ushaita Charij Diosmandaca carupimi can’ nishpa (Job 34:10-12).

Llaquicunata charishpaca, juchata rurashcamanda Taita Dios castigajushcataca na pensanachu capanchi. Jesusta yaripashun. Shuj punllaca, ñausa nacirishca runaguta tuparishpami Jesuspa yachajujcunaca cashna nishpa Jesustaca tapurca: ‘¿Cai runaguca paillata juchayu caimanda na cashpaca paipa taitamamapa juchamandachu’ cashna nacirishca? nishpa. ‘Shina nijpimi Jesusca, na shinachu can’ nirca (Juan 9:1-3).

Na shinachu can nijta uyashpaca, paipa catijcunaca manllarishcami uyashcanga. Shinapash Jesusca, chai runaguta jambishpami, chai punllapi gentecunapa yuyaicuna panda cashcata ricuchirca (Juan 9:6, 7). Llaquipi cajcunaca, Taita Dios paicunata na castigajushcata yachashpami alillata sintirin.

Bibliapica ninmi:

• ‘Canga, jucha illajpacha cashpami ima nalitapash, napacha ricui ushangui’ nishpa (HABACUC 1:13). Taita Diosca ñallami, tucui nali ruraicunata, ungüicunata, nanaicunata, huañuitapash anchuchinga.

• ‘Jesusca tucui ungushcacunatami [jambirca]’ nishpa (MATEO 8:16). Jesusca ungushcacunata jambishpami, Taita Diospa Reinopi mandashpa mundo enteropi gentecunata imashina ayudanata ricuchirca.

• “Taita Diosmi, paicunapaj ñavimandaca, tucuilla viquita fichanga. Huañuipash, huacaipash, llaquipash, nanaipash, na ashtahuan tiangachu. Punda ima tiashcapash illangami” nishpa (APOCALIPSIS [REVELACIÓN] 21:3-5).

Shinaca ¿imamandata ashtaca llaquicuna cai mundopica tian? Taita Dios na culpata charijpica ¿pipa culpamandata llaquicunaca tian? Gentecunaca unaitami chai tapuicunata yachangapaj munashca. Chaimandami chai tapuicunataca cati temapi yachajupashun.