Taita Diospa contracunata ima pasanatami Apocalipsis libropica parlan

 1. Apocalipsis libropi nishcashnaca Satanasca ¿imatata rurai callarirca?

APOCALIPSIS libropica Taita Diospa Gobiernoca ña cielopi gobernajushcata, shinallata Satanás Diablopash cai alpaman ña shitamui tucushcatami parlan (Apoc. 12:1-9). Satanás Diablo cai alpaman shitamui tucujpica, jahua cielopica tranquilo causaimi tiai callarirca. Pero cai alpapica ashtahuan problemacunami mirai callarirca porque Satanasca ninanda culirashca caimandami testigo de Jehovacunataca atacai callarirca (Apoc. 12:12, 15, 17).

 2. ¿Imata aguantashpa catichun ayudanga?

² Diablo llaquichishpa catijujpica ¿imashinata aguantashpa catita ushapashun? (Apoc. 13:10). Shamuj punllacunapi ima pasanata yachanami aguantashpa catichun ayudanga. Por ejemplo, Apocalipsis libropica apóstol Juanga Jehová Diosta sirvijcuna ñallapacha ashtaca bendiciongunata charinamandami parlan. Taita Diospa contracunaca ñallami tucuchi tucunga. Apocalipsis libropi parlashca manllanayai animalcuna imata ricuchijushcata, chaicuna ima pasanata ricupashunchi.

 3. Apocalipsis libropica ¿ima manllanayai animalcunamandata parlan?

³ Apocalipsis libropa callari versocunapica jipa punllacunapi ima pasanatami ricuchijun (Apoc. 1:1). Taita Diospa contracunataca manllanayai sacha animalcunahuan chimbapurashpami parlan. Por ejemplo “mar yacumanda shuj manllanai sacha animal llujshimujta”, ‘chai animalca 10 cachocunata y 7 umacunata charishcatami’ parlan (Apoc. 13:1). Chai manllanayai sacha animalpa catipash cutin shuj sacha animalpash llujshishcatami parlan. “Cai cati sacha animalca alpamandami llujshimurca”. Chai animalca “gentecuna ricujtami cielomandaca ninataca cai alpaman uriajuchirca” nijunmi (Apoc. 13:11-13). Shinallata shuj “puca puca manllanayai sacha animalpa jahuapi culquimanda huainayaj huarmi” tiajushcatapashmi parlan. Cai manllanayai quimsa sacha animalcunaca ashtaca tiempocunata Jehová Diospa contra shayarishca gentecunatami ricuchijun. Picuna Taita Diospa contracuna cashcata yachanaca importantemi can (Apoc. 17:1, 3).

4, 5. Apocalipsis libropi parlashca manllanai sacha animalcuna imata ricuchijujta ali intindichunga ¿imashinata Daniel 7:15-17​pi shimicunaca ayudan?

⁴ Taita Diospa contracuna picuna cajta yachangapaca cai manllanayai sacha animalcuna imata ricuchijujtami aliguta intindina capanchi. Chaipaca Bibliapi ima nijtami ricuna capanchi. Apocalipsis libropi parlashca manllanai sacha animalcunamandaca Daniel libropipashmi parlan. Por ejemplo profeta Danielpashmi mar yacumanda manllanai chuscu sacha animalcuna llujshimujta shuj muscuipishna ricurca (Dan. 7:1-3). Profeta Danielca muscuipishna ricushca “cai chuscu jatun animalcunaca” “chuscu jatun mandajcunatami ricuchijun” nircami (Daniel 7:15-17​ta liipangui). Shinaca Danielpa nishcacunahuanmi Apocalipsis libropi parlashca manllanai sacha animalcunapash gobiernocunatallata ricuchijushcata intindipanchi.

⁵ Apocalipsis libropi parlashca manllanai sacha animalcunamanda yachajupashunchi. Bibliapi ashtahuan textocunata liishpami cai manllanai sacha animalcuna imatapacha ricuchijujta intindishun. Primeroca cai manllanai sacha animalcuna picunata ricuchijushcatami ricugripanchi. Jipaca cai manllanai sacha animalcunata ima pasagrijujta, tucuripica chaicunamanda imata ñucanchi yachajui ushashcatami ricugripanchi.

 6. Apocalipsis 13:1-4​pi parlashca manllanai sacha animal 7 umacunahuanga ¿imatata ricuchijun?

⁶ Apocalipsis libropi parlashca 7 umacunahuan manllanai sacha animalca ¿imatata ricuchijun? (Apocalipsis 13:1-4​ta liipangui). Bibliapica cai animalca shuj leopardoshna cashpapash, paipa chaquicunaca shuj osopashna, paipa shimica shuj leonbashna, shinallata 10 cachocunatami charin nijunmi. Daniel libropa capítulo 7​pipashmi chuscu manllanai animalcunamanda parlan. Shinapash Apocalipsis libropica shujlla manllanai animaltami Danielpi parlashca chuscu animalcunashna cashcata ricuchin. Chaimandami cai manllanai sacha animalca na shujlla gobiernota ricuchijushcata ricupanchi. Apocalipsis 13​pica cai animalca “tucui jatun familiacunata, tucui pueblocunata, tucui idiomacunata parlaj gentecunata y tucui llactacunata mandana autoridadtami chasquirca” nijunmi. Shinaca paica shujlla llactapica na poderta charinllu. Ashtahuangarin ashtaca llactacunapi poderta charishcatami ricuchijun (Apoc. 13:7). Shinaca cai manllanai sacha animalca cunan punllacunacaman gentecunata mandashpa shamushca gobiernocunatami ricuchijun (Ecl. 8:9).b

 7. Cai manllanai sacha animalpa siete umacunaca ¿imatata ricuchijushca?

⁷ Shinaca siete umacunaca ¿imatata ricuchijun? Apocalipsis capítulo 17​pimi Apocalipsis 13​pi parlashca manllanai animalmanda ashtahuan imata nijta ricui ushapanchi. Apocalipsis 17:10​pica “7 reycunami tian, 5 reycunaca ñami urmashca. Shuj reyca cunan horasmi tian y chaishuj reyca nara chayamushcachu. Pero chayamushpaca asha tiempotallami quidanga” nijunmi. Satanasca tucui gobiernocunamandaca ashtahuanbachaca 7 gobiernocunatami Taita Diospa llactata llaquichingapaca ashtahuan utilizashca. Apóstol Juan Apocalipsis 13​pi shimicunata shuj muscuipishna ricujuj tiempopica Egipto gobierno, Asiria, Babilonia, Medopersia y Grecia gobiernocunaca ña mandashpa tucuchishca yalishcami carca. Chai tiempopica Roma llactamanda gobiernomi mandajurca. Shinaca ¿maijanshi último jatun mandaj llacta tucugrijurca?

 8. Cai manllanai sacha animalpa último umaca ¿maijan llactacunatata ricuchijun?

⁸ Daniel libropa profeciacunapimi cai manllanai animalpa último uma maijan gobiernota ricuchijujta ricuchun ayudan. Cai tucurimui punllacunapi o ‘Señorpa punllacunapica’ ¿maijan llactata ashtahuan shinlli jatun mandaj llacta cashca? (Apoc. 1:10). Cai tiempocunapica Reino Unido y Estados Unidos llactacunami ashtahuan shinlli jatun llactacuna cashca. Chaimandami Apocalipsis 13:1​manda 4​caman parlashca manllanai sacha animalpa último umaca cai llactacunata ricuchijushcata ricui ushapanchi.

 9. Shuj maltun llamashna ishcai cachucunata charij animalca ¿pitata ricuchijun?

⁹ Shinaca Reino Unido y Estados Unidos llactacuna imacunatalla rurajtami Apocalipsis capítulo 13​pica ricuchin. Cai llactacunataca shinallata shuj manllanai animalhuan comparashpami ricuchin. “Chai cati sacha animalca shuj maltun llamashnami ishcai cachucunata charirca. Shinapash dragonshnami parlai callarirca” nijunmi. “Cati sacha animalca manllanai cosascunatami rurarca. Hasta gentecuna ricujtami cielomandaca ninata cai alpaman uriajuchirca” nijunmi (Apoc. 13:11-15). Shinallata Apocalipsis capítulo 16 y capítulo 19​pipash cai animaltaca ‘llullashpa villaj profeta’ nijunmi (Apoc. 16:13; 19:20). Cai jatun llacta Reino Unido shinallata Estados Unidos llacta imacunatalla ruranajushcata parlashpami Daniel libropica ‘imapash manllanai jatun llaquicunatami ruranajunga’ nircami (Dan. 8:19, 23, 24). Y cai shimicunaca Segunda Guerra Mundialpimi pactarirca. Reino Unidomanda y Estados Unidosmanda cientificocunami Segunda Guerra Mundialpica ishcai bombas atómicas nishcata cacharishpami gentecunata ninanda llaquichirca. Shinami cai Reino Unido y Estados Unidos llactacunaca Bibliapi nishcashna ‘gentecuna ricujta cielomandaca ninata cai alpaman uriajuchirca’.

10. Puca puca sacha animalca ¿imatata ricuchijun? (Apocalipsis 13:14, 15; 17:3, 8, 11).

¹⁰ Cunanga cutin shuj animalmi ricurin. Y cai animalca Apocalipsis 13​pi parlashca siete umacunata charij manllanai sacha animalhuanga parecidomi can. Shinapash cai animalca puca puca fuerte colormi can. Apocalipsis libropica cai animaltaca callari manllanai ‘sacha animalpa estatuami’ can ninmi shinallata ‘octavo reymi’ can ninmi (Apocalipsis 13:14, 15; 17:3, 8, 11​ta liipangui).c Bibliapica cai reyca mandajushpapash cutin chingarishpami, cutin mandai callarirca ninmi. Apocalipsispi parlashca shimicunaca cai Organización de las Naciones Unidaspimi pactarirca. Cai Organizacionga callaripica Sociedad de Naciones nishcami carca. Shinapash cai Organizacionga Segunda Guerra Mundial callarijpimi ñana mandashpa cati usharca. Tiempohuanmi cai Sociedad de Naciones nishcaca Organización de las Naciones Unidas shutihuan cutin llujshi callarirca.

11. Cai sacha animal o cai gobiernocunaca ¿imatata ruragrin? ¿Imamandata ñucanchicunaca na manllana capanchi?

¹¹ Cai sacha animal o cai gobiernocunaca paicunapa yuyaicunata mediante propagandacuna gentecunaman cushpami Jehovapa contra tucuchun, Jehová Diosta sirvijcunapa contra tucuchun gentecunataca animanajushca. Shinami Bibliapi nishcashnaca ‘Tucui Poderta Charij Taita Diospa jatun punllapa’ o Armagedón punllapa “reycunataca macanajuchun” tandachinajun (Apoc. 16:13, 14, 16). Shinapash ñucanchicunaca na manllanachu capanchi. Jehová Diosca paipa Gobiernota apoyajcunataca tucuillatami salvanga (Ezeq. 38:21-23).

12. Bibliapi parlashca sacha animalcunahuanga ¿imata pasagrin?

¹² Cai Bibliapi parlashca tucui animalcunahuanga ¿imata pasagrin? Chaitaca Apocalipsis 19:20​pimi ricuchin. “Chai manllanai sacha animalca japi tucurcami. Paihuanga llullashpa villachij profetapashmi japi tucurca. Chai llullashpa villachij profetami, sacha animalpa señalta charijcunatapash y chai sacha animalpa estatuata adorajcunatapash, manllanai sacha animalpa ñaupapi manllanai cosascunata rurashpa umachirca. Manllanai sacha animalpash y llullashpa villachij profetapash causallatami, azufrehuan ninanda rupajuj nina lagunaman ishcandi shitai tucurca” nijunmi. Shinaca Jehová Diospa contra tucuj gobiernocunaca paicuna mandanajujpillatami Jehová Diosca paicunataca tucuchinga.

13. Jehová Diosta sirvijcunapaca ¿imata shinlli ricurishca?

¹³ Caimandaca ¿imatata yachajui ushapanchi? Ñucanchicunaca Jehová Diosta, paipa Reinotapash siempremi apoyana capanchi (Juan 18:36). Chaipaca cai mundopa política cosascunapica na chapurinachu capanchi. Shinapash gobiernocunata na apoyanaca shinllimi caita ushan. Porque gobiernocunaca tucui ñucanchipa usharishcapi, ñucanchipa ruraicunahuanbash paicunata apoyachunmi munan. Gobiernocunata apoyashpaca cai manllanai sacha animalpa señaltami chasquinchi (Apoc. 13:16, 17). Y cai manllanai sacha animalpa señalta chasquijcunaca Jehová Diospa ñaupapi ñana ali ricurishpami para siempre causana oportunidadtapash chingachinga (Apoc. 14:9, 10; 20:4). Shinaca gobiernocunapa política cosascunapi ama chapuringapaj ninanda jarcarinaca minishtirishcapachami can.

14. Apóstol Juanga ¿imata ricushpata manllarishca quedan? (Apocalipsis 17:3-5).

¹⁴ Apóstol Juanga shuj cosastapashmi ‘ninanda manllarishpa’ ricun. ¿Imatata ricun? Juanga shuj manllanai sacha animalpa jahuapi shuj huarmi tiajujta ricun (Apoc. 17:1, 2, 6). Cai huarmitaca “culquimanda huainayaj famosa huarmi” nishpami ricuchin. Y cai huarmipa shutica ‘Importante Babilonia Llacta’ shutimi can. “Chai huarmihuanmi cai alpapi reycunaca huainayana juchapi urmarca” ninmi (Apocalipsis 17:3-5​ta liipangui).

15, 16. a) Importante Babilonia Llactaca ¿imata can? b) Chai llacta ima cajtaca ¿imashinata yachapanchi?

¹⁵ Importante Babilonia Llactaca ¿imata can? Cai huarmica shuj gobiernotami ricuchijun nishpaca na nita ushapanchichu. Porque Apocalipsis libropica cai huarmica cai mundopi reycunahuan o gobiernocunahuan huainayashpa juchapi urmashpa causajtami ricuchin (Apoc. 18:9). Cai huarmi cai manllanai sacha animalpa jahuapi tiarishpaca, cai animalta controlangapaj munajushcatami ricuchin. Shinallata cai huarmi cai mundopi jatun negociocunata ricuchijushcatapash na ni ushanchichu. Cai mundopi jatun negociocunamanda parlashpaca ashtahuan jipamanmi Apocalipsis libropica ‘cai alpapi negociantecuna’ nishpa churashca (Apoc. 18:11, 15, 16).

¹⁶ Bibliapica tauca viajetami huainayana shimitaca, Taita Diosta sirvini nishpapash yanga dioscunata adorajpi o cai mundopi nali cosascunata alicachishpa o shuj nali cosascunata rurajcunamanda parlangapami cai shimitaca utilizan (1 Crón. 5:25; Sant. 4:4). Shinapash Jehová Diosta tucui shungu ali sirvij personata parlangapaca jari na tacarishca cuitsagu o virgen nishpami ricuchin (2 Cor. 11:2; Apoc. 14:4). Punda Babilonia Llactamanda parlashpaca cai llactapica ashtaca panda religiongunami tiarca. Chaimandami Apocalipsis libropi Babilonia llactamanda parlashpaca, panda religiongunata ricuchingapaj parlanajushcata ricui ushapanchi. Shinaca Babilonia llactaca cai mundopi tucui panda religiongunatami ricuchijun (Apoc. 17:5, 18; “¿Qué es Babilonia la Grande?” nishca informacionda jw.org paginapi ricupangui).

17. Importante Babilonia Llactataca ¿imata pasagrin?

¹⁷ Importante Babilonia Llactataca ¿imata pasagrin? Bibliapi Apocalipsis 17:16, 17​pica: “Quiquin ricushca 10 cachocunapash y sacha animalpashmi culquimanda huainayaj huarmitaca na ricunayachinga. Chai huarmitaca paipa tucuilla cosascunata quichushpami, lluchullata saquinga. Paipa aichatapashmi micunga. Ninahuanmi paitaca rupachitapacha rupachishpa saquinga. Paipa munaita pactachina pensamientota Taita Dios paicunaman cujpimi shina pasanga” nijunmi. Shinaca Jehová Diosca cai manllanai sacha animalta utilizashpami panda religiondaca tucuchitapacha tucuchigrin. Cai manllanai sacha animal nishpaca Organización de las Naciones Unidasmandami parlajun (Apoc. 18:21-24).

18. Babilonia Llactapa ruraicunapi o panda religiongunapa ruraicunapi ama chapuringapaca ¿imatata rurana capanchi?

¹⁸ Caimandaca ¿imatata yachajui ushapanchi? Ñucanchicunaca Taita Diosta “limpio, ima mapapash illa”, ali adorashpa catina cashcatami yachajupanchi (Sant. 1:27). Shinaca ñucanchicunaca panda religionba yachachishcacuna ñucanchicunata pandachichunga na saquinachu capanchi. Panda religiongunaca paicunapa munashcata causashpami Taita Dios na alicachishca fiestacunatapash ruran. Brujería cosascunatapash rurashpami causan. Chaimandami cai gentecunataca panda religionmanda ‘llujshinami canguichi’ nishpa animana capanchi. Panda religionmanda saquijpica Taita Diosca chai gentecuna Importante Babilonia Llactapa pecadocunapi na chapurijtami ricui ushanga (Apoc. 18:4).

19. Bibliapi parlashca “ninashna puca puca color shuj jatun” dragonga ¿pita can?

¹⁹ Apocalipsis libropica shuj “ninashna puca puca color shuj jatun” dragonmandapashmi parlan (Apoc. 12:3). Y cai dragón Jesushuan y paipa angelcunahuanbash ninanda macanajujtami villan (Apoc. 12:7-9). Shinallata cai dragonga Diospa llactata atacajta, shinallata cai manllanai sacha animalman o cai gobiernocunaman poderta cujtami ricuchin (Apoc. 12:17; 13:4). Shinaca cai dragonga ¿pita can? Bibliapica “chai dragonga pundamandapacha tiashca culebrami can. Paimi Diablo y Satanás can” nijunmi (Apoc. 12:9; 20:2). Satanasmi Taita Diospa contra tucushca y tucui gentecunatami controlajun.

20. Ninashna puca puca dragonhuanga ¿imata pasagrin?

²⁰ Cai dragondaca ¿imata pasagrin? Apocalipsis 20:1​manda 3​camanga chai dragondaca shuj ángel japishpa, huatashpa, ucu ucu utujuman shitashpa chaipi vichashpa saquinatami ricuchin. “Y gentecunata cutinga ama pandachichunmi” mil huatacunacaman vichashpa saquinga nijunmi. Y ultimopica Diablota y paipa demoniocunatapash “azufrehuan ninanda rupajuj nina lagunamanmi” shitanga nijunmi. Shinaca Diablotaca tucuchitapacha tucuchishpa saquinatami ricuchin (Apoc. 20:10). Shinaca caipi pensaripai cai mundopi Satanaspash, paipa demoniocunapash illajpica ¿imashinashi cai mundoca tucunga? Cai mundopi causaica alipachami tigranga.

21. Apocalipsis libropi escribishca shimicunata liinaca ¿imamandata ñucanchitaca ninanda cushichin?

²¹ Apocalipsis libropi parlashca profeciacunata ashtahuan intindishpaca ninandami animaripanchi. Cai yachajuipica picuna Jehová Diospa contracuna cajta, shinallata cai contracunahuan ima pasanatami ricupashcanchi. Apocalipsis libropica “cai shimicunata uyarijta liijcuna” cushijunami can nijunmi (Apoc. 1:3). Shinaca Jehová Diosta na saquishpa sirvishca gentecunaca Taita Diospa contracunata tucuchijpica ¿ima bendiciongunatata chasquigrin? Chaitaca cati temapimi ashtahuan yachajupashun.