¿Ima horacamanda “Canba Reino ucha chayamuchun” nishpa mañashun?

1, 2. a) ¿Imamandata huaquin cosascunataca ricujushpapash na cuenta japinchi? b) Diospa Reinomandaca ¿imatata yachanchi?

HUAQUINGUNACA doctorpaman rishpa, doctor ima nishcataca na cabalta yarinllu. Cutin shujcunaca llavecuna o lentescuna ñaupajpi tiajujpipash mascajushpaca na tarinllu. ¿Imamandata shina pasan? Investigadorcunaca ninmi, chai ratopillata shuj cosascunatapash rurangapaj munajushpami na ricunchi o na cuenta japinchi. Ñucanchi umaca shuj cosaspillami ashtahuan preocuparin ninmi.

² Ashtaca gentecunaca huata 1914manda cai mundopi causai cambiashcata cuenta japishpa o ricushpapash imamanda shina pasajujtaca na intindinllu. Ñausa cuendami can. Shinapash ñucanchicunaca Bibliata estudiaimandami cuenta japishcanchi, huata 1914​pimi Jesusca Diospa Reinopi Rey tucushca nishpa. Shinapash “Canba Reino ucha chayamuchun. Canba munaica jahua cielopishna cai Alpapipash pactarichun” nishca shimicunaca nara pactarishcachu (Mat. 6:​10, NM). Jahua cielopishna cai Alpapipash Taita Diospa munai pactarichunga cai Alpapi tucui nali ruraicunarami tucurina can.

 3. Taita Diospa Shimita estudiashpa catimandaca ¿imacunatata cuenta japipashcanchi?

³ Ñucanchicunaca Taita Diospa Shimita estudiashpa catimandami cunan punllacunapi ashtaca profeciacuna pactarijushcata crinchi. Cutin ashtaca gentecunaca paicunapa munaicunapilla preocuparishpa causaimandami huata 1914manda Jesús mandajushcata, cai Alpapi tucui nali causaita tucuchinatapash na crin. Shinaca ashtaca huatacunata Jehovata sirvijushpapash tapuripai: “Profeciacuna pactarijujta ricushpaca cai Alpapi nali causai ñalla tucurinataca ¿tucui shunguhuanllu crishpa catijunira? nishpa. Chairalla bautizarishca cashpapash pensarinami capangui ¿imapita ashtahuan preocuparini? nishpa. Imashina cajpipash ñucanchicunaca ¿ima pruebacunata ricushpata Jesús ñalla Taita Diospa munaita cai Alpapi pactachinata crinchi? Quimsa pruebacunata ricupashun.

4, 5. a) Huata 1914mandaca ¿imatata Jesusca rurajushca? (Callari dibujota ricupangui.) b) Yuraj caballopi tiajuj Jesusta quimsa caballocunapi tianajujcuna catijushcamandaca ¿imata pasashca? c) Chai profeciaca ¿imashinata pactarishca?

⁴ Bibliapi intindichishca shinaca, Jesusmi yuraj caballopica tiajun. Jesusca 1914 huatapi mandangapaj autoridadta chasquishcandimi Diablopa nali mundotapash tucuchi callarirca (Apocalipsis 6:​1, 2, liingui). Apocalipsis capítulo 6​pi nishca shinaca, yuraj caballopi tiajuj Jesustaca quimsa caballocunapi tiarishcacunami catiria llujshin. Chaimandami Diospa Reinopi Jesús mandai callarishca jipaca ashtaca guerracuna, yarjaicuna, jatun ungüicuna, ninan jatun llaquicunapi huañuicunapash cai Alpapica tiai callarina carca (Apoc. 6:​3-8).

⁵ Bibliapi nishca shinaca, guerracuna tiaimandami cai Alpapi tranquilo, ali causaica chingarirca. Cai Alpapi ali causai tiachun nishpa tauca llactamanda gobiernocuna parlarishcapash yangami cashca. Cai Alpapi tranquilo, ali causaica na tiashcachu. Primera Guerra Mundialmanda, shuj guerracunamandapashmi cai Alpapi tranquilo ali causaica na tiashca. Cientificocuna ashtahuan investigaciongunata rurajpipash ashtaca negociocuna tiai callarijpipash 1914 huatamandaca ashtaca gentecunami ima micunagutallapash na charin. Micunamandami tauca llactacunapica ashtaca guerracuna tian. Shinallata ¿nachu ricupashcanchi, millai ungüicunamanda, terremotocunamanda o imapash jatun llaquicunapi ashtaca ashtaca gentecuna huañunajujta? Jatun llaquicunaca mundo enteropimi tian, cutin cutinmi ricurin. Ima horapash na tiashca jatun llaquicunatami ricunajunchi. ¿Imamanda shina pasajujta cuenta japipashcanguichu?

 6. a) ¿Picunata Bibliapi profeciacuna pactarijujta cuenta japirca? b) Bibliapi profeciacuna pactarijujta cuenta japishpaca ¿imatata rurarca?

⁶ Primera Guerra Mundialta ricushpa, gripe española nishcata ricushpapash ashtaca gentecunaca Bibliapi profeciacuna pactarijujtaca na crircachu. Shinapash Jesusta catij ungidocunaca 1914 huatapimi ‘na israelitacunapa mandana’ punllacuna tucuringa nishpa chai huatataca cushijushpa shuyanajurca (Luc. 21:24). Imapacha pasanata na cabal yachashpapash 1914 huatapi Diospa Reinopi jatun cambiocuna tianataca alimi yacharca. Bibliapi profeciacuna pactarijujta ricushpami ungidocunaca na manllashpa villachirca Diospa Reinoca mandai callarishcami nishpa. Shina nishpa villachinajujpimi contracunaca ninanda paicunataca llaquichi callarirca. Shinami paicunata llaquichina nishca profeciapash pactarijurca. Jipa huatacunamanga Jehovata sirvijcuna ama villachichun nishpami contracunaca leycunata llujchirca. Huaquingunatacarin ninandami macarca, carcelpi churarca. Shujcunataca sipishpa, disparashpa o umata muchushpami huañuchirca (Sal. 94:20; Apoc. 12:15).

 7. ¿Imamandata ashtacunaca cai mundopi ima pasajujta na cuenta japi ushan?

⁷ Tauca pruebacuna pactarijujta ricushpapash ¿imamandata ashtaca gentecunaca Diospa Reino mandai callarishcataca na cuenta japin? Profeciacuna pactarijunmi nishpa Jehová Diosta sirvijcuna villachijpipash ¿imamandata na cringapaj munan? ¿Paicunapa ñavi ricushcatallachu paicunaca ricungapaj munan? (2 Cor. 5:⁠7.) ¿Paicunapilla preocuparishpa causaimandachu Taita Dios imata rurajujtaca na ricui ushan? (Mat. 24:​37-39.) ¿Diablopa nali mundopa yuyaicunata, munaicunata catishpachu pandarinajun? (2 Cor. 4:⁠4.) Diospa Reino imata rurajujta cuenta japingapaca na ñucanchi ñavi ricushcatallachu ricuna canchi, fetami charina canchi. Ñucanchicunaca Diospa Reino imata rurajujta cuenta japishcamandami ninanda cushijunchi.

 8. a) ¿Imashinata 2 Timoteo 3:1-5​pi shimicunaca pactarijushca?

⁸ Taita Diospa munaita Jesús cai Alpapi pactachinata cringapaca shuj pruebatapash ricupashun. Cunanbica ashtaca nali cosascunami mirajun. 2 Timoteo 3:1-5​pi nishca shinaca ñami casi 100 huatacunata ashtaca nali cosascuna mundo enteropi ashtahuan mirajushca. ¿Nachu chai profecía pactarijujtaca quiquinbash ricupangui? Huaquin ejemplocunata ricupashun (2 Timoteo 3:​1, 13, liingui).

9, 10. ¿Imamandata cai mundo ashtahuan ashtahuan huaglijujta cuenta japishcanchi?

⁹ Cunan punllacunata 1940, 1950 huatacunahuan ricujpica cunan punllacunapi gentecunaca ashtahuanmi huaglinajun. Trabajo pushtucunapi, pugllaicunapi, moda nishcacunapipash ninandami cambiashca. Millai millai gentecuna, mapa, nali purij gentecunaca tucui ladocunapimi mirashca. Televisionmanda parlashpaca, huata 1950cunapica huaquin programacunaca nalichu ninmi carca. Shinapash cunanbica chai programacunatallatami tucui familiacunapami ali can nin. Ashtahuangarin, shuj llactacunapica jarihuarmi tucushcacunami mushuj moda ropacunata llujchin. Ashtaca gentecunaca chai mushuj moda ropacunatami alicachin. Ashtahuangarin chai mushuj moda ropacunata ricushpami gentecunaca jarihuarmi tucunaca alimi can nishpa pensai callarin. Gentecuna shina pensajpipash ñucanchica Jehová Dios imata pensajta yachashpami cushijunchi (Judas 14, 15, liingui.)

¹⁰ Shinallata 1950 huatacunapica huahuacuna tabacota chupajpi, machajpi o pinganaita bailajpimi taitamamacunaca ninanda manllarin carian. Shinapash cunan tiempocunapi ricujpica ashtahuan manllanai cosascunami pasajun. Shuj llactapica 15 huatacunata charij estudiantemi paipa cumbacunata yangata disparashpa ishcaipurata huañuchirca cutin 13taca heridocunata saquirca. Cutin machashca huambracunaca 9 huatacunata charij cuitsagupa taitata, primota ushashcata macashpami chai cuitsagutapash llaquinaita huañuchirca. Asia llactapipash ninmi, cai último 10 huatacunapica jovengunami mayorlla gentecunatapash yali ashtaca nali cosascunata rurashca nishpa. ¿Nachu quiquinbash cai mundo ashtahuan ashtahuan huaglijujta cuenta japishcangui?

11. ¿Imamandata ashtaca gentecunaca nali cosascuna mirajujtaca na cuenta japin?

¹¹ Apóstol Pedroca nircami: ‘Tucurimui punllacunapica paicunapa munai nalita rurajcuna, asishpa ricuj runacunami shamunga. Chaicunaca ningami: “Cristo tigramushami nishcapash ¿maita pactanyari? Taitacuna huañushca punllamandapacha imapash chashnallatami tiajun” ’ nishpa (2 Ped. 3:​3, 4). Gentecunaca ashtaca nali cosascuna mirajujta ricushpami chai cosascunaca normalmi can yan. Shuj ali amigo cambiajpica ratomi gentecunaca cuenta japin. Shinapash nali gentecuna cai mundopi mirajujtaca na cuenta japinllu. Gentecuna ashtahuan huaglijujta na cuenta japijpipash jatun llaquicunaca ricuringallatami.

12, 13. a) Cai mundopi nali cosascuna mirajujta ricushpaca ¿imamandata na desanimarina capanchi? b) Llaquicuna tucurinata cringapaca ¿imatata yarina capanchi?

¹² Apóstol Pabloca nircami ‘tucurimui punllacunapica jatun llaquicunami shamunga’ nishpa (2 Tim. 3:1). Shinapash na manllarishpa desanimarinachu canchi. Jehová Diospa ayudahuan, paipa espíritu santopa ayudahuan, congregacionba ayudahuanga ima llaquicunata o ima manllaicunata charishpapash aguantai ushashunmi. Taita Diosmanda ninan ushaita charishpami’ Jehovataca tucui shunguhuan cazuita ushashun (2 Cor. 4:​7-10).

¹³ Apóstol Pabloca “caicunatapash yachanami cangui” nishpaca ciertopacha llaquicuna tianamandami shina nishpa escribirca. Shinaca Jehová Dios tucuchingacamanmi gentecunaca ashtahuan ashtahuan huaglinga. Historiadorcunaca escribishcami, gentecunaca nalicunata ruranajuimandami tucuchi tucushca nishpa. Cunan punllacunapipash jatun nali ruraicunaca ashtacatami mirajun. Jatun llaquicuna tiaimandami nalicunaca tucuchi tucunga. Gentecuna na cringapaj munajpipash, 1914 huatamandami ashtaca llaquicuna mirajushca. Shinaca ñallami Diospa Reinoca tucui nalicunata tucuchinga.

14-16. Diospa Reino tucui nalicunata tucuchinata yachangapaca ¿ima shuj pruebatata charinchi?

¹⁴ Diospa Reino tucui nalicunata tucuchijta yachangapaca shuj pruebatapash ricupashunchi. 1914 huata nara tucujpillatami ungidocunaca cushijushpa Taita Diostaca sirvinajurca. Shinapash paicunapa munashcacuna huata 1914pi na pactarijpica ¿imatata rurarca? Ashtaca ungidocunaca ninanda llaquichijpipash llaquicunata aguantashpami Taita Diosta sirvishpa catirca. Ashtahuangarin, ashtaca ungidocunaca huañungacamanmi Taita Diosta sirvirca.

¹⁵ Tucurimui punllacunamanda parlashpaca Jesusca nircami: “Cunan viñaicuna nara huañujpillatami, ñuca villajushca shimicunaca pactanga” nishpa (Mateo 24:​33-35, liingui). “Cunan viñaicuna” nishpaca ishcai grupocunamandami Jesusca parlajun. Primer grupopi ungidocunaca 1914 huatapi Jesús mandai callarishcatami ricurca. Chai ungidocunaca 1914 huatapi causanajurcarami. Shinallata 1914 huatapi o punda huatacunapimi Taita Diospa espirituta chasquishpa Diospa huahuacuna tucurca (Rom. 8:​14-17).

¹⁶ Cati grupopi ungidocunaca primer grupopi ungidocuna causanajuj punllacunapillatami causanajurca. Ashtahuangarin primer grupopi huaquin ungidocuna cai Alpapi causanajuj punllacunapillatami Taita Diospa espíritu santota chasquirca. Shinaca cunan punllacunapi ungidocunaca na tucuicunachu cunan viñaicuna nishcacuna can. Shinapash cunan punllacunapi ungidocunaca ñami mayorllagucuna can. Mateo 24:34​pica ninmi: ‘Cunan viñaicuna nara huañujpillatami ñuca villajushca shimicunaca pactanga’ nishpa. Shinaca Ninan Manllanai Llaqui Punllacuna callarijpica huaquin ungidocunaca cai Alpapi causanajungarami. Caicunata yachashpami ninchi, Diospa Reinoca ñallami nalicunata tucuchishpa shuj mushuj ali causaita callarichinga nishpa (2 Ped. 3:13).

17. Quimsa profeciacuna pactarijujta ricushpaca ¿imatata cuenta japipashcanchi?

¹⁷ Cai quimsa profeciacuna pactarijujta ricushpaca ¿imatata intindipashcanchi? Jesusca nircami, ima punlla ima horas fin shamunataca na yachanchichu nishpa (Mat. 24:36; 25:13). Shinapash, apóstol Pabloca nircami: ‘Rijcharina horasca ñami chayamushca’ nishpa (Romanos 13:​11, liingui). Ñami tucurimui punllacunapi causanajunchi. Shinaca Jehová Diospash Jesuspash imata rurajujta ali cuenta japishpaca, cai Alpapi nali causai ñalla tucurinataca tucui shunguhuanmi crishun.

18. Taita Diospa Reinota na cazungapaj munajcunaca ¿imata tucunga?

¹⁸ Imashinami ña ricunajupashcanchi, Jesusca yuraj caballopi tiarishpami 1914 huatamanda mandai callarishca. Chaita na cringapaj munaj gentecunaca ñallami arripintiringa. Tucui nalicunata tucuchi callarijpica ushashcatami manllaringa. Taita Diosmandaca na quishpiringachu. Chai punllaca ¿pita shayari ushanga? (Apoc. 6:​15-17.) Apocalipsis capítulo 7pi intindichishca shinaca, chai punllacunapi causanajuj ungidocunapash, cai Alpapi causana esperanzata charijcunapashmi Dios paicunata chasquijpi, Diospa ñaupajpi ali ricurishpa ‘shayari ushanga’. Chai jipaca ashtaca gentecuna nishcami Ninan Manllanai Llaqui Punllacunamanda salvarishpa mushuj Alpaman yaicunga (Apoc. 7:​9, 13-15).

19. Bibliapa profeciacuna cunan punllacunapi pactarijujta crijcunaca ¿ima pactarichunda shuyanajunchi?

¹⁹ Bibliapa profeciacuna cunan punllacunapi pactarijujta intindishpaca Diablopa nali mundo pandachichunga na saquishunllu. Shinallata cai mundopi ima pasajujta ricushpapash na ñausa cuenda causashunllu. Ñallami Jesusca cai mundopi tucui nalicunata Armagedonbi tucuchinga (Apoc. 19:​11, 19-21). Chai punllacuna chayamujpica ¡ninandami cushijushun! (Apoc. 20:​1-3, 6; 21:​3, 4.)