¿Imashinata ñucanchi familiahuan, amigocunahuan ali llevarita ushapanchi?

BIBLIAPICA NINMI: “Maijan cashpapash quiquimbajlla ali cachunga, na yarinachu canguichi. Ashtahuangarin shujcunapajpash ali cachunmi, tucuicunallata yarina canguichi” (Filipenses 2:4).

¿IMATATA NINGAPAJ MUNAN? Shuj gentecunahuan ali llevaringapaca na ñucanchipillachu pensarina capanchi. Chaipa randica paicunata imashina ayudanatami pensarina capanchi. Ñucanchipilla pensarishpaca ñucanchihuanga pipash na llevaringachu. Por ejemplo, shuj cusa o huarmi paipilla pensarishpaca faltapimi urmaita ushanga. Shinallata pipash imagutapash charishcamanda o imatapash ali yachashcamanda jariyashpaca amigocunata na charingachu. El camino del carácter nishca libropica, ñucanchipilla pensarinaca nalipachami can ninmi.

¿IMATATA RURAI USHAPANGUI?

• Shujcunata ayudana. Shuj ali amigoca siempremi imagupipash ayudan. Shinallata imagutapashmi paicunamanga parlaita ushanchilla. Shujcunata ayudajcunaca, depresión ungüitaca na charinllu. Cushillami causan.

• Gentecunata llaquishpa juyaihuan tratana. Chaica gentecuna imashina sintirijta intindinatami ningapaj munan. Shinallata paicunata llaquishpa juyaihuan tratashpaca nunca na imatapash nishpa llaquichishunllu.

  Shujcuna imatapash nijpica na ñapash culirashunllu. Shinaca gentecunata llaquishpa juyaihuan tratashpaca shujcunatapash nalicachishpaca na ricushunllu. Ashtahuanbash shuj llactacunamanda gentecunahuan, shuj costumbrecunata charijcunahuanga alimi llevarishun.

• Shujcunahuan yalingapaj tiempoguta llujchina. Gentecunata ali rijsingapaca paicunahuan tiempoguta yalinami capanchi. Ali amigocunata charingapaca paicuna parlangapaj munashca temamanda parlangapami esforzarina can. Amigocunataca ali uyashpa, paicunamanda preocuparishcatapash ricuchinami capanchi. Shuj libropica ninmi: “Gentecuna munashca temacunamanda parlajcunaca cushillami sintirin” nishpa.

BIBLIAPICA NINMI: “Nalicunahuan tandanajujpica, canguna ali causajujtapash pandachishpami chingachinga” (1 Corintios 15:33, MTQI ).

¿IMATATA NINGAPAJ MUNAN? Amigocunamandami alitapash o nalitapash ruranchilla. Sociología nishcata estudiajcunaca ninmi: Pipash tabacota chupajcunahuan tandanajushpaca, paipashmi tabacota chupanata yachajun. O huarmimanda o cusamanda divorciarijujhuan tandanajushpaca, paipashmi chaitallata ruran nishpa.

¿IMATATA RURAI USHAPANGUI? Ali amigocunatami charina capangui. Chai amigocunaca alita yuyaj, respetota ricuchij, imagutapash na mitsashpa caraj, mingachijcunami cana can.

LLAQUICHINGAPACA NA IMATAPASH NINACHU CAPANGUI

“Huaquingunaca, imata rimashpapash, espadahuan chugrichinshnami saquinajun” (PROVERBIOS 12:18).

CARAJCUNAMI CANA CAPANCHI

“Shujcunaman imagutapash carana yuyaita charij runaca, tucuipimi ali Ilujshin” (PROVERBIOS 11:25).

ÑUCANCHITA TRATACHUN MUNASHCASHNAMI GENTECUNATA TRATANA CAPANCHI

‘Shuj gentecuna imatapash aliguta cangunata rurachun munashpaca, chashnallatami cangunapash shujcunaman aliguta rurana canguichi’ (MATEO 7:12).