Bautizaringapaca ¿listochu cangui?

1, 2. a) Cunan punllacunapi Jehovata sirvijcunaca ¿imamandata cushijupanchi? b) Taitamamacunapash, ancianocunapash ¿imatata jovengunamanga aliguta intindichina can?

CHRISTOPHER nishca huambraguca 12 huatacunata charishpallatami bautizaringapaj munajurca. Chaimandami shuj anciano huauquica nirca: “Candaca llullugumandapachami rijsini. Cushijunimi bautizaringapaj munajushcamanda. Shinapash ¿imamandata bautizaringapaj munajungui?” nircami. Ancianoca ¿imamandata shina tapurca? Jehovata sirvijcunaca, ashtaca jovenguna cada huata bautizarinajujta ricushpaca cushijunchimi (Eclesiastés 12:1). Shinapash, Jesusta catij taitamamacuna, ancianocunaca jovenguna imamanda bautizaringapaj munanajujta, bautizarina ima cajta intindinajujta o na intindinajujtami ali ricuna can.

² Bibliapica yachachinmi, Jehovaman mingarishpa bautizarijcunaca Jehovata sirvi callaringapami shuj mushuj causaita callarinajun nishpa. Jehovaman mingarishpa bautizarijcunaca ashtaca bendiciongunatami charinga. Shinapash Diabloca ashtaca trampacunatami churanga (Proverbios 10:22; 1 Pedro 5:8). Chaimandami Testigo taitamamacunaca tiempota llujchishpa huahuacunamanga intindichina can, Jesusta catijcunaca ashtaca bendiciongunata charishpapash tauca jarcaicunata mishana cashcata. Cutin Testigo taitamamacunata na charij jovengunataca ¿picunata ayudai ushan? Paicunataca ancianocunami juyaihuan ayudaita ushan, Jehovaman mingarina, bautizarina ima cashcata aliguta intindichun (Lucas 14:28-30, liingui). Pensaripashun. ¿Nachu shuj huasiguta rurangapaj munashpaca culquigu pactanata na pactanatara aliguta cuentashpa prepararinchiman? Bautizaringapaj munajuj jovengunapash pundapica aliguta pensarishpami ricuna can, bautizaringapaj listo cashcata o na listo cashcata. Shinami “tucurimuicaman” Jehovata ali cazushpa sirvi ushanga (Mateo 24:13). Shinaca, jovenguna Jehovata unai unaicaman sirvingapaca ¿imatata rurana can? Ricupashun.

 3. a) Bautizarinamanda parlashpaca ¿imatata Jesuspash Pedropash nirca? (Mateo 28:19, 20; 1 Pedro 3:21). b) Cai temapica ¿maijan quimsa tapuicunatata yachajupashun? c) Chai quimsa tapuicunapi pensarinaca ¿imamandata ali can?

³ ¿Joven cashpapash bautizaringapaj munajunguichu? Chaica alipachami can, cushijunchimi. Bautizarishpa testigo de Jehová tucunaca shuj jatun bendicionmi can. Jesusca yachachircami, paita catijcunaca tucuicunami bautizarina can nishpa. Apóstol Pedropash nircami, Jatun Manllanai Llaqui Punllacunapi quishpiringapaj munajcunaca bautizarinami can nishpa (Mateo 28:19, 20; 1 Pedro 3:21). Chaimandami cai temaca bautizaringapaj listo cashcata o na listo cashcata ricuchun, cai quimsa tapuicunapi pensarichun ayudanga: 1) ¿Espiritualmente shinllichu cani? 2) ¿Imamandata bautizaringapaj munani? 3) Jehovaman mingarina ima cashcataca ¿alichu intindini? Chai quimsa tapuicunapi aliguta pensarishpa bautizarishpami, Jehovata unai unaicaman sirvingapaj munajushcata ricuchi ushangui. Ashtahuangarin, cai quimsa tapuicunami Jehovaman imata nishcata pactachichun ayudanga.

4, 5. a) Bautizaringapaca ¿imamandata mayor de edad tucungacaman shuyanaca na minishtirin? b) Espiritualmente shinllicunaca ¿imashinata can?

⁴ Bibliapica mashna huatacunata charishpa o ña mayor de edad cashpa bautizarinataca na nijunllu. Proverbios 20:11​pica ninmi: “Alita rurajtapash, na mapata rurashpa, aligutalla rurajtapash huambrara cajpillata ricunallami” can nishpa. Shinaca joven huambragupashmi ima ali cajta ima nali cajta intindita, Jehovaman mingarina ima cajtapash intindita ushan. Chaimandami, joven huambragucunapash espiritualmente shinlli cashpa, Jehovaman ña mingarishca cashpaca bautizarinalla can (Proverbios 20:7).

⁵ Espiritualmente shinlli cangapaca ¿imata minishtirin? Espiritualmente shinlli cangapaca mayor de edad cana o taucalla huatacunata charinaca na minishtirishcapacha canllu. Bibliapi nishca shinaca, espiritualmente shinlli cangapaca ima ali cajta ima nali cajta ali intindingapami ‘ali yuyaicunata charishpa, aliguta yachajushcashna cana can’ (Hebreos 5:14) (“¿Imatata nisha nin?” nishca recuadrota ricupangui). Shinallata, ima ali cashcata intindishpami ali ruraicunataca tucui shunguhuan rurangapaj munan. Ashtahuangarin, espiritualmente shinllicunaca tentaciongunata mishangapami esforzarin, pipash cutin cutin alita rurai nijuchunga na minishtinllu. Bautizarishpaca, canba taitamama o shuj gentecuna na ricunajujpipashmi alita rurangapaj esforzarina cangui (chai yuyaitaca Filipenses 2:12​pipashmi ricuita ushapangui).

6, 7. a) Babilonia llactapi cashpaca ¿ima tentaciongunatata Danielca charirca? b) ¿Imashinata Danielca espiritualmente shinlli cashcata ricuchirca?

⁶ ¿Joven huambragucunapash espiritualmente shinlli cashcata ricuchi ushanllu? Profeta Danielpa ejemplota ricupashun. Chaira viñajuj huambragu cajpimi contracunaca taitamamamanda separashpa Danieltaca Israel llactamanda Babilonia llactaman prezo apashcanga. Chaipica tauca tentaciongunatami charirca. Jehovata na cazuj gentecunahuanmi causana tucurca. Tucuicunami Danielta alicachishpa ali tratai callarirca. Ashtahuangarin reyta sirvichun nishpami huaquin jovengunatalla agllashpaca Danieltapash agllarca (Daniel 1:3-5, 13). Shinaca, Babilonia llactapimi ashtahuan ali causaita charinashnalla ricurirca.

⁷ Shinapash Danielca, espiritualmente shinlli cashcata ricuchishpami tentaciongunataca misharca. Paica Jehovata na cazuj gentecunahuan causashpapash chai gentecunapa yuyaicunataca na catircachu, Jehovatami cazushpa catirca. Bibliapica ninmi: ‘Danielca paipa shungupica napacha mapayashachu yajurcami’ nishpa. Shinaca, panda religionbica ashatallapash Danielca na chapuringapaj munarcachu (Daniel 1:8). Shinami Danielca espiritualmente shinlli cashcata ricuchirca.

 8. ¿Imatata Danielpa ejemplomandaca yachajuita ushapangui?

⁸ ¿Imatata Danielpa ejemplomandaca yachajuita ushangui? Joven cashpapash espiritualmente shinlli cashpaca, Jehovata siempre cazungapami esforzarina cangui. Camaleón nishca animalgushnaca na canachu cangui. Camaleón nishca animalguca shuj lagartija animalshnami can. Camaleonga según maipi cashcapimi color cambianlla. Shinaca pensaripai, Tandanajui Huasipi Jehovata sirvijunshnalla ricurishpapash escuelapi o colegiopi cashpa cumbacunapa ejemplota catishpaca ¿alicha canman? Tentacionguna ricurijpipash Jehovata siempre cazungapami esforzarina cangui (Efesios 4:14, 15, liingui).

9, 10. a) ¿Imamandata jovengunaca pensarina can, chairalla shuj tentacionda charishpaca imatata rurarcani nishpa? b) Bautizarinaca ¿imata can?

⁹ Joven cashpa o mayorlla cashpapash tucuicunallatami imagupipash pandarinchi (Eclesiastés 7:20). Shinapash bautizaringapaj munajushpaca pensarinami cangui, ¿ciertopachachu Jehovata siempre cazungapaj munajuni? nishpa. Ña huaquin tiempota Jehovata cazushpa causajushpaca pensaripai, chairalla shuj tentacionda charishpaca ¿imatata rurarcani? nishpa. ¿Chai tentaciondaca mishai usharcanguichu? Huaquinbicarin ¿nachu Danieltashna tentaciongunaca pandachingapaj munashca? Pipash candaca nishcachu: “Canba rurai ushashcacunata aprovechashpami cai mundopica ali causangui” nishpa. Shina tentacionguna ricurijpica ¿Jehovapa munai maijan cashcataca alichu intindi ushapangui? (Efesios 5:17).

¹⁰ Chai tapuicunapi pensarishpami intindi ushapangui, bautizaringapaca aligutapacha pensarina cashcata. Bautizarishpami tucui gentecunaman ricuchijungui, Jehovatallami juyashpa para siempre sirvishpa causasha nishcata (Marcos 12:30). Bautizarishpaca tucuicunami Jehovaman imata nishcataca pactachinapacha canchi (Eclesiastés 5:4, 5, liingui).

11, 12. a) Bautizaringapaj munajushpaca ¿imatata seguro cana capangui? b) Bautizarinamanda Jehová imata pensajta canbash pensangapaca ¿imatata rurana capangui?

¹¹ Bibliapica ninmi, Taita Diosta sirvijcunaca jovengunapashmi ‘paicunapa munaillata cazunajunga’ nishpa (Salmo 110:3). Shinaca, bautizaringapaj munajushpaca pensarinami capangui, ñucallata bautizaringapaj munaimandachu bautizaringapaj munajuni nishpa. Ashtahuanbachaca Testigo familiapi viñashcacunami shina pensarina capanguichi.

¹² Quiquin viñajushpaca ricurianguimi, canba tauca amigocuna, canba huauquicuna, panicuna bautizarijta. Shinapash na pensanachu cangui, ñami paicunaca bautizarirca, ñucapashmi bautizarina cani, o ñami bautizarina edadta charini nishpa. Shina pensajushpaca cuidadota charinami cangui. Shinaca, bautizarinamanda Jehová imata pensajta canbash pensangapaca ¿imatata rurana capangui? Chaipaca asha tiempoguta llujchishpami bautizarina imamanda minishtirishcapacha cashcata pensarina cangui. Chaita ali intidingapami cai temapipash shamuj temapipash huaquin yuyaicunata yachajupashun.

13. Ciertopacha bautizaringapaj munashcataca ¿imashinata yachai ushapangui?

¹³ Bautizarina munaihuanbacha bautizarijushcata yachangapaca quiquin rurashca oraciongunapi pensaripai. Tapuripai: “Jehovataca ¿tauca viaje o huaquinbillachu mañajuni?” “¿Preocuparijushca cosascunamanda o rurana cashcamandallachu oraciondaca rurajuni?” nishpa. Chai tapuicunapi pensarinami Jehovapa amigo cashcata o na cashcata yachachun ayudanga (Salmo 25:4). Jehová Diosca ñucanchi mañashcacunataca Bibliapi textocunahuanmi contestan. Shinallata ciertopacha bautizarina munaihuan bautizarijushcata yachangapaca pensarinami cangui Bibliataca imashinata yachajujuni? nishpa (Josué 1:8). Pensaripai: “¿Bibliataca cada semanachu yachajuni? ¿Familiahuan Adorana Tutapi participanata gushtanichu?” nishpa. Chai tapuicunapi pensarinami, bautizarina munaihuanbacha bautizarishpa Jehovapa amigo cangapaj munajushcata, tucui shunguhuan sirvingapaj munajushcatapash yachachun ayudanga.

14. Jehovaman mingarinaca ¿imapita bautizarinahuanga shican can?

¹⁴ Huaquin jovengunaca ninmi, ñami Jehovaman mingarishcani. Shinapash bautizaringapaca nara listochu cani nishpa. Shina nij jovengunaca Jehovaman mingarina ima cajta, bautizarina ima cajtaca na ali intindishpami shina ninajun. Jehovaman mingaringapaca, shuj oracionda rurashpami Jehovataca nina canchi, candallami unai unaicaman sirvishpa causagrini nishpa. Chai jipa bautizarishpaca, Jehovaman ña mingarishcata tucuicunaman ricuchingapami bautizarinchi. Shinaca, nara bautizarishpallatami Jehovaman mingarina ima cashcataca ali intindina cangui.

15. Jehovaman mingarinaca ¿imata can?

¹⁵ Jehovaman mingarishpaca Jehovatami nijungui, cunanmanda vichaimanga ñuca causaica canballami can, canda sirvinatami pundapi churasha nishpa (Mateo 16:24). Chaimandami Jehovaman mingaringapaca aligutapacha pensarina minishtirin (Mateo 5:33). Shinaca ¿imashinata canba causai Jehovapalla cashcata ricuchi ushangui? (Romanos 14:8).

16, 17. a) Joven, canba causai ñana canba cashcataca ¿imashinata shuj ejemplota churashpa intindichipanguiman? b) Jehovaman mingarishpaca ¿imatata ninajupanchi?

¹⁶ ¿Imashinata canba causai ñana canba cashcata ricuchi ushangui? Pensaripai. Shuj amigo canman shuj carrota carashpa, carropa papelcunata cushpa nishcanman, cai carroca canbami can nishpa. Carashpalla nishcaman, carropa llavetaca na cunichu, carrotaca ñucallami manejasha nishpa. Shina nijpica ¿carrota canman ciertopacha carashcata cringuimanllu? ¿Nachu carroca canba amigopallata canman?

¹⁷ Ñucanchicunapash Jehovaman mingarishpaca ninajunchimi: “Ñuca causaica canballami can” nishpa. Ñucanchillata shina nijpimi Jehová Diosca ñucanchi nishcata pactachichun munan. Shinapash pensaripai, na Testigo cuitsahuan o huambrahuan pacalla puri callarishpaca ¿Jehovaman nishcata pactachinajunchimanllu? Shinallata, trabajanamanda tucui tandanajuicunaman na rishpa o villachinaman na llujshinajushpaca ¿Jehovaman nishcata pactachinajunchimanllu? ¿Nachu carrota carashpapash carro llaveta na cuj amigoshnalla canchiman? Shinaca, “ñuca causaica canballami can” nishpa Jehovaman mingarishpaca, ñucanchipa nalishnalla ricurijpipash siempremi Jehová munashcata pundapi churana canchi. Jesuspa ejemplotami catina canchi. Paica nircami: ‘Jahua pachamandaca, na ñuca munashcata rurangapaj shamurcanichu. Ñucata cachamuj Taita munashcata pactachingapami shamurcani’ nishpa (Juan 6:38).

18, 19. a) Bautizarinamanda parlashpaca ¿imatata Rose panigupash Christopher huauquigupash nin? b) Bautizarinamandaca ¿imatata quiquinga yuyapangui?

¹⁸ Imashinami ricupanchi, bautizaringapaca aligutapacha pensarinami minishtirin. Jehovaman mingarishpa bautizarinaca shuj jatun bendicionmi can. Jehovata juyashpa, Jehovaman mingarina ima cajta ali intindishpaca bautizarinataca na manllanguichu. Jehovaman mingarishpa bautizarinataca nunca na arripintiringuichu. Rose nishca joven cuitsaguca ninmi: “Jehovataca tucui shunguhuanmi juyani. Paita sirvishpallami ashtacata cushijuni. Bautizarina yuyaita japishpaca bautizarina minishtirishcapacha cashcata intindishpami bautizarircani” nin.

¹⁹ Callari parrafopica Christopher nishca joven huambragumandami yachajurcanchi. Paica 12 huatacunatalla charishpami bautizarirca. Bautizarina yuyaita japishcamandaca ¿imashinata paica sintirin? Paica cushijushcapachami cani ninmi. Paica 17 huatacunata charishpami precursor regular tucurca, 18 huatacunata charishpaca siervo ministerialmi tucurca, cunanbica ñami Betelpi sirvijun. Paica ninmi: “Bautizarina yuyaita japinaca alipachami cashca. Jehovapa, paipa organizacionba trabajashpami cushijushcapacha causani” nishpa. Quiquinbash ¿bautizaringapaj munajupanguichu? Bautizaringapaca ¿imatata rurana capangui? Chaitaca shamuj temapimi yachajupashun.