Hechos

10 Cesarea llactapica Cornelio shuti runagumi causarca. Paica, italiano nishca grupo soldadocunapa capitanmi* carca. 2 Cornelioca paipa gulpi familiandimi Taita Diosta adorashpa causarca. Paica pobre gentegucunatapashmi ayudanata* yachan carca. Taita Diostapash cutin cutin mañashpami causan carca. 3 Shuj punllaca las 3 de la tarde tucujujtami Cornelioca, Taita Diospa shuj ángel paipa huasiman shamujujta shuj muscuipishna claro clarota ricurca. Chai ángel ricurishpaca “Cornelio” nircami. 4 Chaimi Cornelioca manllarishpa nirca: “Ñuca Señorlla uyajupanimi”. Chaimi chai angelca nirca: “Taita Diosca canba mañashcacunataca cushijushpami uyashca. Pobre gentegucunata quiquin ayudajushcatapash ricushcami. Taita Diosca chaitaca yariajunmi.* 5 Shinaca, Pedro nishpa rijsishca Simón shuti runaguta pushamugrichun, huaquin runagucunata Jope llactaman cachai. 6 Pedroca mar ladopi causajuj Simón shuti runagupa huasipimi mingariajun. Simonga animalpa carahuan trabajanata yachaj runagumi can” nircami. 7 Chai ángel rijhuanmi Cornelioca paipa ishcai sirvijcunata y Taita Diosta tucui shunguhuan sirvij shuj soldadotapash cayachun cacharca. 8 Tucui ima pasashcata parlashpami paicunataca Jope llactaman cacharca.

9 Cayandi punllaca, paicuna rishpa Jope llactaman ña chayagrinajujpica chaupi punllami tucujurca. Chai horaspimi Pedroca Taita Diosta mañangapaj huasi terrazaman vitsarca.* 10 Pedroca ninanda yarjachishpami micungapaj munarca. Paiman micunata yanungacamanmi muscuipishna Pedroca caita ricurca. 11 Cielo pascarijpi jahua cielomanda shuj jatun lino fachashna urmamujujtami ricurca. Chai fachashnaca chuscundi ladocunata huatashcami alpaman urmamujurca. 12 Chai fachapica cai alpapi tiashca chuscu chaqui tucui clase o tucui laya animalcuna, culebracuna, lagartijacuna, shinallata jahua cielota volaj animalcunami carca. 13 Chaipimi shuj angelca nirca: “Pedro, jatarishpa chai animalcunata huañuchishpa micui”. 14 Shinapash Pedroca nircami: “Ñuca Señor, chaitaca nimamanda na rurapashachu. Na micuna nishca prohibido animalcunata, shinallata Leypi nishcashna mapa animalcunataca nunca na micupashcanichu”. 15 Shina nijpimi angelca cutin parlashpa Pedrotaca nirca: “Imatami Taita Dios ña limpiomi can nishcataca, canga ñana mapami can nijunachu cangui”. 16 Chai angelca quimsa viajetami Pedrohuanga parlarca. Chai ratomi chai lino fachashnaca jahua cieloman tigrarca.

17 Muscuipishna shina ricushcata na intindishpami, imata canga yashpa Pedroca pensarijurca. Chaicamanga, Cornelio cachashca runacunaca, tapui tapui rishpami Simonba huasi punguman ña chayarca. 18 Chayashpaca, Pedro nishpa rijsishca Simón runaguca caipichu mingarijupan nishpami huasi dueñotaca tapurca. 19 Muscuipishna ricushcaca imashi can nishpa Pedro pensarijujpillatami, Taita Diospa espíritu santoca nirca: “Pedro, quimsa runacunami quiquindaca mascanajun. 20 Shinaca jatarishpa uriajuilla. Ama pinarijuichu, paicunahuanga rinallami cangui. Paicunataca ñucami cachamushcani”. 21 Shina nijpimi Pedroca chai runagucunapaman uriajushpa cashna nirca: “Caipimi capani. Ñucatami mascanajupanguichi. ¿Imata ningapata shamupashcanguichi?”. 22 Chaimi paicunaca nirca: “Ñucanchitaca Cornelio runagumi cachamun. Paica soldadocunata mandaj capitanmi can. Taita Diostapash manllaj, ali ali* runagumi can. Tucuilla judiocunami paimandaca alicunatalla parlan. Taita Diosca shuj angelta cachashpami Corneliotaca nishca, quiquinda huasiman invitashpa, quiquin imata nishcata uyachun nishpa”. 23 Chaimi Pedroca huasiman yaicuchishpa paicunataca chaipi mingachirca.

Cayandi punllaca jatarishpami Pedroca paicunahuan rirca. Jope llactamanda huaquin huauquicunapashmi paitaca cumbashpa rirca. 24 Shuj punlla jipami paicunaca Cesarea llactaman chayarca. Cornelioca paipa familiacunatapash, paipa ali amigocunatapash paipa huasipi tandachishcami paicunataca shuyajurca. 25 Huasiman Pedro yaicujpica, Cornelioca ñapashmi paita tuparingapaj rishpa, paipa ñaupapi cungurishpa cumurirca. 26 Shinapash Pedroca cashna nishpami jatarichirca: “Shayaripai. Ñucapash quiquinshnallata runallami capani” nishpa. 27 Corneliohuan parlashpandi ucuman yaicushpaca, tauca gentecuna chaipi tandanajushca cajtami Pedroca ricurca. 28 Paicunataca cashnami Pedroca nirca: “Cangunaca alimi yachanguichi, shuj judioca leypi nishcashnaca na judío gentecunahuanga na tandanajunachu, na parlanachu can. Shinapash Taita Diosca, ama pitapash mapami can nishpa nijuchunmi, ñucamanga shuj muscuipishna ricuchihuashca. 29 Chaimi ñucata apachun cachajpica na imatapash nishpa shamurcanilla. Shinaca nihuaichi ¿imagupata ñucataca cayachun cachamuhuarcanguichi?”.

30 Pedro shina nijpimi Cornelioca cashna nirca: “Chuscu punllacuna huashamanmi ñucaca, cashna horasllata las 3 de la tarde tucujujta ñuca huasipi Taita Diosta mañajurcani. Shina mañajujpica na yashcapimi, yura entero churajushca runagu ñuca ñaupapi ricurishpa cashna nihuarca: 31 ‘Cornelio, Taita Diosca quiquin imata mañashcataca uyashcami. Pobre gentegucunata quiquin ayudashcatapash yarishcami. 32 Shinaca, Pedro nishpa rijsishca Simón shuti runaguta pushamugrichun, Jope llactaman pitapash cachai. Pedroca mar ladopi causajuj Simón shuti runagupa huasipimi mingariajun. Simonga animalcunapa carahuan trabajanata yachaj runagumi can’ nihuarcami. 33 Shina nijhuanmi ñucaca quiquinda pushamuchun cacharcani. Pagui shamushcamanda. Cunanga tucuicunami Taita Diospa ñaupapi caipi capanchi. Jehová* Dios tucui imata villachun mandashcata uyangapami munapanchi” nircami.

34 Chaita uyashpami Pedroca nirca: “Cunanmi alipacha intindini, Taita Diosca tucuicunatami igual ricun cashca. 35 Ashtahuangarin, maijan llactamanda cashpapash, paita manllashpa causajcunata, alita rurashpa causajcunataca tucuicunatami chasquin cashca. 36 Shinallata, Taita Diosca israelitacunamanmi ali villaicunata predicachun cacharca. Chai ali villaicunaca, Jesucristomanda Taita Dioshuan paicuna cutin ali caita ushana villaicunami can. Jesusca tucuicunapa Amomi can. 37 Cangunaca Judea llacta enteropi imata predicashcataca alimi yachanguichi. Chaica bautismomanda gentecunaman Juan predicashca jipami, Galilea llactapi callarirca. 38 Chai villaicunaca Nazaret llactamanda Jesusmandami carca. Taita Diosmi paitaca paipa espíritu santohuan agllashpa poderta curca. Chaimi paica ali ruraicunata rurarca. Shinallata Diablo sufrichijuj gentegucunatapashmi jambirca. Taita Dios ayudajushcamandami paica chai tucui cosascunata rurai usharca. 39 Judiocunapa llactapipash, Jerusalén llactapipash pai tucui imata rurashcataca ñucanchica ricushcanchimi. Shinapash paicunaca jatun racu caspipi* huarcushpami paitaca huañuchirca. 40 Pero Taita Diosca gentecuna ricuchunmi paitaca quimsa punllahuan causachirca.* 41 Shinapash pai causarishcataca na tucuicunachu ricui usharca. Sino pundallata Taita Dios agllashca ñucanchicunallami ricui usharcanchi. Ñucanchimi pai causachi tucushca jipaca paihuan micurcanchi y ufiarcanchi. 42 Jesusca gentecunaman predicachunmi ñucanchitaca mandarca. Shinallata causajcunata y huañushcacunata juzgachun Taita Dios paita nombrashcata, gentecunaman aliguta intindichichunmi, Jesusca ñucanchitaca mandarca. 43 Tucuilla profetacunami Jesusmanda parlarca. Paicunaca escribishcarcami que, paipa shutimandami paipi crijcunapa pecadocunataca Taita Diosca perdonanga” nishpa.

44 Pedro shina nijujpillatami, tucui chaipi uyashpa tianajujcunaca Taita Diospa espíritu santota chasquirca. 45 Pedrota cumbashpa rishca judío discipulocunaca* na judío gentecunapash Taita Dios carashca espíritu santota chasquijta ricushpami manllarinajurca. 46 Taita Diospa espíritu santota chasquishcacunaca shuj shuj idiomacunatami parlanajurca, Taita Diostapashmi alabanajurca. Chaimi Pedrota cumbashpa rishca discipulocunaca manllarinajurca. Chai jipami Pedroca nirca: 47 “Paicunapashmi ñucanchishnallata Taita Diospa espíritu santota chasquishca. Shinaca ¿pita ninguichiman, paicunaca na yacupi bautizashcachu cana can nishpa?”. 48 Shina nishca jipami, paicunataca Jesucristopa shutipi bautizachun mandarca. Chai jipami Pedrotaca, huaquin punllacunata ñucanchihuan quidapai* ninajurca.