Huañushca jipaca ¿imapash causashpa catinrachu?

Quiquinba familiamanda ¿pipash huañupashcachu? Shina llaquihuan cashpami talvez cashna tapuripashcangui: “Huañushca jipaca ¿maipipash causashpa catinchirachu? ¿Ñuca huañushca familiacunata cutin ricushacha?”. Cai leccionbi, cati leccionbipashmi cai tapuicunamanda Bibliapi ima nijta yachajugripanchi.

1. Huañushca jipaca ¿imapash causashpa catinrachu?

Huañuitaca, huañujta puñunahuanmi Jesusca compararca. Shinaca ¿imapita igual can? Pipash puñujushpaca imacunalla pasajushcataca na yachanllu. Shina cuendami pipash huañushpaca imapash nanaita o llaquicunataca ñana charin. Bibliapi nishcashnaca “huañushcacunaca, imatapash na yachanllu” (Eclesiastés 9:​5, liipangui).

2. Huañushcacunahuan imapacha pasajta yachanaca ¿imashinata ayudan?

Ashtaca gentecunaca huañunata, shinallata huañushcacunatapashmi manllan. Pero huañushcacunahuan imapacha pasajta Bibliapi yachajushpaca tranquilomi sintiripangui. Jesusca ‘cabal yachachishcacunami cangunataca esclavoshna causanajushcamandaca libre saquinga’ nircami (Juan 8:​32). Ashtaca religiongunapica shuj alma tiashcata, shinallata huañushca jipa chai alma maipipash causashpa catijtami yachachin. Shinapash Bibliapica huañushca jipaca pipash ñana sufrijtami yachachin. Huañushcacuna imatapash ñana yachaimandaca pitapash na llaquichita ushanllu. Shinaca huañushcacunapa alma casilla samachun nishpa rezanaca na minishtirinllu.

Huaquingunaca huañushcacunahuan parlaita ushanchimi nin. Pero chaica na ciertochu can. Imashinami ña ricuparcanchi “huañushcacunaca imatapash na yachanllu”. Huañushcacunahuan parlanajunchi nishpa yuyaj gentecunaca, demoniocunahuanmi parlanajun. Demoniocunami shina yuyachishpa gentecunataca pandachin. Shinapash huañushcacunahuan imapacha pasajta yachanami paicunamanda cuidarichun ayudan. Demoniocunapa ruraicuna peligroso cashcata yachaimandami Jehová Diosca huañushcacunahuan parlangapaj imatapash rurachunga na munan. Demoniocunapa ruraicunamanda caruyaitapacha caruyachunmi shina advirtin (Deuteronomio 18:​10-12, liipangui).

3. Huañushca jipa imapacha pasajta yachajupai

Huañushca jipa ima pasanamandaca, mundo enteropi gentecunaca shujta shujtami crin. Pero chaicunaca na tucuicunachu cierto can.

• Quiquin causajuj pushtupica ¿imatata huañushcacunamandaca crin?

VIDEO: ¿Huañushca jipaca imata tucunchi? (uchilla video) (1:​19)

Eclesiastés 3:​20​ta liishpa, cai tapuicunata contestapangui:

• Cai textopi nishcashnaca, huañushca jipaca ¿imata tucunchi?

• Pipash huañujpica ¿chai personapa alma o espirituca causashpa catinrachu?

Bibliapica Jesuspa amigo Lázaro huañushcatami parlan. Lázaro huañushca jipaca ¿maimanbash rishcatachu Jesusca nirca? Juan 11:11​manda 14​caman liishpa, cai tapuicunata contestapangui:

• Jesusca huañuitaca ¿imahuanda compararca?

• Chai comparacionga ¿imatata huañushcacunamandaca yachachin?

• Huañushcacunahuan imapacha pasajta Bibliapi yachajushpaca ¿imashinata sintiripangui?

4. Huañushca jipa imapacha pasajta yachanami panda yuyaicunamanda caruyachin

Bibliapi huañushcacunamanda cabalta yachajunami huañushcacunata ama manllachun ayudan. Eclesiastés 9:​10​ta liishpa, cai tapuita contestapangui:

• Huañushcacunaca ¿ñucanchita llaquichita ushanllu?

Bibliapi huañushcacuna ima tucujta yachajunami huañushcacuna ñucanchita ama llaquichichun nishpa rezanacunata, huañushcacunamada misacunata ruranatapash saquichun ayudashca. Isaías 8:​19 y Apocalipsis 4:​11​ta liishpa, cai tapuita contestapangui:

• Huañushcacunata adorajta ricushpa o huañushcacunapa ayudata mascajta ricushpaca ¿imashinashi Jehová Diosca sintirin?

5. Huañushca jipa imapacha pasajta yachanami tranquilo sintirichun ayudan

Ashtaca gentecunamanga ‘causaipi nali cosascunata rurashca cashpaca, huañushpaca sufringapami rin’ nishpami panda religiongunaca yachachishca. Pero huañushca jipaca pipash na sufrinllu. Ni nali cosascunata rurashpa causashca gentecunapash na maipash sufringapaj rinllu. Chaita yachanami tranquilo sintirichun ayudan. Romanos 6:7​ta Bibliapi liishpa, cai tapuita contestapangui:

• Bibliapica pipash huañujpica paipa pecadocunaca perdonashcami quedan nishpami yachachin. Shinaca huañushcacunaca ¿paicunapa pecadocunata pagangapachu maipipash sufrinajun?

Jehová Diosta ashtahuan ashtahuan rijsishpami, huañushca gentecunata maipipash na sufrichijushcataca seguro capanchi. Deuteronomio 32:4 y 1 Juan 4:8​ta liishpa, cai tapuicunata contestapangui:

• Cai textocunapica Jehová Dios shuj juyaj, ima pandatapash na ruraj Dios cashcatami nin. Shinaca huañushca gentecunataca ¿maipipash llaquichishpachu charijun?

• Huañushcacunahuan imapacha pasajta yachajushpaca ¿imashinata sintiripangui?

YARINGAPAJ

Pipash huañujpica paipa causaica chaipimi tucurin. Huañushcacunaca na sufrinajunllu. Y shujcunata llaquichitapash na ushanllu.

¿Imatata yachajupashcanchi?

• Huañushca jipaca ¿imapash causashpa catinrachu?

• Huañushcacunamanda cabalta yachajunaca ¿imashinata panda yuyaicunata saquichun ayudan?

• Huañushcacunamanda cabalta yachanaca ¿imashinata tranquilo sintirichun ayudan?

CAITAPASH RICUPAI

Alma nishca shimi Bibliapi imapacha significajta yachajupai.

“¿Almaca imata can?” (jw.org paginapi ricupangui)

Taita Dios nali gentecunata infiernopi castigajta o na castigajta ricupai.

¿Infiernoca huañushcacunata llaquichingapachu can? (3:07)

¿Huañushcacunataca manllanachu canchi?

Huañushcacunapa espirituca ¿ciertopachachu tian? ¿Ñucanchita ayudaita o llaquichita ushanlla? (Folleto)

Huañushcacunamanda cabalta yachajuna imashina cushilla sintirichun ayudashcata ricupai.

“Bibliapimi ñuca tapuicunataca yachajurcani” (Villajun revista, 1 de febrero de 2015)