Na yashcapi shuj ungui japijpica ¿imatata rurai ushanchi?

¿Na yashcapi quiquinda shuj ungui japishcachu? Shina pasashcajpica, shuj ungui japijpica mentalmente, emocionalmente shaijushcami sintirinchi. Culquipash ashtacami gashtarin. Shinaca ¿imata cai llaquita aguantachun ayudanga? Shuj familia o shuj amigo cashna llaquita pasajujpica ¿imashinata ayudai ushanchi? Bibliaca unguicunata imashina jambinamanda na parlaj libro cashpapash, shuj llaqui japijpi imata rurai ushashcata yachachunmi alipacha consejocunata cun.

Shuj ungui japijpi ñaupaman catingapaj consejocuna

Doctorpaman ripai.

Bibliapica ninmi: “Sano gentecunaca doctortaca na minishtinllu. Pero ungushca gentecunaca minishtinmi” nishpa (Mateo 9:12).

¿Imatata nisha nin? Doctorpaman rina minishtirijpica doctorpa ayudata mascanami can.

Caita rurapai. Quiquin minishtishca tratamientota mascapai. Huaquinbica quiquinba unguimanda shuj doctorcunapash imata nishcatami yachana capangui (Proverbios 14:15). Doctorcunahuan ali comunicacionda charingapami esforzarina cangui. Doctorcuna imata nishcataca alimi intindina cangui. Shinallata quiquinba unguicunapa sintomacunata doctorcunapash ali intindijushcatami seguro cana cangui (Proverbios 15:22). Quiquin charishca unguitaca alimi rijsina cangui. Ima tratamientocunalla tiashcatapashmi yachana cangui. Quiquin ima unguitapacha charishcata ali yachashpaca, chai unguita imashina aguantana cashcata yachashpami emocionalmente preparado sintiringui, ali decisiongunatapash japi ushangui.
Ali saludta charingapaj esforzaripai.

Bibliapica ninmi: ‘Ejerciciota ruranaca alimi can’ nishpa (1 Timoteo 4:8).

¿Imatata nisha nin? Ali saludta charingapaj esforzaripai. Por ejemplo, ejerciciota rurapai.

Caita rurapai. Ejerciciota siempre rurangapaj, ali alimentaringapaj, suficienteta puñungapaj esforzaripai. Ungushca cashpapash, estudiashcacunaca ali saludta charingapaj esforzarinaca alipachami can ninmi. Shinapash, imacunatalla rurajushca quiquinba saludta, tratamiento ama huaglichichunmi ali ricuna cangui.
Quiquinba amigocunapa ayudata mascapai.

Bibliapica ninmi: “Ali cumbaguca paipaj cumbataca, tucui causaipimi juyajun. Llaqui punllacuna japijpipash, quiquin huauquitashnami llaquin” nishpa (Proverbios 17:17).

¿Imatata nisha nin? Quiquinba amigocunaca llaqui tiempopimi ayudaita ushan.

Caita rurapai. Quiquin confianzata charishca amigoman imashina sintirishcata parlai. Chaita rurashpaca ashtahuan ali sintirichun, ama yapata preocupado cachunmi ayudanga. Quiquinba familia, amigocunaca ayudangapami munan. Shinapash imashina ayudanataca huaquinbica na yachanllu. Chaimandami imashina ayudachun munashcata villana cangui. Shinapash paicunahuanga na exigente canachu cangui. Tucui paicunapa ayudatami agradicina cangui. Huaquinbica quiquinba amigocuna ayudangapaj munajpipash talvez shaijushcachari sintiringui. Chaimandami mashna tiempota visitanata, ima hora visitanataca ali ricuna cangui.
Cushilla cangapaj esforzaripai.

Bibliapica ninmi: “Cushilla shunguhuan causanaca, cuerpopajpash ali jambigumi. Ashtahuangarin llaquilla shunguhuan causashpaca, tullucamanmi chaquichijun” nishpa (Proverbios 17:22).

¿Imatata nisha nin? Cushilla cangapaj, ama desanimaringapaj esforzarinaca emocionalmente tranquilo sintirichun, unguihuan cashpapash ñaupaman catichunmi ayudanga.

Caita rurapai. Ungushca caimanda imata na rurai ushashcapi pensajunapa randica, imata rurai ushashcapi pensaripai.Shujcunahuanbash na compararijunachu cangui. Shinallata ñaupa punllacunapi imashina causashcatapash na cutin cutin yarijunachu cangui (Gálatas 6:4). Shinallata ¿nachu quiquin pactachi ushashca metacunata churanapi pensaripashcangui? Chaita ruranaca ashtahuan cushilla sintirichunmi ayudanga (Proverbios 24:10). Shujcunatapash imapi ayudai ushashcata ricupai. Shujcunata ayudashpaca ashtahuan alimi sintiringui, quiquinba problemapipash na yapata pensaringui (Hechos 20:35).

Unguihuan cajpica ¿Taita Diosca ayudai ushanllu?

Taita Diosca shuj milagrota rurashpaca na ñucanchita jambingachu. Shinapash, Bibliapica Taita Diosca ñucanchicuna ungushca cajpi aguantashpa catichun ayudai ushanmi ninmi. ¿Imashinata Taita Diosca paita sirvijcunataca ayudan?

Tranquilo causaitami cun. Bibliapica ‘Taita Diosca gentecuna na intindi ushanalla tranquilo, ali canatami quiquingunamanga caranga’ ninmi (Filipenses 4:6, 7).Tranquilo, ali canataca, ungushca cashpa ama yapata preocuparichun ayudaita ushan. Shinapash Jehová Dioscaa paita mañajcunatallami tranquilo, ali canataca cun (1 Pedro 5:7).

Ali yachaita cun. Jehová Diosca ali decisiongunata japichun ayudaita ushan (Santiago 1:5). Bibliamanda yachajushpa, chai yachajushcacuna ñucanchi causaipi pactachishpaca, ali yachaitami charishun.

Shuj esperanzata cun. Jehová Diosca shamui punllacunapi cai alpapi causajcunaca: “Ni pipash ‘Ñucaca huañujunimi’ ninajungachu” nishpa prometin. (Isaías 33:24). Chai esperanzami ashtaca gentecunataca, millai unguicunata charishpapash, chai unguicunahuan chimbapurachunmi ayudashca (Jeremías 29:11, 12).

a Bibliapica Taita Diospa shuti Jehová cajtami yachachin (Salmo 83:18, TNM-S).

Quiquinba amigo ungushca cashpaca

Paita aliguta uyapangui. Quiquinba amigo, pai imashina sintirishcata aliguta uyashpami paitaca ayudaita ushapangui. Quiquinba amigo parlajpica na imatapash ucha ninachu capangui, huaquinbica paita uyachunlla minishtinga. Shinallata pai imatapash pandata nishpaca na manllarinachu cangui, juzgaitapash na juzgarinachu cangui. Quiquinba amigo imashinapacha sintirishcata tucuita yachani nishpaca na pensajunachu cangui, huaquin unguicunaca gentecunata imashinapacha afectashcataca na ricurinalla can (Proverbios 11:2).

Animachij cosascunata ningapami esforzaripangui. Huaquinbica imata ninataca na ali yachagripangui. Shina cajpipash, quiquinba amigo ninan llaquita charijta, quiquin ali intindishcatami nina capangui. Chaita ninatami, imatapash na nishpa quidana ashtahuan alimi canga. Imata ninata na ali yachashpaca, juyaihuanmi imagutapash nina capangui. Por ejemplo: “Imata ninataca na ali yachanichu, pero quiquindaca juyanimi ” ni ushapangui. “Ashtahuan nalipacha tucuita usharcanguimi” o “Antsicarin cai o chai unguitaca na charipangui” nishpapash na ninachu cangui.

Quiquinba amigo charishca unguimanda investiganaca ¿nachu alimi canman? Quiquinba amigo, paita imashina sintirishcata intindingapaj quiquin esforzarijujta ricushpaca ninandami agradicinga. Shinallata chaita rurashpaca, imata ninatapash ashtahuan ali yachagringui (Proverbios 18:13). Shinapash, consejocunata na mañajpica, na imatapash ninachu cangui.

Ayudangapaj listo capangui. Quiquinba amigopa unguimanda tucuita yachani ninapa randica, paita imashina ayudai ushashcapi pensaripai. Quiquinba amigoca, shuj llashaj quipishna shujcunapaca caita ushani yashpami paita ayudachun minishtishcataca na villangapaj munaiman. ¿Nachu imapipacha ayudangapaj munashcataca ninallami cangui, por ejemplo comprasta randishpa, limpiashpa o imagutapash rurashpa? (Gálatas 6:2).

Alita ruranataca na saquinachu cangui. Quiquinhuan imatapash rurangapaj quidashca cashpapash huaquinbica na cumplingachu o parlaitapash na munangachu. Chaimi paita intindingapaj, pacienciata ricuchingapaj esforzaripai. Shinallata imapi ayudai ushashcata pendiente cashpa catipangui (Proverbios 18:24).