Taita Diosca huarmigucunataca juyaihuan, respetohuanmi ricun

JESÚS cai alpapi causashpaca paipa taita Jehová imashina cashcataca paipa causaihuanmi ricuchirca. “Ñucapaj munaica, na imatapash rurajunichu. Ashtahuangarin ñuca Taita yachachishca shimicunatallatami villajuni” nircami. Shinallata: ‘Pai alicachishcataca punllandimi rurajuni’ nircami (Juan 8:28, 29; Colosenses 1:15). Taita Dios huarmi gentegucunamanda imata pensajta, huarmigucunata imashina tratachun munashcata yachangapaca Jesuspa ejemplomandami yachajuna canchi.

Jesuspa causaimanda estudiashca huaquin gentecunaca cashnami nin: Jesús huarmigucunata imashina tratashcata yachanaca cunan punllapipash huarmigucunata ali tratashpa causachunmi ayudan nishcami. ¿Imamandata shina nishca? ¿Jesuspa yachachishcacunaca cunan punllacunapipashchu huarmigucuna tranquilo ali causaiguta charichun ayudan?

Jesusca huarmigucunataca jaricunahuan puñungapalla cashcataca na nircachu. Judiocunata ñaupaman pushajcunaca huarmicunata ricunaca peligrosomi can, paicunahuan cashpaca nalicunata ruraringallami ninmi carca. Chaimi huarmigucunataca callecunapi cashpaca jaricunahuan ama parlachun prohibirca. Shinallata maimanbash llujshishpaca umata taparishpami llujshina carca. Shinapash Jesusca huarmicunahuan nimamanda na llevarina cashcataca na nijurcachu. Ashtahuangarin Jesusca jaricunataca huarmicunahuan cana munaicunamanda jarcarina cashcata shinallata huarmicunata respetohuan tratana cashcatami yachachirca (Mateo 5:28).

Shinallata Jesusca shuj viajeca: “Maijan runapash, paipaj huarmita jichushpa shujhuan cazarashpaca, huainayashpami causajun” nircami (Marcos 10:11, 12). Jesusca “imamandapash juchachishpa” divorciarinalla cashca yuyaihuan na deacuerdo carcachu (Mateo 19:3, 9). Ashtaca judiocunaca huainayana juchamandaca panda yuyaicunatami charirca. Paicunaca cazarashca cashpapash shuj huarmihuan puñushpaca huainayana juchapi na urmanchichu ninmi carca. Judiocunata ñaupaman pushajcunaca huarmicunallami traicionashpa purin, jaricunaca nunca na chashna ruranllu ninmi carca. Bibliamanda parlaj shuj libropica caitami nin: “Jesusca tanto jaricunapash y huarmicunapash igualllata limpio causana obligaciondami charin nishpaca, huarmigucunapash valishca cashcatami ricuchirca” ninmi.

Cai yachachishcacunamandaca ¿imashinata cunanbi huarmigucunaca beneficiarin?: Testigo de Jehovacunapa congregaciongunapica huarmigucunaca jaricunahuanbashmi ali llevarin. Huauquicuna huarmigucunata nali pensamientocunahuan na ricun cashcata yachaimandami paicunaca segura sintirin. Huauquicunaca Jesús nishcata pactachingapami esforzarin. Jesusca nircami: “Paya mamagucunatapash, cambaj mamatashna, chairalla cuitsacunatapash nalitaca ama yarishpa, cambaj panitashna aliguta yarichishpa rimangui” nircami (1 Timoteo 5:2).

Jesusca huarmigucunata yachachingapami tiempota llujchirca. Judiocunapa tiempocunapica huarmigucunataca na valichishpami na imatapash yachachin carca. Shinapash Jesusca, huarmigucunata Jehová Diosmanda yachachingapami tiempota llujchirca. Shinallata huarmigucuna imata pensajta, imashina sintirishcata parlachunbashmi animarca. Jesusca huarmigucuna huasipi ruraicunahuanlla causana cashcataca na pensarcachu. Por ejemplo shuj punllaca María huarmiguca Jesús yachachijushcata uyashpami paipash yachajungapa munarca. Jesusca Mariataca na uyajunachu cangui nishpaimanga na tacurircachu. Paica Mariapash yachajuchunmi saquirca (Lucas 10:38-42). Shinallata shuj viajeca Lázaro huañujpimi Jesusca Martataca canba turi causarinata confianguichu nishpa tapurca. Chaimi Martaca: “Tucurimui punllapi huañushcacuna causarijpimi, ñuca turigupash causaringa. Chaitaca yachapanimi nircami”. Chai shimicunata nishpaca Martaca Jesuspa yachachishcacunata alipacha intindishpa Jesuspi tucui shungu crishcatami ricuchin (Juan 11:21-27).

Jesusca huarmigucunamanbash Taita Diosmanda yachachinatami gushtan carca. Chai tiempopica casi tucui judía huarmigucunallatami paicunapa churicuna importante cachun o shuj profeta tucuchun munan carca. Shuj viajeca shuj huarmiguca canda “chuchuchishpa viñachij mamaca, ninandami cushijun” nishpa Jesusmanga nirca. Shinapash Jesusca Taita Diosta cazuna ashtahuan importante cashcatami yachachirca (Lucas 11:27, 28). Shinami huasipi ruraicunata charishpapash Taita Diosmanda yachajuna ashtahuan importante cashcata Jesusca yachachirca (Juan 8:32).

Cai yachachishcacunamandaca ¿imashinata cunanbi huarmigucunaca beneficiarin?: Congregacionbica tucuicunallatami huarmigucuna comentajpica cushijushpa uyan. Congregacionda ñaupaman pushajcunaca Jesusta catij huarmigucuna “aligutalla rurashpa causaj” cashcata yachashpami respetohuan tratan (Tito 2:3). Shinallata huarmigucunaca Taita Diospa gobiernomanda villachinapipashmi ayudanajun (Salmo 68:11; “¿Huarmicunaca na parlanachu can nishpachu apóstol Pabloca mandarca?” nishca recuadrota ricupangui).

Jesusca huarmigucunataca respetohuanmi tratan carca. Jesuspa tiempopica jari huahuacunatallami ashtahuan valichishpa ricun carca. Chaimandami judiocunapa Talmud nishca libropica: “Jari huahuacunata charinaca shuj jatun cushijuimi can. Shinapash huarmi huahuacunatalla charinaca llaquipachami” ninmi carca. Huarmi huahuacunata charishpaca taitacunaca ushiman cusata mascashpa, cusamanga culquitapash paganami carca. Shinallata taitacuna rucuyajpipash ushicunaca na cuidai ushanallachu carca. Chaimi huaquin taitamamacunapaca shuj huarmi huahuaguta viñachinaca shinllipacha carca.

Jesuspaca tanto jari huahuagucuna y huarmi huahuagucunapash valishcami carca. Jesusca Naín llactamanda viuda huarmigupa churiguta causachishcashnallatami Jairo runagupa ushigutapash causachirca (Marcos 5:35, 41, 42; Lucas 7:11-15). Cutin shuj viajeca ‘chunga pusaj huatata huañujujlla huarmigutami’ Jesusca jambirca. Shinallata ‘cai huarmiguca, Abrahamba mirai puramandami’ can nishpapashmi nirca (Lucas 13:10-16). Abrahamba mirai nishpaca chai huarmigutaca juyaihuan, respetohuan tratashcatami ricuchijurca. Shinallata huarmigucunapash shujcunashnallata importante cashcatami ricuchirca. Jesusca chai huarmigupa shinlli fetapash respetohuanmi ricurca (Lucas 19:9; Gálatas 3:7).

Cai yachachishcacunamandaca ¿imashinata cunanbi huarmigucunaca beneficiarin?: Asia llactapica shuj nishcami tian: ushita viñachinaca shujcunapa tarpushca plantagucunapira yacuta regajuj cuendami can ninmi. Shuj ushiguta viñachinaca imapapash na sirvinllu yashpami shina nin. Pero testigo de Jehová taitacunaca na shina pensanllu. Paicunapaca jari huahuagu o huarmi huahuagu cajpipash igualta cuidangapami esforzarin.

Jesusca huarmigucunapi confianmi carca. Judiocunapa tribunalcunapi cashpaca huarmigucunapa nishcacunataca nimapa na valichinllu carca. Paicunapa nishcacunataca esclavocunapa nishcacunatashnami na valichishpa ricun carca. Chaimi ashtaca ashtaca huatacuna huashamanga Josefo shuti historiadorca cashna nirca: “Huarmicunaca tucuitami manllan. Paicunaca imatapash na rurai ushanllu. Chaimi paicunapica na confiai usharin” nircami.

Shinapash Jesusca na shina pensanllu carca. Jesusca huarmigucunatami pai causarishca cashcata villachunga cacharca (Mateo 28:1, 8-10). Jesusta catij huarmigucunapashmi Jesusta huañuchijtaca ricurca. Shinapash chai huarmigucuna Jesús causarishcami nishpa villajpica apostolcunaca paicunataca na crircachu (Mateo 27:55, 56, 61; Lucas 24:10, 11). Pero Jesús huarmigucunamanra primero ricurishpaca, paicunapash chaishuj discipulocunashnallata importante cashcatami ricuchirca (Hechos 1:8, 14).

Cai yachachishcacunamandaca ¿imashinata cunanbi huarmigucunaca beneficiarin?: Congregacionbi responsabilidadcunata charij huauquicunaca panigucuna imata nijpipash aliguta uyashpami paicunapa nishcapash importante cashcata ricuchin. Shinallata cusacunapash paicunapa huarmigucuna imata nijta ali uyashpami paicunata respetashcata ricuchin (1 Pedro 3:7; Génesis 21:12).

Jesuspa ejemplota catij jaricunaca huarmigucunata juyaihuan, respetohuan tratashpami Taita Diospa munaita pactachinajushcata ricuchin (Génesis 1:27, 28). Shinallata Jesusta catij jaricunaca paicunapa huarmigucunataca na maltratashpami Bibliapa consejocunata cazushpa juyaihuan tratan. Cusacunaca Bibliapi consejocunata pactachishpami huarmigucuna cushilla sintirichun ayudan (Efesios 5:28, 29).

Yelena panigu Bibliata estudiai callarijuj horasca paipa cusa na ali tratajpimi llaquilla sintirishpa sufrin carca. Yelena panigupa cusaca cazarangapaj munashpaca obligashpa cazaraj pushtupi shinallata huarmicunata maltratashpa causan pushtupimi viñashca carca. Yelena paniguca ninmi: “Bibliata yachajunami aguantashpa catichun ayudahuarca. Bibliapica Taita Dios ñucata juyaita, ñucamanda preocuparijtami yachajurcani. Chaimi Bibliata estudiashpaca ñuca cusapash cambiai ushashcata cuenta japircani.” Tiempohuanmi panigupa cusaca Bibliata estudiai callarishpa testigo de Jehová tucurca. Yelena paniguca ninmi: “Ñuca cusaca controlarinatami yachajurca. Shinallata randimanda perdonarinatapashmi yachajurcanchi.” Shinallata ninbashmi: “Bibliapa consejocunami cusahuarmi causaipi cushilla, tranquila causachun ayudahuashca” (Colosenses 3:13, 18, 19).

Yelena panigushnami ashtaca cusahuarmicunaca Bibliapa consejocunata pactachingapaj esforzarimandami cushilla causan. Shinallata congregacionbi huauquicuna panigucunata respetashpa, ali tratajpimi paicunaca cushilla sintirin (Juan 13:34, 35).

Tucui Jesusta catijcunallatami juchayucuna cashcata, na perfectocuna cashcatapash ali yachan. Chaimandami ‘imapapash na sirvij causaita’ charishcataca yachan. Shinapash Jehová Diosman quimirishpaca ‘ñana pecadopa y huañuipa esclavocuna canatami’ tucui shunguhuanmi crin. Paicunaca Taita Diospa ‘huahuacunashnami alipacha libre’ causaita charinga. Tucui Jehová Diosta sirvijcunallatami cushilla causana alipacha esperanzata charin (Romanos 8:20, 21, TNM ).