Bibliamanda yachajujcunata bautizarichun ayudapashunchi (Parte 2)

 1. Gentecunamanga ¿imamandata Bibliamanda yachachina capanchi?

GENTECUNAMAN Bibliamanda yachachishpami paicuna salvarichun ayudaita ushapanchi. ¿Imashinata ayudaita ushapanchi? Mateo 28:19, 20​pica Jesusca, “ñucapa catijcuna tucuchun”, ‘tucuilla gentecunapaman rishpa yachachishpa’, “bautizapanguichi” nircami. Shinaca bautizarinaca minishtirishcapachami can. Shinallami gentegucunaca salvarita ushanga. Pipash bautizaringapaca Jesús paimanda huañushpa, causarishcatami tucui shunguhuan crina can. Apóstol Pedropashmi: ‘Bautizarishpaca Jesucristo causarishcamanda salvarita’ ushanga nircami (1 Ped. 3:21, NM ). Shinaca pipash bautizarishpaca para siempre causanatami cunanmandallata chasquita ushanga.

 2. Gentecuna Jesuspa ali catijcuna tucuchunga 2 Timoteo 4:1, 2​pi nishca shinaca ¿imashina yachachijcunata cana capanchi?

² Gentecuna Jesuspa ali catijcuna tucuchunga Bibliamanda ali ‘yachachijcunami’ cana capanchi (2 Timoteo 4:1, 2, liingui). Jesusca “ñucapa catijcuna tucuchun” ‘tucuilla gentecunapaman rishpa’, ‘yachachinguichi’ nishpami mandarca. Apóstol Pabloca Timoteomanga: “Aliguta rurajushpallami, cambash quishpiringui, can villajujta uyajcunapash quishpiringa” nircami. Chaimi Timoteoca villachishpa catingapaj esforzarina carca. Shinallata “imashna causanatapash, imata yachachinatapash, aligutapacha canllata yaringui” nishpapashmi consejarca (1 Tim. 4:16). Gentecuna Jesuspa ali catijcuna tucuchunga ñucanchicunami Bibliamanda ali yachachijcuna cana capanchi.

 3. ¿Imatata yachajugripanchi?

³ Cada semanami ashtaca millón gentecunaman Bibliamanda yachachinajupanchi. Caina semanaca gentecuna Bibliamanda ashtahuan yachajushpa bautizarina munaita charichun ayudana cashcatami yachajuparcanchi. Cunanga paicuna bautizarichun imata ñucanchicuna rurana cashcatami 5 yuyaicunapi yachajupashun.

 4. Bibliamanda yachachijushpaca ¿imatata controlarina capanchi? (Notata ricupangui).

⁴ Tucuilla Testigocunami Bibliamanda yachachinataca gushtapanchi. Chaimi huaquinbica Bibliamanda yachachijushpaca yapata parlangapaj munapanchiman. Shinallata sabadota o domingota shuj huauqui Villajun revistata yachachijushpaca na yapata parlanachu can. Chaupi semanapi Diospa Shimimanda Yachajungapaj tandanajuipi yachachijushpapash na yapata parlanachu can. Yachachijushpaca Bibliatami siempre utilizana can. Bibliamanda alipacha yachashpapash ama yapata parlangapaj controlaripashunchi (Juan 16:12).b Bautizarishca punllamandapacha cunangamanga Bibliamandaca alipachami yachapangui. Nara bautizarishpaca Bibliamandaca ashatallami yachaparcangui (Heb. 6:1). Shinaca quiquinbash Bibliamanda alipacha yachajungapaca unaitami parapariangui. Shinaca Bibliamanda yachajujcunamanga asha ashami Bibliamandaca yachachina capangui.

 5. a) Bibliamanda yachajujcuna 1 Tesalonicenses 2:13​pi nishcashnaca ¿imata intindichunda munapanchi? b) Bibliamanda yachajujcuna imata intindijushcata yachangapaca ¿imatata rurana capanchi?

⁵ Bibliamanda yachajujcuna imata yachajushcapash Bibliamanda cashcata cuenta japichunmi munapanchi (1 Tesalonicenses 2:13, liingui). Chaimi Bibliamanda yachachijushpaca ñucanchilla parlajunapa randica paicuna Bibliamanda imata intindijushcata parlachun animana capanchi. Chai yachajushcata paicunapa causaipi pactachichun ayudapashunchi. Shinallata imata yachajushcata tapupashunchi. Shinallami paicuna imata intindinajujta, imata pensanajujtapash yachai ushapashun (Luc. 10:25-28). Bibliamanda yachajujcunataca cashnami tapui ushapanchi: “Cai textomandaca ¿imatata Jehovamandaca yachajui ushapangui?”, “cai textoca ¿imashinata quiquindaca ayudaita ushan?”, “caimanda yachajushpaca ¿imashinata sintiripangui?” (Prov. 20:5). Bibliamanda ashtacata yachajunallaca na minishtirinllu. Chaipa randica imata yachajushcata causaipi pactachinami importante can.

 6. Experienciata charij huauquipanicunataca ¿imamandata Bibliamanda yachachingapaj cumbachun mañanalla capanchi?

⁶ Experienciata charij huauquipanicunatami Bibliamanda yachachingapaj cumbahuai nishpa mañaita ushapanchi. Imashinata yachachiparcani nishpapash tapunallami capanchi. Bibliamanda ali yachachijcuna cangapaca humildecunami cana capanchi (Hechos 18:24-26​huan chimbapurashpa ricupangui). Shinallata Bibliamanda yachajuj alichu intindijun nishpapash tapunallami capanchi. Shinallata huaquin semanacunata na yachachita ushagrijushpaca pimanbash mingashpa saquina capanchi. Shinami Bibliamanda yachajujca Bibliamanda yachajuna minishtirishca cashcata cuenta japinga. Bibliamanda yachajujcunataca ñucallami yachachina cani nishpaca na pensanachu capanchi. Paicuna Jehovata ashtahuan rijsishpa catichunmi munapanchi.

 7. Bibliapa yachachishcacunata pactachichunga ¿imatata rurana capanchi?

⁷ Bibliamanda crishcataca tucui shunguhuan yachachijtami Bibliamanda yachajujca ricuna can (1 Tes. 1:5). Shina yachachijta ricushpami Bibliamanda yachajujca ashtahuan yachajungapaj munanga. Bibliapa yachachishcacuna ñucanchi causaipi ayudashcatapash parlapashunchi. Shinami paicunapash Bibliapa yachachishcacunata paicunapa causaipi pactachingapaj munanga.

 8. Bibliamanda ashtahuan yachajuna munaita charichunga ¿imatata ashtahuan rurai ushapanchi?

⁸ Bibliamanda yachachijushpaca llaquicunata o problemacunata charishpapash ñaupaman catishca huauquipanicunapa experienciamandami parlaita ushapanchi. Paicunapa experienciacunaca Bibliamanda yachajujcunataca ashtacatami ayudaita ushan. Chaimi experienciata charij huauquipanicunata Bibliamanda yachachingapaj cumbachun mañanalla capanchi. Shinallata jw.orgc paginapi “Bibliami gentecunapa causaita cambiashca” nishca partepi tiaj experienciacunatapashmi yachachingapaj utilizaita ushapanchi. Chaipi tiashca experienciacuna, videocunapashmi Bibliamanda yachajujtaca Bibliapi nishcacunata pactachina ali cashcata ricuchun ayudanga.

 9. Bibliamanda yachajuj paipa familiacunaman, amigocunaman Bibliamanda parlachunga ¿imashinata ayudaita ushapanchi?

⁹ Bibliamanda yachajuj cazarashca cajpica paipa cusatapash o paipa huarmitapashmi Bibliamanda yachajuchun invitai ushapanchi. Bibliamanda yachajujtaca paipa familiacunaman, paipa amigocunaman Bibliamanda parlachunmi animaita ushapanchi (Juan 1:40-45). Bibliamanda yachajujtaca cashnami tapui ushapanchi: “Cai yachajushcataca ¿imashinata quiquinba familiaman parlapanguiman?”, “cai yuyaitaca ¿maijan textota utilizashpata shuj amigomanga intindichipanguiman?”. Shinami Bibliamanda yachajujpash shuj ali yachachij tucuchun ayudaita ushapanchi. Chaimi pai ña publicador tucushpaca ali villachi ushanga. Shinallata pipash Bibliamanda yachajungapaj munanllu nishpapashmi tapuita ushapanchi. Ari nijpica uchallami Bibliamanda yachachingapaj chai personahuan parlana capanchi. Shinallata Bibliamandaca ¿imashinata yachachinchi?d nishca videotapashmi ricuchi ushapanchi.

10. Apóstol Pablo 1 Tesalonicenses 2:7, 8​pi nishcashnaca ¿imatata rurana capanchi?

¹⁰ Ñucanchicunaca tucui shungumi Bibliamanda yachajujcunata ayudana munaita charina capanchi. Paicunataca ñucanchi huauquipanicunatashnami ricuna capanchi (1 Tesalonicenses 2:7, 8, liingui). Bibliamanda yachajujcunapaca paicunapa punda amigocunata saquishpa paicunapa causaipi cambiocunata ruranaca na facilchu can. Chaimi congregacionbi ali amigocunata charichun ayudana capanchi. Shinallata paicunahuan igual yalingapami tiempota llujchina capanchi. Shinallami paicunapa amigocuna cashcata ricuchi ushapashun. Paicunata cayashpa o shuj mensajeta cachashpaca paicunapi preocuparishcatami ricuchi ushapanchi.

11. Bibliamanda yachajujcunaca ¿maipita ali amigocunata tari ushan?

¹¹ “Shuj huahuaguta viñachingapaca ali gentecunapa chaupipi viñachinami minishtirin”. Shina cuendami: “Congregacionbipash Bibliamanda yachajuj Jesusta ali catij tucuchunga huauquipanicuna ayudachun minishtipanchi”. Chaimi tandanajuicunapi huauquipanicunata rijsichina o presentana capanchi. Shinami Bibliamanda yachajuj ali sintirichun, Jehovata sirvina munaita charichunbash ayudashun. Paicunapash Jehovata sirvijcunahuan shuj familiashna tucuchunbash ayudaita ushashun. Shinami paipa punda amigocunataca fácil saquita ushanga. Chaimi Jehovapa alipacha amigo tucui ushanga (Prov. 13:20). Punda amigocuna paita saquijpipash, Jehovapa organizacionbi ali amigocuna tari ushashcatami cuenta japinga (Mar. 10:29, 30; 1 Ped. 4:4).

12. Jehová Dios candallami sirvisha nishpa mañanamanda, bautizarinamanda parlanaca ¿imamandata ali can?

¹² Jehová Dios candallami sirvisha nishpa mañanamanda, bautizarinamandapash na manllashpami Bibliamanda yachajujcunamanga parlana capanchi. Gentecunaman Bibliamanda yachachishpaca paicunapash Jehovata sirvichun, bautizarichunmi munapanchi. Bibliamanda yachajujcuna tandanajuicunaman ña ricujujpi, huaquin quillacunata Bibliamanda yachajushca jipaca paicunaca Jehovata sirvingapaj testigo de Jehová tucuna cashcatami ali intindina can.

13. Bibliamanda yachajuj bautizaringapaj munashpaca ¿imatallata rurana can?

¹³ Bibliamanda yachajujcuna bautizarina munaita charishpaca huaquin cosascunatami pactachina can. Callaripica Jehovata rijsina, paita juyana, paipi tucui shunguhuanmi crina can (Juan 3:16; 17:3). Jipaca Jehová Dioshuan, huauquipanicunahuanbashmi ali amigocuna cana can (Heb. 10:24, 25; Sant. 4:8). Tiempohuanga nalicunata saquishpami paipa juchacunamandapash arripintirina can (Hech. 3:19). Shinallata Bibliamanda yachajushcatapash tucui shunguhuanmi shujcunaman parlana can (2 Cor. 4:13). Chai jipami Jehová Dios candallami sirvisha nishpa mañashpa, bautizarita ushan (1 Ped. 3:21, NM; 4:2). Pipash bautizarijpica tucuicunallatami ninanda cushijupanchi. Bibliamanda yachajujcuna paicunapa causaipi cambiajta ricushpaca alitami rurajungui nishpa felicitapashunchi.

14. ¿Imashinata Bibliamanda yachajuj Bautizaringapaj munajtaca yachai ushapanchi?

¹⁴ Bibliamanda yachajujcuna Jehová Dios candallami sirvisha nishpa mañachun, bautizarichunga pacienciahuanmi ayudashpa catina capanchi. Shinapash bautizarina munaita charijta o na charijta yachangapaca cashnami tapurina capanchi. ¿Ciertopachachu Jesuspa mandashcata pactachingapaj esforzarijun? ¿Bibliamandaca yachajuna cashcamandallachu yachajujun?

15. Bibliamanda yachajujcuna bautizaringapaca ¿imatallata pactachina can?

¹⁵ Bibliamanda yachajujcuna cambiocunata rurajujta o na rurajujtami ricuna capanchi. Por ejemplo, Bibliamanda yachajujca Jehovamanda imata pensajushcatami parlana can. Shinallata Jehovatami mañana can (Sal. 116:1, 2). Bibliatapashmi liina can (Sal. 119:97). Tandanajuicunamanbash cada semanami rina can (Sal. 22:22). Paipa causaipica Bibliapi yachajushcatami pactachina can (Sal. 119:112). Bibliamanda yachajushcatapash familiaman, amigocunamanmi parlana can (Sal. 9:1). Ashtahuanbachaca testigo de Jehová cana munaitami charina can (Sal. 40:8). Shinapash chaicunata na pactachijujta ricushpaca imamanda na pactachijujta yachangapami juyaihuan tapuchina capanchi.e

16. ¿Imahorata Bibliamanda yachachishpa catinata o na catinata ricuna capanchi?

¹⁶ Bibliamanda yachachishpa catinata o na catinata yachangapaca cashna tapuripashunchi: “¿Bibliamanda yachajungapaca prepararinllu? ¿Tandanajuimanga paipa munaichu ringapaj munan? ¿Nali ruraicunata saquishcachu? ¿Panda religionba yachachishcacunata saquishcachu?”. Caicunata saquishcata ricushpaca Bibliamanda yachachishpa catita ushapanchi. Shinapash paicunapa causaipi na cambiajpica Bibliamandaca ñana yachachinachu capanchi.

17. Bibliamanda yachachijcunaca ¿imatata rurana can?

¹⁷ Gentecuna Jesuspa ali catij tucuchun ayudanaca minishtirishcapachami can. Bibliamanda yachajujcuna bautizarichunmi ayudana capanchi. Chaimi yachachingapaca Bibliata siempre utilizana capanchi. Bibliamanda crishcata tucui shunguhuan yachachina capanchi. Shinallata congregacionbi amigocunata charichunbash ayudapashunchi. Chai jipaca Jehová Dios candallami sirvisha nishpa mañachun, bautizarichunbash animapashunchi. Bibliamanda yachajuj Bautizarina munaita charijta o na charijta ricupashunchi. (“Bibliamanda yachachijcunaca ¿imatata rurana can?” nishca ricupangui). Gentecunaman Bibliamanda yachachishpaca cushillami sintiripanchi. Paicunata ayudajpica paicunapashmi salvarita ushanga. Shinaca Bibliamanda yachajujcuna bautizarichun ayudapashunchi.