Pihuanbash problemata charishpaca juyaihuan arreglashunchi

1, 2. a) Génesis libropica ¿picunalla fiñanajushcatata parlan? b) ¿Imamandata Bibliaca chai gentecuna fiñanajushcata parlan?

BIBLIAPICA huaquin gentecuna fiñanajushcatami parlan. ¿Picunalla fiñanajushcapi pensaripashcanguichu? Huaquinguna imashina fiñanajushcataca Génesis libropa callari capitulocunapillatami parlan. Huaquin ejemplocunata ricupashun. Pundapica Cainmi paipa huauqui Abelta huañuchirca (Génesis 4:3-8). Lamec shuti runapash paita huactashcamandami shuj huambrata huañuchirca (Génesis 4:23, NM). Abrahanba Lotpa michijcunapash paicunapurami fiñanajurca (Génesis 13:5-7). Agarpash Saramanda ashtahuan alimi cani yashpami paihuan fiñarirca. Chaimandami Sarapash Abrahanhuan fiñarirca (Génesis 16:3-6). Ismaelpash paipa ladollapi causanajuj gentecunahuan contrami tucurca. Chaimandami gentecunapash Ismaelpa contra tucurca (Génesis 16:12).

² Shinapash ¿imamandata Bibliaca chai gentecuna fiñanajushcata parlan? Chai gentecunapa causaimanda yachajuchun munashpami Bibliaca chai gentecunamanda parlan. Imashinami chai gentecunaca juchayu caimanda fiñanajushpa pandarirca, shinallatami ñucanchicunapash juchayu caimandaca fiñanajushpa pandarinchilla. Shinaca, fiñanajuicunata charishpaca Bibliapi gentecunapa ali ejemplocunata catipashunchi. Cutin, Bibliapi parlashca nali ejemplocunataca na catinachu canchi (Romanos 15:4). Shina rurashpami tucui huauquipanicunahuan tranquilo caita ushashun.

 3. ¿Imacunatata cai temapica yachajupashun?

³ Cai temapica, shujcunahuan fiñanajushca cashpa imamanda ali tucunata, imashina cutin ali tucunatami yachajushun. Shinallata shujcunahuan ali tucuchun, Jehová Diospa ñaupajpi ali ricuchichun, shujcunahuan ali llevarichun Bibliapa consejocuna imashina ayudajtapashmi yachajushun.

 4. a) ¿Ima yuyaicunata cai mundopica mirashca? b) Chai yuyaicuna cai mundopi mirashcamandaca ¿imata pasashca?

⁴ Diablopa culpamandami cai mundopi gentecunaca ashtaca fiñanajuicunata charishpa shujllashna tandanajushca caitaca na ushan. Jardín de Edenbi ima pasashcata ricupashun. Diabloca Evataca nircami, ima ali cajta, ima nali cajtaca canllatami ricuna cangui, Taita Diosta cazunaca na minishtirinllu nishpa (Génesis 3:1-5). Chai yuyaicuna cai mundopi mirashcamandaca ¿imata pasashca? Cunan punllapi gentecunaca ninmi, ñucanchillatami ima ali cajta, ima nali cajtaca ricuna canchi nishpa. Ashtahuangarin, paicunapilla pensarishpami shujcunamanda ashtahuan ali cashcata crin. Shuj gentecunapipash na pensarishpami paicuna munashca decisiongunata agllanlla. Chaimandami gentecunaca ashtahuan fiñanajushpalla causan. Shinapash Bibliapica yachachinmi, ñapash fiñarijcunaca shujcunahuan problemacunata charingami, juchapipash urmangami nishpa (Proverbios 29:22).

 5. Fiñanajuicunata arreglachunga ¿ima consejocunatata Jesusca curca?

⁵ Paipa catijcunaman yachachijushpaca shinlli cajpipash shujcunahuan tranquilo ali canatami Jesusca yachachirca. Fiñanajuicunata arreglachunga, Jesusca ashtaca consejocunatami curca. Paicunataca nircami, shujcunahuanga cushillami cana canguichi, shujcunahuan tranquilo, ali canatami mascana canguichi, ama culirangapami esforzarina canguichi, pihuanbash fiñanajushpaca uchami ali tucuna canguichi, contracunatapash juyanami canguichi nishpa (Mateo 5:5, 9, 22, 25, 44).

6, 7. a) ¿Imamandata shujcunahuan fiñanajuita charishca cashpaca uchalla ali tucuna canchi? b) Jehovata sirvijcunaca ¿imatata tapurina canchi?

⁶ Cunanbica Jehovata mañashpa, villachishpa, tandanajuicunaman rishpami Jehovata adoranchi. Shinapash ñucanchi huauquipanicunahuan fiñanajushca cajpica Taita Diosca paiman cushca adoraciondaca na chasquingachu (Marcos 11:25). Jehovapa ñaupajpi ali ricuringapaj munashpaca shujcuna pandarijpipash perdonanami canchi (Lucas 11:4; Efesios 4:32, liingui).

⁷ Jehová Diosca ñucanchi huauquipanicunata perdonashpa paicunahuan tranquilo, ali cachunmi munan. Chaimandami tapurina canchi: “¿Ñuca huauquipanicunataca jahuallachu perdonai ushani? Llaquichijpipash ¿paicunahuan tandanajunataca alicachinichu? nishpa. Na perdonaita ushashpaca Jehovatami tucui shunguhuan mañana canchi, perdonangapaj ayudahuai nishpa. Shina nishpa mañajpica Jehová Diosca ayudangami (1 Juan 5:14, 15).

8, 9. Pipash fiñachijpica ¿imatata rurana capanchi?

⁸ Juchayu caimandaca tucuicunallatami huaquinbica imatapash nishpa o imatapash rurashpa llaquichirinchi (Eclesiastés 7:20; Mateo 18:7). Shinapash shujcuna llaquichijpica ¿imatata ruranchi? Shuj ejemplota ricupashun. Shuj punllaca ishcai huauquicuna parlanajujpimi shuj panica paicunata saludarca. Shinapash shuj huauquica, chai panica nali saludahuarcachu nishpami ashata culirarca. Chaimandami chai pani rishca jipaca chai panita nalicachishpa rimai callarirca. Chaita uyashpami chaishuj huauquica aliguman nirca, ashtaca llaquicunata charishpapash chai panica 40 huatacunatami Jehovata ali sirvishca, paica quiquinda nali sintichingapaca na munashcangachu nishpa. Chaita uyashpami chai huauquica pandarijushcanimi nishpa, ima pasashcata cungapaj munarca.

⁹ Shinaca ¿imatata chai ejemplomandaca yachajunchi? Pipash ñucanchita imatapash nishpa o imatapash rurashpa llaquichijpica, ñucanchimi ricuna canchi, culirashpa fiñarinata o perdonanatapash (Proverbios 10:12; 1 Pedro 4:8, liingui). Shujcuna llaquichijpipash perdonajtami Jehová Diosca alicachishpa ricun (Proverbios 19:11; Eclesiastés 7:9). Shinaca jipaman pipash imatapash nishpa o imatapash rurashpa ñucanchita llaquichijpica pensaripashunchi: “¿Perdonashpa cungaita ushanichu? Ñucata imashina llaquichishcata yarishpa catinaca ¿imapipash ayudahuangachu?” nishpa.

10. a) Shujcuna huashalla rimanajujta yachashpaca ¿imashinata shuj paniguca sintirirca? b) Bibliapi ¿ima consejocunata Luciataca shungu ucupi tranquilo sintirichun ayudarca?

¹⁰ Pipash ñucanchita huasha parlajujta yachaj chayashpaca perdonashpa cunganaca shinllimi can. Lucía shuti precursora panigupa ejemplota ricupashun. Paica congregacionbi huauquipanicuna pai imashina villachijujta nalicachishpa, tiempotapash nali utilizajunllu nishpa rimajpimi ninanda llaquirirca. Huaquin consejota cuchun nishpami experienciata charij huauquicunahuan parlarca. Paicunaca Bibliapi huaquin textocunata ricuchishpami Luciataca chai parlocunapi ama yapata preocuparishpa, Jehovata sirvinapirapash preocuparichun ayudarca. Luciaca Mateo 6:1-4​pi shimicunata liishpami ashtacata animarirca (chai textota liipangui). Chai textocunami paitaca Jehovata pundapi cushichina cashcata yarichun ayudarca. Shinami Luciaca shujcunapa parlashcacunapi ñana preocuparijungapaj decidirirca. Cunanbi pipash pai imashina villachishcata nalicachishpa parlajpica, Jehová Dios paipa rurashcata alicachishpa ricujujta yarishpami Luciaca tranquilo, cushilla sintirin.

11, 12. a) Shuj huauqui o shuj pani ñucanchihuan fiñarishcami can yashpaca ¿imatata rurana capanchi? b) Shuj problema tiajpica ¿imatata Abrahanba ejemplomandaca yachajupanchi? (Callari dibujota ricupangui).

¹¹ Santiago 3:2​pica ninmi: “Tucuicunami, imatapash pandata nishpa llaquichinchilla” nishpa. Shinaca shuj huauqui o shuj pani ñucanchi imatapash nishcamanda o rurashcamanda nali sintirijushcata yachashpaca ¿imatata rurana canchi? Jesusca nircami: ‘Taita Diosman imagutapash carangapaj, altarman apashpa ña chayajushpa, canba huauqui canda fiñashca purijushcata yarishpaca, carangapaj apamushcataca altar ñaupajpi saquishpa, canba cumbahuanra ali tucungapaj ringui. Chai jipaca, Diosman carangapaj apamushcataca caragringuilla’ nishpa (Mateo 5:23, 24). Imashinami ricupanchi, shuj huauquihuan o shuj panihuan imapash problemata charishpaca paihuanmi parlana canchi. Shinapash paitalla culpanapa randica ñucanchi imapi pandarishcatapash intindinami canchi. Ashtahuangarin, ali tucuna munaihuanmi parlana canchi. Ñucanchi huauquipanicunahuan tranquilo, ali canami ashtahuan importante can.

¹² Bibliapica shuj huauquihuan o shuj panihuan problemata charishpa imashina cutin ali tucunatami yachachin. Abrahanba, paipa sobrino Lotpa ejemplota ricupashun. Paicunaca ashtaca animalcunata, ashtaca michijcunatami charirca. Animalcunata michingapaj alpacuna faltajujpimi Lotpa michijcunaca Abrahanba michijcunahuan fiñanajunajurca. Chaimandami Abrahanga paipa sobrino Lothuan tranquilo, ali cangapaj munashpa Lottaca nirca, canba animalcunata michingapaca can munashca alpacunata agllapailla nishpa (Génesis 13:1, 2, 5-9). Abrahanga shujcunahuan tranquilo causanatami pundapica mascarca. Shujcunahuan tranquilo, ali causanata mascaimandaca ¿Abrahanga llaqui aparcachu? Na. Lothuan arreglashca jipami Jehová Diosca, shuj jatun bendiciondami cusha nishpa Abrahandaca cushichirca (Génesis 13:14-17). Shinaca ¿imatata Abrahanba ejemplomandaca yachajunchi? Shuj huauquihuan o shuj panihuan imapash problemata charishpa, shinlli cajpipash chai problemata juyaihuan arreglajpica Jehová Diosca bendiciangami^[1] (cai tema tucuripi notata ricupangui).

13. a) Shuj huauqui culirashpa contestajpica ¿imatata shuj huauquica rurarca? b) ¿Imatata paicunamandaca yachajunchi?

¹³ Cunanbi shuj huauquihuan ima pasashcata ricupashun. Juan^[2] (cai tema tucuripi notata ricupangui) shuti huauquimanga jatun tandanajui ali llujshinata ricuchunmi shuj jatun responsabilidadta curca. Chai responsabilidadtaca primera vezmi chasquijurca. Chaimandami Antonio shuti huauquitaca ayudahuangui nishpa telefonopi cayajurca. Shinapash Antonioca culira contestashpami telefonotapash colgashpa saquirca. ¿Imamandata shina rurarca? Ñaupa jatun tandanajui ali llujshinata ricujuj huauquihuan problemata charishca cashpami Antonioca shina rurarca. Shinapash Juanga na culirarcachu. Ashtahuangarin Antoniotaca ayudanami cani nishpami pensarirca. Chaimandami Antoniotaca shuj horas jipa cayashpa nirca, nachu quiquihuan parlaita ushapani nishpa. Shinami shuj semana jipaca Tandanajui Huasipi tuparishpa, Jehovata mañashpa shuj horasta Antoniohuanga parlarca. Chaipimi Antonioca ñaupa jatun tandanajui ali llujshichun ricujuj huauquihuan ima problemata charishcata parlarca. Antonio parlajujpica Juanga aliguta uyashpami Bibliapi huaquin textocunahuan ayudarca. Shina rurashpami ishcandi huauquicunaca tranquilo sintirishpa jatun tandanajuipipash ishcandillata igual ayudanajurca. Antonioca Juan cushilla, tranquilo parlashcamandaca ashtacatami agradicin.

14, 15. a) ¿Ima horata Mateo 18:15-17​pi shimicunataca pactachina capanchi? b) Jesús yachachishca shinaca ¿ima quimsa cosascunatata rurana capanchi? c) ¿Imamandata Jesús yachachishca quimsa cosascunataca rurana capanchi?

¹⁴ Tauca problemacunataca, problemata charij huauquicunalla parlashpami arreglai ushanchi, arreglana canchi. Shinapash huaquinbica na facilchu can. Chaimandami Jesusca nirca, huaquinbica shujcunapa ayudami minishtirin nishpa (Mateo 18:15-17, liingui). Shinapash ¿ima horata Mateo 18:15-17​pi shimicunataca pactachina canchi? Mateo 18:15-17​pica uchilla pandarishcacunamandaca na parlajunllu. Jatun problemacunamandami parlajun. ¿Imashinata yachanchi? Ricupangui. Chai textocunapica ninmi, problemata arreglangapaj ñucanchilla rijpipash, ishcaihuan o quimsahuan rijpipash, o congregacionda ñaupaman pushajcuna rijpipash na uyashpa na arripintirijpica juchata rurajtaca ‘na israel runatashna, impuestota japij runatashnami ricuna’ can nishpa. Cunan punllacunapica impuestota japij runatashnami ricuna can nishpaca expulsanamandami parlajun. Shinaca jucha nishpaca umachishpa shuhuanamanda, o llullacunata ninamandami Jesusca parlajurca (“¿Imatata nisha nin?” nishca recuadrota ricupangui). Shinapash, Jesusca jatun juchacunamandaca na parlajurcachu. Jatun juchacunaca jarihuan huarmihuan juchapi urmana, jaripura o huarmipura pacta puñushpa juchata rurana, Jehovamanda caruyashpa pandata yachachina o maqui rurashca dioscunata adoranami jatun juchacuna can. Chai jatun juchacunataca siempremi ancianocunapa maquipi saquina can.

¹⁵ Shinaca ¿imashinata Mateo 18:15-17​pi Jesuspa shimicunataca pactachishun? Jesuspa shimicunata pactachingapaca quimsa cosascunatami rurana canchi. 1) Problemata charishca huauquihuan ali tucungapami shujcunaman imatapash na parlashpa chai huauquihuan parlana canchi. Huaquinbica cutin cutin parlanami minishtirin. Shina parlashca jipapash paihuan na ali tucuita ushashpaca ¿imatata ashtahuan rurana canchi? 2) Chai huauquihuan ima problemata charishcata yachaj huauquihuan o ciertopacha jucha cashcata ricuchun ayudana huauquihuan rishpami parlana canchi. Shina rishpa problemata arreglai ushashpaca ñucanchihuan problemata charishca huauquipash Jehovapa ñaupajpi ali ricurichunmi ayudanajunchi. Shuj huauquicunahuanbash rishpa cutin cutin parlashpa problemata na arreglai ushashpaca ¿imatata rurana canchi? 3) Ancianocunamanmi villana canchi. Shinapash ¿imamandata chai quimsa cosascunata rurana canchi? Jesús nishca shinaca, chai huauquita juyashpa, ayudana munaimandami shina rurana canchi (Mateo 18:12-14).

16. ¿Imamanda ninchi, Jesús yachachishca quimsa cosascunata ruranaca alimi can nishpa?

¹⁶ Tauca problemacunata arreglangapaca Mateo 18:15-17​pi nishca quimsa cosascunata ruranaca na minishtirinllu. ¿Imamandata shina ninchi? Casi siempremi nara expulsai tucushpallata chai jatun problemataca arreglan. Chaipimi llaquichi tucujushca huauquica chai huauquita perdonashpa cutin paihuan ali tucushpa tranquilo cana can. Jesús yachachishca shinaca, ancianocunaman villanata ultimoman saquinaca alimi can. Shinaca, Mateo 18:15-17​pi mandashca shinaca, callari ishcai cosascunata rurashca jipa, chai huauqui nalita rurashcata seguro cashpami ancianocunamanga villana can.

17. Tucuicunahuan tranquilo, ali canata mascashpaca ¿ima bendiciongunatata charipashun?

¹⁷ Discípulo Santiagoca nircami: ‘Maijan runapash na pandata parlashpa na llaquichij cashpaca, ima pandatapash na ruraj cashpami paipa cuerpotapash jarcai ushan” nishpa (Santiago 3:2). Shinaca juchayu caimandaca tucuicunami imatapash nishpa o imatapash rurashpa shujcunata llaquichishun. Problemata arreglangapaj munashpaca tucuicunahuan shujllashna tandanajushca canatami mascana canchi (Salmo 34:14). Tucuicunahuan tranquilo, ali canata mascashpaca ñucanchi huauquipanicunahuan ali llevarishpami tucuicunahuan shujllashna tandanajushca cashun (Salmo 133:1-3). Ashtahuangarin shinami ‘casilla ali causaita caraj Taita Diosman’ ashtahuan quimirita ushashun (Romanos 15:33). Chai bendiciongunataca ima problemata charishpapash juyaihuan arreglashpallami charishun.