Ñucanchi causaipa ali consejocuna

 1. ¿Imamandata Taita Diospa ali yachaita minishtipanchi? (Proverbios 4:7).

SHUJ importante decisionda agllagrijushpaca seguromi Jehová Diostaca ali decisionda agllangapaj ali yachaita carahuai nishpa mañapashcangui (Sant. 1:5). Rey Salomonga: ‘Tucuimanda yalica, ali yachaita [charinami] ashtahuan’ importante can nircami (Proverbios 4:7​ta liipangui). Rey Salomón ali yachaimanda parlashpaca na gentecunapa yachaimandaca parlajurcachu. Ashtahuangarin Jehová Diospa ali yachaimandami parlajurca (Prov. 2:6). Pero Taita Diospa ali yachaica ¿llaquicunata aguantachunbashchu ayudanga? Ari, ayudangami. Chaitami ricugripanchi.

 2. Ali yachajushcacuna tucungapaca ¿imatata rurai ushapanchi?

² Jesuspa, Salomonba yachachishcacunata yachajushpa, chai yachachishcacunata ñucanchi causaipi pactachingapaj esforzarishpami ali yachajushcacuna tucuita ushashun. Primeroca Salomonmanda parlapashunchi. Bibliapica ‘Taita Diosmi alipacha yachaita, aligutapacha yarishpa causana yuyaitaca Salomonmanga curca’ ninmi (1 Rey. 4:29). Cutin catipica Jesusmandami parlapashun. Cai mundopica Jesusmi tucui gentecunamandaca ashtahuan ali yachaita charirca (Mat. 12:42). Jesusmanda parlashpaca: “Paipimi, Mandaj Diospaj Espirituca causanga. Chai Espiritumi, ali yachaitapash, alipacha yachajushca causanatapash, ali yuyaita cunatapash” cunga nijunmi (Is. 11:2).

 3. Cai yachajuipica ¿imata yachajugripanchi?

³ Jesuspash, Salomonbash Jehová Diospa cushca ali yachaita utilizashpami tucuicunamanllata importante cosascunapica ali consejocunata curca. Cai yachajuipimi cai consejocunamandaca quimsa consejocunata ricugripanchi: Culquimanda, trabajomanda imata pensanata, ñucanchimandallata imata pensanatami ricugripanchi.

 4. Salomonga, Jesushuanga ¿imapita diferente carca?

⁴ Salomonga charij charijmi carca, paica ashtaca juyailla cosascunatami charirca (1 Rey. 10:7, 14, 15). Cutin Jesusca, Salomonshna charijca na carcachu. Paica shuj huasi propiotallapash na charircachu (Mat. 8:20). Shinapash ishcandillatami Jehová Diospa ali yachaita charirca. Chaimandami paicunaca material cosascunaca na ashtahuan importante carca.

 5. Salomonga culquimandaca ¿imatata yuyarca?

⁵ Salomonga culquica “jarcarina jirrushnallatami” can nircami (Ecl. 7:12). Culquica ñucanchi ima minishtirishcagucunata charingapaj, imapash munashca cosascunata randingapaca sirvinmi. Salomonga charij charij cashpapash culquita yali ashtahuan shuj importante cosascuna tiajtami cuenta urmarca. Por ejemplo Rey Salomonga: “Alicachi tucunaca, ninan charij canatapash ashtahuan yali alimari” can nircami (Prov. 22:1). Shinallata Salomonga culquita juyaj gentecuna na siempre cushilla cajtapashmi cuenta japirca (Ecl. 5:10, 12). Chaimandami culquipilla confianaca peligroso cashcata ricuchirca. Mashna culquita charishpapash culquica na yashcapi tucurinllami (Prov. 23:4, 5).

 6. Mateo 6:31-33​pi nishcashnaca Jesusca material cosascunamandaca ¿imatata yuyarca?

⁶ Jesuspaca material cosascunata charinaca na ashtahuan importantechu carca. Pero Jesusca micushpa, ali ratoguta yalina, imagutapash charinaca na malo cashcatami ricuchirca (Luc. 19:2, 6, 7). Chaimandami Jesusca paipa primer milagropica, yacutaca shuj alipacha valishca vinoman tigrachirca (Juan 2:10, 11). Shinallata pai huañuna punllapipash shuj valishca churajunatami churajushca carca (Juan 19:23, 24). Pero shinapash chai cosascunaca Jesuspaca na ashtahuan importante carcachu. Chaimandami Jesusca paipa catijcunamanga: “Ishcai amopa esclavo caitaca pipash na ushanllu”. “Taita Diostapash y culquitapash esclavoshna ishcandita sirvitaca na ushanguichichu” nircami (Mat. 6:24). Jesusca, Taita Diospa Gobiernotara pundapi churajpica Jehová Diosca canguna tucui imata minishtijushcatami caranga nircami (Mateo 6:31-33​ta liipangui). 

 7. Culquimanda Jehová Dios cushca consejocunata catishpaca huauquigu Danielca ¿ima bendiciongunata charishca?

⁷ Jehová Dios culquita imashna ricunamandaca ali consejocunatami cushca. Y chai consejocunata catishpami ashtaca huauquipanicunaca ninanda beneficiarishca. Por ejemplo, Daniel shuti joven soltero huauquiguca: “Ñucaca joven cashcamandapachami, ñuca causaipica Jehovata sirvina ashtahuan importante cachun decidircani” ninmi. Danielca minishtirishca cosascunahuanlla causangapaj esforzarimandami llaqui apashca pushtucunapi ayudangapaj, Betelpi sirvingapapash tiempota charishca. Shinallata Daniel huauquiguca: “Jehová Diosta sirvinata ñuca causaipi primero churashcamandaca nunca na arrepintirinichu. Talvez trabajanata ashtahuan primeropi churashpaca, culquitaca yapajllaimanmi chariman carcani pero cunanbishna ali amigocunata charitaca na ushaimanllu carcani. Shinallata charishca cosascunahuanga cunanbishna cushilla caitaca na ushaimanllu carcani. Mashna culquita charishpapash, Jehová Diospa bendiciongunahuanga nimapi na igualanllu” ninmi. Shinaca culquipilla preocuparinapa randica Jehová Diosta sirvinami ashtahuan cushichijta ricupanchi.

 8. Salomonga ¿trabajotaca imashinata ricurca? (Eclesiastés 5:18, 19).

⁸ Salomonga trabajanaca gentecunataca cushichinmi nircami. Chaimandami trabajoca ‘Taita Diosmi carashca’ nirca (Eclesiastés 5:18, 19​ta liipangui). Shinallata “tucui imata rurashcamandapash, japina tianmi” nishpa escribirca (Prov. 14:23). Salomonga trabajanata ali yachaimandami trabajajpi beneficiocuna tiashcataca experienciahuan parlarca. Paica huasicunata, huertacunata, jardingunata, yacu tanquecunata, llactacunatapashmi rurarca y uvas chagracunatapashmi tarpurca (1 Rey. 9:19; Ecl. 2:4-6). Salomonga chaicunata rurashpaca contentomi sintirishcanga. Shinapash ciertopacha cushilla cangapaca chai cosascunalla na suficiente cashcatami ali yacharca. Ashtahuanbash paica Jehová Diosta sirvingapaca shuj shuj cosascunatami rurarca. Por ejemplo, Salomonga Jehová Diosta adorangapaj shuj jatun templo huasitapashmi 7 huatacunapi rurashpa tucuchirca (1 Rey. 6:38; 9:1). Salomonga shuj shuj cosascunata paipa causaipi rurashca jipami Jehová Diosta sirvingapaj imatapash rurana ashtahuan importante cashcata cuenta urmarca. Chaimandami Salomonga: ‘Taita Diosta manllana, paipa mandashcacunata pactachinami tucuita yali ashtahuan’ importante can nishpa escribirca (Ecl. 12:13).

 9. Jesuspaca culquimanda trabajanaca na ashtahuan importante carcachu. Chaitaca ¿imashinata ricuchirca?

⁹ Jesusca alipacha trabajadormi carca. Pai cai alpapi causajushpaca, carpinteromi carca (Mar 6:3). Jesuspa taitacunaca paicunapa familiata mantiningapaj ninanda esforzarinajujpi, Jesús ayudajpica ninandami agradicirianga. Jesusca jucha illaj caimandaca trabajocunataca alimi ruran cashcanga. Paipa trabajashcataca seguromi ashtaca gentecuna alicachin cashcanga. Jesusca paipa trabajota tucuipi ali pactachingapaj esforzarishpapash, Jehová Diosmanga siempremi tiempogutaca llujchin carca (Juan 7:15). Jipaman, Jesús ña Jehová Diosmanda villachi callarishpaca, paita uyajcunamanga: “Huaglijlla o dañarijlla micunamandaca na trabajanachu canguichi. Sino, para siempre causaita cuj na huaglij micunamandami trabajana canguichi” nishpami yachachirca (Juan 6:27). Shinallata “Taita Diospa ricuipi importante cosascunata rurangapami esforzarina canguichi” nircami (Mat. 6:20).

10. Ali trabajadorcuna cashpapash huaquinbica ¿imata pasai ushanman?

¹⁰ Jehová Dios yachachishca ali yachaimi ama trabajopilla yapata preocuparichunga ayudan. Testigo de Jehovacunaca ali trabajadorcuna cana minishtirishca cajtami yachajupashcanchi (Efes. 4:28). Chaimandami jefecunaca casi siempre testigo de Jehovacunaca ali trabajadorcuna cajta, honradocuna cajta cuenta urmashca. Chaimandami ali trabajadormi cangui nishpapash felicitashca. Chaimi testigo de Jehovacuna ali trabajador cashcata ricuchingapaj munaihuan talvez huaquinbica ashtahuan horascunata trabajashpa Jehová Diosta sirvinata, ñucanchi familiahuan tiempo yalinataimanmi descuidanchiman. Chashna pasajujta cuenta urmashpaca ama yapata trabajopilla yalingapaj uchallami cambiocunata rurana capanchi.

11. William joven huauquiguca anciano huauquigumandaca ¿imatata yachajurca?

¹¹ William shuti joven huauquiguca congregacionmanda shuj anciano huauquiguhuan trabajashpami, trabajana cashpapash Jehová Diosta sirvinataca na huashaman saquina cashcata yachajurca. William huauquiguca: “Cai huauquiguca alipacha trabajocunata ruraimandami, clientecunahuanbash ali llevarin. Shinapash ña trabajomanda alsarishca jipaca trabajota ña huashaman saquishpami familiata ayudangapaj, Jehovata sirvingapaj dedicarin. Paitaca cushillapacha causajtami ricuni” ninmi.b

12. Salomón joven cashpaca ¿imashinata na paipilla confiascata ricuchirca? Jipamanga ¿imata pasarca?

¹² Salomonga Jehová Diosta ali sirvijushpaca imatalla pai rurai ushashcataca yaipimi charin carca. Chaimandami joven cashpa pai chairalla rey tucushca cashpaca imatapash ali ruraita ushangapaj Jehová Diospa ayudata mañarca (1 Rey. 3:7-9). Salomonga shuj persona ali cashpata orgulloso tucui ushashcataca alimi yacharca. Chaimandami paica: “Nara llaqui japijpillami jariyashpa causanajun. Nara urmashpallami, yuyaipi jariyashpa causanajun” nishpa escribirca (Prov. 16:18). Pero jipamanga Salomonga paipa nishcacunatallatapash na yarishpami, huaquin huatacunata ña mandajushpaca orgulloso tucushpa Jehová Diospa mandashcacunatapash na cazui callarirca. Por ejemplo reycunaca: “Diosmanda paipaj shungu ama anchurichunga, chai mandaj runaca ashtaca huarmicunatapash na charingachu” nishca mandamientotami pactachina carca. Pero Salomonga na cazurcachu (Deut. 17:17). Chaimandami Jehová Diospa mandashcacunata yangapi churashpami 700 huarmicunahuan cazararca. Chai jahuapash 300 huarmicunatapashmi charirca. Chai huarmicunamanda taucacunaca Jehová Diostapash na rijsicunami carca (1 Rey. 11:1-3). Talvez Salomonga “tucuita ali pensarishpami rurajuni” yuyashcangami. Shina pensaimandami Jehová Diosta na cazushpa paimanda caruyarca (1 Rey. 11:9-13).

13. Jesusmandaca ¿imatata yachajui ushapanchi?

¹³ Jesusca humilde caimandami pai imata ruranalla cashcata imata na ruranalla cashcataca yaipi charirca. Jesús cai alpaman nara shamushpaca ashtaca cosascunatami paipa taitahuanga rurarca. Colosenses 1:16​pica: “Taita Diosca paita utilizashpami jahua cielopi ima tiashcacunatapash, cai alpapi ima tiashcacunatapash” rurarca ninmi. Jesús cai alpapi ña bautizarijushpaca cielopi cashpa Jehová Dioshuan imatalla rurashcataca tucuitami yarishcanga (Mat. 3:16; Juan 17:5). Jesús paipa taitahuan imacunatalla rurashcata yarishpapash chaicunamanda jariyashcaca na sintirircachu. Shinallata shujcunamanda yali ashtahuan importante cashcatapash na sintirircachu. Chaimandami paica paipa catijcunamanga ñucata ‘sirvichunga na shamurcanichu. Sino shujcunata sirvingapami shamurcani. Shinallata, shuj preciota paganshna causaita cushpa ashtaca gentecunata libre saquingapami shamurcani’ nircami (Mat. 20:28). Shinallata Jesusca humilde caimandami ñucapa munaica imatapash na rurai ushanichu nirca (Juan 5:19). Jesusca tucuicunamanllatami shuj alipacha ejemplota saquirca.

14. Ñucanchimandallata ¿imata pensana cashcatata Jesusca yachachirca?

¹⁴ Jesusca paipa catijcunaman ñucanchimandallata na yapata jariyana cashcata shinallata nimapapash na sirvinichu nishpa na pensana cashcatami yachachirca. Chaimandami shuj punllaca paipa catijcunamanga: “Cangunapa umapi mashna ajcha” tiajtapash contashcallami can nirca (Mat. 10:30). Jesuspa cai yachachishcacunaca ñucanchimandallata imapapash na valinichu yashpa pensajujpica ninandami ayudaita ushan. Jesuspa cai nishcacunaca Jehová Dios ñucanchita ninanda juyashcata, Jehová Diospa ricuipi ñucanchicuna ninan valishca cashcatami ricuchin. Chaimandami Jehová Dios paita sirvichun ñucanchicunata ña agllashca cajpica, Jehová Diosta sirvingapaca na valinichu, paraisopi para siempre causangapacarin na miricinichu nishpaca nunca na pensajuna capanchi.

15. a) Ñucanchimandallata ¿imata pensana cashcatata 15 huatacuna huashaman llujshishca La Atalaya revistapica yachachirca? b) Página 24​pa fotopi ricushca shinaca ñucanchi munaitalla rurashpaca ¿ima bendiciongunatata chingachinchiman?

¹⁵ 15 huatacuna huashamanga, La Atalaya revistapica: “Ñucanchimandallata ama yangata imatapash pensarijungapaj mejorashpa catinamandami yachachirca. Ñucanchipilla yapata pensarishpa, ashtahuan importante cashcata sintirijungapaj o ñucanchimandallata na valichirishpa, imapapash na valishcata sintirijungapaca na munapanchichu. Chaipa randica ñucanchimandallata imacunapi pandarinlla cashcata, imacunata ali rurai ushashcata cuenta urmangapami cada uno esforzarina capanchi. Chaicunamanda parlashpaca shuj paniguca nircami: ‘Mala personaca na canichu, ni mejor personapash na canichu. Imaguta ali rurai ushashpapash tucuicunashnallatami pandarini’”.c Shinaca ñucanchimandallata ashtahuan importante cashcata sintirijuna o imapapash na valinichu nishpa pensajunaca ñucanchipallata nali cashcatami ricupanchi.

16. Jehová Diosca ¿imamandata ñucanchimanga ali consejocunata cun?

¹⁶ Jehová Diosca paipa shimi Bibliahuanmi ñucanchicuna imashna causanataca aliguta yachachin. Jehová Diosca ñucanchita ninanda juyaimandami cushilla causachun munan (Is. 48:17, 18). Ñucanchi causaipi Jehová Diosta sirvinata, Jehovapa mandashcacunata primeropi churanata decidinami ñucanchitaca ninanda cushichinga. Ashtaca gentecunaca paicunapilla, culquipilla, trabajopilla pensaimandami ashtaca llaquicunata charishca. Cutin Jehová Diosta sirvinata decidishpaca, chai tucui llaquicunamandami jarcarishun. Shinaca cada unomi Jehová Diospa ali yachachishcacunahuan Jehová Diosta cushichingapaj decidina capanchi (Prov. 23:15).