“Taita Diosca, na pitapash ñavita ricushpalla chasquinllu”

¿Ima horapash quiquindaca pipash na atindingapaj, na ayudangapaj munashcachu? O yana cajpi, runa cajpi, pobre cajpi ¿pipash quiquinda nalicachishpa ricushcachu? Gentecuna shina cajpipash ama llaquiripaichu. Taita Diosca na gentecunashnachu can. Chaimandami apóstol Pedroca nirca: “Taita Diosca, na pitapash ñavita ricushpalla chasquinllu” nishpa. (Hechos 10: 34, 35, liipangui.)

Apóstol Pedroca chai shimicunataca Cornelio nishca runagupa huasipimi nirca. Pedroca judiomi carca. Cutin Cornelioca na judiochu carca. Chai punllacunapi judiocunaca, na judío gentecunataca nalicachinllu carca, tandanajungapajpash na munanllu carca. Shinaca ¿imamandata Pedroca Corneliopa huasipi carca? Pedroca Taita Dios cachajpimi Corneliopa huasimanga rishcarca. Pedrotaca shuj muscuipishna ricurishpami mandarca: ‘Taita Dios micunalla nishcataca, canga ama yangapi churaichu” nishpa. Cutin Corneliotaca, shuj punllata ñaupashpami shuj angelca muscuipishna ricurishpa Pedrota cayachun cachai nirca (Hechos 10: 1-15). Chaita yachashpami apóstol Pedroca paicuna tuparichun Taita Dios munashcata cuenta japirca.

Apóstol Pedroca nircami: “Taita Diosca, na pitapash ñavita ricushpalla chasquinllu. Chaitaca, cunanga alipachami yachani” nishpa (Hechos 10:34). Bibliata investigaj runaca ninmi: “Ñavita ricushpalla nishpaca, ñavita ricushpallata sentenciata cuj juezcunamandami parlajun. Ali cajta nali cajta na yachashpapash paipa ñavipi ali ricurijta sintishpallami sentenciata cun” nishpa. Gente juezcuna shina cajpipash Taita Diosca na shinachu can. Taita Diosca yana cajta, runa cajta, shuj llactamanda cajta, pobre cajta o charij cajtaca na ricujunllu.

Jehová Diosca shungutami ricun (1 Samuel 16:7; Proverbios 21: 2). Apóstol Pedroca nircami: ‘Maijan llactapi cashpapash paita manllashpa [alita] rurajtami Diosca alicachin’ nishpa (Hechos 10:35). Taita Diosta manllajcunaca, Taita Diosta respetashpa, Taita Diospi confiashpami causan. Shinallata, Taita Diospa ñaupajpi ali ricuringapaj munashpami nali ruraicunamanda caruyan. Shinallata alita rurajcunaca paicunapa munaimi Taita Diospa ñavipi ali ricurishcatalla ruran. Taita Diosca paita tucui shunguhuan alicachishpa respetashpa alita rurajcunatami ninanda alicachin (Deuteronomio 10: 12, 13).

Pipash nalicachishpa ricushcamanda nali sintirijushpaca apóstol Pedropa shimicunami ali sintirichun ayudanga. Jehová Diosca tucui llactamanda gentecuna paita sirvichunmi munan (Juan 6:44; Hechos 17: 26, 27). Yana cashpa, runa cashpa, maijan llactamanda cashpa o pobre cashpapash paita aliguta adorashpa mañajpica Taita Diosca uyashpa ayudanllami (1 Reyes 8: 41-43). Shinaca gentecuna imashina cajpipash Taita Diosca tucuicunatami igual ricun. Chaita yachashpaca ¿nachu ñavita na ricushpalla agllaj Taita Diostaca ashtahuan rijsingapaj munapanguiman?