‘Ñucapa yachajujcuna tucuchun villana canguichi’

1, 2. a) Mateo 28:18-20​pi nishcashnaca tucui Jesusta ali catij huauquipanicunataca ¿imata rurachunda Jesusca mandarca? b) Cai temapica ¿ima chuscu tapuicunamandata yachajupashun?

GALILEA llactamanda shuj urcupi apostolcuna tandanajushpaca ninandami cushijushca cashcanga. Jesusmi pai causarishca jipa chai urcupi paihuan tandanajuchun mandashca carca (Mat. 28:16). Shinallata chai punllapimi tal vez “picha patsaj yali crijcuna tandanajushcamanmi” ricushcanga (1 Cor. 15:6). Jesusca ¿imamandata chai urcupi tandanajushun nishpa mandarca? Jesusca: “Ñucapaj yachajujcuna tucuchun, cai pachapi causanajuj tucuilla gentecunapajman rishpa, villana canguichi” nishcata mandangapami, paihuan tandanajuchun mandashcanga (Mateo 28:18-20, liingui).

² Jesuspa mandashcata uyajcunaca Jesusta ali catij punda congregacionmi tucurca. Paicunaca shuj gentecunapash Jesusta ali catijcuna tucuchunmi ayudana carca.b Cunanbipashmi mundo enteropica ashtaca ashtaca Jesusta ali catij congregacionguna tian. Paicunapashmi shuj gentecuna Jesusta ali catijcuna tucuchun ayudanajun. Cai temapica cai chuscu tapuicunatami yachajupashun. Shuj gentecunapash Jesusta ali catijcuna tucuchun ayudanaca ¿imamandata minishtirishcapacha can? ¿Imashinata pactachi ushapanchi? Tucui huauquipanicunaca ¿imatata rurana can? Na ñapash culiranaca ¿imamandata minishtirishca can?

 3. Juan 14:6; 17:3​pi nishcashnaca Jesusta ali catijcuna tucuchun ayudanaca ¿imamandata minishtirishcapacha can?

³ Shuj gentecunapash Jesusta ali catijcuna tucuchun ayudanaca minishtirishcapachami can. Gentecunaca Jesusta ali catijcuna tucushpallami Taita Dioshuan ali amigo caita ushanga. Shinallata cunanmandallata ali causaita, shamuj punllacunapipash para siempre causaita chari ushanga (Juan 14:6; 17:3, liingui). Jesusca shuj gentecunapash paipa ali catijcuna tucuchun ayudachunmi ñucanchitaca mandarca. Shinapash na ñucanchilla canchichu. Apóstol Pabloca nircami, ñucapash, shuj huauquipanicunapash “Taita Diosta ayudajcunallami canchi” nishpa (1 Cor. 3:9). Imashinami ricupanchi, Jehová Diospash, Jesuspash shuj juyailla bendiciondami ñucanchicuna juchayu cajpipash cushca.

 4. Iván, Matilde Testigo cusahuarmimandaca ¿imatata yachajupanchi?

⁴ Shuj gentecunata Jesusta ali catijcuna tucuchun ayudashpaca cushillami sintirishun. Colombia llactamanda Iván, Matilde cusahuarmihuan imata tucushcata yachajupashunchi. Paicunaca Davier jovenmanmi villachishcarca. Chai jovenga paicunata cashnami nishcarca: “Ñuca causaipi cambiangapaj munaimanmi. Shinapash na ushanichu” nishpa. Davier jovenga alipacha boxeadormi carca. Shinapash paica drogacunata chupan carca. Shinallata yapata ufian carca. Ashtahuanbash nara cazarashpallatami paipa novia Erikahuan pacta causan carca. Iván huauquica ninmi: “Chai jovenga shuj caru caru pueblogupimi causan carca. Chaimi paita visitangapaca turu turu ñangunatami ashtaca horascunata bicicletapi rin carcanchi. Davier jovenga paipa causaipi, yuyaicunapipashmi cambiai callarirca. Chaita ricushpami paipa noviapash Bibliamanda yachajui callarirca” nishpa. Tiempohuanga chai jovenga drogacunata chupanata, ufianata, boxeador canatapashmi saquirca. Paipa noviahuanbash cazararca. Matilde paniguca ninmi: “Davier jovenbash, paipa noviapashmi 2016 huatapi bautizarirca. Paicuna bautizarishca punllapimi Davier joven imata nishcata yarircanchi: ‘Ñuca causaipi cambiangapaj munaimanmi. Shinapash na ushanichu’ nishcata. Chaimi cushijuimanda huacai callarircanchi” nishpa. Imashinami ricupanchi Jesusta catij tucuchun pitapash ayudashpaca ninandami cushijupashun.

 5. Jesuspa ali catijcuna tucuchunga ¿imatata pundapica rurana capanchi?

⁵ Pundapica Jehová Diosmanda yachajungapaj munaj gentecunatami mascana capanchi (Mat. 10:11). Jehovata ali sirvijcuna cashcata ricuchingapaca maipi cashpapashmi gentecunaman villachina capanchi. Shinallata Jesusta ali catijcuna cashcata ricuchingapaca Jesús villachichun mandashcatami pactachina capanchi.

 6. Gentecunaman villachigrijushpaca ¿imatata rurana capanchi?

⁶ Huaquin gentecunaca Bibliamanda yachajungapami munan. Cutin huaquin gentecunaca Bibliamanda yachajuna munaitaca na charinllu. Chaimi gentecuna yachajuna munaita charichun ayudana capanchi. Gentecunaman villachigrijushpaca imata ninatami ña ali yachana capanchi. Chaipaca gentecuna uyangapaj munashca yuyaicunata parlangapami ali agllana capanchi. Shinallata chai yuyaicunamanda imashina parlanatapashmi ali pensarina capanchi.

 7. a) Villachinajushpaca ¿imatata ni ushapanchi? b) Gentecunahuan parlajushpaca ¿imamandata paicuna imata nijta respetohuan ali uyana capanchi?

⁷ Villachinajushpaca cashnami nita ushapanchi: “Cuna punllacunapica shuj shuj llaquicunata o problemacunatami charipanchi. Quiquinga imatata yuyapangui, chai llaquicunata o problemacunata tucuchichunga ¿mundo enterota shujlla gobierno mandachunllu minishtinchi?” nishpa. Chai jipaca Daniel 2:44​ta liishpa chai textota intindichita ushapanchi. Na capashca cashnami nita ushapanchi: “Huahuacunata aliguta viñachingapaca ¿ima consejota ayudaita ushan?” nishpa. Chai jipaca Deuteronomio 6:6, 7​madami intindichita ushapanchi. Maijan yuyaicunamanda parlagrijushpapash gentecuna imata uyangapaj munashcapimi pensarina capanchi. Shinallata Bibliapa yachachishcacuna paicunata imashna ayudanapipashmi pensarina capanchi. Gentecunahuan parlajushpaca paicuna imata nijtami respetohuan ali ali uyana capanchi. Shina rurashpaca gentecuna imashina sintirishcata alimi intindishun. Shinallata paicuna tal vez ñucanchita uyangapapashmi munanga.

 8. ¿Imamandata revisitacunataca cutin cutin rurana capanchi?

⁸ Pipash Bibliata yachajui callarichunga cutin cutinmi visitana capanchi. Chaipaca tiempomi minishtirin. ¿Imamandata shina nipanchi? Huaquinbica na huasipi tuparishunllu. Cutin huasipi cashpapash na yachajuita ushajpimi cutin cutin visitana tucunchi. Shina cutin cutin visitajpimi ñucanchicunata ali rijsinga. Shina rurajpimi paicunaca tal vez Bibliamanda yachajungapaj munanga. Cunanga caipi pensaripashunchi, shuj plantagupi yacuta churariajpica plantaguca aligutami viñanga. Shinaca Bibliamanda yachajujhuanmi Diospa Shimimanda cutin cutin parlana capanchi. Chaimi paicunaca Jehovatapash, Jesustapash juyai callaringa.

9, 10. Ñucanchicunaca ¿imashinata Jesusta ali catij gentecunataca tari ushapanchi?

⁹ Mundo enteromanda huauquipanicunami Bibliamanda yachajungapaj munaj gentecunata mascanajupanchi. Chaica shuj chingashca huahuaguta mascajuj cuendami can. ¿Imamandata shina nipanchi? Chaipaca ima pasashcata ricupashun. Quimsa huataguta charij shuj huahuagu chingajpica 500 gentecunami mascaita ayudangapaj llujshin. Ña 20 horas yalishca jipami shuj jarica chagra pambapi chai huahuaguta tarin. Shina tarishcamandaca chai jarica paita ninanda alicachichunga na munarcachu. Chaipa randica ninmi: “Tucuicuna mascangapaj llujshishcamandami tarita usharcanchi” nishpa.

¹⁰ Tauca gentecunaca chai chingashca huahuagu cuendami causan. Jehovapa nishcacunata na yachashpapash chai gentecunaca paicunata ayudachunmi minishtin (Efes. 2:12). 8 millón yali testigo de Jehovacunami shina chingashca gentecunata mascanajupanchi. Ñucanchipacha Bibliamanda yachajuj gentecunataca tal vez nachari charipanchi. Shinapash shuj huauquipanicunaca chai territoriopillata villachimandami Bibliamanda yachajuj gentecunata tarita ushashca. Shuj huauqui o shuj pani pitapash Jesusta ali catij tucuchun ayudajpica tucuilla Testigocunami ninanda cushijupanchi.

11. Cai rato pimanbash Bibliamanda na yachachijushpaca ¿imashinata Tandanajuipi ayudaita ushapanchi?

¹¹ Tal vez cai ratoca nachari Bibliamanda shuj yachajuj genteta charipanchi. Shinapash ¿imashinata Jesusta ali catijcuna tiachunga ayudaita ushapanchi? Caitami rurai ushapanchi. Tandanajui huasiman mushujcuna shamujpica ali shamushca capai nishpami paicunataca chasquita ushapanchi. Shina chasquishpaca paicuna cushilla sintirichunmi ayudashun. Chaita ricushpami ciertopacha ñucanchicuna Jesusta ali catijcuna cashcata cuenta japinga (Juan 13:34, 35). Tandanajuipi comentariocunata cujpi mushujcuna uyashpami paicunapash paicuna yachajushcata tucui shunguhuan, respetohuan comentaita ushanga. Shinallata mushuj publicadorhuan villachingapaj llujshishpaca Bibliamanda textocunata imashina utilizanatami yachachi ushapanchi. Shina rurashpaca Jesuspa chaquita catichunmi ayudashun (Luc. 10:25-28).

12. Jesuspa ali catij gentecunata taringapaca ¿alipacha estudiashca canachu minishtirin? Shuj panigumanda parlapai.

¹² Jesuspa ali catij gentecunata taringapaca alipacha estudiashca canaca na minishtirinllu. Cunanga Faustina panigumanda yachajupashun. Paica Bolivia llactapimi causan. Faustina paniguca testigo de Jehovacunahuan Bibliamanda yachajui callarishpaca liitaca na yacharcachu. Jipamanmi ashaguta liinata yachajurca. Chai paniguca cunanbica ña bautizarishcami can. Shinallata shuj gentecunaman ali villaigucunata yachachinataca ninandami gushtan. Paica cada semanami 5 gentecunaman Bibliamanda yachachin. Paipa yachajujcunaca alipachami liinata yachan. Faustina paniguca paicunashna na liita ushashpapash 6 gentecunatami bautizarichun ayudashca (Luc. 10:21).

13. Ocupado cashpapash Jesusta ali catij gentecunata tarishpaca ¿imashinata sintiripashun?

¹³ Tauca huauquipanicunaca shuj shuj cosascunatami ruranata charin. Shina ocupado cashpapashmi shuj gentecunaman Bibliamanda yachachingapaj tiempoguta llujchin. Shujcunaman yachachinami chai huauquipanicunataca cushilla sintichin. Cunanga Melanie panigumanda yachajupashun. Paica paillami paipa 8 huataguta charij ushiguhuan causarca. Shinallata semana enterotami trabajan carca. Shinapash paipa taitaca cáncer ungüita charirca. Shinaca paipa taitatapashmi cuidan carca. Melanie paniguca Alaska llacta pueblo ladopimi causarca. Chai llactapica paillami testigo de Jehová carca. Chai llacta chiri chiri cajpimi villachingapaca na llujshita ushan carca. Chaimi pimanbash Bibliamanda yachachingapaj tarichun ayudahuai nishpa Jehovata mañarca. Chai jipallami Sara huarmiguman villachirca. Paica Taita Dios shuj shutita charijta yachashpaca ninandami cushijurca. Punllacuna yalijpica Sara huarmiguca Bibliamanda yachajui callarirca. Melanie paniguca ninmi: “Viernes punllataca shaijushcami carcani. Shinapash ñuca ushiguhuanmi Sara huarmigumanga Bibliamanda yachachingapaj rin carcanchi. Shina ruraimandaca cushillapachami sintirin carcanchi. Shinallata Sarapa tapuicunata tigrachingapaca cushijushpami shuj shuj publicaciongunapi mascan carcanchi. Ashtahuanbachaca Sara Jehovapa amiga tucujta ricushpaca ninandami cushijurcanchi” nishpa. Sara huarmiguta paipa iglesiamanda amigocuna, paipa familiacuna testigo de Jehová tucuchunga na munarcachu. Shina cajpipash Sara huarmiguca na manllashpami punda iglesiatapash saquishpa bautizarirca.

14. a) Gentecunaman villachinaca ¿imamandata pescadota japinahuanga casi igual can? b) 2 Timoteo 4:1, 2​pi apóstol Pablo nishca shinaca ¿imata rurachunda ñucanchitaca ayudan?

¹⁴ Villachijujpipash pipash Jehovamanda na yachajungapaj munajpica ama llaquiripashunchichu. Ashtahuangarin gentecunaman villachishpa catipashunchi. Jesús nishcata yaripashunchi. Gentecunaman villachinataca pescadocunata japinahuanmi Jesusca chimbapurarca. Pescadocunata japijcunaca ni shuj pescadota na japishpapash trabajashpami catin. Paicunaca tutata o nara punllayajpillatami trabajangapaj rin. Huaquinbicarin caru carutami rin (Luc. 5:5). Shina cuendami testigo de Jehovacunaca gentecunaman villachingapaca “pescadocunata” japingapashna shuj shuj horascunapi, shuj shuj pushtucunapi gentecunaman villachingapaj rin. ¿Imamandata shina rurashca? Huauquipanicuna chaita rurashpaca Bibliamanda ciertopacha yachajungapaj munaj gentecunatami tarita ushashca. Shinaca ima punllapash, ima horapash gentecunaman villachingapaca ¿imatata rurai ushapanchi? (2 Timoteo 4:1, 2, liingui).

15. Gentecunaman Bibliamanda yachachingapaca ¿imamandata na culirashpa yachachina capanchi?

¹⁵ Gentecunaman Bibliamanda yachachingapaca ¿imamandata na culirashpa yachachina capanchi? Bibliamanda yachajujcunataca Bibliapi imata nishcatallaca na yachachinchichu. Ashtahuangarin Bibliamanda yachajushpaca Jehovata juyachunmi ayudana capanchi. Shinallata Jesusta ali catingapaj imata rurana cashcatapashmi yachachina capanchi. Jesuspa ali catijcuna imashina causanatapashmi yachachina capanchi. Bibliata yachajujcuna Bibliapa mandashcacunata paicunapa causaipi pactachingapaj esforzarijujpipash ayudashpami catina capanchi. Huaquingunaca huaquin quillacunapillami paicunapa yuyaita, imapash yanga costumbrecunata saqui ushashca. Cutin huaquingunaca na ñapash cambiaita ushashcachu.

16. Raulmandaca ¿imatata yachajupanchi?

¹⁶ Perú llactapi shuj misioneroca na ñapash culiraimandami gentecunaca paimanda alicachishpa parlarca. Chai huauquica ninmi: “Raúl jarica Bibliata yachajujmi carca. Paica ña ishcai librocunata yachajushca cashpapash paipa causaipi cambianarami carca. Paica paipa huarmihuanbash nalipachami causajurca. Nali shimicunata nijpimi paipa huahuacunapash paitaca na respetan carca. Shina na cambiajpipash tandanajuicunaman casi siempre rijujpimi, paitapash paipa familiatapash Bibliamanda yachachishpa catircani. Raultaca quimsa yali huatacunatami ña ali rijsircani. Chai jipami paica bautizaringapaj ña listo carca” nishpa.

17. Cati temapica ¿imatata yachajupashun?

¹⁷ Jesusca nircami: “Ñucapaj yachajujcuna tucuchun, cai pachapi causanajuj tucuilla gentecunapaman rishpa, villana canguichi” nishpa. Cai mandashcataca ¿imashinata pactachina capanchi? Huaquinbica shuj shuj crishcacunata charij gentecunahuan, shuj religionda charijcunahuan o huaquingunacarin Dios tiajtapash na crij gentecunahuanmi parlana tucupanchi. Cati temapimi Jehovapa Reinomanda shuj shuj gentecunaman imashina villachinata yachajupashun.