3. Taita Diosca ¿imashinata ñucanchi mañaicunataca contestan?

Taita Diosca paipa Shimi Bibliata utilizashpami ñucanchi mañaicunataca contestan. Bibliata liinaca ‘alipacha yachajushcacuna’ tucuchunmi ñucanchitaca ayudanga (Salmo 19:7; Santiago 1:​5, liipangui). Shinallata problemacunahuan cajpica Jehová Diosca tranquilo sintirichunmi ayudan. Huaquinbicarin huauquipanicunata utilizashpami ñucanchitaca ayudan.

Tucuicunallatami imapash decisiongunata agllana tucupanchi. Chai decisiongunaca ñucanchi causaipi y Jehová Dioshuan amigo canapipashmi afectaita ushan. Por ejemplo, huaquinbica maipi causanata, imapi trabajanata, cazaranata o na cazaranatami decidina tucupanchi. Pero ali decisiongunata agllashpaca ñucanchillatami cushilla causaita ushapanchi. Y Jehová Diostapashmi cushichishun.

1. Bibliaca ¿imashinata ali decisiongunata agllachun ayudan?

Imatapash nara decidishpallatami Jehová Diospa ayudata mañana capanchi. Shinallata Bibliapa consejocunatapashmi mascana capanchi (Proverbios 2:3-6, liipangui). Huaquinbica Jehová Diosca imata rurana cashcatami mandan. Y chaipica mejor cazunami capanchi.

Pero Bibliapica tucui tucuipa shuj leyca na tianllu. Shinapash Jehová Diosllatami “maijan ñanda rinatapash” o maijan decisionda agllanatapash ricuchun ayudanga (Isaías 48:17). Shinapash ¿imashinashi Jehová Diosca ayudanga? Jehová Diosca Bibliapa consejocunahuanmi imatapash decidichun ayudanga. Bibliapa consejocunami Jehová Dios imata pensajta y imata munajta yachachun ayudan. Chaipaca Bibliatami liina capanchi. Jehová Dios imata munajta yachashpami pai munashcashna imagutapash decidi ushapashun.

2. Imagutapash nara decidishpallata ¿imacunapillata pensarina capanchi?

Bibliapica “ali yachajushca runaca, imata rurangapajpash aliguta” pensarinra ninmi (Proverbios 14:15). Cai shimicunaca imagutapash nara decidishpallata aliguta pensarina cashcatami ricuchin. Imata decidinata pensarijushpaca, cashna tapuripai: “Caita decidingapaca ¿Bibliapa maijan consejocunata ayudahuan? ¿Imata decidishpashi tranquilo sintirisha? Ñucapa decisiongunaca ¿imashinashi shujcunataca afectanga? ¿Jehová Diosta cushichi ushashacha?” (Deuteronomio 32:29).

Jehová Diosca ima ali cashcata o nali cashcata nina derechotami charin. Paipa consejocunata y mandashcacunatapash ashtahuan yachajushpa y chaicunata cazungapaj esforzarishpaca, shuj ali concienciatami chari ushapashun. Ñucanchi concienciaca alita o nalita ruranajushcata cuenta japichunmi ayudan (Romanos 2:​14, 15). Ali yachajushca concienciata charinaca ali decisiongunata agllachunmi ayudan.

ASHTAHUAN YACHAJUPASHUNCHI

3. Bibliapa consejocuna quiquinda ayudachun saquipangui

VIDEO: Bibliapa yachachishcacunata siempre catipashunchi (5:54)

• Jehová Diosca ¿imatata shuj regalogutashna carashca?

• Jehová Diosca ¿imamandata ñucanchillata imagutapash decidichun saquishca?

• Ñucanchillata decidi ushachunga ¿imatata Jehová Diosca carashca?

Bibliapa shuj consejota ricungapaca, Efesios 5:​15 y 16​ta liipangui. Liishca jipaca cai situaciongunapi ‘tiempota aliguta aprovechangapaj’ imata rurana cashcata parlapangui:

• Bibliata cada punlla liingapaj.

• Ali cusahuarmicuna, ali taitamamacuna, ali huahuacuna cangapaj.

• Reuniongunaman na faltashpa ringapaj.

4. Aliguta decidingapaca quiquinba concienciatami aliguta yachachina capangui

VIDEO: “Ali concienciatami charina canguichi” (5:13)

• Videopi ricushcashnaca, ali concienciata charingapaj y Jehová Dios munashcashna ali decidingapaca ¿imatata cai paniguca rurarca?

Shujcuna ñucanchipa randi decidichunga ¿imamandata na mañana capanchi? Hebreos 5:​14​ta liishpa, cai tapuicunata contestapangui:

• Shujcuna ñucanchipa randi decidichun alishnalla ricurijpipash ¿imamandata cada uno decidina capanchi?

• Ñucanchi concienciata ali yachachingapaj y ali decisiongunata agllangapaca ¿ima ayudacunatata charipanchi?

5. Shujcunapa concienciata respetapashunchi

Cada unomi diferente concienciata charipanchi. Chaimandami diferente decisiongunata agllapanchi. Shinaca ¿imashinata shujcunapa concienciata respetashcata ricuchi ushapanchi? Cunanga cai ishcai ejemplocunata ricupashun.

Ejemplo 1: Maquillarinata ninanda gushtaj shuj panigumi shuj congregacionbi ayudangapaj rishcanman. Y chai congregacionbi maquillarinata na gushtaj panigucuna tiashcanman.

Romanos 15:1​ta y 1 Corintios 10:23 y 24​ta liishpa, cai tapuicunata contestapangui:

• Cai textocunapi nishcashnaca, cai paniguca ¿imatashi rurana can? Quiquin gushtashca cosascuna shujcunapa concienciata molestajpica ¿imatata rurana capangui?

Ejemplo 2: Bibliapi tragota ufianata na prohibijta yachashpapash shuj huauquiguca nimatapacha na ufianatami decidin. Y chai huauquiguta shuj fiestaman invitashcanman. Y chai fiestapi huaquin huauquigucuna asha tragota ufianajujta ricushcanman.

Eclesiastés 7:16​ta y Romanos 14:​1 y 10​ta liishpa, cai tapuicunata contestapangui:

• Cai textocunapi nishcashnaca, cai huauquiguca ¿imatashi rurana can? Shujcunapa rurashcacunata ricushpa quiquinba conciencia na ashta ali sintirijpica ¿imatata rurana capangui?

Ali decisiongunata agllangapaca ¿imacunatallata rurana capangui?

1. Jehovapa ayudata mañapai. Paipa ayudahuanmi imata rurana cashcata yachai ushapangui (Santiago 1:5).

2. Informacionda mascapai. Bibliapi y publicaciongunapimi Jehová Diospa consejocunata mascaita ushapangui. Shinallata experienciata charij huauquipanicunatapashmi tapuita ushapangui.

3. Imata decidigrijushpapash quiquinba concienciata y shujcunapa concienciatapash afectanata o na afectanata pensaripai.

YARINGAPAJ

Ali decisiongunata agllangapaca, Jehová Dios imata pensajta y shujcunata afectajta o na afectajtami ricuna capanchi.

¿Imatata yachajupashcanchi?

• ¿Imashinata Jehová Dios munashcashna aliguta decidi ushapangui?

• Quiquinba conciencia ali yachajushca cachunga ¿imatata rurana capangui?

• ¿Imashinata shujcunapa concienciata respetashcata ricuchi ushapangui?

CAITAPASH RICUPAI

Jehová Dioshuan ashtahuan ali amigo cangapaca ¿imashinata ali decisiongunata agllaita ushapangui?

“Ali decisiongunata agllapashunchi” (Villajun revista, 15 de abril de 2011)

Jehová Dios ñucanchita imashina consejajta ricupai

Jehová Diosca paita sirvijcunataca consejashpami cuidan (9:50)

Aliguta decidichun ima ayudashcata ricupai.

Jehová Diosca paita primeropi churajpica ninandami bendician (5:51)

Tucui tucuipa shuj ley na tiajpipash Jehová Diosta imashina cushichi ushashcata ricupai.

“Bibliapica ¿tucuipachu shuj ley tian?” (Villajun revista, 1 de diciembre de 2003)