Jehová Dios llaquinshnami llaquina canchi

 1. a) Moisesman ricurishpaca ¿imatata Jehová Diosca pundapica nirca? b) ¿Imata cuenta japichunda, Jehová Diosca shina nirca?

SHUJ punllaca, Moisesman ricurishpami Jehová Diosca paipa shutitapash, pai imashina cashcatapash villarca. Tucui ushaita, ali yachaita charij Taita Dios cashcata pundapi villanapa randica, llaquij, juyaj Taita Dios cashcatami pundapica villarca (Éxodo 34:5-7, liingui). Moisesca, Jehová Dios paita ciertopacha ayudangapaj munajushcata yachangapami munarca. Chaimandami Jehová Diosca, paita sirvijcunata ciertopacha ayudangapaj munajushcata cuenta japichun nirca, ñucaca llaquij, juyaj Diosmi cani nishpa (Éx. 33:13). Jehová Dios ñucanchipi preocuparijujta yachashpaca, munailla, alimi sintirinchi. Cai temapica, shujcunata llaquinatami yachajupashun. Llaquijcunaca, shujcuna sufrinajujta ricushpaca, paicunapashmi llaquirin, ayudangapami munan.

 2. ¿Imamandata shujcunata llaquishcata ricuchi ushapanchi?

² Imashinami ricupanchi, Jehová Diosca llaquij Diosmi can. Ñucanchicunataca paiman rijchajtami rurarca. Chaimandami gentecunaca Jehová Diosta na rijsishpapash, shujcunata llaquishcata ricuchinchi (Gén. 1:27). Bibliapica, shujcunata llaquij gentecunamandami parlan. Rey Salomonba punllacunapi ima pasashcata yaripashun. Ishcai huarmicunami shuj huahuata quichurinajurca. Chaimandami rey Salomonga, chai huahuataca chaupishpa, cada unoman chaupi chaupi cuchun mandarca. Chaita uyashpami, ciertopacha mamaca, huahuaguta ama huañuchichun nishpa, chaishuj huarmiman cupaichilla nirca (1 Rey. 3:23-27). Shinallata, Egipto llactamanda faraonba ushita yaripashun. Paica, yacu manñapi Moisesta tarishpaca, chai llullu huahuagu hebreo cajta, paita na salvana cashcataca alimi yacharca. Shinapash, chai “llullu huahuaguta llaquishpami”, paitaca paipa huahuatashna viñachingapaj japirca (Éx. 2:5, 6).

 3. ¿Imamandata, shujcunata llaquinamanda yachajuna capanchi?

³ Bibliapica yachachinmi, Jehová Diospa ejemplota catishpami shujcunata llaquina canguichi nishpa (Efes. 5:1). Shujcunata llaquichunmi, Jehová Diosca ñucanchita rurarca. Chaimandami shujcunata llaquina canchi. Shinapash juchayucuna caimandaca, ñucanchipilla pensarinatami yachanchi. Huaquinbica, ishcai shungu tucushpami pensarinchi, shujcunata ayudashachu, o ñuca munashcatachu rurasha nishpa. Shujcunata ashtahuan llaquichunga ¿imata ayudanga? Pundapica, Jehová Diospash, shuj gentecunapash shujcunata imashina llaquishcata yachajupashun. Chai jipaca, Jehová Diospa ejemplota imashina catinata, shujcunata llaquina imamanda ñucanchipallata ali cajtapash yachajupashun.

 4. a) ¿Imamandata Jehová Diosca angelcunata Sodoma llactaman cacharca? b) Lotmanda, paipa familiamanda parlashpaca ¿imatata Jehová Diosmandaca yachajupanchi?

⁴ Bibliapica cutin cutinmi parlan Jehová Diosca juyaj Taita Diosmi can nishpa. Lot shuti runaguta imashina llaquishcata ricupashun. Lotca alita ruraj runagumi carca. Sodoma, Gomorra llactacunapi nalicunata ruranajujta ricushpami, Lotca ninanda llaquirijurca. Chai gentecuna jatun nalicunapacha cajpimi, Jehová Diosca paicunata tucuchigrijurca (2 Ped. 2:7, 8). Shinapash Lotta salvangapami Jehová Diosca angelcunata Lotpaman cacharca. Angelcunaca, cai llactacunata Jehová Diosca tucuchigrinmi, canbash canba familiapash caimanda rinami canguichi nishpami villarca. Paicuna ‘na ucha llujshijpimi, angelcunaca Lottapash, paipa huarmitapash, paipa ishcandi ushicunatapash maquimanda japishpa pueblomanda llujchirca’ (Gén. 19:16). Imashinami ricupanchi, Jehová Diosca paita sirvijcuna ima llaquicunata charijtaca ricujunmi (Is. 63:7-9; Sant. 5:11; 2 Ped. 2:9).

 5. Bibliapa 1 Juan 3:17​pica ¿imatata llaquinamandaca yachajupanchi?

⁵ Jehová Diosca ñucanchita llaquishpapash, shujcunata imashina llaquinatapashmi yachachin. Israelitacunaman cushca shuj leyta yaripashun. Leypi nishca shinaca, shuj israelita shuj cumba runaguman culquita mañachishpaca, chai runagupa churajunata prenda japinallami carca (Éxodo 22:26, 27, liingui). Chai prenda japishcata, ama japishpa quedachun, tutayajpi churajuna illaj ama quedachunmi, Jehová Diosca mandarca, “nara indi huashajujpillatami” paipa churajunataca tigrachina cangui nishpa. ¿Imatata yachajupanchi? Shuj huauqui ayudachun minishtijujpi ayudai ushashpaca, ayudanami canchi (Col. 3:12; Sant. 2:15, 16; 1 Juan 3:17, liingui).

 6. Israelitacuna na cazujpipash, Jehová Dios paicunata llaquishcamandaca ¿imatata yachajupanchi?

⁶ Israelitacuna na cazujpipashmi, Jehová Diosca paicunata llaquirca. Bibliapica ninmi: “Paicunapaj ñaupa taitacunata Mandaj Taita Diosca, pai agllashca gentecunatapash, paipaj huasitapash llaquishpami, pai ima nishcata villajcunahuan cutin cutin villachijurca” nishpa (2 Crón. 36:15). Ñucanchicunapash, Jehová Diosta na rijsij gentecunataca llaquinami canchi. Paicunaca arripintirishpa, Jehová Diosman quimiringapaca tiempota charinrami. Jehová Diosca shujllapash ama tucuchi tucuchunmi munan (2 Ped. 3:9, NM). Chaimandami, shuj gentecunatapash Jehová Dios llaquishpa perdonachunga, tiempo tiajpillata villachishpa catina capanchi.

7, 8. ¿Imashinata shuj familiaca Jehová Dios llaquishcata cuenta japirca?

⁷ Cunan punllacunapica, ashtaca Testigocunami Jehová Dios paicunata llaquishcata cuenta japishca. 1990 callari huatacunapi ima pasashcata ricupashun. Chai punllacunapica Bosnia llactapimi shuj guerra tiarca. Chai punllacunapica, tauca Testigocunami Bosnia llactamanda Serbia llactaman buspi rinajurca. Paicunapurapica, 12 huatacunata charij Milan shuti huambragupash, paipa huauquipash, paipa taitamamapashmi jatun tandanajuiman rinajurca. Paipa taitamamaca bautizarigrinajurcami. Shinapash, fronterapica shuj razamanda cashcamandami, Milandapash, paipa familiatapash busmanda uriajuchishpa, chaipi quedachirca. Ishcai punllacuna jipaca, soldadocunata mandajmi paita mandajtaca radiopi cayashpa tapurca, imatata paicunahuanga rurashun nishpa. Shina nijpimi, paicuna uyajta nirca: “Canllaman llujchishpa, disparashpa saqui” nishpa.

⁸ Shina ninajujpillatami, Milanba familiaman ishcaipura quimirishpa alillaguta nirca: “Ñucanchica testigo de Jehovacunami canchi. Buspi rinajuj huauquicunami ima pasashcata villarca” nishpa. Jipamanga Milandapash, paipa huauquitapashmi nirca, fronterata yalingapaca carroman vitsaichi, huahuacunapa papelcunataca na mañajunllu nishpa. Chai jipami, Milanba taitamamatapash nirca: “Cangunaca, papelcunata revisajuj pushtu huashata richilla” nishpa. Shina nijta uyashpami Milanga, ashataca huacangapaj o ashataca asingapaj munarca. Milanba taitamamaca nircami: “Ñucanchita richun saquinataca na crinchichu” nishpa. Shina nishpapash, chaishuj llactamanmi chimbai callarirca. Soldadocunaca ricunajujshnalla cashpapash, na ricurcachu. Shinami Milanga, paipa familiahuan chaishuj llactapi tuparishpa jatun tandanajuiman rirca. Paicunaca Jehová Dios paicunata uyashcataca seguromi carca. Bibliapi nishca shinaca, na siempre Jehová Diosca shina cuidanllu (Hech. 7:58-60). Shinapash Milanga ninmi: “Angelcunami chai soldadocunataca ñausayachishca yarin, Jehová Diosmi salvarca” nishpa (Sal. 97:10).

 9. Paita catinajuj gentecunata ricushpaca ¿imashinata Jesusca sintirirca? (Callari dibujota ricupangui).

⁹ Jesuspa ali ejemplomandapashmi yachajuita ushanchi. Shuj punllaca, paita catinajuj gentecuna “michij illaj jichushca llamacunashna causanajujta ricushpami Jesusca, paicunata ninanda llaquirca”. Chaimandami ‘tucuillacunaman yachachi callarirca’ (Mat. 9:36; Marcos 6:34, liingui). Chai punllacunapi fariseo nishcacunaca, shujcunata ayudangapaca nimamanda na munanllu carca. Shinapash Jesusca na chai fariseocunashna carcachu (Mat. 12:9-14; 23:4; Juan 7:49). Shinaca ¿Jesuspa ejemplota catishpachu, Jehová Diosta rijsingapaj munajcunataca tucui shunguhuan ayudangapaj munanchi?

10, 11. ¿Siemprechu gentecunata llaquishcata ricuchina capanchi? Intindichipai.

¹⁰ Shinaca ¿siemprechu shujcunata llaquishcata ricuchina capanchi? Na. Jehová Diospa ejemplota ricupashun. Rey Saultaca, Amaleq llactamanda gentecunatapash, paicunapa animalcunatapashmi huañuchina cangui nishpami mandarca. Shinapash Saulca chai llactamanda reytapash, juyailla gushtu animalcunatapash na huañuchircachu. Paica pensashcangami, shujcunata llaquishcatami ricuchijuni nishpa. Shinapash Jehová Diosca, paita na cazushcamandami, Saúl rey cashpa catichunga ñana munarca (1 Sam. 15:3, 9). Jehová Diosca ali ricushpa juzganata yachaj Juezmi can. Paica, gentecunapa shungu imashina cajtaca alimi yachan. Chaimandami ima hora llaquishcata ricuchinataca ali yachan (Lam. 2:17; Ezeq. 5:11). Ñallami Jehová Diosca paita na cazungapaj munajcunata tucuchinga (2 Tes. 1:6-10). Chai punlla chayamujpica, paita na cazujcunataca na llaquingachu. Paita sirvijcunata llaquishcata ricuchingapaj, salvangapami na cazujcunataca tucuchinga.

¹¹ Ñucanchicunaca, Jehová Dios picunata tucuchinata, picunata salvanata nina derechotaca na charinchichu. Chaipa randica, gentecuna salvarichunmi, cunanllata ayudangapaj esforzarina canchi. Shinaca ¿imashinata shujcunata llaquishcata ricuchi ushapanchi? Huaquin yuyaicunata ricupashun.

12. ¿Imashinata shujcunata llaquishcata ricuchi ushapanchi?

¹² Imagupipash ayudangapaj esforzarishunchi. Jesusta catijcunaca, huauquipanicunatapash shuj gentecunatapash llaquinami canchi (Juan 13:34, 35; 1 Ped. 3:8). Llaquijcunaca, paicunapash chai llaquipi cashcashnallata sintirishpami, ayudangapaj munan. Chaimandami shujcunata ayudangapaj esforzarina canchi. ¿Imashinata ayudashun? Huasipi ayudachun, o imagutapash randishpa ayudachun pipash minishtijujpica, chai cosascunapipashmi ayudaita ushapanchi (Mat. 7:12).

13. Llactapi jatun llaquicuna tiajpica ¿imashinata huauquipanicunaca shujcunata llaquishcata ricuchin?

¹³ Llactapi jatun llaquicuna tiajpi ayudashunchi. Huaquin llactacunapica, terremotocuna, ushashcata tamiaicuna shuj llaquicunapashmi tian. Chaimandami ashtaca huauquipanicunaca paicunata llaquishcata ricuchin. Testigo de Jehovacunaca, chashna llaquicunapi ayudashcamandami rijsishcacuna can (1 Ped. 2:17). Japón llactapica, 2011 huatapimi shuj terremotopash, jipaca marpi yacucuna jahuata jatarishpa shuj llactata tucuchirca. Chaipi causajuj shuj paniguca, Japonmandallata, o caru llactacunamanda huauquipanicuna shamushpa, huauquipanicunapa huasicunata, Tandanajui Huasicunatapash arreglashpa ayudanajujta ricushpami animarirca. Paica cashna nishpami escribirca: “Ayudanajujta ricushpami, Jehová Dios ñucanchita juyajta cuenta japircani. Shinallata, Testigocuna randimanda llaquirijta, mundo enteropi ashtaca huauquipanicuna ñucanchimanda mañanajujtami cuenta japircani” nishpa.

14. ¿Imashinata mayorllagucunatapash, ungushcacunatapash ayudai ushapanchi?

¹⁴ Mayorllagucunata, ungushcacunata ayudashunchi. Mayorllagu caimanda, ungushca caimanda sufrinajujta ricushpaca, ninandami llaquirinchi. Jehová Diostapash tucui shunguhuanmi mañanchi, cashna llaquicuna ama tiachun canba Reino uchalla shamushpami ali canman nishpa. Shinapash, chaicamanga ayudachun minishtinajujcunata ayudangapami esforzarinchi. Shuj escritorca, paipa mama ima pasashcata parlashpami nin: “Ñuca mamitaca Alzheimer nishca ungüitami charin. Paica bañoman na ucha chayai ushashpami mapayashcarca. Limpiangapaj atirijujpimi, paita visitanajuj ishcai panigucunaca punguta huactachishcarca. Ima pasashcata ricushpami, chai panigucunaca ayudashunllu nirca. Shina nijpimi chai mishaguca nirca: “Pinganayahuanmi, shinapash pagui ayudahuaichilla” nishpa. Ari nijpi ayudashca jipapash, shuj taza cafeguta rurashpami paihuan parlashpa quedarca. Chai mishagupa churica nircami: “Paicunaca imatami villachishca purinajun chaitallatami pactachinajun. Alipacha panigucunami cashca” nishpa. Shinaca ¿nachu mayorllagucunata, ungushcacunata ayudangapaj munana capashcanchi? (Filip. 2:3, 4).

15. ¿Imamandata shujcunaman villachishpa, yachachishpaca paicunata llaquishcata ricuchinajupanchi?

¹⁵ Jehová Diosta rijsichun ayudashunchi. Cunanbica ashtaca gentecunami problemacunahuan, llaquicunahuan causanajun. Paicunataca Jehová Diosmanda yachachishpa, Jehová Diospa Reino mandashpa tucui llaquicunata tucuchinata yachachishpami ayudaita ushanchi. Shinallata, Jehová Diosta cazuna imashina paicunapallata ali cashcatami yachachita ushanchi (Is. 48:17, 18). Villachishpa, yachachishpami Jehová Diosta alicachishcata, shuj gentecunatapash llaquishcata ricuchi ushanchi. Villachingapaj, yachachingapaj ashtahuan esforzarishpaca, alipachami canman (1 Tim. 2:3, 4).

16. ¿Imamandata shujcunata llaquinaca ñucanchipallata ali can?

¹⁶ Huaquin doctorcunaca ninmi, shujcunata llaquijcunaca, ashtahuan sanomi causan, shujcunahuanbash ashtahuan alimi llevarin nishpa. Sufrinajujcunata ayudashpaca, ashtahuan cushillami sintirishun, na ñucanchilla sintirishunllu, llaqui yuyaicunatapash na charishunllu. Imashinami ricupanchi, shujcunata llaquishcata ricuchinaca alipachami can (Efes. 4:31, 32). Jehová Diosca shujcunata juyachun, paicunata juyashcata ricuchingapaj esforzarichunmi munan. Jehová Dios munashcata rurashpaca, concienciapipash alimi sintirishun. Shinallata, ali taitamamacuna, ali cusahuarmicuna, ali huahuacunami cashun. Ashtahuangarin, shujcunata llaquijpimi, shujcunapash randi ñucanchi minishtinajujpica llaquishpa ayudan (Mateo 5:7; Lucas 6:38, liingui).

17. ¿Imamandata quiquinga shujcunata llaquingapaj, paicunata llaquishcata ricuchingapaj munapangui?

¹⁷ Jehová Diosca juyaj, llaquij Diosmi can. Chaimandami shujcunata llaquishcata ricuchina ñucanchipallata ali cajpipash, ashtahuanbachaca Jehová Diospa ejemplota catingapaj munaimanda, paita alabangapaj munaimanda shujcunata llaquishcata ricuchinchi (Prov. 14:31). Jehová Diospa ejemplota ashtahuan ali catingapaj esforzarishpami, ñucanchi huauquipanicunaman ashtahuan quimirishun, shujcunahuanbash ashtahuan ali llevarishun (Gál. 6:10; 1 Juan 4:16).