¿Imamandata Jesús Huañushca Punllata yarinchi?

1, 2. Jesusca ¿imatata huata 33​pi 14 de nisán tutapica rurarca? (Callari dibujota ricupangui.)

HUATA 33​pi, 14 de nisán tutapica punchapambatami lunaca brillajurca. Jesuspash paipa apostolcunandi tandanajushpami Pascuataca ña yarishca tianajurca. Shinapash ¿imamandata Pascuataca ruran carca? Pascuataca 1.500 huatacuna huashaman Jehová Dios imashina Egiptomanda salvashcata yaringapami ruran carca. Pascuata ña yarishca cashpapash chai tutallatami Jesusca shuj sumaj micuita paipa 11 apostolcunahuan callarichirca. Chai sumaj micuita rurashpami paipa catijcunaca Jesús huañushcata yarishpa catina carca (Mat. 26:1, 2, NM ).

² Jesusca oracionda rurashca jipami, levadura illaj tandata paipa apostolcunamanga “japishpa micuichi” nishpa curca. Chai jipaca vino copatapash japishpami shuj oracionda rurashpa nirca: “Cai copamandaca, tucuicuna ufiachi” nishpa (Mat. 26:26, 27). Tandata, vinota yalichishca jipaca Jesusca na imatapash ashtahuanga yalichircachu. Shinapash chai tutaca alipacha yuyaicunatami paipa catijcunaca yachajurca.

 3. Cai temapica ¿maijan tapuicunatata yachajugripanchi?

³ Jesusca paipa catijcuna pai huañushcata cada huata yarichunmi munarca. Chaitami jipamanga ‘Apunchij Jesuspa micui’ o Jesús Huañushcata Yarina Punlla nishpa rijsinchi (1 Cor. 11:20). Shinapash ¿imamandata Jesús huañushcata yarina canchi? Tandapash vinopash ¿imatata ricuchin? Jesús Huañushcata Yarina Punllapaca ¿imashinata prepararishun? ¿Picunata tandata micuna, vinota ufiana can? Jahua cielopi o cai Alpapi causanata yachashpaca ¿imashinata Jesusta catijcunaca sintirin?

 4. Jesús huañushcamandaca ¿ima bendiciondata charipanchi?

⁴ Adanba huahuacuna caimandaca tucuicunami juchayu canchi, huañunchipash (Rom. 5:12). Juchayucuna caimandami ñucanchillata salvaringapaj o pitapash salvangapaj imatapash Jehová Diosman cuitaca na ushanchi (Sal. 49:6-9). Shinapash Jesusca paipa jucha illaj causaita cushpa, paipa jucha illaj yahuarta jichashpami ñucanchitaca juchamanda, huañuimanda randirca. Shinami Jesusca juchamandapash, huañuimandapash salvashpa para siempre causana oportunidadta ñucanchiman curca (Rom. 6:23; 1 Cor. 15:21, 22).

 5. a) ¿Imashinata Jehová Diospash Jesuspash ñucanchita juyashcata ricuchishca? b) ¿Imamandata Jesús Huañushcata Yarina tandanajuiman rina capanchi?

⁵ Jehová Diosca paipa Churita ñucanchimanda huañuchun cachamushpami ñucanchita juyashcata ricuchirca (Juan 3:16). Jesuspash paipa causaita cushpami ñucanchita juyashcata ricuchirca. Jahua cielopi causajushpapashmi Jesusca cai Alpapi ‘runacunata’ ninanda juyarca (Prov. 8:30, 31). Shinaca ciertopacha Jehová Diosta, Jesusta agradicingapaj munashpaca Jesús Huañushcata Yarina tandanajuiman rinami canchi. Shina rurashpami Jesusta cazunajushun. Jesusca mandarcami: “Ñucata yarishpa, cashnata rurashpa catinguichilla” nishpa (1 Cor. 11:23-25).

 6. Caica ñuca cuerpomi can, caica ñuca yahuarmi can nishpaca ¿imatata Jesusca ningapaj munajurca?

⁶ Huaquin religiongunapi ashtaca gentecunaca ninmi, “Jesusca paillata chai rato tanda tucushpami nirca ‘caica ñuca cuerpomi’ can”, shinallata chai rato vino tucushpami nirca ‘caica ñuca yahuarmi’ can” nishpa. Shinapash chai crishcacuna cierto cashcataca Bibliapica na yachachinllu. ¿Imamandata shina ninchi? Yaripashun. Caimi ñuca cuerpo nijuj ratoca Jesusca apostolcunapa ñaupajpimi tiajurca. Levadura illaj tandapash apostolcunapa ñaupajpimi carca. Shinaca ‘caica ñuca cuerpomi’ can, ‘caica ñuca yahuarmi’ can nishpaca shuj viajecuna cuenda shuj chimbapuraita churashpallami Jesusca parlajurca (Juan 2:19-21; 4:13, 14; 10:7; 15:1).

 7. Jesús Huañushcata Yarina tandanajuipi tandaca ¿imatata ricuchin?

⁷ Huata 33​pica, Pascua micuimanda puchushca levadura illaj tandatami Jesusca paipa apostolcunamanga yalichirca (Éx. 12:8). Bibliapica imapash mapa illaj, jucha illaj cashcata ricuchingapami huaquinbica levaduramanda parlan (Mat. 16:6, 11, 12; Luc. 12:1). Chaimandami levadura illaj tandaca Jesuspa jucha illaj cuerpota ricuchijurca (Heb. 7:26). Cunanbipash levadura illaj tandatami Jesús Huañushcata Yarina tandanajuipica yalichinchi.

 8. Jesús Huañushcata Yarina Punllapi vinoca ¿imatata ricuchin?

⁸ Apostolcunaman yalichishca vinopash Jesuspa yahuarta o Jesuspa causaitami ricuchijurca. Chaimandami cunanbipash Jesús Huañushcata Yarina punllapica vinota yalichinchi. Jesusca gentecunapa ‘juchacunata anchuchingapami’ Jerusalén canllaman Gólgota nishca pushtupi paipa yahuarta jichashpa huañurca (Mat. 26:28; 27:33). Shinaca, Jesús paipa causaihuan ñucanchita salvashcata agradicishpaca cada huatami Jesús Huañushcata Yarina Punllapa prepararina canchi.

 9. a) Jesús Huañushcata Yarina Punllapa liina textocunata liinaca ¿imashinata ayudan? b) Juchamanda, huañuimanda Jesús salvashcata yarishpaca ¿imashinata sintiripanchi?

⁹ Jesús Huañushcata Yarina Punllapa prepararingapaca chai punllacunapa liina textocunatami Cada punlla Diospa Shimita intindingapaj folletopi ricushpa liina canchi. Shina liishpami Jesús nara huañushpallata imata rurajushcapi aliguta pensarishun. Shuj paniguca escribircami: “Cada huatami Jesús Huañushcata Yarina Punllataca ansia shuyanajunchi. Chai tandanajuica cada huatami ashtahuan alipacha can. Shuj punllaca ñuca taita huañushca sirijujta ricushpami Jesús paipa causaita cushpa juchamanda, huañuimanda salvanataca tucui shunguhuan agradicircani. [...] Jesús ñucanchimanda huañushcata ricuchingapaj ashtaca textocunata yachashpa, aliguta intindichi ushashpapash ñuca taita huañujpimi, ñucanchita salvangapaj Jesús paipa causaita cushcataca ali cuenta japircani” nishpa. Shinaca, Jesús Huañushcata Yarina Punlla chayamungacamanga Jesús paipa causaita cushpa ñucanchita imashina juchamanda, huañuimanda salvashcatami aliguta pensarina canchi.

10. Jesús Huañushcata Yarina Punlla chayamungacamanga ¿imatata rurana capanchi?

¹⁰ Jesús Huañushcata Yarina Punlla chayamungacamanga ashtahuanmi villachina canchi. Usharijpicarin chai quillacunapica precursorado auxiliartami japina canchi. Shinami Jesús Huañushcata Yarina tandanajuimanga ashtaca gentecunata invitai ushashun. Jehová Diosmanda, Jesusmanda, shamuj punllacunapi bendiciongunamanda parlashpaca tucui shunguhuanmi cushijushun (Sal. 148:12, 13).

11. ¿Imamandata apóstol Pabloca nirca, Corinto congregacionmanda huaquingunaca ‘Apunchi Jesuspa cuerpota, yahuartaca nalicachinajurcachu’ nishpa?

¹¹ Apóstol Pablo imata nishcatapash yaripashunchi. Paica Corinto llactamanda huauquipanicunataca nircami, maijan cashpapash, Apunchi Jesús micuichi nishca tandata ‘nali shunguhuan micushpa’, ufiaichi nishca copamandapash ‘nali shunguhuan ufiashpaca Apunchi Jesuspa cuerpota, yahuartami nalicachishpa juchata ruran’ nishpa (1 Corintios 11:27-34, liingui). Shinaca, Jesusta catij ungidocuna nalita ruranajushpapash tandata micushpa, vinota ufiashpaca paicunallata llaquichi tucungapami tandata micunajun, vinotapash ufianajun. Apóstol Pablopa tiempopi Corinto congregacionmanda ashtacacunaca imapash nalicunatami ruranajurca. Huaquingunacarin, Jesús Huañushcata Yarina Punlla nara chayajpillata o chai punllapillata ushashcata micushpa, ufiashpami espiritualmente puñunajuj cuenda carca. Shina rurashpami paicunaca Jesús Huañushcata Yarina Punllata na respetanajushcata ricuchinajurca. Chaimandami tandata micunajujta, vinota ufianajujtaca Jehová Diosca nalicachirca.

12. a) Apóstol Pabloca ¿imahuanda Jesús Huañushcata Yarina Punllataca chimbapurarca? b) Ungidocunataca ¿imatata nirca? c) Shuj jatun juchata rurashca cashpaca ¿imatata ungidoca rurana can?

¹² Apóstol Pabloca Jesús Huañushcata Yarina Punllata shuj micuihuan chimbapurashpami ungidocunataca nirca: “Cangunaca Jehová Dios carashca copamandapash, ayacunaman carashca copamandapash ishcandita ufiaitaca na ushanguichichu. Jehová Dios carashca micunamandapash, ayacunaman carashca micunamandapash ishcandita micuitaca na ushanguichichu” nishpa (1 Cor. 10:16-21, NM ). Shinaca, ungido huauqui shuj jatun juchata rurashca cashpaca ancianocunapa ayudatami mascana can (Santiago 5:14-16, liingui). Chai juchamanda tucui shunguhuan arripintirishcata ricuchishca jipa, tandata micushpa, vinota ufiashpaca imapash nalitaca na ruranajunllu (Luc. 3:8).

13. ¿Imamandata shuj mañaita rurashpa ali ricuna canchi, ima esperanzatata charini nishpa?

¹³ Jesús Huañushcata Yarina Punlla ña chayamujujpica aliguta pensarishpa, Jehová Diosta mañashpami ricuna canchi, jahua cieloman rina esperanzata o cai Alpapi causana esperanzata charishcata. Ungido cashcata na seguropacha cashpaca Jesús Huañushcata Yarina Punllapi tandata micuna, vinota ufianaca na alichu canman. Manapash alipacha seguro cashpata chai punllapi tandata micushpa, vinota ufiashpaca Jesús ñucanchita salvangapaj shamushcataca na sirvichijuj cuendami canman. Shinaca Jesús Huañushcata Yarina Punllapi tandata micuna, vinota ufiana cashcata o na cashcataca ¿imashinata yachai ushanchiman?

14. Jesús Huañushcata Yarina Punllapi tandata micujcuna, vinota ufiajcunaca ¿imatata seguropacha cana can?

¹⁴ Jesús Huañushcata Yarina Punllapi tandata micujcuna, vinota ufiajcunaca Jehová Dios paicunahuan Mushuj Pactota rurashcataca seguropachami cana can. Vinomanda parlashpaca Jesusca nircami: “Cai vino copaca, ñuca yahuarmi. Chaihuanmi Diosca, shuj mushujta ari nishca” o shuj mushuj pactota rurashca nishpa (1 Cor. 11:25). Profeta Jeremiasmanbash Jehová Diosca villachircami, Israel llactapi nacirishcacunaman Leyta Cushca Pactopa cuendaca shuj mushuj pactomi tianga nishpa (Jeremías 31:31-34, liingui). Chai Mushuj Pactotaca ungidocunahuanmi Jehová Diosca rurarca (Gál. 6:15, 16). Cai Mushuj Pactoca Jesús paipa causaita cujpimi pactari callarirca (Luc. 22:20). Chai pacto pactarichunga Jesusmi ayudarca. Chai pacto tiaimandami Jesusta ali cazuj ungidocunaca cielopi causanga (Heb. 8:6; 9:15).

15. a) Jesusca ¿picunahuanda Diospa Reinopi Mandangapaj Pactota rurarca? b) Tucuipi Jesusta cazuj ungidocunaca ¿ima bendiciondata charinga?

¹⁵ Ungidocunaca Diospa Reinopi Mandangapaj Pactota paicunahuan rurashcatapash seguromi can (Lucas 12:32, liingui). Diospa Reinopi Mandangapaj Pactotaca Jesusmi paihuan igual ‘llaquita apaj’ ungidocunahuan rurarca (Filip. 3:10). Jesús chai pactota rurajpimi tucuipi cazuj ungidocunaca Jesushuan unai unaicaman igual jahua cielopi mandana bendicionda charinga (Apoc. 22:5). Cai ungidocunami Jesús Huañushcata Yarina Punllapica tandata micui ushan, vinotapash ufiai ushan.

16. Ashalla shimicunapi Romanos 8:15-17 textota intindichipai.

¹⁶ Diospa huahuacuna cashcata seguropacha cashpallami Jesús Huañushcata Yarina Punllapica tandata micui ushan, vinotapash ufiai ushan (Romanos 8:15-17, liingui). Apóstol Pabloca nircami, ungidocunaca Jehová Diostaca “Ñuca Taitalla” ningami nishpa. Cai textopi “Ñuca Taitalla” nishpaca arameo shimimanda japishpami apóstol Pabloca parlajurca. Chai shimipi “ñuca Taitalla” nishpaca taitata tucui shunguhuan juyashpa, respetashpami shina nin carca. Ungidocunapash Jehová Diospa ‘huahuacuna tucuimandami’ paiman quimirita ushashpa Jehová Diostaca “ñuca Taitalla” nin. Ashtahuangarin Taita Diospa ‘espíritu santollatami paicunapa shungupica: “Cangunaca, Taita Diospa huahuacunami canguichi” nishpa yarichijun’. Ungidocunaca cai Alpapi na causangapaj munashcataca seguromi can. Shinallata tucuipi cazuimanda jahua cieloman rishpa Jesushuan mandai ushanatapash seguromi can. Diospa espíritu santohuan agllashca cashcatapash alipachami yachan. Cunan punllacunapica 144 mil ungidocunamandaca huaquingunallami cai Alpapi can (1 Juan 2:20; Apoc. 14:1). Paicunaca Jehová Diosman quimirita ushashpami “ñuca Taitalla” nin.

17. a) Ungidocunaca ¿ima esperanzatata charin? b) ¿Imashinata ungidocuna cashcataca seguro can?

¹⁷ Quiquin ungido cashpaca jahua cieloman rinamandaca cutin cutinmi Jehová Dioshuan parlajuna cangui. Bibliapi yachachishcacunapash quiquinba shungu ucumanbachami chayana can. Huaquin ejemplocunata ricupashun. Bibliapica nijunmi, Jesusca paipa noviahuanmi cazaranga nishpa. Chai shimicunata Bibliapi liijushpaca ¿quiquinbash Jesuspa noviapura cashcata cringuichu? Jesushuan cazarana punlla uchalla chayamuchunga ¿tucui shunguhuanllu munajupangui? (2 Cor. 11:2; Juan 3:27-29; Apoc. 21:2, 9-14.) Taita Diosca paipa huahua tucushcacunata juyanmi nishpa Bibliapi villachijujpica ¿quiquinga ñucamandami parlajun yanguichu? Ungidocunata imatapash mandajujta Bibliapi liishpaca ¿ñucatami mandajun yashpa cazungapaj munanguichu? Shina pensachishpami Diospa espíritu santoca quiquin jahua cieloman rina cashcata intindichin.

18. a) Na cuentai ushanalla ashtaca gentecunaca ¿ima esperanzatata charin? b) Cai Alpapi causana esperanzata charishpaca ¿imashinata sintiripangui?

¹⁸ ‘Na cuentai ushanalla ashtaca gentecunapuramanda’ cajpica cai Alpapi causana esperanzatami Taita Diosca quiquinmanga cushca (Apoc. 7:9; Juan 10:16). Chaimandami quiquinga paraíso Alpagupi para siempre causangapaj ninanda munangui. Chaipi causai imashina canatapash pensarinata gushtanguimi. Shinallata tucuilla familiahuan, rijsicunahuan tandanajushpa cushilla causanatami shuyajungui. Ashtahuangarin tucui llaquicuna, nanaicuna, ungüicuna, huañuipash tucurichunmi tucui shunguhuan munajungui (Sal. 37:10, 11, 29; 67:6; 72:7, 16; Is. 33:24). Huañushcacuna causarijpi paicunata tuparina punllatapash ansiami shuyajungui (Juan 5:28, 29). Chashna juyailla causaiguta cai Alpapi charinata yachashpaca tucui shunguhuanllari Jehová Diostaca pagui nijungui. Chaimandami Jesús Huañushcata Yarina tandanajuipi tandata na micuna, vinota na ufiana cashpapash Jesús salvashcata agradicimandaca chai tandanajuiman ringui.

19, 20. a) Ima esperanzata charishpapash ¿imatata rurana capangui? b) ¿Imamandata Jesús Huañushcata Yarina tandanajuimanga rigripangui?

¹⁹ Jahua cieloman rina o cai Alpapi causana esperanzata charishpapash Jehová Diospi, Jesuspimi feta churana cangui. Jesús paipa causaita cushpa salvashcatapash crinami cangui. Jesús Huañushcata Yarina tandanajuiman rishpaca, maijan esperanzata charishcapi aliguta pensarishpa, Jesús paipa causaita cushcatapash aliguta intindipangui. Cai 2015 huatataca viernes 3 de abrilta, Indi yaicushca jipami Tandanajui Huasicunapi o shuj pushtucunapipash mundo enteropi testigo de Jehovacunaca Jesús Huañushcata Yaringapaj tandanajushun.

²⁰ Jesús Huañushcata Yarina tandanajuiman rishpaca ashtahuanmi Jehová Diostaca agradicingapaj munangui. Chaipi discursota aliguta uyashpacarin Jehová Diosca juyanmi, shamuj punllacunapica ali causaigutami caranga nishpami shuj gentecunamanbash villangapaj munangui (Mat. 22:34-40). Shinaca ama faltapanguichu. Jesús Huañushcata Yarina tandanajuica sumajpachami can.