Congregación shujllashna tandanajushca cachun ayudapashunchi

Ñucanchi huauquipanicunahuan cashpaca rey Davidshnami: “Ricuichi, huauquipura juyarinajushpa tandanajushpa causanaca, alipacha juyaillagumari” nita ushapanchi (Salmo 133:1). Huauquipanicunahuan tandanajushca cangapaca tucuicunallatami esforzarina capanchi.

1. ¿Imamandata Jehová Diospa organizacionga shujpacha can?

Shuj llactapi congregacionda visitashpaca chai llactapi parlaj shimita na intindishpapash huauquipanicunahuanga familiapishnami sintiripangui. ¿Imamandata shina nipanchi? Porque mundo enteropi testigo de Jehovacunaca chai publicaciondallata utilizashpami Bibliamandaca yachajupanchi. Shinallata maimanda cashpapash tucuicunallata randimanda juyaita ricuchingapami esforzaripanchi. Shinallata Jehová Diospa shutita tucuicunallata shujllashna tandanajushpa alicachingapami munapanchi (Sofonías 3:9).

2. ¿Imashinata congregación shujllashna tandanajushca cachun ayudaita ushapangui?

“Caishuj chaishujmi tucui shunguhuan ninanda juyarina capanguichi” (1 Pedro 1:22). Cai consejotaca ¿imashinata pactachi ushapangui? Shujcunapa pandarishcacunatara ricujunapa randica ima alicunatalla rurashcatami ricungapaj esforzarina capanchi. Quiquinba gustota charijcunahuanlla llevarijunapa randica shuj llactamanda o shuj costumbrecunata charijcunahuanbash ali llevaringapaj esforzaripangui. Shinallata shujcunata nalicachishpa ricunata yachashpaca ama nalicachishpa ricungapaj esforzaripangui (1 Pedro 2:17, liipangui).a

3. Shuj huauquihuan o panihuan shuj problemata charishpaca ¿imatata rurana capangui?

Shujllashna tandanajushca cashpapash juchayucuna caimandami huaquinbica imatapash nishpa o rurashpa llaquichita ushanchi, na cashpaca ñucanchitapash llaquichita ushan. Chaimandami Bibliaca “tucui shunguhuan perdonarishpa catina capanguichi. Imashnami Jehová Diosca quiquingunata tucui shunguhuan perdonarca chashnallatami quiquingunapash rurana capanguichi” ninmi (Colosenses 3:​13, liipangui). Ñucanchicunaca Jehová Diostaca tauca viajemi llaquichishcanchi. Shinapash paica ñucanchitaca ashtaca viajemi perdonashpa catishca. Chaimandami huauquipanicunataca ñucanchipash perdonana capanchi. Pitapash llaquichishcata cuenta japishpaca chai personahuan uchalla arreglangapaj esforzaripangui (Mateo 5:​23, 24, liipangui).b

ASHTAHUAN YACHAJUPASHUNCHI

4. Tucuicunatallata igual y ali tratapashunchi

Huauquipanicunataca tucuicunatallata juyaihuan ali tratangapami munapanchi. Shinapash diferente costumbrecunata y diferente yuyaicunata charijpimi ashata difícil caita ushanman. Shinaca tucuicunata juyaihuan tratachunga ¿imata ayudaita ushan? Hechos 10:34 y 35​ta liishpa, cai tapuicunata contestapangui:

• Jehová Diosca tucui laya gentecunatami paita sirvijcuna cachun chasquishca, chaita yachaimandaca quiquinga ¿imashinata shuj shuj laya gentegucunata ricuna capangui?

• Quiquin causashca pushtupica ¿diferente gentegucunataca siemprechu ali tratan? ¿Imamandata quiquinbash na chashnallata rurana capangui?

2 Corintios 6:11​manda 13​caman liishpa, cai tapuita contestapangui:

• Tucui huauquipanicunata juyashcata ricuchingapaca ¿imatata rurai ushapangui?

5. Perdonarishpa ali tucunami canguichi

Jehová Diosca perfecto caimandami paita perdonachunga na minishtin. Pero paica ñucanchitaca siempremi perdonajushca. Salmo 86:5​ta liishpa, cai tapuicunata contestapangui:

• Cai textoca Jehová Dios ¿imashina perdonan cashcatata ricuchin?

• Jehová Dios perdonaj cashcamandaca ¿imashinata sintiripangui? ¿Imamandata shina sintiripangui?

• ¿Imacunamandallata tucuicunahuan ali llevarinaca difícil caita ushanman?

Jehová Diospa ejemplota catishpa huauquipanicunahuan shujllashna tandanajushca cangapaca ¿imatata rurana capanchi? Proverbios 19:11​ta liishpa, cai tapuita contestapangui:

• Pipash imatapash nishpa o rurashpa llaquichijpica quiquinga ¿imatata rurai ushapangui?

Huaquinbica ñucanchimi imatapash nishpa o rurashpa shujcunata llaquichinchi. Shina pasajpica ¿imatata rurana capanchi? VIDEOTA ricushpa, cai tapuita contestapangui:

VIDEO: Tranquilo causanata mascashpaca bendiciongunatami charishun (6:01)

• Videopi ricushca paniguca chaishuj paniguhuan ali tucungapaca ¿imatata rurarca?

6. Huauquipanicunapa ali rurashcacunata ricupangui

Huauquipanicunata ashtahuan rijsingapaj esforzarishpaca paicunapa ali rurashcacunata ricushpapash paicunapa pandarishcatapashmi ricushun. Shinaca paicunapa pandarishcacunatalla ama ricungapaca ¿imatata rurana capanchi? VIDEOTA ricushpa, cai tapuita contestapangui:

VIDEO: Ashtahuan ali cangapaj esforzarishunchi (5:10)

• Huauquipanicunapa ali rurashcacunata ricuchunga ¿imata quiquindaca ayudaita ushapanga?

Jehová Diosca ñucanchi shunguta y ñucanchi ali rurashcacunatami ricun. 2 Crónicas 16:9 callari parteta liishpa, cai tapuita contestapangui:

• Quiquinba ali rurashcacunata Jehová Dios ricujta yachashpaca ¿imashinata sintiripangui?

YARINGAPAJ

Tucui huauquipanicunata perdonashpa y juyashcata ricuchishpaca congregacionbi tucuicunallata shujllashna tandanajushca cachunmi ayudapangui.

¿Imatata yachajupashcanchi?

• Tucui laya gentegucunata igual tratachunga ¿imata ayudanga?

• Shuj huauquihuan o shuj panihuan imapash problemata charishpaca ¿imatata rurana capangui?

• ¿Jehová Dios perdonanshnallata quiquinbash shujcunata perdonangapaj munapanguimanllu? ¿Imamanda?

CAITAPASH RICUPAI

Jesusca shujcunata ama criticashpa ricuchunga shuj ejemplota churashpami yachachirca. Ima ejemplota churashcata ricupangui.

Canba ñavipi jatun caspishna tiajujtara anchuchipai (7:01)

¿Imapash nalitaca na rurashcanichu yashpapashchu disculparina canchi?

“Disculparinaca cutin ali tucuchunmi ayudan” (Villajun revista, 1 de noviembre de 2002)

Huaquinguna shujcunata ali, igual tratanata imashna yachajushcata ricupai.

Ama ñavitalla ricushpa tratapashunchichu (5:06)

Congregacionbi tucuicunahuanllata tranquilo cangapaca imapash problemacuna tiajpi imashina arreglanata ricupai.

“Pihuanbash problemata charishpaca juyaihuan arreglashunchi” (Villajun revista, mayo de 2016)