‘Diospa espiritullatami yarichijun’

1, 2. Huata 33 Pentecostés punllapica ¿imata pasarca?

DOMINGO tutamandata, huata 33 Pentecostés punllapica Jerusalén llactapimi Jesusta 120 yali catijcunaca shuj altibajo huasipi tandanajushca carca (Hech. 1:13-15; 2:1). Huaquin punllacuna huashamanga Jesusca, maimanbash ama ringuichichu Taita Dios caramushapacha nishcata chasquingapami shuyana canguichi nishcarcami (Hech. 1:4, 5). Chai punllapica ¿imata pasarca?

² Chai punllaca ‘jahua pachamanda huaira ninanda huacamunshnami ñapash uyarimurca. Chai huairami, paicuna tianajuj huasi ucuman jundarca’. ‘Shina shamushpami, rupajuj ninashna paicunaman ricurishpa, tucuicunapa umapi tiarirca. Shina tiarijpimi tucui paicunaca, Diospa jucha illaj espíritu junda tucurca’ (Hech. 2:2-4). Caita rurashpami Jehová Diosca paipa espíritu santota paicunaman curca (Hech. 1:8). Cai 120 Jesuspa ali catijcunatami Jehová Diosca primera vez paipa espíritu santohuanb agllarca. Paicunaca Jesushuanmi jahua cielopi mandangapaj rina oportunidadta chasquirca.

 3. Jerusalenmanda huauquipanicunaca ¿imamandata ungidocuna cashcataca seguro carca?

³ Jerusalenbi huauquipanicunaca shuj rupajuj ninashna paicunapa umapi tiarijpi paicuna shuj shuj shimicunapi parlai callarishcatami ricurca. Quiquinbash chaipi cashca cashpaca, chaitaca nunca na cungapanguimanllu carca (Hech. 2:5-12). Diospa espíritu santohuan quiquin cieloman richun agllashcataca seguromi capanguiman carca. Shinapash Jehová Dios ungidocunata agllashpaca ¿Jerusalenbi agllashca shinachu agllan? ¿Shuj punllapillachu tucui ungidocunata agllan? Na, na shina agllanllu. ¿Imamandata shina nipanchi?

 4. Ungidocunataca ¿imahorata Jehová Diosca agllan? Intindichipai.

⁴ Jehová Dios paipa espíritu santohuan imahora agllajta ricupashunchi. Huata 33​pi Pentecostés punllapica 120 Jesusta ali catijcunatallaca na agllarcachu. Chai punllapillatami Jehová Diosca 3 mil gentecunatapash paipa espíritu santohuan agllarca. Paicunaca ña bautizarishca jipami Jehovapa espíritu santohuan agllai tucurca (Hech. 2:37, 38, 41). Cutin cati huatacunapica na tucuicunatachu bautizarijpi Jehová Diosca paipa espirituhuan agllarca. Samaritanocunataca ña unaillata bautizarishca jipami Jehová Diosca agllarca (Hech. 8:14-17). Shinapash Cornelio runaguta, paipa familiatapash paicuna nara bautizarijpillatami Jehová Diosca paipa espirituhuan agllarca (Hech. 10:44-48).

 5. Apóstol Pabloca ¿imata 2 Corintios 1:21, 22​pica nirca?

⁵ Cunanga Jehová Dios paicunata cielopi causachun agllajpi paicuna imashina sintirijta yachajupashun. Huaquin ungidocunaca imashpashi ñucatara agllahuarca nishpami cutin cutin pensarin. Cutin shujcunaca na shina pensarinllu. Shinapash tucui ungidocunallatami apóstol Pablo nishcashna sintirin. Paica nircami: ‘Shina crijpimi, carashapachami nishca paipa jucha illaj espirituhuan sellaic tucushca canchi. Chai espiritumi, Dios quishpichishcamanda ñucanchi imata japigrinatapash ricuchijun’ nishpa (Efes. 1:13, 14). Shinaca Jehovallatami paipa espirituta utilizashpa ungidocuna cieloman rina cashcata seguropacha cachun ayudan. Jehovapa espiritumi paicuna cielopi ‘imata japigrinatapash ricuchijun’ (2 Corintios 1:21, 22, liingui).

 6. Cieloman ringapaca ¿imatata ungidocunaca rurana can?

⁶ ¿Jehová Dios paipa espirituhuan agllashcamandallachu paicunaca cieloman ringapachami nipanchi? Na. Paicuna cieloman ringapaca caitami yarina can: ‘Huauquicuna, panicuna, cangunata Dios cayashpa agllashcata yariajlla causashpa, ashtahuan shinllimi tucuna canguichi. Caicunata pactachishpa causashpami, imahorapash na urmashpa causanguichi’ nishcata (2 Ped. 1:10). Shinaca ungidocuna agllashca cashpapash cieloman ringapaca, huañungacamanmi Jehová Diosta aliguta cazushpa causana can (Filip. 3:12-14; Heb. 3:1; Apoc. 2:10).

 7. ¿Imashinata shuj huauqui o shuj panica cieloman ringapaj agllai tucushca cashcata yachan?

⁷ ¿Imashinata shuj huauqui o shuj panica cieloman ringapaj agllai tucushca cashcata yachan? Caita intindingapaca apóstol Pablo, Roma llactamanda ‘cayai tucushca’ ungidocunaman imata nishcata ricupashunchi. Paicunataca nircami: ‘Gañanshna [o esclavoshna] cutin manllaihuan causanata yachachij espiritutaca, na chasquircanguichichu. Ashtahuangarin Diospa huahuacuna tucushpa causanata yachachij, paipa espiritutami chasquircanguichi. Paimandami Taita Diostaca: “¡Ñuca Taitalla!” nishpa, caparishpa mañanajunchi. Diospa espiritullatami, ñucanchi shungupica: “Cangunaca, Taita Diospa huahuacunami canguichi” nishpa yarichijun’ nirca (Rom. 1:7; 8:15, 16). Shinaca Jehová Diosca paipa espíritu santohuanmi ungido huauquipanicunataca paicuna cieloman rinapacha cashcataca yarichin (1 Tes. 2:12).

 8. Ungidocunaca 1 Juan 2:20, 27​pi nishca shinaca ¿imatata na nijuchun minishtin?

⁸ Jehová Diosllatami ungidocunataca paicuna cieloman rina cashcata tucui shunguhuan crichun, seguro cachunbash ayudan (1 Juan 2:20, 27, liingui). Shinapash ungidocunapashmi, shuj huauquipanicunashnallata Jehová Dios paicunata yachachishpa catichun minishtin. Ungidocunaca, quiquinga ungidomi cangui cielomanmi rigringui nijuchunga na minishtinllu. Cieloman rina cashcata ciertopacha crichunga Jehová Diosllatami ungidocunamanga paipa espíritu santohuan yarichijun.

 9. Jehovapa espirituhuan agllashcacunaca Efesios 1:18​pi nishca shinaca ¿ima yuyaitata chari callarin?

⁹ Cunanbi shuj huauquita o shuj panita cielopi mandachun Jehová Dios paipa espíritu santohuan agllashcataca na cabalta intindi ushapanchichu. Gentecunataca cai alpapi causana munaihuanmi Jehová Diosca rurashca. Chaimandami ungidocunataca na cabalta intindi ushapanchi (Gén. 1:28; Sal. 37:29). Shinapash huaquinguna cielopi causachunmi Jehová Diosca agllashca. Shinaca Jehová Dios paipa espíritu santohuan agllajpimi cai Alpapi causana munaita charishca cashpapash cielopi causana munaita chari callarin (Efesios 1:18, liingui).

10. “Cutin huacharin” nishpaca ¿imatata ningapaj munan? (Notatapash ricupangui).

¹⁰ Shuj ungido Jehová Dios paipa espíritu santohuan agllajpica ‘cutin huacharij’ cuendami can.d Chaimandami paicuna imashnapacha sintirishcataca na explicaita ushan. “Cutin huacharin” nishcamandaca shuj na ungidoman explicaitaca na usharinllu nishpami Jesuspash nirca (Juan 3:3-8).

11. Ungidocuna cai horasmandaca ¿ima munaitata ñana charin?

¹¹ Ungidocunaca ¿imapita pensari callarin? Paicunaca cai Alpapi causana munaitaca tucui shunguhuanmi munan carca. Shinallata Jehová Dios cai Alpapi llaquicunata tucuchijpi, cai alpa Paraíso tucujpi, paicunapa huañushca familiacuna o shuj alipacha amigo causarijpi paicunata chasquina munaihuanmi causan carca. Shinapash ña ungidocuna cashpaca paicunapa yuyaicunaca cambianmi. ¿Imashpata shina cambian? Ungidocunaca cai Alpapi causanaca aburrido, cushilla causaitapash na usharinllu nishpaca na pensarishcachu. Ashtahuangarin Jehová Diosmi paipa espíritu santota utilizashpa paicuna cielopi causana munaita charichun cambiashca.

12. Shuj ungidoca ¿imashinata 1 Pedro 1:3, 4​pi nishca shinaca sintirin?

¹² Shuj ungidoca cashnachari pensarin, cielopi causana bendiciondaca na chasquinachu cani yarin nishpa. Shinapash Jehová Dios paita agllashcataca seguropachami can. Cielopi ayudanata pensarimandami ungido huauquica agradicishpa ninanda cushijun (1 Pedro 1:3, 4, liingui).

13. Cai Alpapi causaimandaca ¿imatata ungidocunaca yuyan?

¹³ Ungidocuna cieloman rinata yachashpaca ¿ucha huañushcaiman nishpachu pensarin? Na. Apóstol Pabloca ungidocunapa huañunalla cuerpotaca ‘carpa huasihuanmi’ chimbapurarca. Chaimi nirca: “Ñucanchica cai carpa huasipi causanajushpami llaquirishpa aij ninajunchi, shaijushca sintirinajunchi. Shinapash, caitaca na chingachingapaj munanchichu. Ashtahuangarin, shujtami churaringapaj munanchi. Shinami causaica, cai huañunalla cuerpotaca langanshna tucuchinga” nishpa (2 Cor. 5:4, NM ). Caita nishpaca huañungapaj munashcataca na ninajunllu. Ungidocunaca paicunapa familiahuan, amigocunahuan Jehovata sirvishpa, cushilla causashpa catingapami munan. Shina causanajushpapash ungidocunaca cielopi causanataca siempremi yarishpa causanajun (1 Cor. 15:53; 2 Ped. 1:4; 1 Juan 3:2, 3; Apoc. 20:6).

14. ¿Imashinata na ungido cashcataca yachai ushapanchi?

¹⁴ ¿Ungido cachun Jehová Dios quiquindapash agllashcatachu sintipangui? Chaita sintishpaca cai tapuicunapi pensaripai: ¿Jehovapa munaita ruranataca tucui shunguhuanllu munapangui?, ¿predicanataca ninandachu gushtapangui?, ¿Bibliataca ninandachu yachajungapaj munapangui?, ¿‘pipash na yachai ushanalla’ yuyaicunatachu yachajunata gushtapangui?, ¿villachijujpi Jehová alipacha ayudashcataca cuenta japipashcanguichu?, ¿huauquipanicunata ninanda juyashpachu, paicunapash Jehovata sirvichun ayudangapaj munapangui?, ¿Jehová Dios quiquinda ashtaca viajeta ayudashcatachu ricupashcangui? (1 Cor. 2:10). Cai tapuicunata ari nishpaca ¿quiquin ungido cashcatachu ricuchijun? Na. Tucuilla Jehovata sirvijcunami caicunataca rurapanchi. Jehová Diosca ungidocunatapash, na ungidocunatapashmi paipa espirituta cushpa ayudan. Shinapash, pipash ungidocha cani nishpa tapurijushpaca, na ungido cashcatami ricuchin. Ungidocunaca imahorapash ungidocha cani nishpaca na tapurijunllu. Ungidocunaca paicuna ungido cashcataca seguromi can.

15. ¿Espíritu santota chasquishpapash tucuicunachu cieloman rigrin?

¹⁵ Bibliapica ashtaca Jehovata tucui shunguhuan sirvijcunamandami parlan. Shinapash paicunaca na ungidocunachu can. Por ejemplo, rey Davidtaca Jehovapa espíritu santomi ayudarca (1 Sam. 16:13). Chaimi Davidca, Jehovamanda ashtaca cosascunata intindirca. Bibliapa huaquin librocunatapashmi escribirca (Mar. 12:36). Shinapash, rey Davidmanda apóstol Pedro parlashpaca, ‘jahua pachaman rishcataca na nircachu’ (Hech. 2:34). Bautizaj Juanbashmi ‘Diospa jucha illaj espíritu junda’ carca (Luc. 1:13-16). Bautizaj Juanmandaca Jesusca nircami: Paishnaca “shujllapash na tianllu” nishpa. Jesús shina nishpapash Bautizaj Juan Diospa Reinopi mandagringa nishpaca na nijurcachu (Mat. 11:10, 11). Paicuna huaquin cosascunata rurachun, Jehová Dios paipa espirituhuan ayudashpapash cielopi causachunga paicunataca na agllarcachu. Shinaca ¿paicunaca cielopi na causangapaj rinamandallachu ungidocunamandaca menos carca? Na, na chaitaca nijunllu. Ashtahuangarin paicunaca cai Alpa shuj paraíso tucujpimi chaipi causangapaj causaringa (Juan 5:28, 29; Hech. 24:15).

16. Ashtaca ashtaca Jehovata sirvijcunaca ¿imatata shuyanajun?

¹⁶ Punda tiempomanda Abrahán, Sara, David, Bautizaj Juan, Jehovata shuj sirvijcunashnami cunanbi ashtaca ashtaca Jehovata sirvijcunaca Diospa Reino cai Alpata mandajujpi paraíso Alpagupi causanata shuyanajun (Heb. 11:10).

17. Cati temapica ¿ima tapuicunatata yachajupashun?

¹⁷ Huaquin ungidocunaca cai Alpapi causanajunrami (Apoc. 12:17). Chaimi cashna tapurinchi: Ungidocunaca ¿imashinata cana can? Ungidocunataca ¿imashinata tratana capanchi? Ungidocuna ashtahuan miranajujta ricushpaca ¿preocuparinachu capanchi? nishpa. Cati temapimi cai tapuimandaca yachajupashun.