Bibliamanda yachajujcuna bautizarichun ayudapashunchi

 1. Apóstol Pedropash, paita cumbajcunapash ¿imatata Jerusalenman shamushca gentecunamanga nirca?

ASHTACA llactacunamanda gentecunami Jerusalenmanga chayashca carca. Paicunaca shican shican idiomacunatami parlan carca. Chai punllaca imahorapash na pasashcami pasarca. Cungashcapimi huaquin judiocunaca Jerusalenman shamushca gentecunapa idiomacunapi parlai callarirca. Huaquin judiocuna paicunapa shimipi parlai callarijpica chai gentecunaca manllarishcami quidarca. Pero ashtahuanbachaca apóstol Pedro paita cumbajcunapash imata nijta uyashpami manllarishcanga. Paicunaca Jesuspi feta churashpaca salvari ushashcatami intindichirca. Chai shimicunata uyashpami chaipi cashca gentecunaca: “Shina cashpaca, ¿imatata rurapashun, huauquicuna?” nirca. Shina nijpimi Pedroca: “Tucuicuna [...] bautizarichi” nirca (Hech. 2:37, 38).

 2. Cunanga ¿imatata yachajupashun? (Callari paginapi fotota ricupangui).

² Chai punllaca 3 mil gentecunami Jesuspa catijcuna tucushpa bautizarirca. Chai punllamandapachami Jesús mandashca shina Jesuspa discipulocuna tucuchun gentecunata ayudai callarirca. Cunanbipashmi chaitallata rurashpa catinajupanchi. Cunanbica na huaquin horascuna jipallachu pipash bautizarinlla. Pipash bautizarichunga huaquinbica huaquin quillacuna, shuj huata o maspashmi yalita ushan. Testigocunaca pipash Testigo tucuchunga ninanda esforzarina cashcataca alimi yachapanchi. Chaimi cunanga Bibliamanda yachajujcuna bautizarichun imashina ayudana cashcata yachajupashun.

 3. Mateo 28:19, 20​pi nishca shinaca Bibliamanda yachajujcunaca bautizaringapaca ¿imatata rurana can?

³ Nara bautizarishpallatami Bibliamanda yachajujcunaca Bibliapi yachajushcacunataca pactachina can (Mateo 28:19, 20​ta liipangui). Jesusca “aligutapacha yarishpa” shuj runagumandami parlarca. Cai runaguca huasichingapaca ucu ucuta allashpami rumicunata churashpa huasichirca. Bibliamanda yachajujcunaca imata yachajushcata pactachishpaca Jesús parlashca runagushnami canga (Mat. 7:24, 25; Luc. 6:47, 48). Cunanga Bibliamanda yachajujcuna Bibliapi yachajushcacunata pactachichun ayudangapaj 3 yuyaicunata yachajupashunchi.

 4. Bibliamanda yachajujcuna bautizaringacamanga ¿imashinata ayudaita ushapanchi? (“Bibliamanda yachajujcunataca metacunata churarichun, pactachichunbash ayudapashunchi” nishca recuadrotapash ricupangui).

⁴ Bibliamanda yachajujcunataca Jehová Diosta sirvingapaj metacunata charichun ayudapashunchi. Caita ruranaca ¿imamandata minishtirishca can? Caipi yuyapashunchi. Shuj carrota manejashpa shuj caru llactaman rinajupashcanchiman. Carreterata rijushpa ama yapata aburriringapaca talvez shuj juyailla pushtugucunata ricungapaj shayarishpandimi rinchiman. Shinami viaje na yapa caru cashcata sintipanchiman. Viaje rijuj cuendami Bibliamanda yachajujcunaca bautizaringacamanga Jehovata sirvingapaca huaquin cosasgucunata rurashpa catijuna can. Shina rurashpami ima punllapash bautizari ushashcata cuenta japinga. Bibliamanda yachajuj bautizaringapaj munachun o imapash metacunata churarichunga Cushilla causapashunchi nishca libromanda, “Caita rurapai” nishca recuadrotapashmi utilizaita ushapanchi. Shuj leccionda tucuchishca jipaca, ima metacunatalla churari ushashcatami parlaita ushapanchi. Shinallata shuj metatapash churarichun munashpaca “Caitapashmi ruragrini” nishca partegupipash escribichunmi animana capanchi. “Caitapashmi ruragrini” nishca partemanda yachajujushpaca Jehovata imashina ashtahuan sirvi ushashcatami parlai ushapanchi.

 5. Marcos 10:17-22​pica Jesusca ¿imatata charij jovengumanga nirca? Shinallata ¿imamandata chaitaca nirca?

⁵ Bibliamanda yachajujcunataca, paicunapa causaipi cambiogucunata rurachun ayudapashunchi (Marcos 10:17-22​ta liipangui). Jesusca shuj charij joven runagumanga shinlli cajpipash paipa tucui charishcacunata jatuchunmi nirca (Mar. 10:23). Jesusca ¿imamandata chaita nirca? Jesusca chai joven runaguta juyaimandami shina nirca. Huaquinbica Bibliamanda yachajujcunata paicunapa causaipi imapash cambiocunata rurachun ninaca na fácil canllu. Paicunaca na listo canllu yashpami chaigucunataca na ninchilla. Huaquinbica Jehová Dios mandashcashna mushuj causaiguta charinaca na fácil canllu. Cai cambiocunataca tiempohuanmi ruraita usharin (Col. 3:9, 10). Shinapash ñucanchica cai cambiocunamandaca uchallami parlana capanchi. Chaimi paicunapash paicunapa causaipica imapash cambiocunata ruraita ushanga. Ashtahuangarin cashnagucunamanda parlashpaca paicunata juyashcatami ricuchipashun (Sal. 141:5; Prov. 27:17).

 6. Bibliamanda yachajujcunataca ¿imamandata tapuicunata rurashpa yachachina capanchi?

⁶ Bibliamanda yachajujtaca pai imata yuyashcata, imata intindishcata, imata crishcata yachangapami huaquin tapuicunata rurana capanchi. Tapuicunata shinashpami jipacunamanga imapash temacunamanda fácil parlaita ushapashunlla. Cushilla causapashunchi libropica Bibliamanda yachajujta pensachingapaj tapuicunami tian. Por ejemplo, lección 4​pica: “Jehová Diosta shutipi quiquin parlajpica ¿imashinashi paica sintiringa?”. Lección 9​pica: “Quiquinga ¿imacunamandallata mañapanguiman?” nishca tapuicunami tiapan. Callaripica Bibliamanda yachajujca ñucanchicuna pai imata yuyashcata tapujpica, na ñapash contestangallachu. Chaimi ñucanchica pacienciahuan paitaca uyana capanchi. Cashna tapuicunata contestachunga Bibliapa textocunapi pensachun, imata yachajujushca leccionbipash dibujocunata ricushpa contestachunmi ayudana capanchi.

 7. Bibliamanda yachajujta ayudangapaca ¿imashinata shuj huauquipanicunapa experienciacunataca utilizaita ushapanchi?

⁷ Paipa causaipi Bibliamanda yachajuj ima cambiocunatalla ruranata cuenta japijpica, chai cambiocunata rurachunmi animana capanchi. Chaipaca shuj huauquipanicunapa experienciacunamandami parlaita ushapanchi. Por ejemplo, tandanajuicunaman ringapaj na ashta munajujpica, Cushilla causapashunchi libropi lección 14​pi “Caitapash ricupai” nishca partemanda Jehová Diosca ninandami ñucataca llaquin nishca videota ricuchipangui. Cai libropa lecciongunapica “Ashtahuan Yachajupashunchi” o “Caitapash ricupai” nishca partecunami tian. Cai partecunapica huaquin experienciacunami tian.b Bibliamanda yachajujcunataca: “Paica paipa causaipica cambiocunata rurai usharcami, quiquinbash rurai ushanguimi” nishpaca na shujcunahuanga comparajunachu capanchi. Chaipa randica, paillata paipa causaipi cambiocunata rurai ushashcata cuenta japichun ayudapashunchi. Videopi parlashca huauquita o panita paipa causaipi cambiachun Bibliapa shuj texto o ima ayudashcata cuenta japichun ayudapashunchi. Ashtahuangarin Jehová Dios chai huauquita o panita imashina ayudashcata ricuchunbash ayudapashunchi.

 8. Jehová Diosta juyachunga ¿imashinata Bibliamanda yachajujcunataca ayudai ushapanchi?

⁸ Bibliamanda yachajujcunataca Jehová Diosta juyachun ayudapashunchi. Ñucanchicunaca Jehová Dios imashina cajta yachachingapapashmi tiempoguta llujchina capanchi. Jehová Dios shuj cushi Dios cashcata, ñucanchicunata siempre cuidajushcatapashmi yachachina capanchi (1 Tim. 1:11, TNM ; Heb. 11:6). Chashnallata Bibliapa yachajushcacunata paicunapa causaipi pactachishpaca paicunallata beneficiari ushashcatapashmi intindichina capanchi. Caicunata yachachishpaca Jehová Dios ñucanchita juyashcata ricuchijujtapashmi intindichina capanchi (Is. 48:17, 18). Bibliamanda yachajujcunaca, Jehová Diosta ashtahuan juyashpaca ashtahuanmi paicunapa causaipi cambiocunata rurangapaj munanga (1 Juan 5:3).

 9. Bibliamanda yachajuj bautizarichunga ¿imashinata Marcos 10:29, 30​pi shimicunaca ayudan?

⁹ Bautizaringapaj munashpaca Bibliamanda yachajujcunaca huaquin cosascunatami huashaman saquina tucunga. Huaquingunaca párrafo 5​pi parlashca charij jovenshnami talvez paicuna charishca cosascunatapash saquina tucunga. Talvez huaquingunaca Jehová Dios nalicachishca trabajocunapimi trabajanajunga. Chaimi chai trabajocunatapash saquina tucunga. Shinallata Jehová Diosta na juyaj amigocunatapashmi saquina tucunga. Shujcunatacarin, testigo de Jehovacunahuan Bibliamanda yachajunajujpimi familiacunaca contrashpa ricunga. Cai tucui cosascunata huashaman saquina shinlli canataca Jesusca ñami villashca carca. Shinapash Jehová Diosta sirvingapaj decidijpica Jehová Diosca shuj juyaj familiata cusha nircami (Marcos 10:29, 30​ta liipangui). Bibliamanda yachajuj cai bendicionda chasquichunga ¿imashinata ayudaita ushapanchi?

10. Huauqui Manuelpa experienciamandaca ¿imatata yachajupanchi?

¹⁰ Bibliamanda yachajujcunahuan ashtahuan ali amigocuna tucupashunchi. ¿Imamandata paicunapi preocuparishcataca ricuchina capanchi? Mexicomanda Manuel shuti huauquica pai Bibliamanda estudiajuj tiempopi ima pasashcatami parlan. Paica ninmi: “Ñucata yachachij huauquiguca siempremi, alillachu cangui nishpa tapuhuan carca. Shina tapujpimi ñucaca tranquilo, ali sintirishpa imatapash paimanga parlanlla carcani. Pai ñucamanda ciertopacha preocuparishcatami ricun cariani” nin.

11. Bibliamanda yachajujcunahuan tiempota yalinaca ¿imamandata ali can?

¹¹ Jesusca paipa discipulocunahuanmi tiempota yalin carca. Shinallatami ñucanchicunapash Bibliamanda yachajujcunahuan tiempota yalina capanchi (Juan 3:22). Bibliamanda yachajushcacunata asha asha paipa causaipi pactachijujta ricushpaca, ñucanchipa huasiman imagutapash micungapaj o cafegutapash ufiangapaj o JW Broadcasting programata ricungapami invitaita ushapanchi. Talvez mundopi fiestacunata ruraj horascunapimi paicunataca invitaita ushapanchi. Chai horascunapimi paicunaca sololla sintirinajunga. Shina invitajpica paicunaca cushijungami. Uganda llactamanda Kazibwe shuti huauquica ninmi: “Bibliamanda ñucata yachachij huauquihuan yalishpaca Jehová Dios paipa sirvijcunata ninanda valichishcatami yachajurcani. Shinallata Jehovata cushilla sirvishpa causajtapashmi ricurcani. Ñucapash shinallata causangapami munarcani” nin.

12. Shuj estudiomanga ¿imamandata shuj shuj huauquipanicunata pushanaca ali can?

¹² Shuj shuj huauquipanicunata estudioman pushapashunchi. Huaquinbica talvez ñucanchilla o shuj huauquihuanlla o paniguhuanlla rinatami gushtapanchi. Chaita rurana alishnalla cajpipash Bibliamanda yachajujca shuj shuj huauquipanicunata pushajpimi ashtahuan beneficiaringa. Moldavia llactamanda Dimitri shuti jarica ninmi: “Ñucata yachachij huauquica shuj shuj huauquipanicunahuanmi shamun carca. Cada unomi imagutapash yachachishpaca de diferente manera explicahuan carca. Shuj shuj huauquipanicunamanda yachajunami ñucataca Bibliamanda ashtahuan yachajushpa catichun ayudahuarca. Chaimi tandanajuiman primera vez rishpaca na pinganayachircani. Porque ña tauca huauquipanicunatami ña rijsircani” nin.

13. ¿Imamandata Bibliamanda yachajujtaca tandanajuicunaman invitana capanchi?

¹³ Bibliamanda yachajujcunataca tandanajuicunaman shamuchun ayudapashunchi. ¿Imamandata tandanajuicunaman invitana capanchi? Jehová Diosmi ñucanchitaca tandanajunami canguichi nishpa mandan. Shinami Jehovata adoranajushcataca ricuchinajupanchi (Heb. 10:24, 25). Congregacionmanda huauquipanicunaca ñucanchi familiacunami can. Paicunahuan reuniongunapi cashpaca, ñucanchi propio familiacunahuan shuj jatun micuipi tandanajushcashnami capanchi. Bibliamanda yachajujcunata tandanajuicunaman invitashpaca, paipash imahorapash bautizari ushachunmi ayudanajupashun. Pero huaquinbica reunionman ringapaca imapash jarcaitami charita ushan. Shina pasajujpica ¿imashinata Cushilla causapashunchi librohuanga ayudaita ushapanchi?

14. Tandanajuicunaman invitachunga ¿imata ayudanga?

¹⁴ Tandanajuicunaman ri callarichunga Cushilla causapashunchi libropa lección 10​tami utilizaita ushapanchi. Cai librota nara presentajpica huaquin huauquipanicunami cai librotaca paicunapa Bibliamanda yachajujcunahuan utilizarca. Chaita utilizashcamandaca ashtaca experienciacunami tiarca. Pero lección 10man chayangacamanga na shuyanachu capanchi. Estudiocunataca callarimandami cutin cutin reunionmanga invitanalla capanchi. Cada Bibliamanda yachajujmi diferente can. Cada unomi shuj shuj problemacunata charin. Chaimi cada unota ayudangapaca aliguta pensarishpa, imashina ayudanata ricuna capanchi. Reuniongunaman na shamujpipash na desanimarinachu capanchi. Pacienciahuanmi huaquinbi huaquinbica invitashpa catinalla capanchi.

15. Bibliamanda yachajujcunaca ¿imatata manllaita ushanman?

¹⁵ Ñucanchicuna Bibliamanda yachajui callarishpaca Testigo tucunataca ninandami manllan carcanchi. Huaquinbica huasin huasin villachingapapash na usharingachu yashpami pensaripashcashun. O talvez ñucanchi familiacunapash, amigocunapash ñucanchi contrami shayaringa yashpapashmi pensaripashcashun. Caicunata yarinami ñucanchicuna Bibliamanda yachajujcuna imashina sintirijushcata intindichun ayudanga. Jesusca ñucanchicuna villachinata manllai ushashcataca ñami villashcarca. Shinapash chai manllaicuna Jehová Diosta sirvinata jarcachunga na saquinachu canguichi nircami (Mat. 10:16, 17, 27, 28). Jesusca ¿imashinata paipa discipulocunataca chai manllaicunata mishachun ayudarca? ¿Imashinata ñucanchicunapash chaitallata rurai ushapanchi?

16. Shujcunaman parlai ushachunga ¿imashinata Bibliamanda yachajujtaca ayudai ushapanchi?

¹⁶ Bibliamanda yachajujcunataca ashagu ashagu Bibliamanda shujcunaman parlachun ayudapashunchi. Jesusca paipa discipulocunataca villachinami canguichi nishpami mandarca. Shina mandajpica, paicunaca villachinataca manllashcangami. Pero Jesusca imashina, picunaman, imata ninatapashmi yachachirca (Mat. 10:5-7). Ñucanchicunaca Jesuspa ejemplota catishpami, Bibliamanda yachajujcunataca paicuna picunaman villachi ushashcata yachachi ushapanchi. Paicunataca caitami ni ushapanchi: “Quiquinba rijsicunamandaca ¿nachu pipash Bibliamanda o cai temamanda yachajungapaj munanman?” nishpa. Jipamanga, paipa rijsiman Bibliamanda paillata imashina yachachi ushashcatami yachachi ushapanchi. Usharijpicarin Cushilla causapashunchi libropi “Huaquingunaca ... ninmi” y “Huaquingunaca ... nishpami tapuchita ushan” nishca partecunatapash utilizashpa villachichunmi ayudaita ushapanchi. Cai partecunata utilizashpami Bibliamanda yachajujtaca Bibliata aliguta utilizashpa shujcunaman yachachi ushachun ayudapashun.

17. Mateo 10:19, 20, 29-31​pi shimicunahuanga ¿imashinata estudiocunataca Jehová Diospi confiachun ayudaita ushapanchi?

¹⁷ Jehová Diospi confiachun ayudapashunchi. Jesusca paipa discipulocunataca, Jehová Diosca quiquingunata juyaimandaca ayudangallami nircami (Mateo 10:19, 20, 29-31, liipangui). Bibliamanda yachajujtaca paitapash Jehová Dios ayudanatami yarichina capanchi. Jehová Diospi confiachunga paihuan Jehovata mañajushpaca paipa metacunamandapashmi mañaita ushapanchi. Polonia llactamanda Franciszek shuti huauquica ninmi: “Ñucata yachachij huauquica Jehovata mañajushpaca, Jehová Diosta ñuca sirvingapaj munaimanda ima metacunatalla charishcamandami parlan carca. Jehová Dios imashina paipa mañaicunata contestajta ricushpaca ñucapashmi shinallata mañai callarircani. Shina mañashpaca Jehová Dios ñucata ninanda ayudajtami cuenta japircani. Por ejemplo, ñuca mushuj trabajopica reuniongunaman, asambleamanbash ringapami huaquin día librecunata mañarcani. Chaipimi Jehová Dios ñucata imashina ayudajta cuenta japircani” nin.

18. Bibliamanda yachajujcunata ayudangapaj esforzarijpica ¿imashinata Jehová Diosca sintirin?

¹⁸ Shinapash cunan rato pimanbash Bibliamanda na yachachijushpaca, Bibliamanda yachajujcunataca ¿imashinata bautizarichunga ayudaita ushapanchi? Ñucanchicunaca shuj huauquipanicunatami paicunapa estudiogucunaman cumbaita ushapanchi. Chaita rurashpapashmi Bibliamanda yachajujcuna bautizarichunga ayudaita ushapanchi. Jehová Diosca tucui Bibliamanda yachajujcunapimi preocuparin. Jehová Diosca ñucanchicuna Bibliamanda yachajujcunata ima modospash ayudangapaj esforzarijpica ninandami cushijun (Is. 52:7).