Jovenguna Diablopa trampacunata mishaichi

1, 2. a) Jovengunaca Satanastapash, demoniocunatapash mishangapaca ¿imatata rurana can? (Callari dibujota ricupangui). b) Cai temapica ¿imatata yachajupashun?

APÓSTOL Pabloca nircami, Jesusta ali catijcunaca shinllita macanajuj soldadocunashnami can nishpa. Ñucanchicunaca espiritualmentemi macanajunshna causanchi. Ñucanchipa contracunaca Satanaspash, demoniocunapashmi can. Paicunata na ricui ushashpapash cuidarinami capanchi. Satanaspash, demoniocunapash ashtaca huatacunata gentecunata pandachishpa causaimandami, imashinata pandachinataca alipacha yachan. Chaimi Satanasta mishanaca jovengunapaca shinlli ricurin. Shinaca ¿Satanastapash, demoniocunatapash jovengunaca mishai ushanllu? Ari mishai ushanmi. Jovengunaca Jehovapa ayudahuanmi Satanastaca mishai ushan. Jovengunaca alipacha soldadocunashnami, ‘Taita Dios cushca macanajungapaj tucui churajunacunata churajushcalla’ causanajun (Efesios 6:10-12, liingui).

² Apóstol Pabloca macanajungapaj churajunamanda chimbapuraitaca romano soldadocunapa churajunapi yuyashpami parlashcanga (Hech. 28:16). Cai temapica apóstol Pablopa chimbapuraimandami yachajupashun. Shinallata macanajungapaj Taita Dios cushca espiritual churajunata churajuna imamanda huaquin jovengunapa shinlli cashcatami ricupashun. Shinallata chaita churajuna imashina jovengunata ayudashcatapashmi ricupashun.

3, 4. Jirruhuan rurashca correaca, Diospa Shimihuanga ¿imapita igual can?

³ (Efesios 6:14, liingui). ‘Na llullashpa villajuj Shimita chumbiliripaichi’ nishpaca, apóstol Pabloca romano soldadocuna churajuj jirruhuan rurashca correamandami parlajushcanga. Chai correaca cinturas ama imapash tucuchun, jirru churajuna ama urmachunmi ayudan carca. Shinallata jatun espadata, uchilla espadatapash huarcungapaj ganchocunatapashmi charirca. Chai correata churajushpaca soldadocunaca seguromi sintirin cashcanga.

⁴ Shinallatami Diospa Shimimanda yachajunaca panda yachachishcacunahuan ama chapurichun ayudan (Juan 8:31, 32; 1 Juan 4:1). Diospa Shimita tucui shunguhuan alicachinaca alita ‘ruranata jirruta churajunshna’ causachun o Diospa mandashcacunata pactachichunmi ayudan (Sal. 111:7, 8; 1 Juan 5:3). Diospa Shimita ali intindinami pipash ñucanchi crishcacunamanda tapuchijpica na manllashpa parlachun ayudan (1 Ped. 3:15).

 5. ¿Imamandata na llullana capanchi?

⁵ ‘Na llullashpa villajuj Shimita chumbilirishcashna’ causangapaca Bibliapa nishcacunata pactachishpami causana capanchi. Shinallata llullacunataca na ninachu capanchi. Satanasca llullacunata parlachunmi ñucanchicunata pandachingapaj munan. Llullacunata parlashpaca ñucanchillatami llaquicunata charishun. Shujcunatapashmi llaquichishun (Juan 8:44). Chaimi juchayucuna cashpapash llullacunata ama parlangapaj esforzarina capanchi (Efes. 4:25). Chaita pactachinaca huaquinbica shinllimi ricurin. 18 huatacunata charij Abigail cuitsaguca ninmi: “Problemacunapi cashpaca ciertota ninapa randica huaquinbica llullanami alishnalla ricurin” nishpa. Shinapash chai paniguca ama llullangapami esforzarin. ¿Imamandata shina esforzarin? Paica ninmi: “Na llullashpami Jehovapa ñaupajpi shuj limpio concienciata charini. Ñuca taitamamacuna, ñuca amigocunapash ashtahuanmi ñucapi confian” nishpa. 23 huatacunata charij Victoriaca ninmi: “Na llullangapaj esforzarijpi, na manllashpa canba crishcacunata parlajpipash huaquinbica imatapash nishpa o rurashpami shujcunaca nali sintichin. Na llullashpaca quiquinllatami seguro sintiringui. Jehovahuanmi ali amigo caitapash ushangui. Shujcunapashmi quiquindaca ashtahuan respetanga” nishpa. Imashinami ricupanchi, ‘na llullashpa villajuj Shimita chumbilirishcashna’ causanaca minishtirishcapachami can.

6, 7. Alita ruranataca ¿imamandata jirru churajunahuan chimbapuran?

⁶ Punda siglopi romano soldadocunaca jirru churajunatami churajun carca. Jirruhuan rurashca churajunatami hombrosmanda cinturascaman churajun carca. Chai jirrucunapa ganchocunapi cuero cintata yalichishpami huatarin carca. Chai jirru churajunaca llasha llashami cashcanga. Shinapash soldadocunapa shunguta o cuerpota espadahuan, flechacunahuan ama chugrichichunmi jarcan carca. Chaimi chai jirru churajunataca cuero cintahuan ali ali huatarina carca.

⁷ Diospa mandashcacunaca chai jirru churajuna cuendami ñucanchi shunguta cuidachun ayudan (Prov. 4:23). Soldadocunaca jirruhuan rurashca churajunatallami churajun carca. Shinallata ñucanchipa yuyaita catinapa randica, Taita Diospa mandashcacunatami cazuna capanchi. Ñucanchi yuyaicunata catishpaca pandarishunmi (Prov. 3:5, 6). Chaimi Diospa mandashcacuna ñucanchi shungupi cachun ricuriana capanchi.

 8. Jehovapa mandashcacunata pactachinaca ¿imamandata ali can?

⁸ ¿Quiquinbaca Diospa mandashcacunaca shuj llasha quipishnachu cashca? O ¿Quiquin munashcashna causachunllu na saquishca? 21 huatacunata charij Danielca ninmi: “Biblia nishcashna causajta ricushpami ñuca profesorcuna, cumbacunapash ñucamanda burlarin. Chaimi nimapa na valinichu yashpa llaqui llaqui sintirircani” nishpa. Ali sintirichunga ¿imata Danieltaca ayudarca? Paica ninmi: “Jehovapa mandashcacunata cazuna ñucapallata ali cashcatami tiempohuanga cuenta japircani. Huaquin cumbacunaca drogatami chupai callarirca. Cutin shujcunaca escuelamandapashmi llujshishpa rirca. Paicuna llaquicunatalla charijta ricushpaca ninandami llaquirircani. Chaimi Jehová Dios paita sirvijcunata imashina cuidajta ricurcani” nishpa. 15 huatacunata charij Madison cuitsaguca ninmi: “Cumbacuna imatapash rurashpa cushilla cajta ricushpaca huaquinbica Jehovapa mandashcacunata pactachinaca shinllimi ricurin” nishpa. Madison cuitsagutaca ¿imata ayudarca? Paica ninmi: “Testigo de Jehová cashcatami yarini. Shinallata chai trampacunahuan Satanás pandachingapaj munashcatapashmi yarini. Satanaspa trampacunapi na urmashpaca ñucallatami cushilla sintirini” nishpa.

9-11. a) Jehovata sirvijcunaca ¿ima botasta churajunshna churajuna canchi? b) Na manllashpa villachingapaca ¿imatata rurana capanchi?

⁹ (Efesios 6:15, liingui). Soldadocunaca botas illajca guerramanga na rinllu carca. Chai botascunaca quimsacaman pillushpa cuerohuan rurashca botascunami carca. Alipacha rurashca botascuna caimandami soldadocunaca na lluchashpa purin carca.

¹⁰ Romano soldadocunaca chai botascunata churajushpami guerraman rin carca. Cutin Jehovata sirvijcunaca botasta churajunshnami ‘casilla causaita cuj villaicunata’ villachinchi (Is. 52:7; Rom. 10:15). Na manllashpa tucui ladocunapi villachingapami esforzarina capanchi. 20 huatacunata charij Robertoa shuti jovenga ninmi: “Ñuca cumbacunaman villachinataca ninandami manllan carcani. Pingaimandami na villachin cashcani. Imamanda shina sintirishcatapash na intindinichu. Cunanga cushijushpami tucui jovengunaman villachini” nishpa.

¹¹ Ashtaca jovengunataca ali prepararinami na manllashpa villachichun ayudashca. Cutin quiquinga ¿imatata rurai ushapangui?Julia shuti cuitsaguca 16 huatacunatami charin. Paica ninmi: “Colegiomanga siempremi publicaciongunata apashpa rini. Ñucapa cumbacuna imata yuyajta, imapi crijtami ali ali uyani. Shina ruranami ima temamanda parlanata yachachun ayudahuashca. Ali prepararishca cashpaca paicuna gushtashca temacunamandami parlai ushashcani” nishpa. 23 huatacunata charij María cuitsaguca ninmi: “Quiquimba cumbacunata ali tratangapaj, imata yuyajta ali uyangapaj esforzarishpaca paicuna imashina sintirishcatami intindi ushangui. Jovengunapa llujshishca tucui informacionda liingapami esforzarini. Shinami jovengunamanga Bibliamanda alipacha yuyaicunata ricuchi ushashcani. Shinallata jw.org paginapi informaciondapashmi ricuchi ushashcani” nishpa. Imashinami ricupanchi, ali prepararinami ali botasta churajushcashna tucuicunaman villachichun ayudan.

12, 13. “Flecha pundapi ninata japichishpa” Satanás shitamushcacunaca ¿imacunata can?

¹² (Efesios 6:16, liingui). Romano soldadocunapa escudocunaca jatun jatungunami carca. Chai escudocunaca hombrosmanda cunguricamanmi tapan carca. Espadacuna, flechacuna o shuj cosascunapash cuerpoman ama chayachunmi chai escudoca jarcan carca.

¹³ Satanasca llullashpami cashna nin, Jehová Diosca gentecunata na llaquinllu, na juyanllu nishpa. Satanaspa llullacunaca ‘flecha pundapi ninata japichishpa shitamushcashnami’ can. 19 huatacunata charij Aida shuti cuitsaguca ninmi: “Jehová Diosca caru carupimi can yanimi. Shinallata Jehová Diosca ñucapa amigo cangapaca na munangachu yanimi” nishpa. Chaita mishachunga ¿imata Aidataca ayudashca? Paica ninmi: “Tandanajuicunaca ñucapa fe shinlliyachunmi ayudan. Tandanajuiman rishpapash na comentanllu carcani. Ñuca comentariocunataca nipi na uyangapaj munanllu nishpami pensarin carcani. Shinapash cunanbica tandanajuicunamanga ali prepararishpami rini. Ishcai o quimsa viajeta comentangapami esforzarini. Shinlli cajpipash tandanajuicunapi comentashpaca cushillami sintirini. Turiñañacunaca ninandami animahuan. Tandanajuicuna tucurishca jipaca Jehová Dios ñucata juyashcatami cuenta japini” nishpa.

14. Aidapa ejemplomandaca ¿imatata yachajupanchi?

¹⁴ Aidapa ejemplomandaca shuj alipacha yuyaitami yachajui ushapanchi. Romano soldadocunapa escudocunaca shuj medidatallami charirca. Ñucanchi feca chai escudoshnami can. Shinapash ñucanchi fe shinlli cajta o na shinlli cajtapash cada unomi cuenta japina capanchi (Mat. 14:31; 2 Tes. 1:3). Chaimi ñucanchi fe shinlli cachun esforzarishpa catina capanchi.

15, 16. Cascoca ‘quishpirinata yaria’ causanahuanga ¿imapita igual can?

¹⁵ (Efesios 6:17, liingui). Romano soldadocunapa umapi churajuna jirru o cascoca umapi, cungapi, ñavipi imapash ama chayachunmi jarcan carca. Huaquin cascocunaca maquipi apangapaj shuj ganchogutami charirca.

¹⁶ Soldadocunapa uma imapash ama pasachunmi cascocunaca ayudan carca. Shinallatami ‘quishpirinata yaria’ causanaca chai cascoshna ñucanchi yuyaicunata cuidachun ayudan (1 Tes. 5:8; Prov. 3:21). ‘Quishpirinata yaria’ causanami Jehovapa tucuilla nishcacuna pactarinata crichun ayudan. Shinallata problemacuna ricurijpi ama yapata preocuparichunmi ayudan (Sal. 27:1, 14; Hech. 24:15). Soldadocunaca paicunapa uma ama imapash pasachunga cascotaca churajunapachami carca. Shinallatami ñucanchipash ‘quishpirinataca yaria’ causana capanchi.

17, 18. a) Quishpirina esperanzata ama yaria causachunga ¿imatata Satanasca rurangapaj munan? b) Satanaspa trampacunapi ama urmangapaca ¿imatata rurana capanchi?

¹⁷ Satanasca ‘quishpirinata yaria’ causachunga na munanllu. Chai esperanzata ama yaria causachunga ¿imatata Satanasca rurangapaj munan? Chaipaca Satanás imashina Jesusta pandachingapaj munashcata ricupashunchi. Shamuj punllacunapi Jesús cai alpata mandana cashcataca Satanasca alimi yachashcanga. Cai alpapi llaquichi tucushpa Jesús huañunatapashmi yachashcanga. Chai jipa rey shina mandangapaj Jehová Dios ningacaman Jesús shuyana cashcatapashmi yachashcanga. Chaimi Jesusta pandachingapaj Diabloca cashna nirca: “Ñucata can cungurishpa mañajpica tucuillatami canmanlla cusha” nishpa. Shina nishpaca chai rato Jesús rey tucui ushashcatami Diabloca ricuchijurca (Luc. 4:5-7). Paraíso alpagupi ashtaca cosascunata Jehová Dios ñucanchiman caranataca Satanasca alimi yachan. Chaicunata chasquingapaca shuyanarami capanchi. Chaicamanga tal vez problemacunatapashmi charishun. Chaimi cunanbillata ali causaita charina munaihuan Diabloca pandachingapaj munan. Diospa Reinota pundapi churanapa randica ashtaca cosascunata charinapi preocuparishpa causachunmi Diabloca munan (Mat. 6:31-33).

¹⁸ Satanaspa trampacunapica ashtaca jovengunaca na urmashcachu. Por ejemplo, 20 huatacunata charij Karinaca ninmi: “Ñucanchipa tucui llaquicunata Diospa Reino tucuchinataca alimi yachani” nishpa. Shina yuyanaca ¿imashinata Karinataca ayudashca? Paica ninmi: “Shamuj punllacunapi cai alpa shuj paraíso tucunata yachanami espiritual metacunata charichun ayudahuan. Cai mundopi ali trabajota o ashtaca culquita charingapaca na esforzarinichu. Chaipa randica espiritual metacunata pactachingapami ñuca tiempota, ñuca fuerzatapash utilizani” nishpa.

19, 20. Diospa Shimita ali utilizachunga ¿imata ayudanga?

¹⁹ Apóstol Pablo Efesios librota escribijuj tiempopica, romano soldadocunaca 50 centimetrota charij espadatami macanajungapaca utilizan carca. Chai soldadocunaca espadacunataca alipachami utilizan carca. Paicunaca espadata ali utilizangapami cada punlla yachajun carca.

²⁰ Apóstol Pabloca nircami, Taita Diospa Shimica shuj espadashnami can nishpa. Chaimi ñucanchipa crishcacunata shujcunaman parlangapaca Diospa Shimita ali utilizana capanchi. Shinallata ñucanchi yuyaicunata cambiangapapashmi Diospa Shimita ali utilizana capanchi (2 Cor. 10:4, 5; 2 Tim. 2:15). Diospa Shimita ali utilizachunga ¿imata ayudanga? Sebastian shuti jovenga 21 huatacunatami charin. Paica ninmi: “Bibliata liijushpaca cada capitulomanda shuj textotami ñuca gushtashca textocunapurapi anotani. Shina ruranami Jehová Dios imashina yuyajta ashtahuan rijsichun ayudahuashca” nishpa. Párrafo 8​pi parlashca Daniel jovenga ninmi: “Bibliata liijushpaca villachinapi utilizangapaj textocunataca señalashpami churani. Bibliata alipacha utilizajta ricushpa, paicunata ayudangapaj esforzarijta ricushpaca gentecunaca ashtahuanmi uyangapaj munan” nishpa.

21. Satanastapash, demoniocunatapash ¿imamandata na manllana capanchi?

²¹ Cai temapi parlashca jovengunaca, Satanastapash, demoniocunatapash na manllana cashcatami ricuchin. Satanaspash, demoniocunapash ushaita charijpipash mishai ushanchimi. Paicunaca na para siempre causangachu. Diospa Reinopi Mil Huatacunata Jesús mandajuj tiempopica Satanaspash, demoniocunapash vichashcami canga. Paicunaca nimata ñana rurai ushangachu. Mil huatacuna jipaca paicunataca para siempremi tucuchinga (Apoc. 20:1-3, 7-10). Satanás ñucanchita llaquichingapaj munashcata, paipa trampacunatapash ñami yachajupashcanchi. Jehová Diospa ayudahuanga Satanaspa trampacunataca mishai ushashunmi.