Koai Tikai te Tutara ra i Teianei Ao?

E manganui te au tangata te ka pau i te uianga i runga ake nei ma tetai tuatua okotai—ko te Atua. Inara ma te puapinga, kare e ngai ta te Puka Tapu e karanga ra e ko Iesu Karaiti me kore ko tona Metua te au tutara tikai o teianei ao. I tetai tua, kua karanga a Iesu e: “Ka tiriaia te tutara o teianei ao ki vao.” E kua tuatua katoa aia: “Te aere maira te tutara o teianei ao. E kare ana mou anga iaku.”—Ioane 12:31, NW; 14:30, NW; 16:11.

No reira te patoi ra te tutara o teianei ao ia Iesu. Koai ra teia?

Te Pau Anga mei te Au Turanga o Teianei Ao

Noatu te au tauta anga o te au tangata tei akakoro meitaki, kua mamae kino tikai teianei ao i te au tuatua enua i aereia mai. Te akatupu ra teia i te au tangata kite ra kia umere, mei te etiti tata ra tei mate ko David Lawrence: “‘Te au i te enua nei’—e vaitata rai te inangaro ra te katoatoa i te reira. ‘Te anoano meitaki no te au tangata nei’—e vaitata rai te kite ra te au tangata katoatoa o teianei ao i te reira no tetai e tetai. Eaa i reira tei tarevake? Eaa ra te tamaki i riro ei ei kino noatu te au anoano tikai o te au tangata?”

Te akara anga e e patoi anga teia iaia uaorai kare ainei? I te mea e te anoano natura o te au tangata ko te noo ma te au, te matau ua ra ratou i te makitakita e te tamate i tetai e tetai—e ma te tu kino tikai. Ka tamanako ana i te maata rava o te au kino viivii ma te rikarika tikai. Kua taangaanga te au tangata i te au pia kati, te au puakapa tamamae anga, te au apinga titiri anga ai, te au pomu penitini, e tetai atu au tu kikino no te tamamae te tamate i tetai e tetai ma te tangi kore.

Te irinaki ra ainei koe e ka rauka i te au tangata, tei anoano ra i te au e te mataora, i te rave i teia au tu kino pakari ki rungao i tetai e tetai? Eaa te au ririnui tei akakeu i te au tangata ki teia au angaanga kino pakari me kore te apai ia ratou ki roto i te au turanga te ngai i manako ei ratou kia rave i teia au tu kino? I manako ana ainei koe e me kua akakeu etai mana kino ma te kitea koreia i te au tangata kia rave i teia au tu rave anga ta ua?

Akatakaia te Au Tutara o Teianei Ao

Kare e anoanoia kia tamanako uaia teia mea, no te mea te akaari papu maira te Puka Tapu e i akatere ana tetai peretana kite ma te kitea koreia i te au tangata e te pa enua. Te karanga ra e: “Te vai ra teianei ao katoa i raro ake i te mana akatereanga o tei kino ra.” Te akataka ra te Puka Tapu iaia, te karangaanga e: “Ko te Tiaporo ko Satani, te arataki ke ra i te katoa anga o te au tangata i te enua nei.”—1 Ioane 5:19, NW; Apokalupo 12:9, NW.

I tetai atianga i to Iesu ‘timata angaia e te diabolo ra,’ kare a Iesu i ekoko ana i ta Satani tuanga ei tutara no teianei ao. Te akamarama ra te Puka Tapu i tei tupu: “Kua arataki akaou atura te diabolo iaia ki runga i tetai maunga teitei rava, e kua akakite maira kiaia i te au basileia katoa o te ao nei, e to ratou kakā; Kua tuatua maira kiaia, E oronga atu au i teianei au mea katoa kia koe, kia akatopa mai koe ki raro e akamori mai iaku. Kua karanga aturā Iesu kiaia, E aere ke atu koe e Satani”!—Mataio 4:1, 8-10.

Ka akamanako ana i teia. Kua timata a Satani ia Iesu na te orongaanga kiaia “te au basileia katoa o te ao nei.” Inara, kua riro ainei ta Satani oronga anga ei timata anga tika tikai naringa e kare ko Satani te tutara tikai o teia au patireia? Kare, kare oki. Ka akara ana, kare a Iesu i ekoko ana e pouroa teia au kavamani o teianei ao e no Satani ia, koia oki naringa e kare o Satani mana ki rungao ia ratou kua pera rai aia. No reira, ko Satani te Tiaporo tikai te tutara kitea koreia o teianei ao! Ko te tika, te kapiki ra te Puka Tapu iaia e ko “te atua o teia akatereanga o te au mea nei.” (2 Korinetia 4:4, NW) Inara, akapeea teia peretana kino i tae mai ei ki teia turanga mana ra?

Ko tei riro mai ko Satani ra e angera aia i te taime mua tei angaia e te Atua, inara kua morimori aia i te taoonga o te Atua. Kua akaao aia i to te Atua tika anga no te tutara. E tae mai ki teia taime kua taangaanga aia i tetai ovi ei vaa tuatua no te akavare i te vaine mua ra, ko Eva, e i reira te akatopa anga iaia e tana tane, ko Adamu, kia rave i tana angaanga i te mea ka akarongo i te Atua. (Genese 3:1-6; 2 Korinetia 11:3) Kua tuatua katoa aia e ka rauka iaia ta Adamu e ta Eva uanga katoatoa tei kare i anauia ake i te akauri ke mai mei te Atua. No reira kua tuku te Atua i tetai tuatau no Satani kia tauta i te akaari i tana tuatua, inara kare a Satani i manuia ana.—Iobu 1:6-12; 2:1-10.

Ma te puapinga, kare a Satani e koia anake ua i roto i tana tutara anga i teianei ao. Kua manuia aia i te akakeuanga i etai o tetai atu au angera kia piri kiaia i roto i te patoi anga i te Atua. Kua riro mai teia ei au temoni, tona aronga vaerua tauturu i te rave kino. Te tuatua ra te Puka Tapu ia ratou i te raurauanga i te au Kerititiano e: “E aao i te paruru umauma katoa mei te Atua maira e raukaʼi ia kotou i te tu ketaketa atu i te patoi i te au ravenga pakari a te Tiaporo; no te mea e kukumianga ta tatou, kare ki te toto e te kiko ra, inara . . . ki te au tutara o teianei ao o teia poiri, ki te au vaerua ririnui kino i te au ngai o te rangi.”—Ephesia 6:11, 12, NW.

E Patoi i te Au Vaerua Kino

Te tauta ra teia au tutara kino kitea koreia i te arataki ke i te au tangata katoatoa, te akauri ke anga ia ratou mei te akamori anga i te Atua. Ko tetai ravenga ta te au vaerua kino e rave i teia na te akamaataanga i te manako o te ora anga atu i muri ake i te matenga, noatu e te akaari papu maira te Tuatua na te Atua e kare a tei mate ra apinga i kite. (Genese 2:17; 3:19; Ezekiela 18:4; Salamo 146:3, 4; Koheleta 9:5, 10) No reira, penei ko tetai vaerua kino, te aru ra i te reo o tei mate ra, te ka tuatua ki tona au kopu tangata e te au taeake te ora ra, penei na roto i tetai taunga vaerua me kore tetai “reo” mei te au ngai kitea koreia. Te akapikikaa ra te “reo” e koia tei mate ra, inara ko te temoni tikai ia!

No reira, me akarongo ua akera koe i teia tu “reo,” auraka e akavareia. E kopae ua atu i tana ka tuatua, e e tuatua i te au tuatua a Iesu: “Aere ke atu koe e Satani.” (Mataio 4:10; Iakobo 4:7) Auraka e tuku ua i te manako no te kite atu no runga i te ngai vaerua kia akakeu ia koe kia piri atu ki te au vaerua kino. Ko teia piri anga ka kapikiia ko te irinaki anga vaerua, e te akamatakite ra te Atua i tona aronga akamori no teia au tu ravarai. Te akaapa ra te Puka Tapu i tetai tei kitea “ei tauraatua . . . e te purepure, e te akarakara, e te kebere, e tei kimi i te vaerua kino, e te peu purepure, e tei ui ki tei mate ra.”—Deuteronomi 18:10-12; Galatia 5:19-21; Apokalupo 21:8.

I te mea e ka tuku te irinaki anga vaerua i tetai tangata ki raro ake i te mana o te au temoni, e patoi atu i te reira au rave anga katoatoa, noatu e mei teaa te reka, me kore mei teaa te mataora i te reira. Te kapiti maira teia au rave anga i te akaraanga i te poro punupunu, te rave anga i te au tapaanga Ouija, te ESP, te akara matatioanga i te au raina o te rima o tetai (rave anga rima), e te akarakara etu. Kua akatupu katoa te au temoni i te au maniania e tetai atu au rave anga i roto i te au are tei akariro ra ratou ei ngai no ratou.

Ei kapiti atu, te akamaata ra te au vaerua kino i te tu ara o te au tangata na te akamaataanga i te au puka, te au teata, e te au porokarama tivi tei rave ra i te tu akono kore e te tu ainga tau kore. Kua kite te au temoni e ko te au manako tarevake me kare e akaateaia mei te manako ka akatupu ia i te au tuatua te ka kore rava e ngaro e ka arataki atu i te au tangata kia rave ma te akono kore—mei te au temoni uaorai.—Genese 6:1, 2; 1 Tesalonia 4:3-8; Iuda 6.

E tika, e manganui te ka kata aviri i te manako e te tutaraia ra teianei e te au vaerua kino. Inara kare te tu irinaki kore i te mea poitirere, i te mea kua karanga te Puka Tapu e: “Ko Satani oki tei akatutu angela katoa iaia uaorai no te mārama.” (2 Korinetia 11:14) Ko tana akavare anga kikite rava atu ko te akamatapoanga i te manganui ki te tika e te ora tikai ra aia e tana au temoni. Inara auraka e akavareia! E mea tika tikai te Tiaporo e tana au temoni, e te anoanoia ra koe kia tamou ua rai i te patoi ia ratou.—1 Petero 5:8, 9.

Ma te mataora, te vaitata maira te tuatau i teianei e kare a Satani e tona au tauturu e vai akaou! “Te ngaro ke nei teianei ao [kapiti katoa tona au tutara temoni],” te akapapu maira te Puka Tapu, “ko tei akono ra i to te Atua ra anoano, e tika ïa i te ora anga e tuatau ua atu.” (1 Ioane 2:17) Mei teaa atura i te reka me akaateaia atu te reira mana kino ra! No reira, kia riro i reira e ko tatou tetai i rotopu i te aronga te rave ra i te anoano o te Atua e te rekareka i te oraanga e tuatau ua atu i roto i te ao ou tika a te Atua.—Salamo 37:9-11, 29; 2 Petero 3:13; Apokalupo 21:3, 4.

Me kare i akakiteia atu te reira, te au taiku anga Tuatua Tapu i roto i teia aenga pepa no roto mai i te Puka Tapu i te reo Kuki Airani, urianga 1888. Te ngai i akaariia te NW i muri i tetai taiku anga, te akakite maira e no roto mai te urianga i te reo Engarani o te New World Translation of the Holy Scriptures, Tataanga Ou o te 1984.

[Tutu i te kapi 4]

Ka oronga ainei a Satani i teia au kavamani katoatoa kia Iesu naringa e kare e nana te reira?