¿Imamandata Jehová Diosta adorangapaj tandanajuna canchi?

1, 2. ¿Imashinata yachanchi, tandanajuicunaca Jehovata sirvijcunapa minishtirishcapacha cashcata? (Callari dibujota ricupangui).

CORINNA shuti panigu 17 huatacunata charijpimi paipa mamataca caru caruman prezo apashpa shinllita trabajachirca. Jipamanga Corinnatapashmi Siberia llactapi trabajachun aparca. Siberia llactaca paipa huasimanda caru carupimi carca. Chaipimi Corinnataca huagracuna, llamacuna tiaj haciendapi esclavatashna trabajachin carca. Huaquinbica cunujlla ropatapash na cushpami chiri chiripi canllapi trabajachin carca. Shinapash Corinnahuan shuj cumba Testigohuanga congregación carupi cajpipash tandanajuiman ringapami munarca.

² Chaimandami paicunaca chishipi llujshishpa, 25 mil metrocunata purishpa tren paradaman chayarca. Corinnaca ninmi: ‘Trenga dos de la mañanata llujshishpami sujta horasta pararca. Chayashpaca 10 mil metrocunata purishpami tandanajuimanga chayarcanchi” nishpa. Chai tucuita rishpa tandanajuiman chayashcamandaca paica nunca na arripintirishcachu. Corinnaca ninbashmi: “Tandanajuipica Villajun revistatami yachajurcanchi, canticocunatapashmi candarcanchi. Tandanajuipimi ñucanchi fepash ashtahuan shinlliyarca” nin. Quimsa punlla jipa tigrajpipash hacienda dueñoca paicuna rishcataca na cuenta japircachu.

 3. ¿Ima quimsa tapuicunatata cai temapica yachajugripanchi?

³ Jehovata sirvijcunapaca tandanajuicunaca minishtirishcapachami can. Jesusta punda catijcunapa ejemplota ricupashun. Jesusta cati callarishcandimi paicunaca ‘punllandi Diospa huasipipash shujllashnalla yarishpa tandanajurca’ (Hechos 2:46). Tucuicunallatami tandanajuicunaman rinataca alicachinchi. Shinapash huaquingunapaca trabajomanda, shuj cosascunata ruranamanda o shaijushca caimandami tucuilla tandanajuicunaman rinaca ashata shinlli ricurin. Shinaca tandanajuicunaman ama faltachunga ¿imata ayudanga?^[1] (Cai tema tucuripi notata ricupangui). ¿Imashinata ñucanchihuan yachajujcunatapash shuj gentecunatapash tandanajuicunaman richun animashun? Chaimandami cai temapica cai quimsa tapuicunata yachajupashun: 1) ¿Imamandata tandanajuicunaman rinaca alica can? 2) Tandanajuicunaman rishpaca ¿imashinata shujcunatapash ayudanchi? 3) ¿Imamandata Jehová Diosca ñucanchicuna tandanajuicunaman richun munan?^[2] (Cai tema tucuripi notata ricupangui).

 4. ¿Imashinata tandanajuicunaca Jehovata ashtahuan ali rijsichun ayudan?

⁴ Tandanajuicunami Jehová Diosmanda yachachin. Tandanajuicunami Jehová Diosta ashtahuan ali rijsichun ayudan. ¿Imashinata ayudan? Shuj ejemplota ricupashun. Mundo enteropi tauca congregaciongunapimi Taita Diosmanda ali villaigucuna, ¿Picunata Diospa munaita ruranajun? nishca folletocunata Diospa Shimimanda Yachajungapaj tandanajuipica yachajurcanchi. Chai tandanajuipi Jehová Dios imashina cajta yachajushpa, ñucanchi huauquipanicuna Jehová Diosta imashina juyajta uyashpaca ¿imashinata sintirircanchi? ¿Nachu Jehová Diostaca ashtahuan juyarcanchi? Ashtahuangarin, tandanajuicunapimi huauquicunapa discursota uyashpa, demostraciongunata ricushpa, Bibliapi textocunata liishpa Bibliamanda ashtahuan yachajushcanchi (Nehemías 8:8). Shinallata, cada semanapa Bibliata liina capitulocunata liishpa, jipaman huauquipanicunapa comentariocunata tandanajuicunapi uyashpami mushuj cosascunata yachajushcanchi.

 5. Tandanajuicunaca ¿imashinata villachichunbash Bibliapi imata nijta yachajushcata pactachichunbash ayudashca?

⁵ Tandanajuicunaca Bibliapi imata yachajushcata pactachichunmi ayudan (1 Tesalonicenses 4:9, 10). ¿Imashinata ayudan? Huaquinbica, Villajun revistapimi Jehovata imashina ashtahuan sirvinata, imashina ashtahuan ali oraciongunata ruranata o ñucanchita llaquichij huauquita perdonanata yachajushcanchi. Shinallata, Jesuspa Chaquita Catishpa Causashunchi Yachachishunchi tandanajuipica Bibliapa yachachishcacunata shuj gentecunaman imashina villachinata, imashina yachachinatami yachajunchi (Mateo 28:19, 20).

 6. Tandanajuicunaca ¿imashinata shinlli tucuchun, animarichun ayudan?

⁶ Tandanajuicunami animan. Diablopa mundoca ñucanchi feta chiriyachingapaj, desanimachingapami munan. Shinapash tandanajuicunaca shinlli tucushpa Jehovata sirvishpa catichun, animarichunmi ayudan (Hechos 15:30-32, liingui). Tandanajuicunapimi Bibliapi profeciacuna imashina pactarishcata cutin cutin yachajunchi. Shinami ñucanchitaca shamuj punllacunapi pactarina profeciacunapash ciertopacha pactarinata crichun ayudashca. Shinallata discursocunata cushpa, demostraciongunata rurashpa, comentariocunata cushpa, tucui shunguhuan Jehovaman candashpami huauquipanicunaca animan (1 Corintios 14:26). Ashtahuangarin, tandanajuicuna nara callarijpi o tucurishca jipa huauquipanicunahuan parlashpami huauquipanicuna juyahuanmi, llaquihuanmi yashpa animarinchi (1 Corintios 16:17, 18).

 7. ¿Imamandata tandanajuicunapi canaca minishtirishcapacha can?

⁷ Tandanajuicunapimi Jehová Diosca paipa espíritu santota cushpa ayudan. Jesusca Taita Diospa espíritu santota utilizashpami congregaciongunataca ñaupaman pushan. Jesusca nircami: ‘Diospa espíritu villajujta uyanguichi’ nishpa (Apocalipsis 2:7). Taita Diospa espíritu santomi tentaciongunapi ama urmachun, na manllashpa villachichun, ali decisiongunata agllachun ayudan. Chaimandami tucuilla tandanajuicunaman ringapaj esforzarina canchi. Shina rurajpimi Jehová Diosca paipa espíritu santota cushpa ayudanga.

 8. Tandanajuicunapi cashpa, comentashpa, candashpaca ¿imashinata shujcunatapash ayudanchi? (“Siempremi huasimanga alillata sintirishpa tigrani” nishca recuadrotapash ricupangui).

⁸ Tandanajuicunaman rishpami huauquipanicunata juyashcata ricuchinchi. Ashtaca huauquipanicunaca jatun problemacunatami aguantanajun. Apóstol Pabloca escribircami: “Caishujhuan, chaishujhuan yarichirishunchi” nishpa (Hebreos 10:24, 25). Pabloca tucuilla huauquipanicunamanda preocuparinguichi nishpami shina nirca. Ñucanchi huauquipanicunamanda preocuparishpami animaringapaj tandanajunchi. Tandanajuicunaman rishpami huauquipanicunahuan cangapaj munashcata, paicunahuan parlangapaj munashcata, paicuna imashina sintirijta yachangapaj munashcata ricuchinchi. Shinallata comentashpa, tucui shunguhuan Jehovaman candashpami huauquipanicunataca animanchi (Colosenses 3:16, NM).

9, 10. a) ¿Imashinata Juan 10:16​pi shimicunaca tandanajuiman rina minishtirishca cashcata intindichun ayudan? b) Testigo familiata na charij huauquipanicunaca ¿imamandata ñucanchita tandanajuipi ricushpaca animarin?

⁹ Tandanajuicunaman rishpami congregacionbi huauquipanicuna shujllashna tandanajushca cachun ayudanchi (Juan 10:16, liingui). Jesusca nircami, ñucami llamacunata michijshna cani. Ñucata catijcunaca llamagucunashnami can nishpa. Llamagucunaca siempremi paicunapura tandanajushca can, paicunata michijujtapash catishpa purin. Pensaripai, ishcai llamagucuna shuj lomapi cajpi, cutin ishcai llamagucuna pambapi cajpi, cutin shuj llamagu shuj ladopi cajpica ¿chai picha llamagucunaca tandanajushcami can nita ushanchimanllu? Na. Shinallata ‘shujlla michijta’ catijuj ‘shujlla corral’ cangapaj munashpaca ñucanchi huauquipanicunahuan cangapami tandanajuicunaman siempre rina canchi.

¹⁰ Tandanajuicunami tucuicuna shujllashna cachun, llaquirishpa juyarij familiapurashna cachun ayudan (Salmo 133:1). Yaripashunchi, huaquin huauquipanicunaca paicunallami Testigocuna can. Testigo tucujpimi paicunapa taitamamacuna, huauquicuna, panicunaca paicunata na ricunayachin. Shinapash Jesusca nircami, congregacionbica quiquingunata juyashpa cuidaj familiatami taringuichi nishpa (Marcos 10:29, 30). Tandanajuicunaman na faltashpa rijpica ñucanchitaca paicunapa taitamamatashna, paicunapa propio huauquipanicunatashna ricushpami animaringa. Chaicunata yarishpami tucuilla tandanajuicunaman ringapaj esforzarina canchi.

11. ¿Imashinata tandanajuicunaca Jehovata ali adorachun ayudan?

¹¹ Tandanajuicunapimi Jehovataca aliguta adoranchi. Jehová Diosmi ñucanchicunataca rurarca. Chaimandami paita agradicina, respetana, alabana canchi (Apocalipsis 7:12, liingui). Tandanajuicunapi oracionda rurashpa, candashpa, paimanda parlashpami Jehovata agradicishcata, respetashcata, alabashcata ricuchinchi. Tucui semanacunami Jehovata ali adorana bendicionda charinchi.

12. Paipa mandashcata cazushpa tandanajuicunaman rijpica ¿imashinata Jehová Diosca sintirin?

¹² Jehová Dios ñucanchicunata rurashcamandami paitaca cazuna canchi. Paica, siempre tandanajuchunmi mandashca. Ashtahuanbachaca cai tucuri punllacuna ña tucurijujpimi tandanajuchun munan. Cazujpica Jehová Diosca cushijunmi (1 Juan 3:22). Tandanajuicunaman ringapaj ñucanchicuna imashina esforzarijujtaca alimi yachan. Ashtahuangarin shina rurashcamandami ñucanchitaca alicachishpa ricujun (Hebreos 6:10).

13, 14. ¿Imashinata tandanajuicunaca Jehovaman, paipa Churiman quimirichun ayudan?

¹³ Tandanajuicunaman rishpami Jehovaman, Jesusman quimiringapaj munashcata ricuchinchi. Tandanajuicunapimi Bibliamandapash, Jehová imata rurachun munashcatapash yachajunchi (Isaías 30:20, 21). Huaquin gentecunaca Jehovata na sirvishpapash tandanajuicunaman rishpami Jehová Dios ñaupaman pushajujta cuenta japishca (1 Corintios 14:23-25). Jehová Diosca paipa espíritu santota utilizashpami tandanajuicunapica ñaupaman pushajun. Chaimandami tandanajuicunapi yachachishcacunaca Jehovamanda shamun. Shinaca tandanajuicunaman rishpami Jehovamanda uyashpa, Jehová imashina ñucanchita juyajtapash yachajushpa Jehovaman ashtahuan quimirinchi.

¹⁴ Jesusmi congregaciongunataca ñaupaman pushajun. Paica nircami: ‘Maipimi ñuca shutipi ishcai cashpa, quimsa cashpapash tandanajujpica, ñucaca paicunapa chaupipimi cani’ nishpa (Mateo 18:20). Bibliapica yachachinbashmi Jesusmi congregaciongunapa “chaupipi purijuj” nishpa (Apocalipsis 1:20–2:1). Congregaciongunata Jesús ñaupaman pushajujpimi shina nin. Chaimandami tandanajuicunaman rishpaca Jesusman ashtahuan quimirinchi. Imashinami ricupanchi, Jehovapash Jesuspash ñucanchihuanmi can, tandanajuicunapimi paicunaca ñucanchita shinlliyachishpa ayudan. Shinaca pensaripai, ñucanchicuna paiman, paipa Churiman quimiringapaj esforzarijujta ricushpaca ¿imashinashi Jehová Diosca sintirin?

15. Tandanajuicunaman rishpaca ¿imatata Jehovamanga ricuchinajunchi?

¹⁵ Tandanajuicunaman rishpami Jehovata cazungapaj munashcata ricuchinchi. Munai na munai tandanajuicunaman richunga Jehová Diosca na munanllu (Isaías 43:23). Shinaca tandanajuicunaman rina punllacunapi ashtahuan trabajachun mandajpica ¿imatashi rurashun? Gobiernoca nishcanman, tandanajuicunaman rijpica multata cobrashunmi, carcelman cachashunmi o imapash castigotami churashun nishpa. Shina nijpica ¿imatashi rurashun? Shinallata, shuj cosascunata rurangapaj munaimanda shuj tandanajuiman na rina munai shamujpica ¿imatashi ruranchiman? Chaipica ñucanchimi ali decidina canchi (Hechos 5:29). Jehovata cazushpa tandanajuicunaman rishpaca Jehovata juyashcata, Pailla ñucanchita mandachun munashcatami ricuchishun (Romanos 6:17). Shina rurajpica Jehová Diosca cushijungami (Proverbios 27:11).

16, 17. a) Jesusta punda catijcunapaca tandanajuicuna minishtirishcapacha cashcataca ¿imashinata yachanchi? b) George Gangas huauquica ¿imatata tandanajuimandaca pensan carca?

¹⁶ Huata 33, Pentecostés fiesta jipaca Jesusta catijcunaca apostolcuna ‘yachachijujtapash na saquishpami, punllandi Diospa huasipipash shujllashnalla yarishpa tandanajunajurca’ (Hechos 2:42, 46). Imashinami ricupanchi, Jesusta catijcunaca Jehovata adorangapami tandanajuicunaman rishpa catirca. Roma llactamanda gobiernocuna, judiocunata ñaupaman pushajcuna llaquichingapaj catiriajpipash tandanajunataca na saquircachu. Shinlli cajpipash tandanajushpa catingapami esforzarirca.

¹⁷ Cunan punllacunapi Jehovata sirvijcunapash tandanajuicuna tiashcamandaca tucui shunguhuanmi agradicinchi. George Gangas huauquipa ejemplota ricupashun. Paica 22 huata yalitami Cuerpo Gobernantepi sirvirca. Paica nircami, huauquipanicunahuan tandanajushpami ashtacata animarini. Tandanajuicunami ñucapa causaipica shuj jatun cushijui can nishpa. Paica tandanajuicunaman pundata chayangapaj, tandanajuicunamanda último ringapami esforzarirca. Huauquipanicunahuan parlaimanda ninanda cushijushpami nirca: “Paicunahuan cashpami ñuca familiahuanshna tranquilo, ali sintirini. Huauquipanicunahuan tandanajunatami tucui shunguhuan munani” nishpa.

18. a) Quiquinga ¿imatata tandanajuicunamandaca pensapangui? b) ¿Imatata ruragripangui?

¹⁸ Quiquinga ¿Gangas huauquishnachu pensapangui? Shina cashpaca, shinlli cajpipash huauquipanicunahuan tandanajuipi cangapaj esforzarishpa catipai. Quiquinbash rey Davidshna sintirishcata ricuchipai. Paica, Jehová Diosta adorana huasipi canataca ninandapachami alicachin carca (Salmo 26:8).