Joven panigucuna, espiritualmente shinlli tucungapaj esforzaripaichi

 1. Espiritualmente shinlli cachunga ¿imata ayudanga?

HUAHUAGUCUNACA na cuenta japijtami ñapash viñashpa catin. Shinapash espiritualmenteca na yangata huahuacunashnaca jaicata viñai usharingachu. Espiritualmente ñaupaman shinlli tucushpa catingapaca imatapash ruranami minishtirinb (1 Cor. 13:11; Heb. 6:1). Espiritualmente shinlli cangapaca Jehová Dioshuan ali amigo cangapami esforzarina capanchi. Jehovapa espíritu santoca ali cualidadcunata charichun, imagutapash ruranata yachajuchun o imata responsabilidadcuna ricurijpi preparado cachunmi ayudan (Prov. 1:5).

 2. Génesis 1:27​pica ¿imatata yachachin? Cai temapica ¿imatata yachajupashun?

² Callaripica Jehová Diosca shuj jarita, shuj huarmitami rurarca (Génesis 1:27​ta liipangui). Shuj jarica shuj huarmihuan ricujpica cuerpopi cashpa y yuyaipi cashpapash diferentemi can. Por ejemplo, Jehová Diosca jariman y huarmimanga diferente responsabilidadcunata pactachichunmi cushca. Y chai responsabilidadta pactachingapaca cada unomi ali cualidadcunata charinata y diferente ruraicunata yachanata minishtin (Gén. 2:18). Cai temapica joven panigucuna espiritualmente shinlli cangapaj imata rurana cashcatami yachajupashun. Y cati temapica joven huauquigucuna imata rurai ushashcatami yachajupashun.

3, 4. Joven panigucunaca ¿maipita ali ejemplota ricuchij panigucunataca tarita ushan? (Fotocunata ricupangui).

³ Bibliapica Jehová Diosta tucui shunguhuan juyashpa sirvij huaquin huarmigucunamandami parlan (jw.org paginapi “Bibliapi parlashca huarmicunamandaca ¿imatata yachajunchi?” nishca temataca ricupangui). Cai temapa textopi nishcashnami chai huarmigucunaca ‘tucuipi controlarijcuna carca. Y tucui ruraicunapimi tucui shunguhuan crishcata ricuchin carca’. Quiquinba congregacionbica seguromi espiritualmente shinlli panigucuna tiapanga. Paicunapa ali ejemplomandaca ashtacatami yachajuita ushapangui.

⁴ Joven panigucuna, espiritualmente shinlli caj panigucunapa ejemplota catingapaj ninanda esforzaripaichi. Chaipaca cai panigucuna ima cualidadcunatalla charishcata y chai cualidadcunata charingapaj imata rurai ushashcata pensaripai. Cati parrafocunapica espiritualmente shinlli cangapaj munaj tucui panigucuna ima quimsa cualidadcunata charina cashcatami yachajupashun.

 5. Espiritualmente shinlli panigucunaca ¿imamandata humilde cana can?

⁵ Humilde cana. Humilde caj panigucunaca Jehová Dioshuan ali amigami can. Shuj huauquipanicunahuanbash alipachami llevarin (Sant. 4:6). Por ejemplo, humilde y Jehová Diosta tucui shunguhuan juyajcuna caimandami familiapi y congregacionbi Jehová churashca autoridadta respetashpa apoyanata decidin (1 Cor. 11:3).c

 6. Joven panigucunaca ¿imashinata Rebeca huarmigupa ejemplota catita ushan?

⁶ Rebeca huarmigupa ejemplota ricupashun. Rebeca huarmiguca imata ruranata o imahora ruranataca aliguta pensarishpami ruran carca (Gén. 24:58; 27:​5-17). Shinallata respetohuan trataj y aliguman cazuj huarmigumi carca (Gén. 24:​17, 18, 65). Quiquinbash Rebeca huarmigushnallata humilde y Jehová cushca autoridadta charij personacunata respetashpaca quiquinba familiapi y congregacionbipash alipacha ejemplomi capangui.

 7. Joven panigucunaca ¿imashinata Ester huarmigupa ejemplota catita ushan?

⁷ Na jariyashca cana. Bibliapica: “Ali yachaica, na jariyashcacunahuanmi” can ninmi (Prov. 11:2). Por ejemplo, Ester huarmiguca paita reina cachun agllajpica na jariyashca tucurcachu. Ashtahuanbash paipa primo Mardoqueo cushca consejocunata aliguman uyashpami cazun carca (Est. 2:​10, 20, 22). Quiquinbashmi Ester huarmigupa ejemplota catishpa shujcunapa ali consejota mascaita ushapangui (Tito 2:​3-5).

 8. Ropata churajunata agllana horasca ¿imashinata panigucunaca 1 Timoteo 2:​9, 10​pi consejota pactachita ushan?

⁸ Ester huarmiguca ¿imashinata na jariyashca cashcata ricuchirca? Ester huarmiguca “ali ñavi, juyaillagumi carca”. Paica paita alicachishpa ricunajuchunga na imatapash rurajurcachu (Est. 2:​7, 15). Ester huarmigupa ali ejemplota catichunga 1 Timoteo 2:​9, 10​mi ayudapanga (chai textota liipangui). Chai textopi apóstol Pabloca panigucunata aliguta pensarishpa mudarichunmi consejarca. Griego shimipi apóstol Pablo cashna nishpaca panigucuna aliguta pensarishpa y shujcuna imata yuyashcata yaipi charishpa ropata churajuna cashcatami ningapaj munarca. Aliguta pensarishpa ropata mudarij panigucunaca espiritualmente ali cashcatami ricuchin. Chaimandami paicunamandaca ninanda cushijupanchi.

 9. Abigaíl huarmigumandaca ¿imatata yachajupanchi?

⁹ Aliguta pensarina. Aliguta pensarishpa imatapash ruranaca ima ali cashcata, ima nali cashcata aliguta ricushpa ruranatami ricuchin. Abigailpa ejemplota ricupashunchi. Paipa cusa shuj nali decisionda agllashcamandami paipa huasipica llaquicuna tiagrijurca. Abigaíl huarmigu chaita cuenta japishpaca uchallami aliguta pensarishpa gentecunata salvanata yuyarca. Chaimandami ashtacacuna salvarirca (1 Sam 25:​14-23, 32-35). Aliguta pensarinaca ñucanchitaca ima hora imaguta ninata o na ninata ricuchunmi ayudan. Shinallata shujcunata ama nali sintichishpa paicunapi preocuparishcata ricuchichunbashmi ayudan (1 Tes. 4:11).

10, 11. Ali liinata, ali escribinata yachanaca ¿imashinata quiquindaca ayudapanga? (Fotota ricupangui).

¹⁰ Panigucunapaca causaipi ayudaj cosascunata yachajunaca alipachami can. Huahua cashpa yachajushca cosascunaca tucui causaipimi ayudaita ushan. Huaquin ejemplocunata ricupashunchi.

¹¹ Ali liinata, ali escribinata yachajupai. Huaquin culturacunapi gentecunaca: “Huarmicunaca liinata y escribinata yachajunataca na minishtinllu” ninmi. Shinapash chaicunata yachajunaca tucui cristianocunapaca minishtirishcapachami can (1 Tim. 4:13).d Shinaca ali liinata, ali escribinata yachajuchun pipash jarcachunga ama saquipanguichu. Chaita ruranaca shuj trabajoguta tarishpa quiquinllata mantinirichunmi ayudanga. Shinallata Bibliata ali yachajushpa shujcunaman Bibliata ali yachachichunbashmi ayudapanga. Ashtahuanbachaca Bibliata liishpa, liishcapi pensarishpa Jehová Dioshuan ali amigo tucuchunmi ayudanga (Jos. 1:8; 1 Tim. 4:15).

12. Proverbios 31:26​pica ¿imatata yachajupanchi?

¹² Shujcunahuan imashina parlanata yachajupai. Caita yachajunaca tucui cristianocunapami minishtirishcapacha can. Caimandallata parlashpami discípulo Santiagoca: “Uyangapaca listomi cana capanguichi. Uyangapaj listo cashpapash na ñapash imatapash ninajunachu capanguichi” nishpami consejarca (Sant. 1:19). Shujcuna parlajujpi aliguta uyashpaca paicunamanda preocuparishcatami ricuchipanchi (1 Ped. 3:8). Imaguta parlajujpipash o quiquinhuan parlajuj persona imashina sintirijushcata na intindijushpaca respetohuan cutin tapuchipangui. Jipaca imagutapash nara nishpallata cashna pensaripangui: “Ñucapa nishcacunaca ¿ciertochu cagrin? ¿Animagrinllu? ¿Respetashcata, juyashcatachu ricuchigrin?” nishpa (Prov. 15:28). Cashna ali cualidadcunata charij panigucunapa ejemplotami catita ushapangui (Proverbios 31:26​ta liipangui). Chai panigucuna imashina parlajta ricushpa yachajupangui. Cai cualidadta charingapaj esforzarishpaca quiquinllatami shujcunahuan ashtahuan ali llevaripangui.

13. Huasipi rurana cosasgucunataca ¿imashinata yachajui ushapangui? (Fotota ricupangui).

¹³ Huasipi rurana cosascunata yachajupai. Huaquin pushtucunapica huarmigucunami huasipica ashtaca cosascunata ruran. Huasipi ruraicunata yachajuchunga quiquinba mama o shuj panigumi yachachishpa ayudaita ushan. Cindy shuti shuj paniguca paipa mama imata yachachishcamanda parlashpaca: “Ñuca mamaca shinllita trabajashpaca canllatami contenta, ali sintiringui nishpami yachachihuarca. Yanunata, limpianata, siranata, y comprasgucunata ruranata yachajunaca Jehová Diosta ashtahuan ali sirvichunbashmi ayudahuarca. Ñuca mamitaca shujcunata mingachinatapashmi yachachihuarca. Chaimandami shuj shuj turiñañacunata rijsishpa paicunamandaca ashtacata yachajurcani” ninmi (Prov. 31:​15, 21, 22). Trabajadora huarmigucuna, shujcunata mingachinata yachaj huarmigucuna, huasipi imagutapash ruranata yachaj huarmigucunaca paicunapa familiapi y congregacionbipash shuj jatun bendicionmi can (Prov. 31:​13, 17, 27; Hech. 16:15).

14. Crystal shuti panigu nishcamandaca ¿imatata yachajupangui? ¿Imata ruranapita ashtahuan pensarita ushapangui?

¹⁴ Trabajashpa imashina mantinirinata yachajupai. Tucui cristianocunallatami trabajashpa paicunallata mantinirinata y charishcaguhuan cushilla canata yachana can (Filip. 4:11). Crystal shuti paniguca: “Ñuca joven cashpaca shuj shuj cosascunata agllashpa estudiana oportunidadtami charircani. Ñuca taitamamaca ñuca causaipi ayudaj cosascunata yachajuchunmi animahuarca. Por ejemplo, ñuca taitaca contabilidadta yachajuchunmi animahuarca. Chaita yachajunaca ñucataca ninandami ayudahuarca” ninmi. Trabajota taringapaj minishtirishca cosascunata yachajushca jahuapash culquiguta imacunapilla gashtanatapashmi yachajuna capangui (Prov. 31:​16, 18). Yangamanda na dibi tucushpa y charishca cosasgucunahuanlla cushilla cashpaca Jehovata ashtahuan sirvingapaj metacunatapashmi pactachita ushapangui (1 Tim. 6:8).

15, 16. Soltera panigucunaca ¿imamandata ninan valishca can? (Marcos 10:​29, 30).

¹⁵ Jehová gushtashca cualidadcunata yachajushpa, causaipi ayudana cosascunata yachajushpaca jipa punllacunapi ima responsabilidadcuna ricurijpipash chaicunata pactachingapaca preparadomi capashun.

¹⁶ Asha tiempota soltera paranatami decidita ushapanguiman. Huaquin culturacunapica gentecunaca cazarachunmi atichin. Shinapash Jesús nishcashnami huaquingunaca na cazaranata decidishca (Mat. 19:​10-12). Cutin shujcunaca shuj shuj razongunamandami solterocuna paran. Soltera cajpipash Jehová Dios y Jesusca quiquindaca ninandami valorashpa ricun. Mundo enteromanda soltera panigucunaca congregacionbica ninan valishcami can. Cai panigucuna huauquipanicunamanda preocuparishcata y juyaita ricuchishcamandami huauquipanicunaca paicunataca panitashna o mamatashna ricun (Marcos 10:​29, 30​ta liipangui; 1 Tim. 5:2).

17. Tiempo completopi panigucuna sirvi ushachunga ¿imata ayudaita ushan?

¹⁷ Jehová Diostaca tiempo completopimi sirvita ushapanguiman. Mundo enteropica panigucunami ashtahuan predicanajun (Sal. 68:11). Cunanmandallata precursora, voluntaria de construcción o betelita shina sirvingapaca ¿imatapash rurai ushapanguichu? Chaita pactachingapaca Jehovata mañapangui. Tiempo completopi sirvij huauquipanicunahuanbash parlapangui. Shinallata paicunashnallata Jehovata sirvingapaj imatalla rurana cashcatapash tapupangui. Tiempo completopi sirvichun ayudaj cosascunata rurangapaj esforzaripangui. Tiempo completopi sirvinata decidishpaca Jehová Diosta shuj shuj cosascunapi ashtahuan sirvina oportunidadtami charita ushapangui.

18. Panigucunaca ¿imamandata pihuan cazaranataca ali ali ricuna can? (Fotota ricupangui).

¹⁸ Cazaranatami decidita ushapanguiman. Cai temapica ima cualidadcunata charinata, ima cosasgucunata ruranata yachajunatami ricupashcanchi. Caipi yachajushcacunaca cazarashpa shuj ali huarmigu cachunmi ayudapanga. Cazarangapaj munashpaca pihuan cazaranataca ali alimi ricuna cangui. Porque chai decisionga quiquinba causaipica shuj jatun, importante decisionmi can. Porque cazarashca jipaca quiquinba cusamanmi sujetarina capangui (Rom. 7:2; Efes. 5:​23, 33). Nara cazarashpallata cashna pensaripai: “Chai turiguca ¿espiritualmente alichu can? Paipa causaipica ¿Jehovapa cosascunata ruranachu ashtahuan importante can? Shinallata ¿ali decisiongunata agllanllu? Imapi pandarishpapash ¿pandarishcata reconocinllu? Ñañagucunataca ¿respetohuanllu tratan? ¿Ñuca imashina sintirishcata intindishpa ayudaita ushagrinllu? Congregacionbi chasquishca responsabilidadcunataca ¿imashinata pactachin?” nishpa (Luc. 16:10; 1 Tim. 5:8). Shuj ali cusata taringapaj munashpaca primeroca quiquinrami shuj ali huarmigu cangapaj esforzarina capangui.

19. “Huarmicunaca cusacunapa ayudantemi can” nijpica ¿imamandata cushilla sintirita ushan?

¹⁹ Bibliapica shuj ali huarmiguca paipa cusata ‘ayudajmi’ can ninmi (Gén. 2:18). Huarmigucuna cusacunapa ayudantemi can ninaca ¿na valishca cashcatachu ricuchin? Na. Ashtahuangarin pitapash ayudaj canaca shuj jatun bendicionmi can. Chaimandami Bibliapica Jehová Diosca ñucanchita ‘ayudaj’ cashcatami ricuchin (Sal. 54:4; Heb. 13:6). Shuj huarmiguca paipa cusata apoyashpami shuj ali huarmigu cashcata ricuchin. Ashtahuangarin familiapi imapash decisionda agllajujpi apoyashpapashmi shuj ali huarmigu cashcatapash ricuchin (Prov. 31:​11, 12; 1 Tim. 3:11). Cazaranata pensajushpaca Jehová Dioshuan ali amiga tucungapaj esforzaripangui. Shinallata cunanmanda quiquinba huasipi o congregacionbipash ‘ayudaj’ huarmigu cangapaj esforzaripangui.

20. Mamacunaca ¿imashinata familiata ayudaita ushan?

²⁰ Cazarashpaca huahuacunatami charita ushapanguiman (Sal. 127:3). Chaimandami mama tucushpaca ima responsabilidadcunatalla pactachina cashcata yaipi charina capangui. Cai temapi yachajushca ali cualidadcunata charina, imata rurana cashcata yachajunapash ninandami ayudanga. Juyaita, pacienciata charinami quiquinba familiapi cushilla cachun, huahuacunapash tranquilo, seguro sintirishpa viñachun ayudapanga (Prov. 24:3).

21. Panigucunataca ¿imamandata ninanda valichipanchi? (Callari paginapi fotocunata ricupangui).

²¹ Juyashca panigucuna, Jehová Diosta sirvingapaj y paipa organizacionda apoyangapaj ninanda esforzarishcamandaca ninandami juyapanchi (Heb. 6:10). Panigucunaca ali cualidadcunata charingapaj, causaipi ayudaj cosascunata yachajungapaj y shamuj punllacunapi ima responsabilidadcuna ricurijpipash preparada cangapami ninanda esforzarin. Jehová Diospa organizacionbica panigucunaca ninan valishcami can.