Jehovatallami sirvina capanchi

 1. ¿Imamandata Jehová Diostalla sirvina capanchi?

ÑUCANCHITA Jehová Dios rurashcamanda, causaiguta cushcamandami paitalla sirvina capanchi (Apoc. 4:11). Shinapash paitalla sirvina, paitalla respetanaca huaquinbica shinllimi can. Chaimandami paitalla sirvingapaca esforzarinapacha capanchi. Shinapash Jehová Diostalla sirvina nishpaca ¿imatata ninajupanchi?

 2. Éxodo 34:14​pi nishca shinaca ¿imatata rurana capanchi?

² Bibliapica Jehová Diostalla sirvina o alabana nishpaca paita tucui shunguhuan juyana cashcatami nijun. Tucui shunguhuan juyaimandami imapash paimanda caruyachichunga na saquishun (Éxodo 34:14, liingui).

 3. ¿Imacunamandallata Jehová Diostaca juyapanchi?

³ Jehová Diostaca pai imashina cashcata yachajuimandami paitalla sirvinchi. Jehová Dios imashinapacha cashcata yachashpa, pai imata gushtajta, imata na gushtajta yachajushpami paitaca sirvipanchi. Imata rurangapaj munashcata yachashpami ñucanchipash Jehovata ayudangapaj esforzaripanchi. Paita rijsichun saquishcamandapashmi ninanda cushijupanchi (Sal. 25:14). Jehová imacunatalla rurashcata yachajushpami paipaman ashtahuan quimiringapaj munapanchi (Sant. 4:8).

 4. a) Jehová Diosta ama sirvichunga ¿imacunatata Diabloca utilizan? b) Cai temapica ¿imatata yachajupashun?

⁴ Cai mundotaca Diablomi mandajun. Chaimi cai mundopa cosascunata utilizashpa ñucanchicuna nali cosascunata rurachun munan (Efes. 2:1-3; 1 Juan 5:19). Diabloca shuj cosascunapira preocuparishpa ama Jehová Diostalla sirvichunmi munan. Chaimi cai temapica cai ishcai yuyaicunamanda yachajupashun: primero, ashtahuan culquita charina munai; segundo, pugllanata maimanbash puringapaj rinata.

 5. ¿Imamandata charijyanapilla pensarijunaca na ali can?

⁵ Tucuicunallatami micunaguta, ali churajunaguta, maipi causanagutapash charingapaj munapanchi. Shinapash culquipilla yuyanamandaca cuidarinami capanchi. Cunanbica ‘charijyangapaj munaj gentecuna’, culquihuan paicuna imata munashcata rurangapaj munaj gentecunami ninanda mirashca (2 Tim. 3:2). Jesusca paipa catijcunapash chai munaicunahuan cana cashcataca alimi yacharca. Chaimi nirca: “Pipash ishcai amota servitaca, na ushanllu. Ishcai amota servijushpaca, shujtaca na ricunayachishpa, shujtallami juyanga. Na cashpaca shuj amotalla cazushpami, shujtaca yangapi churashpa puringa. Shinallatami cangunaca, Taita Diostapash, imata charishcacunatapash, ishcandita servitaca na ushanguichi” nishpa (Mat. 6:24). Taita Diosta sirvijushpapash ashtahuan charijyana munaihuan trabajajushpaca ishcai amota sirvijushcashnallatami can. Chaicunata rurashpaca Jehovatalla sirvijushcataca na ricuchijunllu.

 6. Laodiceamanda huauquipanicunaman cushca consejomandaca ¿imatata yachajupanchi?

⁶ Laodicea congregacionmanda huauquipanicunaca charij charijmi canchi, imatapash na minishtinchichu nishpami jariyanajurca. Shinapash Jehovapa, Jesuspa ñaupajpica imapash illaj, llaquinayai, imagutapash na charij, ñausa, lluchullami ricurinajurca. Jesusca charijcuna cashcamandaca na tacurijurcachu, Jehovapa ñaupajpi ali cangapaj na esforzarinajushcamandami Laodicea congregacionmanda huauquipanicunataca tacurirca (Apoc. 3:14-17). Ñucanchicunapash ashtahuan charijyana munaita ñucanchi shungupi charijushcata cuenta japishpaca, uchallami chai yuyaicunata cambiangapaj esforzarina capanchi (1 Tim. 6:7, 8). Ashtahuan charijyana munaita charishpaca Jehová Diostaca na tucui shunguhuan juyai ushapashunllu. Jehová Diosca “paipajlla cachun munaj Taita Diosmi” can (Deut. 4:24). ¿Imamandata yapata culquipilla preocuparita ushapanchiman?

7-9. Huauqui Davidpa causaimandaca ¿imatata yachajupanchi?

⁷ Estados Unidosmanda David shuti anciano huauquipa experienciata ricupashun. Paica responsable, ali trabajadormi can. Pai trabajajushca empresapica ashtahuan pagopa ali trabajotami chasquirca. Chai trabajota ali ruraj nishpapashmi paipa llactapica paitaca rijsin carca. Paica ninmi: “Chai tiempopica Jehová bendiciajujpimi ali trabajotaca charini nishpa pensan carcani” nin. Shinapash na shina carcachu.

⁸ Huauqui Davidca asha ashami paipa trabajopilla empeñarimandaca Jehová Diosmandapash caruyajushcata cuenta japirca. Paica tandanajuicunapi cashpa, villachijushpapash paipa trabajopirami pensajun carca. Ashtaca culquita ganashpapash ashtahuan estresado, paipa huarmiguhuanbash problemacunata chari callarirca.

⁹ Chaimi huauqui Davidca paipa causaipi huaquin cambiocunata rurana cashcata cuenta japirca. Chaimi paica paipa jefehuan parlashpa, ima punllacunalla pai trabajashpa cati ushashcata jefehuan parlarca. Chaimi paipa jefeca trabajomanda llujchirca. Shinapash ¿imata pasarca? Huauqui Davidca ninmi: “Trabajo illaj quedashca punlla jipallami precursorado auxiliarta japircani” nishpa. Huauqui Davidca paipa huarmigundi mantiniringapaca huasicunata limpiashpami trabajai callarirca. Chaita ricushpami shujcunaca nalicachishpa ricun carca. Shinapash paicunaca Jehovata sirvingapaj munaimandaca limpiashpapash trabajarcallami. Chai jipallami precursorado regulartapash japirca. Jipamanga paipa huarmigupashmi precursora tucurca. Pundacunahuan ricushpaca huauqui Davidca ashagutallami ganan carca. Shinapash paicuna imaguta minishtijushcata randingapaca siempremi charirca. Huauqui Davidpash paipa huarmigupash Diospa Reinotara pundapi churajpica Jehová Dios paicunata imashina cuidajtaca ricurcapachami (Mat. 6:31-33).

10. Ñucanchi shungutaca ¿imamandata cuidana capanchi?

¹⁰ Ashtaca cosascunata charishpa o na charishpapash ñucanchi shungu ama umachichunmi cuidarina capanchi. ¿Imashinata cuidari ushapanchi? Ashtahuan charijyangapaj munashpa o trabajotara ñucanchi causaipi pundapi churanamandami cuidarinapacha capanchi. Shina pasajujpica cashnami tapurina capanchi: “Tandanajuipi cashpa, villachijushpaca ¿trabajopirachu pensarijuni? ¿Jipa punllacunapa ashtahuan culquita charinapirachu pensarijuni? ¿Cusahuarmi causaipica culquimanda, ashtahuan charina cosascunamandachu culirarinajunchi? ¿Jehovata ashtahuan sirvingapaca shujcuna na alicachishpa ricuj trabajopipash trabajaimanllachu?” nishpa (1 Tim. 6:9-12). Shinallata caitami siempre yarina capanchi, Jehová Diosca ñucanchitaca juyanmi. Chaimi Jehová Diosca cashna nin: “Candaca na jichushachu, na saquishachu” nishpa. Apóstol Pabloca cai consejotami curca: ‘Imata cashpapash charijyanata munashcamandalla na ruranachu canguichi’ nishpa (Heb. 13:5, 6).

11. Pugllaicuna, maimanbash purigrinaca ¿imashinata pandachita ushan?

¹¹ Pugllashpa, maimanbash puringapaj llujshishpa tucuicunallata cushilla causachunmi Jehová Diosca munan. Chaimandami Bibliapica cashna nin: “Imapash ashtahuan alica na tianllu. Ashtahuangarin micushpa, ufiashpa cushijunami ali. Shinallata pai trabajashcamandami, paipaj shungupipash cushijun” nishpa (Ecl. 2:24). Shinapash cunanbi huaquin pugllaicunaca ali causanataca na yachachinllu. Ashtahuangarin Taita Dios na ricunayachishca cosascunata rurachunmi animan.

12. ¿Imamandata 1 Corintios 10:21, 22​pi nishca shinaca pugllanata, maimanbash purigrinataca ali agllana capanchi?

¹² Tucui ñucanchicunaca Jehovatalla sirvishpa causangapami munapanchi. Chaimandami Bibliapica cashna nin: “Jehová Dios carashca micunamandapash, ayacunaman carashca micunamandapash ishcandita micuitaca na ushanguichichu” nishpa (1 Corintios 10:21, 22, liingui)b. Pihuanbash igual micushpaca ali amigocuna cashcatami ricuchinchi. Shina cuendallatami telepi o Internetpi macanajushpa pugllaicunata ricuna, espiritismo nishcacunata ricuna, huainayashpa nalicunata ruranajujta ricuna o shuj nali cosascunata ricungapaj tiarishpaca Jehová Diospa contracunahuan micungapaj tiarishcatami ricuchishun. Shina rurashpaca ñucanchillatami nali sintirishun. Shinallata Jehová Diospa ñaupajpipashmi nali ricurishun.

13, 14. Santiago 1:14, 15​pi nishca shinaca ¿imashpata pugllanacunapi, maimanbash puringapaj llujshinacunapica cuidarina capanchi? Shuj ejemplomanda parlapai.

¹³ Pugllanahuan, maimanbash puringapaj llujshinahuanga ¿imashpata micunahuanga igual can? Imatapash micujushpaca imata micujushcataca alimi yachapanchi. Shinapash ña micunata langajpica ñucanchi cuerpopa imapalla sirvijtaca na yachapanchichu. Sano micunacunata micushpaca ñucanchi cuerpopallatami ali can. Cutin imapash nali micunacunata micushpaca ñucanchillatami irquiyaita ushapanchi. Shinapash ima micuna irquiyachijta o na irquiyachijtaca tiempohuanmi yachaita usharin.

¹⁴ Imatapash micunataca ñucanchillatami ali ricuna capanchi. Shina cuendallatami imapash pugllanata, maimanbash puringapaj llujshinataca ali ricuna capanchi. Shinallatami imata telepi o Internetpi ricushcacunaca asha asha ñucanchi pensamientocunapi, ima rurashcacunapi ricurita ushan. Ali pugllaicunata pugllashpa, maimanbash puringapaj llujshishpapash alita rurashpaca ñucanchillatami cushilla ali sintiri ushapanchi (Santiago 1:14, 15, liingui). Imata rurashca o imatapash rurashcaca na chai ratoca ricuringachu. Ashtahuangarin tiempohuanmi imapash nalicuna rurashcaca ricuringa. Chaimi Bibliapica cashna cutin cutin nin: “Na cangunallata pandarinachu canguichi. Taita Diostaca, na pipash umashpa asi ushangachu. Maijan imata tarpushpapash, chaitallatami japinga. Shina cajpica, maijambash paipaj munaitalla catishpa tarpunshna rurashpaca, chai munaita rurashcamandami, chingaita chingagrinata japinga” nishpa (Gál. 6:7, 8). Shinaca maimanbash puringapaj rina, imapash pugllaicunaca Jehová Diospa ñaupajpi nali cajpica millanayachishpami napacha rurana capanchi (Sal. 97:10).

15. Jehová Diosca ¿imata utilizachunda munan?

¹⁵ Ashtaca huauquipanicunaca JW Broadcasting^®, nishcapi llujshishca videocunata ricunataca ninandami gushtan. Marilyn paniguca ninmi: “JW Broadcasting videota ricushpaca punlla enteropash yalimanllami. Chaicunata ricunami ñuca ali sintirichun ayudahuan. Shinallata llaquilla cashpa o ñucalla sintirishpaca Bibliamanda Yachajungapaj discursocunata uyanami cushilla sintirichun ayudahuan. Shina ruranami Jehová Diospa organización imatalla rurajujta yachachun, Jehovata ashtahuan juyashpa catichunbash ayudahuan. JW Broadcasting nishcapi videocunata ricunami ñuca causaita cambiachun ayudahuashca” nishpa. Ñucanchicunaca ¿chaitaca alichu utilizanajupanchi? JW Broadcasting videocunaca cada quillami llujshin. Cai quillamanda o shuj quillacunamanda grabashcata charishpacarin videocunata, canticocunata shuj punllacunapash ricuita o uyaita ushapanchimi. Chaicunata ruranami Jehovata sirvishpa catichun ayudanga.

16, 17. Pugllanapi o maimanbash puringapaj llujshinapi yapata tiempota yalijushpaca ¿imatata rurai ushapanchi?

¹⁶ Pugllana, maimanbash puringapaj llujshinaca alimi can. Shinapash chaicunapira yapata ocupado yalijushpaca cuidadota charinami capanchi. Chaimi cashna tapurinaca ali can, ¿pugllanatara o maimanbash puringapaj llujshinatarachu pundapi churajuni? ¿Na cashpaca Jehovata ashtahuan sirvingapachu tiempota llujchijuni? nishpa. Chai ruraicunata saquinaca huaquin huauquipanicunapaca shinllimi ricurishca. Por ejemplo, Abigail 18 huatacunata charij paniguca ninmi: “Punlla entero imagutapash rurashpa shaijushca caimandami teleta ricungapaj tiarinata gushtani. Shinapash huaquinbica na cuenta japijtami tauca horascunata teleta ricushpa yalinilla” nishpa. Shinallata Samuel jovenga ninmi: “Huaquinbica Internetpi videocunata ricushpami na cuenta japijta ña quimsa o chuscu horascunata chai videocunata ricushpa yalishcani” nishpa.

¹⁷ Shinaca tapuripashunchi ¿pugllanapira, maimanbash puringapaj llujshishpachu yapa tiempota yalijuni? nishpa. Imatapash rurashpa yapa tiempota yalijushcata cuenta japishpaca caitami rurana capanchi. Telepi, Internetpi imacunatapash ricushpa, celularpi imacunatapash escribishpa o imacunatapash ricushpa mashna tiempota yalijushcatami shuj calendariopi anotaita ushapanchi. Chai jipaca ima ruraicuna ashtahuan importante cashcatami yarina capanchi. Shina rurashca jipaca, tiempota ali aprovechangapaj ayudahuai nishpami Jehovata mañana capanchi. Shina rurashpallami, estudio personalta charingapaj, Familiahuan Adorana Tutata charingapaj, Diospa Reinomanda villachingapaj, tandanajuiman ringapajpash na shaijushca sintirishun. Caicunatara pundapi rurashca jipaca, pugllangapaj, maimanbash puringapaj llujshishpaca nalica na sintirishunllu.

18, 19. Jehovatalla sirvishcata ricuchingapaca ¿imatata rurana capanchi?

¹⁸ Diablopa nali ruraicuna tucuchi tucunamanda, paraíso Alpagu imashna canata parlashpami apóstol Pedroca cashna nirca: “Juyashca crijcuna, shinamandami cangunaca chashna tucunacunata shuyashpa, imata cashpapash ucha rurana canguichi. Na mapayashca, na juchachi tucushpa, casilla ali causaita charijta Dios japij shamunatami yariana canguichi” nishpa (2 Ped. 3:14). Cai consejota ñucanchicuna cazushpaca Jehovapa ñaupajpi ali cashcatami ricuchipanchi. Shinallata Jehová Diostalla sirvijushcatapashmi ricuchi ushapanchi.

¹⁹ Jehovatalla ama sirvichunmi Diabloca imapash nali ruraicunapi urmachun imatapash rurashpa catinga (Luc. 4:13). Shinaca Jehovatalla sirvishpa catichun imapash problemacuna, pipash jarcachunga ama saquipashunchichu. Jehová Diosca pai munashca shina sirvichunmi munan. Chaimandami Jehovatalla sirvingapaj causana capanchi.