¿Imashinata Jehová Diospi shuyashpa catishun?

 1. Huaquinbica ¿imamandata shaijunchi?

DIABLOPA nali mundoca huata 1914mandami ña tucurimujushca. Chai huatapimi Jesusca Rey tucushpa Diablotaca paipa demoniocunandi cai Alpaman shitamurca (Apocalipsis 12:​7-9, liingui). Bibliapica ninmi, Diablopa ‘punllacunaca tucurijunmi’ nishpa (Apoc. 12:12). Ña tucurimujunmi nishpapash huata 1914mandaca ñami casi 100 huatacuna yalishca. Chaimandami huaquin huauquipanicunaca pensashca Taita Diosca Diablopa nali mundotaca na ucha tucuchinllu nishpa. ¿Ñucanchicunapash shina pensashpachu Taita Diospi shuyanataca shaijunajunchi?

 2. Cai temapica ¿ima quimsa tapuicunatata yachajupashun?

² Shuyanata shaijunaca nimamanda nalichu can. Shinaca ama shaijushpa shuyachunga ¿imata ayudanga? Chaita yachangapaca cai quimsa tapuicunata yachajupashun: 1) Profeta Miqueas na shaijushpa shuyashcamandaca ¿imatata yachajunchi? 2) Tucurimui punllacuna ña tucurijushcataca ¿imashinata yachanchi? 3) Jehová Dios na shaijushpa shuyajushcamandaca ¿imatata yachajunchi?

 3. Profeta Miqueaspa punllacunapi israelitacunaca ¿imashinata causanajurca?

³ (Miqueas 7:​2-6, liingui.) Nali rey Acaz mandajuj punllacunapi israelitacunaca Taita Diostaca nali catinajurcachu. Israelitacuna ninanda huaglinajujta ricushpami profeta Miqueasca nirca, nali israelitacunaca “cashashnami” can nishpa. Imashinami cashacunaca tujsishpa chugrinchilla shinallatami nali israelitacunaca paicunapaman maijan quimirijpipash llaquichinajurca. Ashtahuangarin taitamamacunapash huahuacunapash na randimanda llaquirishpa juyarinajurcachu. Chaicunata ricushpa na imatapash rurai ushashpami, profeta Miqueasca Taita Diosman tucuita villashpa, Taita Diosca pai munashca tiempopimi imatapash ruranga nishpa Taita Diospi shuyajurca.

 4. Huaquinbica ¿ima llaquicunatata charipanchi?

⁴ Ñucanchicunapash profeta Miqueaspa punllacunapishnami causanajunchi. Cai mundopi gentecunaca ‘na pagui nijcuna, Taita Diosta na manllajcuna, pitapash na juyajcunami’ can (2 Tim. 3:​2, 3). Tucuicunallatami nali vecinocunata, trabajopi o colegiopi nali cumbacunata charimandaca ninanda llaquirinchi. Huaquin Testigocunacarin ashtahuan jatun llaquicunatami charishca. Familiacunallatami contra tucunga nishpami Jesusca Miqueas 7:6​pi shimicunata yarishpa nirca: ‘Churica taitatami na cazun, ushipash mamatami macan, jachunbash suedratami jariyan. Runata fiñajcunaca huasi ucupurallatami’ canga nishpa (Mat. 10:​35, 36). Na Testigo familiacuna burlarijpi, rimajpi aguantanaca shinllimi can. Shinapash ama llaquiripanguichichu. Chaipa randica, Jehová Diosta cazushpa, Jehová Diosmi ayudanga nishpa paipi shuyashpa catipashunchi. Jehová Diosta mañajpica paimi ñucanchimanga llaquicunata aguantangapaj fuerzata cunga, aliguta pensarishpa aguantachunbash ayudanga.

 5. Jehová Diosca ¿imashinata profeta Miqueastaca bendiciarca?

⁵ Profeta Miqueasca na shaijushpa shuyaimandami rey Acaz mandajushca punllacuna tucurijta ricurca. Shinallata rey Acazpa cuenda rey Ezequías mandai callarijtami ricurca. Rey Ezequiasmi israelitacunataca Jehová Diosta aliguta adorai callarichun ayudarca. Ashtahuangarin, na shaijushpa shuyaimandami profeta Miqueasca Asiria llactamanda gentecuna Samaria llactamanda gentecunata llaquichijta ricurca. Shinami Israelpa 10 jatun familiacunaca llaquichi tucungami nishpa paillata villashca profecía pactarijta ricurca (Miq. 1:6).

 6. Profeta Miqueasca ¿ima profecía pactarijtata na ricurca?

⁶ Miqueasca pai villashca profeciacuna tucuilla pactarijtaca na ricurcachu. Paica nircami: ‘Tucurimui punllacunapica Mandaj Diospa huasi tiajuj urcuca, tucui urcucunapa umashnami canga. Tucuicunata yali ashtahuan jatunmi canga. Chaimandami, tucui pueblocunamanda chaiman shamunajunga. Ashtaca llactacunamanda shamushpami ninajunga: “Mandaj Dios causajuj urcuman rishunchi” nishpa (Miq. 4:​1, 2). Profeta Miqueasca huañuimandami chai profecía pactarijtaca na ricurca. Shinapash huañungacaman Jehová Diosta cazungapaj munashpami nirca: ‘Tucui gentecuna paicunapa diospa shutipi mañashpa purinajujpipash ñucanchica, ñucanchita Mandaj Taita Diostami causaita causaicaman cazushpa purinajushun’ nishpa (Miq. 4:5). Taita Diospa tucui nishcacunaca pactaringami nishpami Miqueasca na shaijushpa Taita Diospi shuyarca.

 7. ¿Imamandata Jehovapi confiana capanchi?

⁷ Ñucanchicunapash Jehová Diospimi confiana canchi. Cai ‘tucurimui punllacunapica’ ashtaca llactacunamanda, shuj shuj shimita parlaj ashtaca millón gentecuna ‘Taita Diospa urcuman’ shamujtami ricushcanchi. Ashtacacunaca contra llactacunamanda cashpapash ñana contra cangapaj munashpami paicunapa ‘espadacunataca azadongunata rurashca’ (Miq. 4:3). ¿Nachu Jehovata tranquilo, aliguta sirvinaca shuj jatun bendición cashca?

 8. Tiempo uchalla yalichunga ¿imatata rurana capanchi?

⁸ Tucuicunallatami Diablopa nali mundota Taita Dios ucha tucuchichun munanchi. Shinapash Jehová Diospa yuyaita catishpami na shaijushpa shuyana canchi. Yaripashunchi, Diablopa nali mundota tucuchingapaca ñami Jehová Diosca shuj punllata agllashca. Paipa Churi Jesustami mandai callarichun churashca (Hech. 17:31). Shinapash chai punlla chayamungacamanga tucui gentecuna ‘na llullashpa villajuj Shimita yachajushpa’ salvarichunmi Jehová Diosca munan (1 Timoteo 2:​3, 4, liingui). Shuj gentecunaman yachachishpa purijpica tiempoca ñapashmi yalin. Taita Diospa punlla chayamujpica na shaijushpa villachishpa purishcamandaca ninandami cushijushun.

9-11. ¿Ñachu 1 Tesalonicenses 5:3​pi shimicunaca pactarishca?

⁹ (1 Tesalonicenses 5:​1-3, liingui.) Ñallami ‘casilla aliguta, imatapash na manllashpami causanajunchi’ nishca shimicunaca uyaringa. Chai shimicuna cungashcapi ama japichunga apóstol Pablopa consejota catishpami ‘aliguta yarishpa rijcharia causana canchi’ (1 Tes. 5:6). Shinaca espiritualmente rijcharishca cangapaca, 1 Tesalonicenses 5:3​pi shimicuna pactaringacaman ima pasanata ricupashunchi.

¹⁰ Huata 1914manda 1918​camanga Primera Guerra Mundial nishcami tiarca. Chai punllacunapica casilla, ali causai tiachun nishpami Liga de Naciones nishca organización tiai callarirca. Cutin huata 1939manda huata 1945​camanga Segunda Guerra Mundial nishcami tiarca. Chai punllacunapimi Organización de las Naciones Unidas tiai callarirca. Politicocunapash, religiongunapash chai ishcai organizaciongunapi confiashpami nirca, caicunami casilla, aliguta causachun ayudanga nishpa. Ashtahuangarin Naciones Unidasca nircami, huata 1986​ca Año Internacional de la Pazmi can nishpa. Chai huatapimi ashtaca llactacunapash religiongunapash Católico Iglesiapi mandajhuan Italia llactapi tandanajurca. Paicunaca cai mundopi casilla ali causai tiachun nishpami, Taita Diosta mañanajurca.

¹¹ Shinapash 1 Tesalonicenses 5:3​pi shimicunaca nara pactarircachu. ¿Imamandata nara pactarirca? ‘Ñapash tucuchij llaquicuna’ nara tiai callarishcamandami 1 Tesalonicenses 5:3​pi shimicunaca nara pactarirca.

12. ‘Casilla aliguta imatapash na manllashpami causanajunchi’ nishca shimicunamandaca ¿imatallata yachapanchi?

¹² ¿Pita ‘casilla aliguta imatapash na manllashpami causanajunchi’ ninga? Jesusta catinchi nij tucushca religiongunapash shuj religiongunapash ¿imatata ruranga? Gobiernocunapash ¿imatashi ruranga? Chai tapuicunataca na yachanchichu. Bibliapica na imatapash ninllu. ‘Casilla aligutami causanajunchi’ nishca shimicuna aligu uyarishpapash na ciertochu canga. Cai nali mundotaca Diablomi mandashpa catijunga. Chaimandami Diablopa llullacunapica na crishpa, politicacunapi ama chapuringapaj cuidarina canchi.

13. ¿Imamandata angelcunaca nali huairacunata jarcarianajun?

¹³ (Apocalipsis 7:​1-4, liingui.) 1 Tesalonicenses 5:3​pi shimicuna pactaringacamanga ninan ushaita charij angelcunaca ninan manllanai llaqui punllacuna ama callarichunmi nali huairacunataca jarcanajun. Shinapash ¿imamandata jarcanajun? Apóstol Juanga nircami: ‘Taita Diosta sirvijcunata’ o ungidocunata sellanarami can nishpa.a Ungidocunata sellaita tucuchijpimi angelcunaca nali huairacunata cacharinga. Chai jipaca ¿imata tucunga?

14. ¿Imamandata ninchi, Babilonia shuti jatun puebloca ñallami tucuringa nishpa?

¹⁴ Babilonia shuti jatun pueblo o tucui panda religiongunaca chaipimi tucuringa. ‘Ashtaca llactamanda, shuj shuj shimita parlaj’ gentecuna chai religiongunata ñana ayudanajujtaca ñami ricunajunchi (Apoc. 16:12; 17:​15-18; 18:​7, 8, 21). Panda religiongunata apoyajuj gentecuna tucurijujtapash ricunallami can. Chaimandami chai religiongunapi mandajcunatapash radiocunapi, televisiongunapica nalicachishpa rimanajun. Chai panda religiongunapi mandajcunaca na pinarinachu canchi ninajunmi. Shina ninajushpapash paicunaca pandarinajunmi. ‘Casilla aliguta imatapash na manllashpami causanajunchi’ nishca shimicuna uyarishca jipaca cungashcapimi politicocunaca tucuilla panda religiongunata atacashpa paicunataca tucuchitapacha tucuchishpa saquinga. ¿Nachu chai ali punllacunata ricungapaca na shaijushpa shuyana cashcanchi? (Apoc. 18:​8, 10.)

15. Jehová Diosca ¿imamandata shuyajushca?

¹⁵ Ashtaca gentecuna paipa shutita mapayachinajujpipash Jehová Diosca ali shungu gentecuna salvarichun munashpami shuyajushcara (Rom. 2:4). ¿Ñucanchicunapash Jehová Diospa ejemplota catinajupanchichu? Jehová Dios na shaijushpa shuyajushcamandaca ¿imashinata agradicishun? Huaquin yuyaicunata ricupashunchi.

16. ¿Imamandata villachingapaj na llujshijujcunataca ayudana capanchi?

¹⁶ Unaillata villachingapaj na llujshijujcunata ayudapashunchi. Jesusca nircami, shugullapash Taita Diospajman tigrajpica jahua cielopica ninan cushijuimi tian nishpa (Mat. 18:14; Luc. 15:​3-7). Na villachingapaj llujshinajushpapash, Jehová Diosta tucui shunguhuan catijushca cajpica paicunatapashmi Jehová Diosca llaquishpa ricuriajun. Chai huauquipanicuna cutin congregacionman tigramuchun ayudashpaca, Jehová Diospash angelcunapash cushijuchunmi ayudanajunchi.

17. ¿Imamandata unaillata villachingapaj na llujshijujcunaca uchalla Jehová Diospaman tigramuna can?

¹⁷ Cunanga pensaripashunchi: ¿ Jehovata sirvinata saquipashcanguichu? ¿Shuj huauqui o shuj pani culirachijpichu tandanajuicunaman rinata saquipashcangui? ¿Ima horamandata tandanajuicunamanga na rijupashcangui? Shinaca tapuripai: “Tandanajuicunaman rinata saquishpaca ¿alichu causajuni? ¿Cunanbichu ashtahuan cushilla ali causajuni? ¿ Jehová Dioschu ñucataca llaquichihuarca? ¿O ñucashnallata juchayu huauquichu ñucataca culirachihuarca? ¿Ima horata Jehová Diosca ñucata nali tratahuashca?” nishpa. Yaripashunchi, Jehová Diosca ninanda llaquishpa tucuicunaman caraj Diosmi can. Ñucanchicuna pandarijpipash pai rurashca cosascunataca na quichushcachu (Sant. 1:​16, 17). Ama cungapashunchichu, Jehová Diospa punllaca ñallapachami chayamunga. Imamanda caruyashca cashpapash, ñucanchi Taita Jehová Diospaman, congregacionman tigramupaichi. Cai tucuri punllacunapica congregacionbillami seguro caita ushanchi (Deut. 33:27; Heb. 10:​24, 25).

18. ¿Imamandata congregacionbi ñaupajman pushajcunata apoyana capanchi?

¹⁸ Congregacionbi ñaupajman pushajcunataca tucui shunguhuan apoyapashunchi. Jehová Diosca ñucanchita juyashpa llaquishpami imata ruranatapash ricuchijun, cuidajunbash. Ñucanchita ñaupajman pushachunga Jesustami Jehová Diosca churashca. Jesusmi michijcunapa ashtahuan Jatun Michij cuenda can (1 Ped. 5:4). Cien mil yali congregaciongunapica ancianocunami michijcuna cuenda shugu shugu tucui huauquipanicunata ricurianajun (Hech. 20:28). Paicunata tucui shunguhuan apoyashpami Jehovatapash Jesustapash ñucanchita ayudashcamanda agradicinajunchi.

19. Ñucanchipura shujlla shina tandanajushca cangapaca ¿imatata rurana capanchi?

¹⁹ Tucuicuna shujlla shina tandanajupashunchi. Contra soldadocuna atacai callarijpica chaishuj lado soldadocunaca tucuilla tandanajushpami shujlla shina macanajui callarin. Shinami contracuna yalishpa mishachunga na saquin. Diablopash cunan punllacunapimi Diosta sirvijcunataca ashtahuan atacajun. Fiñanajushpa culirarinajuna tiempoca na canllu. Ashtahuangarin tucuicunallata juchayucuna cashcata yarishpa perdonarina, Jehová Diospi confiana tiempomi can.

20. ¿Imatata cunanbica rurana capanchi?

²⁰ Tucuicunallata espiritualmente rijcharia, na shaijushpa shuyapashunchi. ‘Casilla aliguta, imatapash na manllashpa causanajunchi’ nishca shimicunaca uyaringami. Ungidocunapa sellamiento final nishcapash tiangami. Chai punllacunataca na shaijushpa shuyapashunchi. Chai punllacuna jipami ninan ushaita charij chuscu angelcunaca nali huairacunata cacharinga. Chaipimi Babilonia shuti jatun puebloca tucuchi tucunga. Chai punllacuna chayamungacamanga Jehovapa organizacionbi ñaupajman pushaj huauquicunata cazupashunchi. Shinallata Diablo paipa demoniocunandi ñucanchita ama mishachunga shujlla shina tandanajupashunchi. Ashtahuangarin cai shimicunata yaria causapashunchi: ‘Mandaj Diosta tucui shuyajcunaca shinlli tucuichi. Cangunapaj shungupipash cushijuita japichi’ (Sal. 31:24).