Jehová Diosca ‘shujlla Diosmi’ can

1, 2. a) ¿Imamandata Deuteronomio 6:4​pi shimicunaca rijsishcapacha can? b) ¿Imamandata Moisesca chai shimicunata nirca?

JUDIOCUNACA Deuteronomio 6:4​pi yuyaicunata japishpami shemá nishca oracionda ruran. Hebreo shimipi chai textota ricujpica, shemá nishca shimihuan callarijpimi judiocuna rurashca oraciondaca shemá nin. Judiocunaca shujlla Taita Diostami adoranchi ningapami chai oraciondaca ruran. Paicunaca ña unaitapachami cada tutamanda, cada chishi chai oracionbi shimicunataca de memoria nin.

² Deuteronomio 6:4​pi shimicunataca israelitacunamanda dispidiringapaj munashpami Moisesca Jesús shamungapaj 1473 huatacuna faltajuj punllacunapi nirca. Chai punllacunapi israelitacunaca Jordán yacucunata chimbashpa Jehová Dios carana alpacunaman ña chayangapami Moab llactapi carca (Deuteronomio 6:1). Moisesca 40 huatacunatami paicunataca ñaupaman pushajurca. Shinapash ña dispidirishpami israelitacunataca na manllanachu canguichi, Jehovapi confianami canguichi, Jehovata cazunami canguichi nishpa animarca. Shinapash ¿imamandata Moisesca shina nishpa animajurca? Israelitacunaca ashtaca llaquicunatami charigrinajurca. Chaimandami Diez Mandamientos nishcamandapash, shuj leycunamandapash parlashca jipaca Deuteronomio 6:4, 5​pi shimicunata yarichirca (chai textota liingui).

 3. ¿Ima tapuicunatata cai temapica yachajupashun?

³ Israelitacunaca paicunata mandaj Jehová Dios ‘shujlla Dios’ cashcataca alimi yacharca. Paicunapa punda tiempo taitacuna adorashca shujlla Taita Diostami adoran carca. Shinaca ¿imamandata Moisesca israelitacunataca nirca, Jehová Diosca ‘shujlla Diosmi’ can nishpa? Moisespa nishcahuan, Diosta tucui shunguhuan, tucui almahuan, tucui ushaihuan adoranahuanga ¿imatata ricunata charin? ¿Imamandata Deuteronomio 6:4, 5​pi shimicunata yarinaca ñucanchipapash ali can?

4, 5. a) Pundapica ¿imamandata Jehová Diosca ‘shujlla Diosmi’ can nin? b) ¿Imashinata Jehová Diosca chaishuj llacta dioscunamanda ashtahuan ali cashcata ricuchirca?

⁴ Jehová Diosca shujllami can. Tauca yuyaicunata intindichingapaj munashpami Bibliapica ‘shujlla Dios’ nin. Punda yuyaita ricupashun. ‘Shujlla Dios’ nishpaca, paishnalla Taita Diosca pipash na tianllu nishpami shina nin. Shinaca ¿Trinidad llulla cashcata ricuchingapachu Moisesca, Jehová Diosca ‘shujlla Diosmi’ can nijurca? Na. Jehová Diosmi jahua pachatapash cai Alpatapash rurarca. Paimi ashtahuan autoridadta charij jatun mandaj Taita Dios can. Pai shina shuj Diosca na tianllu (2 Samuel 7:22). Shinaca ‘shujlla Dios’ nishpaca Jehová Diostalla adorana cashcata yarichingapami Moisesca israelitacunamanga shina nirca. Chaishuj llactamanda gentecunashna yanga dioscunataca na adoranachu carca. Chai gentecunaca crinmi carca, yanga dioscunami cai Alpapi ima tiashcacunata controlan nishpa.

⁵ Huaquin ejemplocunata ricupashun. Egipciocunaca crinmi carca, Ra shuti diosmi Indipa dios, Nut shuti huarmi diosmi cielopa dios, Geb shuti diosmi cai Alpapa dios, Hapi shuti diosmi Nilo huaicupa dios can nishpa. Egipciocunaca animalcunatapashmi adoran carca. Shinapash Jehová Diosca egipciocunaman 10 plagacunata cachashpami, paicunapa dioscunaca yanga dioscuna cashcata, pailla tucuita yali Dios cashcata ricuchirca. Canaán llactamanda gentecunapaca Baal shuti diosmi ashtahuan jatun dios carca. Paicunaca crinmi carca, Baal yanga diosmi causaita caran nishpa. Shinallata crinmi carca, Baalmi cielotapash, tamiatapash, shinlli huairatapash controlajun dios nishpa. Ashtaca gentecunaca Baal paicunata cuidanataca tucui shunguhuanmi crin carca (Números 25:3). Shinapash israelitacunaca Jehová Dios ‘na llullaj Dios’ cajta, ‘shujlla Dios’ cajtami yarina carca (Deuteronomio 4:35, 39, Jeremías 10:10).

6, 7. a) ¿Imamandapashta ‘shujlla Dios’ nin? b) ¿Imashinata Jehová Diosca ‘shujlla Dios’ cashcata ricuchirca?

⁶ Jehová Diosca nunca na cambianllu, paica na saquinllu. Bibliata escribishca shimicunapi ‘shujlla Dios’ nishpaca ‘shuj Jehovallami’ can nishcami tiajun (Deuteronomio 6:4, NM). Chai shimicunaca ricuchinmi, Jehová Diosca siempre paipa nishcacunata pactachijta. Jehová Diosca nunca na cambianllu, pai imashina cajtaca alimi yachanchi. Paica nunca na saquinllu, nunca na llullanllu. Shuj ejemplota ricupashun. Abrahanmanga nircami, canba huahuacunami ñuca carasha nishca alpacunapi causanga nishpa. Chai shimicunataca pactachircami. Ashtaca milagrocunata rurashpami Abrahanman nishca shimicunataca 430 huatacuna jipa Jehová Diosca pactachirca (Génesis 12:1, 2, 7; Éxodo 12:40, 41).

⁷ Ashtaca huatacuna jipaca, ñucamanda villajcuna o ñucapa testigocunami canguichi nishpami, Jehová Diosca israelitacunataca nirca: “Ñucapaj pundaca, pi diospash na tiarcachu, ñucapaj jipallapash na tiangachu” nishpa. Ashtahuangarin paipa munaicuna nunca na cambiajta intindichunmi Jehová Diosca nirca: “Tucui tiempomi ñucallata cani” nishpa (Isaías 43:10, 13, NM; 44:6; 48:12). Imashinami ricupanchi, nunca na cambiaj, paipa nishcacunata siempre pactachij Jehová Diosta sirvina bendiciondami israelitacunaca charirca. Ñucanchicunapash chai bendiciondallatami charinchi (Malaquías 3:6; Santiago 1:17).

8, 9. a) Jehová Diosca paita sirvijcuna ¿imata rurachunda munan? b) Moisespa shimicuna importante cashcata ricuchingapaca ¿imatata Jesusca nirca?

⁸ Moisespa shimicunaca israelitacunata Jehová Dios juyanata, cuidanatami yarichijurca. Juyashpa cuidana cashpami Jehová Diosca israelitacuna paitalla adorashpa paita tucui shunguhuan, tucui almahuan, tucui ushaihuan juyachun munarca. Ashtahuangarin, taitamamacunapash huahuacunaman Jehovamanda siempre parlangapami esforzarina carca. Shinami huahuacunapash Jehovatalla adoranman carca (Deuteronomio 6:6-9).

⁹ Jehová Diosca pai rurasha nishcacunataca nunca na cambianllu. Chaimandami ñucanchicunapash israelitacunashna paitalla adorashpa paita tucui shunguhuan, tucui almahuan, tucui ushaihuan juyachun munan. Shinaca paita adorajpi ñucanchita alicachishpa ricuchunga pai munashcashnami adorana canchi. Jesuspash Jehová munashcashna adorana ashtahuan importante cashcatami yachachirca. Shina yachachishpami Jesusca, Moisespa nishca shimicuna importante cashcata ricuchirca (Marcos 12:28-31, liingui). Shinaca Jehová Dios ‘shujlla Dios’ cashcata ñucanchicuna crishcataca ¿imashinata ricuchita ushanchi? Ricupashun.

10, 11. a) Jehovatalla adorana nishpaca ¿imatata nisha nin? b) Chuscu hebreo jovengunaca ¿imashinata Jehovatalla adorashcata ricuchirca?

¹⁰ Ñucanchicunaca Jehovatallami adorana canchi. Shuj dioscunataca na adoranachu canchi. Ñucanchi yuyaicunahuan o panda yachachishcacunahuan chapushpaca Jehovataca na adoranachu canchi. Jehová Diosmi tucui chaishuj dioscunamanda ashtahuan ali, ashtahuan ushaita charij Dios can. Paillami ciertopacha Taita Dios can. Chaimandami Jehovatalla adorana canchi (Apocalipsis 4:11, liingui).

¹¹ Daniel libropica chuscu hebreo jovengunamandami parlan. Paicunaca Daniel, Hananías, Misael, Azarías shuticunami carca. ¿Imashinata paicunaca Jehovatalla adorashcata ricuchirca? Paicunaca Taita Dios na micunachu canguichi nishca micunacunata na micushpami, Jehovatalla adorashcata ricuchirca. Shinallata, Danielpa quimsa amigocunaca Babilonia llactamanda rurashca imagenba ñaupajpi cunguringapaca na munarcachu. Paicunaca Jehovatalla adorana cashcataca alimi yacharca. Chaimandami Jehovataca siempre cazurca (Daniel 1:1–3:30).

12. Jehovatalla adorangapaj munashpaca ¿imapita cuidadota charina capanchi?

¹² Jehovatami pundapica adorana canchi. Paitalla adorangapaj munashpaca shuj cosascunata ama pundapi churangapami cuidadota charina canchi. Shinaca ¿ima cosascunamandata cuidarina canchi? Diez Mandamientos nishcata israelitacunaman cujushpaca Jehová Diosca mandarcami, shuj dioscunataca na adoranachu canguichi nishpa. Paicunaca Jehovapa randica na imacunatapash adoranachu carca (Deuteronomio 5:6-10). Cunan punllacunapica na cuenta japishpami imapash cosascunatara adoranchiman. Shinapash Jehová Diosca nunca na cambianllu. Chaimandami paipa randi shuj cosascunatara adorachunga na munan. Jehová Diosca cunanbipashmi ‘shujlla Dios’ can. Shinaca yanga cosascunata imashina na adorana cashcata ricupashun.

13. Jehová Diospa ñaupajpi ali ricurishpa catingapaj munashpaca ¿imapita cuidadota charina capanchi?

¹³ Jehová Diospa ñaupajpi ali ricurishpa catingapaj munashpaca Colosenses 3:5​pi nishca cosascunamandami cuidadota charina canchi (chai textota liingui). Chai textopica nijunmi, charijyanata o imatapash ansiarishpaca na munanachu canguichi. Chaita munanaca yanga dioscunata adorajunshnallatami can nishpa. ¿Imamandata shina nin? Ashtaca ali cosascunata, culquita charingapaj munajpica chai munaimi ñucanchitaca shuj dios shina controlai callarin. Ashtahuangarin, imatapash ansiarishpa munaimandami Colosenses 3:5​pi nishca juchacunapi urman. Chai cosascunata ansiarishpa charingapaj munashpaca, chai cosascunatarami Taita Diospa randi juyai callarishun. Shina llaquipi urmashpaca yanga dioscunata adorajuj cuendami canchiman. Jehová Dios ñucanchipa ‘shujlla Dios’ cashcataca na ricuchinajushunllu. Chashna llaquipi urmanaca nalichu canman.

14. Apóstol Juanga ¿imata nishpata advirtirca?

¹⁴ Apóstol Juanbash advirtircami, ‘quiquin munaimanda, imatapash ricushcandi munaicunamanda, yangata jariyashpa causanamandaca’ cuidadota charinami canguichi nishpa. Ashtahuangarin nircami, chai cosascunata juyashpaca ‘Taita Diospa juyaica na paipi causajunllu’ nishpa (1 Juan 2:15, 16). Chaimandami ñucanchi shungupi imashina cashcapi cutin cutin pensarina canchi. Huaquinbica cai mundopi diversiongunata, gentecunata, paicuna imashina mudarijcunata, arreglarijcunatachari alicachishpa ricunajunchi. Huaquinbicarin, cai mundopi ‘jatun tucungapachari’ universidadcunaman ringapaj munanchi (Jeremías 45:4, 5). Shinapash ñallami Jehová Dios mandana mundoca chayamunga. Chaimandami Moisespa shimicunata yarina canchi. Jehová Dios ñucanchipa ‘shujlla Dios’ cashcata intindishpa, crishpaca paitalla adorashpami pai munashcashna sirvishun (Hebreos 12:28, 29).

15. ¿Imamandata apóstol Pabloca ‘shujlla Diostami’ charinchi nishpa Jesusta catijcunataca yarichirca?

¹⁵ ‘Shujlla Dios’ nishca shimicunaca Jehovata tucuilla sirvijcuna shujlla munaita charichun, tucuilla tandanajushca cachun Jehová Dios munashcatapashmi ricuchijun. Jesusta punda catijcunaca ashtacacunami judiocuna, griegocuna, romanocuna, shuj llactacunamandapash carca. Paicunaca shuj shuj costumbrecunata, yuyaicunatami charirca. Chaimandami huaquingunapaca, imata yachajushcata pactachina o punda ruraicunata saquinaca shinlli carca. Chaita ricushpami apóstol Pabloca ‘shujlla Diostami’ charinchi nishpa paicunataca yarichirca (1 Corintios 8:5, 6, liingui).

16, 17. a) Bibliapa ¿ima shimicunata cunan punllacunapi pactarijun? Chai shimicuna pactarishcamandaca ¿imata pasashca? b) ¿Imamandata shujllashna tandanajushca caitaca na ushanchiman?

¹⁶ Cunan punllacunapi Jesusta catijcunamanda parlashpaca profeta Isaiasca nircami, “tucurimui punllacunapica” tucui llactamanda gentecunami tandanajushpa Jehovata adoranajunga. Paicunaca ningami: ‘Pai munashcashna causanata yachajushpami, paipa ali ñangunata cati ushashun’ nishpa (Isaías 2:2, 3). Chai shimicuna pactarijujtaca cushijushpami ricunchi. Chaimandami cunanbica ashtaca llactacunamanda, shuj shuj shimita parlajcuna, shuj shuj costumbreta charij huauquipanicuna tian. Shinapash tucuicunami shujllashna tandanajushpa Jehovata adoranchi. Chai cushijuita charishpapash huaquinbica asha llaquicunatami charishcanchi.

¹⁷ Shuj ejemplota ricupashun. Shuj llactamanda shamushca huauquipanicunamandaca ¿imatata pensanchi? Huaquingunaca shuj shimita, shuj ropata, shuj micunacunata, shuj costumbrecunatami charin. ¿Paicunata ladoman saquishpachu llactapuracunahuanlla, ñucanchi costumbrecunata charij huauquipanicunahuanlla tandanajunchi? Joven ancianocunamanda, shuj costumbrecunata charij ancianocunamanda o shuj llactamanda ancianocunamandaca ¿imatata pensanchi? Na cuidadota charishpaca chaicunatara ricushpami tucuicunahuan shujllashna tandanajushca caitaca na ushashun.

18, 19. a) Efesios 4:1-3​pica ¿ima ali consejota tian? b) Tucuilla congregación shujllashna tandanajushca cachunga ¿imatata rurai ushapanchi?

¹⁸ Huauquipanicunahuan llaquicunata ama charingapaca Éfeso huauquicunaman apóstol Pablo cushca consejotami pactachina canchi. Éfeso llactaca charij llactami carca, chaipica shuj shuj costumbrecunata charij gentecunami causarca (Efesios 4:1-3, liingui). Pabloca humilde canamanda, ali shungu tranquilo canamanda, na fiñarinamanda, juyanamandami parlarca. Chai chuscu cualidadcunami shuj huasi shinlli cachun charijuj columnacunashnalla can. Shuj huasi ama huaglishpa parachunga ricuriashpami cuidana can. Chaimandami apóstol Pabloca Efesomanda huauquipanicunataca tucuilla shujllashna tandanajushca cangapami esforzarina canguichi nirca.

¹⁹ Congregacionbi huauquipanicuna shujllashna tandanajushca cachunga tucuicunami esforzarina canchi. Shinaca ¿imashinata esforzarishun? Pundapica apóstol Pablo nishca shinami, humilde cangapaj, ali shungu tranquilo cangapaj, na fiñaringapaj, juyangapaj esforzarina canchi. Chai jipaca congregacionbi tucuilla huauquipanicunahuan tranquilo ali canatami mascana canchi. Congregacionbi huauquipanicunapa fiñanajuicunaca huasi columna partirishcashnami can. Huauquipanicunahuan fiñanajuicunaca tucuilla huauquipanicuna shujllashna tandanajushca cachunga na saquinllu. Chaimandami shuj huauquihuan imapash problemata charishpaca ucha arreglana canchi. Shina rurashpami tucuilla huauquipanicunahuan tranquilo, shujllashna tandanajushca caita ushashun.

20. Jehová Dios ‘shujlla Dios’ cashcata intindishcataca ¿imashinata ricuchipanchi?

²⁰ Ñucanchi Jehová Diosca ‘shujlla Diosmi’ can. Chaita yachanami ñucanchitaca ashtacata animan. Israelitacunaca Jehová Dios ‘shujlla Dios’ cashcata yarishpami Jehová carasha nishca alpacunaman chayashpa contracunata mishangapaca fuerzata chari usharca. Ñucanchipash Jehová Dios ‘shujlla Dios’ cashcata yarishpami Ninan Manllanai Llaqui Punllacunamanda salvaringapapash, paraisopi tucuilla huauquipanicuna shujllashna tandanajushca cachun ayudangapapash fuerzata charishun. Shinaca Jehová Dios ‘shujlla Dios’ cashcataca ¿alichu intindinchi? Ali intindishpaca Jehovatalla adorashpa, paita tucui shunguhuan, tucui almahuan, tucui ushaihuan sirvishpa catishunchi. Shinallata congregacionbi tucuilla huauquipanicunahuan shujllashna tandanajushca cangapaj esforzarishpa catishunchi. Shina rurashpa catijpimi Jesusca paipa llamagucunatashna agllashpa ñucanchitaca ninga: ‘Ñuca Taita bendiciashcacuna shamupaichi’ nishpa (Mateo 25:34).