Cazungapaca ¿listochu capanchi?

 1. Cazunaca ¿imamandata difícil caita ushan?

SHUJCUNATA cazunaca quiquinbaca ¿dificilchu cashca? Rey Davidtaca huaquinbica chaimi pasarca. Chaimandami paica Jehovataca canda cazuna munaita carahuai nishpa mañarca (Sal. 51:12). Rey David Jehovata ninanda juyashpapash huaquinbica paipaca Jehovata cazunaca dificilmi carca. Ñucanchipapashmi shinallata can. Primeroca, juchayu caimandami cazunaca difícil caita ushan. Segundo, Diabloca paishna na cazujcuna cachunmi imacunatapash rurajun (2 Cor. 11:3). Ultimopica, na cazungapaj munaj gentecunapa chaupipimi causanajupanchi. Chaimi Diabloca gentecunamanga “na cazuna yuyaicunata” yachachin. Chai yuyaicunaca huairashnami tucui ladocunapi can (Efes. 2:2). Ñucanchicunaca juchayucuna caimandami pecadocunapi ama urmangapaj ninanda esforzarina tucupanchi. Shinallata Diablopa trampacunapi ama urmangapaj y cai mundopa nali ruraicunapipash ama urmangapami ninanda esforzarina capanchi. Ashtahuanbash Jehovata tucuipi cazungapaj y Jehová cushca autoridadta charij gentecunata cazungapapashmi esforzarina capanchi.

 2. Cazungapaj listo canaca ¿imatata ningapaj munan? (Santiago 3:17).

² (Santiago 3:17​ta liipangui). Santiago librota escribij runaguca ali yachaita charij gentecunaca “cazungapaca listomi can” nircami. Cai shimicunaca Jehová cushca autoridadta charij personacunata cazuna cashcata y paicunata cazuna munaita charina cashcatami ningapaj munan. Shinapash autoridadta charijcuna Jehovata ama cazuchun atichijpica chaicunata uyachunga Jehová Diosca na munanllu (Hech. 4:​18-20).

 3. ¿Imamandata Jehová Diosca autoridadta charij gentecunata cazuchun munan?

³ Jehovapa mandashcacunaca perfectomi can. Shinapash gentecunaca juchayumi can. Chaimandami Jehovata cazunaca, gentecunata cazunamandaca ashtahuan yali fácil cajta pensaita ushapanchi (Sal. 19:7). Shinapash Jehová Diosca mandana autoridadtaca taitacunaman, cai alpapi autoridadcunaman y congregacionbi anciano huauquicunamanbashmi cushca (Prov. 6:20; 1 Tes. 5:12; 1 Ped. 2:​13, 14). Shinaca paicunata cazushpaca Jehovata cazujushcatami ricuchipanchi. Cunanga Jehová cushca autoridadta charij personacunata cazuna difícil cajpipash paicunata aliguman cazungapaj imata rurana cashcata yachajupashun.

 4. ¿Imamandata ashtaca jovengunaca taitamamataca na cazun?

⁴ Jovengunaca taitamamata na cazuj ashtaca compañerocunatami charin (2 Tim. 3:​1, 2). ¿Imamandata ashtaca jovengunaca taitamamataca na cazun? Huaquin taitamamacunaca paicunapa huahuacunataca imatapash rurachunmi mandan. Shinapash jovengunaca taitacunallatapash chai mandashcacunata na pactachijtami ricun. Cutin shuj jovengunaca paicunapa taitamamacuna cushca consejocuna yapa antiguo cajta o yapa estricto cajtami yuyan. Joven, ¿huaquinbica chashnallatachu sintiripashcangui? Ashtaca jovengunapa cai cati mandashcata pactachinaca dificilmi caita ushan: “Huahuacuna, ñucanchi Señor Jesús munashcashnami quiquingunapa taitamamataca cazuna capanguichi. Porque chashna ruranami Taita Diospa ñaupapica ali ricurin” (Efes. 6:1). Cai consejota cazuchunga ¿imata ayudanga?

 5. Lucas 2:​46-52​pi nishcashnaca ¿imamandata Jesusca jovengunapaca alipacha ejemplomi can nipanchi?

⁵ Taitamamata cazunata yachajungapaca Jesuspa ejemploca alipachami can (1 Ped. 2:​21-24). Jesusca perfectomi carca. Pero paipa taitamamaca juchayucunami carca. Shina cajpipash paipa taitamama pandarijpi o paita na intindijpipash paicunataca tucuipimi cazurca (Éx. 20:12). Jesús 12 huatacunata charijpi ima pasashcata ricupashun (Lucas 2:​46-52​ta liipangui). Jerusalén llactapica cada huatami Jehovata adorangapaj shuj fiestata ruran carca. Chai fiestamanga Jesuspa familia enteromi rishcarca. José y María Jerusalén llactamanda ña tigranajushpami Jesús paicunahuan ñana cashcata cuenta japirca. Paicunaca Jesús, Jesuspa huauquipanicuna paicunahuan cachunmi segurarina carca. María huarmigu Jesusta ña tarishpaca paicunata ninanda preocupachishcamandami Jesustaca culparca. María chaita nijpica Jesusca “chaica injustomi can” nishpami contestaita ushanman carca. Pero Jesusca respetohuan, aligumanmi contestarca. Shinapash José y Mariaca Jesús imata rurajujtaca “na intindircachu”. Shina pasajpipash Jesusca “paicunata tucuipi cazushpami causajurca”.

6, 7. Taitamamacunata cazui ushachunga jovengunataca ¿imata ayudanga?

⁶ Jovenguna, quiquinba taitacuna pandarijpi o canda na intindijpica paicunata cazunaca ¿dificilchu can? Shina cajpica ¿imata ayudanga? Primeroca, Jehová imashina sintirijta yaipi capangui. Porque Bibliapica: “Huahuacuna paipa taitamamacunata cazujpica Señor Jesuspa ñaupapica ali ricuringami” ninmi (Col. 3:20). Shinallata quiquinba taitacuna quiquinda na intindijta o na tucuipi perfecto mandajtaca Jehová Diosca alimi yachan. Shina pasajpipash quiquinba taitamamacunata tucuipi cazungapaj esforzarijpica Jehová Diosca cushillami sintiringa.

⁷ Segundo, quiquinba taitamama imashina sintirijta yaipi charipangui. Paicunata tucuipi cazungapaj esforzarijpica cushillami sintiripanga. Shinallata ashtahuanmi quiquinbi confiapanga (Prov. 23:​22-25). Y seguromi paicunahuanga ashtahuan ali llevaripangui. Bélgica llactamanda Alexander huauquiguca: “Ñuca taitamamata ashtahuan cazui callarishpaca paicunahuanga ashtahuan alimi llevari callarircani. Shinallata tucuicunami ashtahuan cushilla sintirircanchi” ninmi.b Tercero, cunanbi cazushpaca jipacunaman cazunaca ashtahuan fácil canatami yaipi charina capangui. Brasil llactamanda Paul huauquiguca: “Ñuca taitamamata cazunata yachajunaca Jehovata cazuchun y autoridadta charij gentecunata cazuchunbashmi ayudahuarca” ninmi. Bibliapica taitamamata cazuna importantepacha cashcatami ricuchin. Chaipica: Taitamamata cazushpami “ali causaiguta charingui y cai alpapipash ashtaca huatacunata causangui” nijunmi (Efes. 6:​2, 3).

 8. Ashtaca jovengunaca ¿imamandata paipa taitamamata cazunata decidishca?

⁸ Ashtaca jovengunaca taitamamata cazuna ali cashcatami cuenta japishca. Brasil llactamanda Luiza paniguhuan igual edadta charij jovengunaca tucuicunami celularta charirca. Shinapash Luizapa taitamamaca shuj celularta charichunga na saquircachu. Chaita intindinaca panigupaca dificilmi carca. Brasil llactamanda Luiza paniguhuan igual edadta charij shuj jovengunaca cada unomi shuj celularta charin carca. Shinapash jipamanmi paniguca paipa taitamamacuna paita cuidangapaj shina rurajushcata cuenta japirca. Paniguca paipa taitamamata cazungapaj na obligada sintirina cashcatami cuenta japirca. Porque paipa taitamamapa consejocunaca paipallatami ali carca. Estados Unidos llactamanda Elizabeth shuj joven panigupaca huaquinbica cazunaca dificilmi carca. Paniguca: “Ñuca taitacuna mandashcata huaquinbi nali intindishpapash paicunapa mandashcacuna shuj viajecunapi imashina ñucata ayudashcatami yarini” ninmi. Shinallata Armenia llactapi causaj Mónica shuti paniguca: “Ñuca taitamamapa tucui mandashcacunata cazushpaca ñucallatami beneficiarini” ninmi.

 9. Gobiernopa leycunata cazunamandaca ashtaca gentecunaca ¿imatata yuyan?

⁹ Ashtaca gentecunaca gobiernocuna minishtirishca cashcatami reconocin. Chaimandami, “‘mandanajuj autoridadcunapa’ mandashcacunata huaquingunatallapash cazunapachami canchi” nin (Rom. 13:1). Shinapash shuj ley na ali cashcata o na pactachi ushanalla cashcata pensashpaca ñana cazungapaj munanllu. Por ejemplo, impuestocunata paganamanda ricupashun. Europamanda shuj llactapica impuestota paganamanda gentecunata tapuchijpica chuscu gentecunamanda shujca shuj impuesto na ali o yapapacha cashcata pensashpaca, “chai impuestota na pagashparapash alimi canman” nishpami contestarca. Chaipi gentecuna shina pensaimandami gobierno mañashca impuestocunataca na tucuita pagan.

10. Gobiernopa imapash leycunata na ashta alicachishpapash ¿imamandata cazupanchi?

¹⁰ Bibliapica cai mundopi gobiernocunata Diablo mandajushcatami ricuchin. Shinallata chai gobiernocuna gentecunata sufrichinajujta y ñalla tucuchi tucuna cashcatapashmi ricuchin (Sal. 110:​5, 6; Ecl. 8:9; Luc. 4:​5, 6). Shinallata Bibliapica “autoridadcunata na cazungapaj munajcunaca Taita Diospa contrami tucunajun” ninmi. Chaimandami Jehová Diosca cunanbi gobiernocuna leycunata churashpa gentecunata mandachun saquishca. Shinaca paicunata respetashpa cazuchun, “tucuicunaman imata cuna cashcata” cuchunmi munan. Chaimandami autoridadcunata respetana, cazuna, shinallata impuestocunata pagana capanchi (Rom. 13:​1-7). Gobiernocuna churashca leycunamandaca: “Nimapa na ayudanllu. Yapapacha injustomi can” nishpami pensaita ushapanchiman. Shinapash ñucanchicunaca Jehovatami cazupanchi. Y paica autoridadcunata cazuchunmi munan. Shinapash gobiernocuna Jehovapa mandashcacunata ama pactachichun nishpa imatapash mandajpica Jehová Diosca paicunata cazuchunga na munanllu (Hech. 5:29).

11, 12. Lucas 2:​1-6​pi nishcashnaca na fácil pactachi ushanalla shuj leyta cazungapaca José y Mariaca ¿imatata rurarca? Shina rurashcamandaca ¿ima bendiciongunatata chasquirca? (Fotocunata ricupangui).

¹¹ José y Mariapa ejemplomandaca ashtacatami yachajuita ushapanchi. Autoridadpa leycunata cazuna paicunapa difícil cajpipash cazungapaca listomi carca (Lucas 2:​1-6​ta liipangui). María huarmigu 9 quillacunata ña vijsayu cajpimi paicuna na fácil pactachi ushanalla shuj ley llujshirca. Roma llactapi mandaj César Augusto runaca tucuilla gentecuna paicunapa shutita anotachingapaj richunmi mandarca. Chai mandashcata pactachingapami José y Mariaca Belén llactaman rina tucurca. Chaiman ringapaca urcucunata cruzashpa 150 kilometrocunatami rina tucurca. María huarmigupaca vijsayu caimandaca chashna caru caruta rinaca dificilmi carca. María huarmiguca Mesías tucuna huahuagutami vijsayu carca. Ñanda rijushpa huahuaguta unguna tucushpaca ¿imashi pasanman carca? María huarmigu vijsayu caimandami gobiernopa chai mandashcata na pactachishpa yangata saquita ushanman carca.

¹² José y María, Belén llactaman rina cashcamandaca preocupadomi cashcanga. Shinapash gobiernopa mandashcataca pactachircami. Tucuipi cazushcamandami Jehová Diosca paicunataca bendiciarca. María huarmiguca Belén llactamanga alimi chayarca. Chai llactapimi sano, ali huahuaguta ungurca. Shinallata Bibliapi parlashca profeciacuna pactarichunbashmi ayudarca (Miq. 5:2).

13. Leycunata cazushpaca ¿imashinata ñucanchi huauquipanicunatapash ayudapanchi?

¹³ Autoridadcuna churashca leycunata cazushpaca ñucanchillata y shujcunapashmi beneficiarin. Shinallata autoridadcunata cazushpaca imapash jatun problemacunamandapashmi jarcarita ushapanchi (Rom. 13:4). Shinallata ñucanchicuna cada uno autoridadpa leycunata cazushpaca testigo de Jehovacunata aliguman ricuchunmi ayudaita ushapanchi. Huaquin huatacuna huashaman Nigeria llactapi ima pasashcata ricupashun. Chai llactapica reunión horaspimi Salón del Reinomanga huaquin soldadocunaca yaicurca. Chai soldadocunaca impuestocunata ama pagangapaj nishpa protestashca gentecunatami mascanajurca. Shinapash chai soldadocunapa a cargo shuj soldadoca, chai soldadocunataca Salón del Reinomanda llujshichunmi mandarca. Chai soldadoca: “Testigo de Jehovacunaca impuestocunamanda protestashpaca na purinllu” nircami. Shinaca gobiernopa leycunata quiquin cazushpaca Jehovata tucui sirvijcuna ali ricuri ushachunmi ayudapangui. Shinallata huauquipanicunata ama imapash pasachunbashmi ayudapangui (Mat. 5:16).

14. Autoridadpa leycunata cazui ushachunga ¿imata shuj panigutaca ayudarca?

¹⁴ Huaquinbica autoridad churashca leycunata cazunaca dificilmi caita ushan. Estados Unidos llactamanda Joanna paniguca ninmi: “Autoridadcunata cazunaca ñucapaca dificilmi carca. Porque ñuca familiaca autoridadcunapa culpamandami ninanda sufrirca”. Shinapash Joanna paniguca autoridadcunata ama shina ricungapami cambiocunata ruranata decidirca. ¿Imashinata chaita rurarca? Primeroca, redes sociales nishcapi autoridadcunamanda en contra parlaj imapash mensajecunata liinatami saquirca (Prov. 20:3). Segundo, gobiernocuna cambiocunata rurashpa ali cosascunata rurachun shuyanapa randica, Jehovatami canbi confiangapaj ayudahuai nishpa mañarca (Sal. 9:​9, 10). Tercero, Diospa Gobiernotalla apoyanamanda parlaj publicaciongunatami lii callarirca (Juan 17:16). Joanna paniguca: “Autoridadpa leycunata respetashpa cazunaca ñucatallatami tranquilo, ali cachun ayudahuashca” ninmi.

15. Jehovapa organizacionbi cushca instrucciongunata cazunaca ¿imamandata huaquinbica difícil caita ushan?

¹⁵ Jehová Diosca congregacionda ñaupaman pushaj huauquicunata cazuchunmi mandan (Heb. 13:17). Jehovapa organizacionda ñaupaman pushaj Jesusca perfectomi can. Pero cai alpapi Jehovata sirvijcunata ñaupaman pushachunga juchayu gentecunatami agllashca. Huaquinbica imapash instrucciongunata cazunaca dificilmi caita ushan. Ashtahuanbachaca ñucanchi na rurangapaj munashca o na gushtashca instrucciongunata cujpimi pactachinaca difícil can. Shuj viajeca apóstol Pedroca shinami sintirirca. Shuj angelca apóstol Pedrotaca Moisespa Leypi nishcashna mapa animalcunata micuchunmi mandarca. Pero apóstol Pedroca quimsa viajecamanmi, “chaitaca na rurashachu” nirca (Hech. 10:​9-16). Apóstol Pedropa ricuipica cai mushuj instrucciongunaca na alichu carca. Shuj perfecto angelpa mandashca cajpipash apóstol Pedropa cazunaca dificilmi carca. Ñucanchicunataca juchayu gentecunami imagutapash rurachun mandan. Shinaca imapash instruccionguna pactachina difícil ricurijpica na manllarinachu capanchi.

16. Huaquin instruccionguna apóstol Pablopa na alishnalla ricurijpipash ¿imatata rurarca? (Hechos 21:​23, 24, 26).

¹⁶ Apóstol Pabloca paiman cushca instruccionguna paipa ñaupapi na alishnalla ricurijpipashmi cazungapaj listo cashcata ricuchirca. Huaquin judío cristianocunaca apóstol Pablomanda imapash yanga nishcacunatami uyashcarca. Huaquin gentecunaca: “Moisesman Cushca Leyta na respetaimandami Pabloca ‘Moisesman Cushca Leytaca ñana catinachu canguichi’ nishpami yachachijun” ninajurcami (Hech. 21:21). Chaimandami Jerusalén llactamanda ancianocunaca apóstol Pablotaca: “Moisesman Cushca Leyta cazujushcata o na cazujushcataca ricuchinami cangui” nircami. Apóstol Pablo imapash nalita na rurashca cashpapash, Moisesman Cushca Leyta ñana cazuna cashcata yachashpapashmi Jerusalén llactamanda ancianocunata cazurca. Chaipaca ‘cayandi punllaca, chuscu runagucunata temploman pushashpami Pabloca Moisesman Cushca Leypi nishcashna limpio cangapaj imata rurana cashcata rurarca’ (Hechos 21:​23, 24, 26​ta liipangui). Apóstol Pablo cazushpaca tucui huauquipanicuna shujllashna tandanajushca cachunmi ayudarca (Rom. 14:​19, 21).

17. Panigu Stephaniepa experienciamandaca ¿imatata yachajupanchi?

¹⁷ Sucursalpi sirvij huauquicuna imata decidishcata aliguman chasquinaca panigu Stephaniepaca dificilmi carca. Paniguca paipa cusaguhuan Jehovata shuj idiomapi sirvijushcamandaca cushillami carca. Shinapash sucursalpi sirvij huauquicunaca: “Cai uchilla grupoca ñana tiashpa catingachu” nishpami villarca. Shinallata cai cusahuarmigutaca paicunapa propio idiomata parlaj congregacionman tigrachunmi mandarca. Shina nijpica panigu Stephanieca ¿imashinata sintirirca? Paniguca: “Llaquillapachami sintirircani. Shinallata cai uchilla grupoguta yali ñucanchi propio idiomata parlaj congregación ashtahuan ayudata minishtijujtaca na pensarcanichu” ninmi. Difícil cajpipash chai decisionda apoyanatami paniguca decidirca. Paniguca caitapashmi nin: “Tiempohuanga turigucuna shuj alipacha decisionda japishcatami intindircani. Cai congregacionbica ashtacacunami Jehovata na sirvij familiacunata charin. Chaimandami ñucanchicunaca paicunapaca espiritualmente taitamamashna tucurcanchi. Shinallata shuj inactiva ñañagutapashmi Bibliamanda yachachishpa ayudajupani. Y cunanbica estudio personalta charingapapashmi ashtahuan tiempota charipani. Tucuipi cazungapaj ninanda esforzarishcamandami tranquila, cushilla sintiripani” ninmi.

18. Cazushpaca ¿imashinata beneficiaripanchi?

¹⁸ Tucuicunallatami cazunataca yachajuita ushapanchi. Jesusca cai alpapi llaquicunahuan “sufrishpami, imashina cazunataca yachajurca” (Heb. 5:8). Ashtaca viajecunata ñucanchicunapash jatun llaquicuna ricurijpimi cazunata yachajuna tucupashcanchi. Por ejemplo, COVID-19 ungui callarijpica Salón del Reinopi reuniongunata ñana charichun, huasin huasin rishpa ñana villachichunmi nirca. Chaita cazunaca ¿dificilchu carca? Imashina cashpapash quiquin cazushcamandami quiquinllata cuidariparcangui, congregacionbi huauquipanicuna shujllashna tandanajushca cachun ayudaparcangui y Jehovatapash cushichiparcangui. Shinallata cunanga Ninan Jatun Manllanai Llaqui Punllacuna tiempo chayamujpi imapash instrucciongunata cazungapaca preparadomi capanchi. Chai tiempopi cazunaca salvarita ushachunmi ayudapanga (Job 36:11).

19. Quiquinga ¿imamandata cazungapaj munapangui?

¹⁹ Cazushpaca ashtaca bendiciongunata chasqui ushashcatami yachajupashcanchi. Shinapash Jehovata juyaimanda y paita cushichingapaj munaimandami ashtahuanbachaca cazupanchi (1 Juan 5:3). Ñucanchicunamanda Jehová imacunatalla rurashcataca imashapash tigrachitaca nunca na ushapashunllu (Sal. 116:12). Shina cajpipash Jehovataca cazuita ushapanchimi. Shinallata pai cushca autoridadta charij gentecunatapashmi cazuita ushapanchi. Cazushpaca ali yachaita charishcatami ricuchishun. Y ali yachaita charishpaca Jehovatami cushichishun (Prov. 27:11).