Aliguta cazushpa aliguta yarishpa sirvij esclavoca ¿Maijanda canga?

1, 2. Cunanbica ¿imashinata Jesusca ñucanchita yachachijun? ¿Imamandata chai esclavo pi cashcataca ali yachana capanchi?

SHUJ paniguca publicaciongunata escribij oficinacunamanga cashna nishpami escribirca: “Minishtijuj horascunapipachami ali temacunata llujchishpa ninanda ayudahuashcanguichi” nishpa. ¿Nachu tucuicunallata chai panigushnalla sintiripashcanchi? Shinapash ¿imamandata shina sintirishcanchi?

² Congregacionda ñaupaman pushaj Jesusmi pai nishcashnaca ñucanchicuna minishtijuj horaspi yachachijun. Shinapash ñucanchita yachachingapaca ¿picunatata Jesusca agllashca? Pai shamuna punllacunamanda parlashpaca Jesusca nircami, sirvijcunaman ‘micuna horasgupi’ yachachichunga ‘aliguta cazushpa aliguta yarishpa sirvij’ esclavotami churasha nishpa (Mateo 24:​45-47, liingui).a Cai tucuri punllacunapica chai esclavota churashpami Jesusca paipa ali catijcunata yachachijun. Chaimandami chai esclavo maijan cashcataca ali yachana canchi. Chai esclavo pi cashcata yachashpallami Diospa ñaupajpi ali ricurishun (Mat. 4:4; Juan 17:3).

 3. Punda huatacunapica ¿imacunatata intindin carcanchi?

³ Aliguta cazushpa aliguta yarishpa sirvij esclavomandaca ¿imatata intindina canchi? Punda huata publicaciongunapica llujshircami huata 33 Pentecostespimi Jesusca aliguta cazushpa aliguta yarishpa sirvij esclavotaca agllarca nishpa. Shinallata yanmi carcanchi, huata 33manda callarishpa cunangamanmi ungidocuna maijan huatapi causashca cashpapash aliguta cazushpa aliguta yarishpa sirvij esclavo carca nishpa. Ashtahuangarin, chai ungidocunata cada unota separado ricujpica “sirvijcunami” can ninmi carcanchi. Shinallata, tucuilla cai Alpapi charishcacunata cuidachunga Jesusca huata 1919pimi aliguta cazushpa aliguta yarishpa sirvij esclavotaca agllarca nishpami yan carcanchi. Shinapash Jehová Diosta mañashpa ashtahuan aliguta yachajujpica, ashtahuan aliguta intindinarami cashcanchi (Prov. 4:18). Shinaca aliguta cazushpa aliguta yarishpa sirvij esclavomanda ashtahuan yachajupashunchi. Shinallata, jahua cielopi o cai Alpapi causana esperanzata charijpipash cai tema imashina ayudajta yachajupashunchi.

4-6. ¿Imamandata ninchi, aliguta cazushpa aliguta yarishpa sirvij esclavomanda parlaj chimbapuraica huata 1914 jipami pactarin nishpa?

⁴ Huaquin textocunata liishpa intindijpica aliguta cazushpa aliguta yarishpa sirvij esclavomanda parlaj chimbapuraica na huata 33 Pentecostepichu pactari callarirca. Tucuri punllacunapimi pactarijun. Aliguta intindingapaca huaquin textocunata ricupashun.

⁵ Jesusca pai ‘shamuna punllamanda [griego parousía]’ shinallata ‘cai mundopa cosascuna tucuri punllacunamanda’ parlashpaca aliguta cazushpa aliguta yarishpa sirvij esclavomandapashmi parlarca (Mat. 24:3). Mateo 24:​4-22​pa primera parteca ishcai viajetami pactarin. Pundaca huata 33manda huata 70camanmi pactarirca. Cati viajeca ñucanchi punllacunapimi pactarijun. Shinapash aliguta cazushpa aliguta yarishpa sirvij esclavomanda parlaj chimbapuraica na ishcai viajeta pactarinllu.

⁶ Mateo 24:29​manda ñaupaman parlashpaca cunan punllacunapi pactarina cosascunamandami Jesusca parlarca (Mateo 24: 30, 42, 44, liingui). Ninan manllanai llaqui punllacunamanda parlashpaca Jesusca nircami: ‘Runa Aichayu tucushca ñuca fuyu jahuapi shamujtaca ricunguichimi’ nishpa. Chaimandami tucuri punllacunapi causajujcuna rijcharishcashna causachunga nirca: ‘Ñuca ima horas tigramunataca na yachanguichichu, cungashcapimi ñapash shumusha’ nishpa.b Jesusca tucuri punllacunapi pactarina cosascunamanda parlashpami aliguta cazushpa aliguta yarishpa sirvij esclavomandapash parlarca. Shinaca, aliguta cazushpa aliguta yarishpa sirvij esclavomanda parlaj chimbapuraica huata 1914 jipami pactari callarirca. Ricushun huaquin textocunata

 7. Tucuri punllacunapica ¿imatata yachangapaj munapanchi? ¿Imamanda?

⁷ Yaripashunchi Jesusca tapurcami aliguta cazushpa aliguta yarishpa sirvij esclavoca ¿maijanda canga? nishpa. Imashinami ñaupa temapi ricuparcanchi, apostolcunaca milagrocunata ruranllami carca, shujcunapash milagrocunata rurachunga espíritu santota cunllami carca (Hech. 5:12). Chaita ricushpami apostolcunata Taita Dios ayudajushcataca tucuicuna yacharca. Chai punllacunapica, ñucanchita yachachingapaca pitashi Jesusca agllarca nishpa tapurijunaca na minishtirircachu. Shinapash, huata 1914pimi cozecha tiempo callarishpa trigotaca nali jihuamanda separai callarirca (Mat. 13:​36-43). Huata 1914pi cozecha tiempo callarijpica Jesusta panda catijcunapashmi ashtacacunaca ñucanchimi Jesusta ali catinajunchi ninajurca. Chaimandami picuna trigoshna Jesusta ali catij ungidocuna cashcata rijsinaca ninanda minishtirirca. Picuna ali trigoshnca cashcata yachachunga Jesusca nircami, ñucata catijcunaca Taita Diosmanda cabalta yachajushcacunami canga nishpa.

 8. ¿Imamandata aliguta cazushpa aliguta yarishpa sirvij esclavoca ungidocuna cana can?

⁸ Aliguta cazushpa aliguta yarishpa sirvij esclavoca cai Alpapi causaj ungidocunami can. Paicunatami Bibliapica nin, reycunashna sacerdotecunashnami can nishpa. Paicunamanmi ‘yanapi causanajujcuna juyailla michaman llujshichun’ ‘Taita Diospa juyailla rurashcacunata villachun mingarca’ (1 Ped. 2:9). Paicunaman mingashcamandami paicunaca micunaguta preparashpa carajuj cuenda Taita Diosmandaca yachachina can (Mal. 2:7; Apoc. 12:17).

 9. ¿Tucuilla ungidocunachu aliguta cazushpa aliguta yarishpa sirvij esclavo can? ¿Imamandata shina ninchi?

⁹ Cai Alpapi causaj ungidocunaca na tucuillacunachu aliguta cazushpa aliguta yarishpa sirvij esclavo can. ¿Imamandata shina ninchi? Ali trigoshna huaquin ungidocunaca siervo ministerialcuna, ancianocunami can. Paicunaca huasin huasin rishpami villachinajun, congregaciongunapipash yachachinajun, oficina centralpa instrucciongunatapash cushijushpami cazun. Ungida panigucunapash congregacionbi yachachinataca yaitallapash na yanllu (1 Cor. 11:3; 14:34). Chaimandami ninchi, na tucui ungidocunachu aliguta cazushpa aliguta yarishpa sirvij esclavo can nishpa.

10. Aliguta cazushpa aliguta yarishpa sirvij esclavoca ¿pita can?

¹⁰ Shinaca, aliguta cazushpa aliguta yarishpa sirvij esclavoca ¿pita can? Jesús ricuchishcashnaca ashagucunallami ashtacacunaman yachachina carca. Shinaca, ashalla ungidocunami 1914mandaca micunaguta preparashpa carajuj cuenda Taita Diosmanda yachachinajushca. Cai tucuri punllacunapica aliguta cazushpa aliguta yarishpa sirvij esclavoca oficina centralpimi can. Paicunatami cai último huatacunapica Testigo de Jehovacunapa Cuerpo Gobernante nin. Bibliapica na tauca esclavocunamandachu parlan. Shujlla esclavomandami parlan. Shinaca, Cuerpo Gobernantepi ungidocunaca tucuillacuna shujllashna tandanajushpa imapash decisionda agllashpami aliguta cazushpa aliguta yarishpa sirvij esclavo can.

11, 12. a) Aliguta cazushpa aliguta yarishpa sirvij esclavomanga ¿imacunatallata cuidapangui nishpa mingarca? b) Jesusca ¿ima horata esclavomanga sirvijcunata cuidapangui nishpa mingarca? ¿Picunatata agllarca?

¹¹ Aliguta cazushpa aliguta yarishpa sirvij esclavomanda parlashpaca Jesusca nircami, esclavomanmi mingasha sirvijcunata cuidapangui, tucuilla ñuca charishcacunatapash cuidapangui nishpa. Esclavomanda parlaj chimbapuraica tucuri punllacunapimi pactarijun. Shinaca sirvijcunata cuidapangui, tucuilla ñuca charishcacunata cuidapangui nishca shimicunaca huata 1914 jipa, Jesús mandangapaj autoridadta chasquishca jipami pactarina carca.

¹² Jesusca ¿ima horata esclavomanga sirvijcunata cuidapangui nishpa mingarca? Chaita yachangapaca 1914 huatapi cozecha tiempo callarijpi ima tucushcatami yarina canchi. Chai punllacunapica Jesusta catinchi nij tucushcacunapash ashtacacunami ñucanchimi Jesusta ali catinajunchi ninajurca. Chaimandami 1914manda 1919 huata callaricamanga Jesuspash Jehová Diospash picuna Dios munashcashna ali adoranajujta ricui callarirca (Mal. 3:1).c Bibliamanda Yachajujcuna Jehová Diosta tucui shunguhuan juyashpa Bibliapi yachachishcacunata respetajta ricushpaca Jesuspash Jehová Diospash ninandami cushijurca. Shinapash Bibliamanda Yachajujcuna ali trigo cashcata ricuchingapaca huaquin cosascunapi cambianarami carca. Paicunaca ali shungu cashcata ricuchishpa alpa mangagutashna Jehová Dios formachunmi saquirca (Mal. 3:​2-4). Chaimandami Jesusca huata 1919pi tucui ungidocunamanda huaquingunatalla agllashpa paicunataca aliguta cazushpa aliguta yarishpa sirvij esclavo cachun churarca. Chai huatapimi chai esclavomanga sirvijcunata cuidapangui nishpa mingarca.

13. ¿Picunapashta sirvijcuna can? ¿Imamanda?

¹³ Shinaca sirvijcunaca ¿picunata can? Sirvijcunaca aliguta cazushpa aliguta yarishpa sirvij esclavopa yachachishcacunata chasquijcunami can. Tucuri punllacuna callaripica tucuilla ungidocunami sirvijcuna carca. Jipa huatacunamanga ashtaca ashtacacuna (gran muchedumbre) o shuj llamagucuna nishcacunapashmi sirvijcuna carca. Shuj llamagucunapuramanda cashpapash Jesusta catij llamagucunapa ‘corralmandallatami’ can (Juan 10:16). Ungidocuna cashpapash shuj llamagucunapura cashpapash aliguta cazushpa aliguta yarishpa sirvij esclavo cushca micunatallatami ‘minishtijuj horaspi’ chasquin. Cuerpo Gobernantepi huauquicunapash ashtahuan yachajushpa catinata minishtinmi. Chaimandami paicunapash shujlla cashpaca sirvijpuracunami canchi nishpa esclavopa micunaguta chasquin.

14. a) Aliguta cazushpa aliguta yarishpa sirvij esclavoca ¿imatallata ricuriana can? b) Aliguta cazushpa aliguta yarishpa sirvij esclavomanda parlashpaca ¿imatata advirtirca? (“Esclavoca: ‘ñuca amoca, na ucha shamungachu’ yashpachari...” nishca recuadrota ricupangui.)

¹⁴ Imashinami ñaupa tiempo esclavocuna o mayordomocunaca huasipi tucuilla sirvijcunata ricuriana carca, shinallatami cunan punllapi aliguta cazushpa aliguta yarishpa sirvij esclavopash Jehová Diospa tucuilla ali sirvijcunata ricuriana can (Luc. 12:42). Shinallata imashina villachinata, jatun tandanajuicunapi imata yachachinacunata, gentecunapa, ñucanchi estudio personalpa, tandanajuicunapa publicaciongunatapash ruranami can. Ashtahuangarin Jehovapa organizacionba culquita, tucuilla cosascunatapash ricurianami can. Sirvijcunaca aliguta cazushpa aliguta yarishpa sirvij esclavo yachachichunmi minishtin.

15, 16. Jesusca ¿ima horata esclavomanga paipa tucuilla charishcacunata cuidapangui nishpa minganga?

¹⁵ Jesusca ¿ima horashi paipa tucuilla charishcacunata cuidapangui nishpa minganga? Jesusca nircami: ‘Mingashcata pactachijujta amo japij shamushpaca imata charishcataca tucuillatami minganga’ nishpa (Mat. 24:​46, 47). Micunaguta caranshna Taita Diosmanda ali yachachijujta ricushpami Jesusca ‘paipa tucuilla charishcacunataca mingasha’ nin. Shinaca micunaguta caranshna Taita Diosmanda yachachijujta ricushca jipami Jesusca esclavomanga minganga ñucapa tucuilla charishcacunata ricupangui nishpa. Shinaca ¿ima hora, imashinashi Jesusca esclavomanga minganga tucuilla ñuca charishcacunata cuidapangui nishpa? Chaita yachangapaca Jesús ima hora shamunata, shinallata tucuilla charishcacuna ima cashcata ricupashun.

¹⁶ Jesús ima hora shamujta yachangapaca Mateo 24:​46, 47​pa ñaupa textocunata ricupashun. Chai textocunapi Jesús shamunga nishpaca cai mundopa cosascuna ña tucurijujpi Jesús juzgangapaj shamuna tiempomandami parlajun (Mat. 24:​30, 42, 44).d Shinaca, aliguta cazushpa aliguta yarishpa sirvij esclavomanda parlaj chimbapuraipi Jesús shamunga nishca shimicunaca ninan manllanai jatun punllacunapimi pactaringa.

17. Jesuspa tucuilla charishcacunaca ¿imacunata can?

¹⁷ Jesuspa tucuilla charishcacunaca ¿imacunata can? Tucuilla nishpaca na cai Alpapi charishcacunamandallachu parlajun. Jesusca ashtaca autoridadtami cielopica charin. Bibliapica ninmi: ‘Jahua pachapipash cai pachapipash mandajuchunmi, [“ashtaca autoridadta”, NM] Diosca ñucaman carahuarca’ nishpa (Mat. 28:18; Efes. 1:​20-23). Charishcacuna nishpaca Jesús mandana Reinomandami parlajun. Chai Reinoca huata 1914mandami tiai callarishca. Chai Reinopimi Jesusca paipa ungidocunandi mandanga (Apoc. 11:15).

18. Jesusca ¿imamandata esclavomanga cushijushpa paipa tucuilla charishcacunata minganga?

¹⁸ Shinaca ¿imatata yachajupanchi? Ninan manllanai llaqui punllacunapi Jesús juzgangapaj shamushpaca, aliguta cazushpa aliguta yarishpa sirvij esclavo minishtirishca horaspi sirvijcunaman, micunaguta caranshna yachachijujtami ricunga. Chaita ricushpami Jesusca cushijushpa paicunamanga minganga ñucapa tucuilla charishcacunata cuidapangui nishpa. Shinaca, aliguta cazushpa aliguta yarishpa sirvij esclavoca ña jahua cielopi cashpa, Jesushuan mandai callarishpami Jesuspa tucuilla charishcacunataca cuidai callaringa.

19. ¿Aliguta cazushpa aliguta yarishpa sirvij esclavoca tucuilla ungidocunamanda yali ashtahuan jatun bendiciongunatachu chasquinga?

¹⁹ Shinaca ¿aliguta cazushpa aliguta yarishpa sirvij esclavoca tucuilla ungidocunamanda yali ashtahuan jatun bendiciongunatachu japinga? Na, na shinachu can. Ashallacunamanlla bendiciasha nishca cashpapash tucuicunatami bendician. Shuj ejemplota ricupashun. Huañungapaj shuj tuta faltajpica Jesusca paipa 11 apostolcunataca nircami, tucuipi cazushcamandaca cangunamanmi jatun bendiciongunata cusha nishpa (Lucas 22:​28-30, liingui). Jesusca 11 apostolcunatallami nirca, cangunahuanmi mandasha nishpa. Shinapash, jipa huatacunamanga nircami, tucuilla ungidocuna o tucuilla 144.000cunami reycunashna tucushpa Jesushuan mandanga nishpa (Apoc. 1:1; 3:21). Shinallata, Mateo 24:47​pica ashalla ungidocunaman o aliguta cazushpa aliguta yarishpa sirvij esclavomanllami Jesusca ñucapa tucuilla charishcacunata cuidapangui nishpa mingasha nirca. Shinapash, tucuilla 144.000cunami chai bendiciondaca chasquinga (Apoc. 20:​4, 6).

20. Jesusca ¿imapata aliguta cazushpa aliguta yarishpa sirvij esclavotaca churarca? Chaimanda ¿imatata rurangapaj munapanchi?

²⁰ Imashinami apostolcunapa punllacunapi Jesusca ashacunatalla agllashpa ashtacacunaman micuchirca, shinallatami cunanbipash aliguta cazushpa aliguta yarishpa sirvij esclavota agllashpa ungidocunaman, shuj llamaguna nishcacunamanbash minishtijuj horaspi yachachijun. Aliguta cazushpa aliguta yarishpa sirvij esclavo tiashcamandaca ninanda agradicishpami paicunataca tucuipi apoyana capanchi (Heb. 13: 7, 17).