E Akarongo Meitaki ki te Au Apii a Iehova

1-2. (a) Eaa ta Iehova e rave ra no tona iti tangata i teia tuatau? (Salamo 23:​1, 2, 5) (e) Eaa ta tatou ka akamanako i roto i teia atikara?

I TEIA tuatau, e maata te au kai pae vaerua ta Iehova e oronga mai nei kia tatou. No reira ka āriki tatou i ta Davida i imene: “Ko Iehova toku tiaki; kare rava au e ngere.”—E tatau ia Salamo 23:​1, 2, 5.

² I teia tuatau, e oronga mai ana a Iehova i te kai pae vaerua na roto i te au uipaanga. Ka akarongo tatou i te au apii, kua kite takere tatou i mua ana. Inara, ka anoanoia tatou kia akarongo ua rai ki te au apiianga mei te Pipiria, noatu kua tavini tatou ei Au Kite no Iehova no tetai tuatau roa e kua kite meitaki tatou i te Pipiria. (2 Pete. 1:12) Me akarongo tatou i tetai apinga i ko i te uipaanga tei tuatua putuputuia, ka ngatā ainei ia koe i te akarongo? Ka uriuri teia atikara eaa te ka tauturu ia tatou kia akarongo meitaki i ko i te au uipaanga. Ka apii tatou akapeea te au taeake me oronga i ta ratou ako na roto i tetai tu ei akakeu i tetai ke kia akarongo. E ka uriuri katoa tatou i tetai au ravenga ei tauturu ia tatou kia akarongo meitaki. Inara te mea mua, ka uriuri tatou e koai te tuatua maira kia tatou.

E AKAMAARA TE TUATUA MAIRA IEHOVA KIA TATOU

3. Akapeea a Iehova me tuatua kia tatou e akapeea tona au tavini me taangaanga meitaki i tana Tuatua?

³ Te tuatua maira a Iehova kia tatou na roto i tana Tuatua te Puka Tapu. (2 Timo. 3:​16, 17) Kua kite a Iesu i teia. Kua taangaanga meitaki aia i te Tuatua a te Atua e kua akakeuia te aronga e akarongo ra kiaia, kia ui: “Noea ra te kite o teianei tangata, kare oki aia i apiiia?” (Ioa. 7:15) Ko te aronga akaaka tei inangaro i te apii no runga ia Iehova, kua mataora tikai ratou te akarongo i ta Iesu akamārama anga. Ko te au Kerititiano i te anere mataiti mua, mei te apotetoro ko Paulo e Apolo, kua aru raua i te akaraanga o Iesu. (Anga. 17:​2, 3; 18:​24, 28) Kua kite tatou e kua akatumuia te au apii i roto i te au atikara, te au broadcast, te au papaanga ako e te au vitio, mei roto i te Pipiria. E umere ana te tangata me aere mai ratou ki te au uipaanga, no te mea e taangaanga ana tatou i te Pipiria. Ka apii te aronga e tuanga ta ratou mei roto i te Pipiria, kare ratou e tatau ua i te au irava, mari ra ka akamārama ratou akapeea me taangaanga i te reira.—Luka 24:32.

4. Eaa i puapinga ai kia akarongo meitaki i ko te au uipaanga?

⁴ Me rongo te tangata i te tuatua “akarongo” i roto i to ratou reo, kua mārama ratou te aiteanga koia oki kia “kauraro.” No reira, me tatau tatou i te Pipiria i ko i te au uipaanga, te apii maira a Iehova ia tatou kia mārama i tona anoano e ka māmā i reira ia tatou i te kauraro kiaia. Irinaki tatou e ka mareka a Iehova me akarongo tatou kiaia e me taangaanga tatou i tana apii.—Mase. 27:11.

EAA TATOU KA AKARONGO MEITAKI EI I KO I TE AU UIPAANGA?

5. Eaa ta tatou ka rave no to tatou inangaro ia Iehova? (Ioane 4:​23, 24; 1 Ioane 5:3)

⁵ Ka akarongo tatou i ko i te au uipaanga no to tatou inangaro ia Iehova. (Mata. 22:37) Te maata atu i ta tatou ka apii no runga ia Iehova, te maata atu ïa to tatou inangaro iaia. Ka inangaro tatou i te akarongo meitaki ki tana e akakite maira, kia kauraro kiaia e kia akamori iaia mei tei akanooia i roto i te Puka Tapu.—E tatau ia Ioane 4:​23, 24; 1 Ioane 5:3.

6. I ko i te au uipaanga, eaa ta tatou ka apii mai me tauturu tatou i tetai ke?

⁶ Ka akarongo tatou i ko i te au uipaanga no to tatou inangaro i te tangata. (Mata. 22:39) I ko i te au uipaanga, te apii maira a Iehova ia tatou akapeea me tauturu i to tatou au taeake e te au tuaine e pera te aronga kare i kite ake iaia. Ei akaraanga, kua tauturu te poroutia Akaperepere i te Tangata—E Akariro Ei Pipi ia tatou kia akaari i te aroa ki te tangata i roto i ta tatou angaanga orometua. E ngatā ainei ia koe i te komakoma ki tetai tangata? Me ko tera te tu, e akarongo meitaki ki te au taeake e te au tuaine me oronga i ta ratou tuanga no te “Rave Maroiroi i te Angaanga Orometua” i te au uipaanga epetoma.

7. Eaa i puapinga ai kia akarongo ua rai tatou kia Iehova?

⁷ Ka akarongo tatou i ko i te au uipaanga no to tatou inangaro i te oraanga mataora e kia ora e tuatau ua atu. Mei ta Iehova i akakite ki tona au tavini i taito, me inangaro tatou i te oraanga mataora e kia ora e tuatau ua atu ka anoanoia tatou kia akarongo kiaia (Deu. 32:​44-47) Me akarongo meitaki tatou i ko i te au uipaanga, ka akamaroiroiia tatou kia akakoromaki i te au manamanata e kia tiaki marie no te ao ou. (Roma 8:25) E mea puapinga tikai kia akarongo tatou kia Iehova i teianei e kia tavini maroiroi iaia i roto i teia tuatau openga.—Mata. 24:​42-44; Apo. 1:3.

TAUTURU I TETAI KE KIA AKARONGO I KO I TE AU UIPAANGA

8. Eaa i anoanoia ai te au taeake e oronga ra i te ako i mua i te paata, kia akameitaki atu i to ratou tu karape i te tuatua?

⁸ Ka anoanoia te au taeake e apii ra i mua i te paata kia akameitaki atu i to ratou tu karape no te tuatua. Me akapapa meitaki te taeake i tana ako e kia akapapu e no roto te reira i te Pipiria, ka rauka iaia i te tauturu i te aronga kare i te Kite, kia kite eaa ta te Pipiria e apii ra. Ka tauturu katoa aia i te Au Kite kia mārama meitaki i te au tuatua mou Pipiria e kia taangaanga i te reira i roto i to ratou oraanga. Me e tuanga taau i te uipaanga e akamaara ka riro taau ako ei tauturu maata atu i tetai ke. No reira e akamanako akapeea teia au ravenga me tauturu ia koe kia karape atu ei puapii tukatau. Ka tauturu teia i te aronga e oronga ra i te au ako e te au taeake e tuanga ta ratou i te uipaanga.—2 Timo. 4:2; Tito 1:9.

9. Eaa taau ka rave kia mārama te katoatoa i taau e tuatua ra?

⁹ E akapapa kia taka meitaki taau ka tuatua. Me oronga koe i tetai ako, ka inangaro koe kia mārama te katoatoa i taau e tuatua ra, e akapeea koe me neke mei tetai manako ki tetai manako ou i roto i taau ako. Me kare e māramaia te manako o taau ako, ka ngatā i te katoatoa i roto i te uipaanga i te akarongo. No reira, eaa taau ka rave? (1) I te akamata anga o taau ako, e akataka meitaki eaa te au manako puapinga. (2) E akamārama e tai ua manako i te taime okotai, e tāpu poto i mua ake ka neke ei ki tetai manako ou. (3) E taoki akaou i te au manako puapinga i te openga o taau ako.

10. Eaa i puapinga ai kia akaari koe i te inangaro no te au manako puapinga i roto i taau ako?

¹⁰ Kia maoraora me oronga i tetai ako. Me reka koe i tetai tumu manako, ka inangaro koe i te akakite aere i te reira ma te tu maoraora e ka kite te aronga e akarongo maira i toou inangaro. (Mase. 2:​4, 5; Anga. 4:20) Ei tauturu ia koe kia reka i te au manako i roto i taau ako, e akamanako oonu i te au apii e te au irava. Kua akakite mai tetai taeake pakarikari i Marike i tetai ako tei orongaia i tona mapu anga: “Te maara nei rai iaku i te akamaroiroianga kia akamanako oonu me tatau i te Tuatua a te Atua. Kua akataka te taeake akapeea me rave i te reira e kua kite au e mea puapinga tikai teia kiaia. Kua taui teia ako i toku oraanga, e kua tauturu iaku kia apii maata atu i te Pipiria e kia piri vaitata kia Iehova.”

11. Eaa i puapinga ai kia oronga i te au manako akamaroiroi i roto i te au ako? (1 Timoteo 4:​13-16)

¹¹ Akamanako i te tangata e oronga i te tauturu. E taangaanga i te au Irava tau kia oronga i te akapumaana e te manako akamaroiroi. Ei akaraanga, kua akakite a Paulo kia Timoteo i tana ka rave kia piri vaitata kia Iehova iaia e tavini ra i Ephesia. (E tatau ia 1 Timoteo 4:​13-16.) E akamanako i te au anoano o te aronga e akarongo maira, e tauturu ia ratou kia kite akapeea me taangaanga i te au manako akamaroiroi i roto i to ratou oraanga.

12. Eaa i meitaki ei kia tuatua na roto i te tu akangateitei me oronga i tetai akoanga?

¹² E apiipii i te tuatua na roto i te reo maata e te tu akangateitei. Kare koe e anoanoia i te tata pouroa i taau ako e te tatau i te reira, mari ra e tuatua na roto i te tu ka mārama te katoatoa. Na roto i teia, ka māmā ua ia ratou i te akarongo e kia mārama i taau ako. Akakite ra te poroutia Akamaata Atu i to Tatou Karape i te Tatau e te Apii: “E tuatua na roto i te tu ka viviki te tangata i te mārama e te kite i toou manako no runga i taau karere.” Me oronga koe i taau ako mei roto i toou ngakau ma te tu oraora, ka inangaro rai te katoatoa i te akarongo e ka taangaanga ratou i te reira i roto i to ratou oraanga.

13. Me akapapa koe i taau ako, eaa koe ka pati ei i te tauturu a tetai taeake tukatau? (Akara katoa i te tutu.)

¹³ E pati i te tauturu a tetai taeake tukatau. Ei akaraanga, i mua ake i taau ako e akaari i te reira ki te taeake e e tauta kia kapiti i tona au manako kia akameitaki atu i taau ako. Pera katoa, e pati kia akarongo mai aia i te reira kia rauka iaia i te tauturu. (Mase. 1:5) Kare tatou e viviki i te kite i te au ngai kare e mārama meitakiia ana. Inara, ka tauturu te taeake ia koe kia akatanotano i te au manako i roto i taau ako, kia mārama e kia taangaanga te aronga e akarongo maira i te reira. Ka inangaro tatou kia karape atu i te tuatua e te apii i te Pipiria ei tauturu i tetai ke kia puapingaia mei te au tuatua mou i roto i te Pipiria.a

AKAPEEA ME AKARONGO MEITAKI I KO I TE AU UIPAANGA

14. Eaa tatou ka aru ei i te tu o te tata Salamo 119? (Salamo 119:​24, 111, 167)

¹⁴ Ka akarongo meitaki tatou i ko i te au uipaanga, me akamaara tatou e puapinga tikai ta Iehova au tuatua. Ka anoano tatou i te Tuatua a te Atua ei tauturu ia tatou kia akakoromaki i te au manamanata i roto i teia tuatau ngatā e te kino. (2 Timo. 3:1) No reira noatu ka rongo putuputu tatou i tetai au apiianga, e akamanako oonu i te tu o te tata Salamo 119 tei akaperepere i te Tuatua a te Atua.—E tatau ia Salamo 119:​24, 111, 167.

15. Eaa te ka tauturu ia tatou kia kite i te puapinga o te au apiianga i ko i te au uipaanga?

¹⁵ Ka anoanoia tatou kia āriki ua rai i te au kai pae vaerua, eiaa kia aite ki to Iseraela tei kore i mareka i te māna ta Iehova i oronga kia ratou i te metepara. (Exo. 16:​15, 31) I te akamata anga kua mataora ratou i te kai i te māna, e kai reka teia, e e puapinga te reira no to ratou ora. Inara i muri mai kua iu tetai pae i te kai i taua kai rai. (Nume. 21:5) I teia rā, e rongo putuputu ana tatou i tetai au apiianga i te uipaanga. No reira, auraka tatou e manako e mea puapinga kore te reira. Mari ra, kia kite tatou e no ko mai te reira ia Iehova. Kia akamaara katoa tatou e kua akapapa meitakiia te kai pae vaerua e te akaaerenga a Iehova. No reira ka tauturu teia au apiianga ia tatou kia rave i te au ikianga meitaki e kia ora e tuatau ua atu.—Mase. 3:​13, 16-18; Ioa. 17:3.

16. Eaa tei tauturu i te au taeake e te au tuaine tei tavini ana ia Iehova no tetai tuatau kia akarongo meitaki i ko i te au uipaanga? (Akara katoa i te pia “Au Tauturu Kia Akarongo Meitaki.”)

¹⁶ Me akarongo meitaki tatou i ko i te au uipaanga ka taangaanga tatou i teia au tauturu. Eaa tei tauturu i te au taeake e te au tuaine tei tavini ana ia Iehova no tetai tuatau kia akarongo meitaki i ko i te au uipaanga? Karanga a Ashley, tei tavini ana ia Iehova no tetai 30 tuma mataiti: “Kua riro taku i akapapa no te uipaanga, ei tauturu iaku kia akarongo meitaki. Me kare au e akapapa, ka ngatā iaku i te paupau e kare e mou toku manako ki runga i te apii.” Akakite a József, tei tavini ana ia Iehova no tetai 52 mataiti: “E reka ana au i te akarongo ki tetai ako i te au taime ravarai. Me rongo au i tetai ako e me oronga mai te au taeake i to ratou au manako, ka kite au i tetai apii ou. Inara, me kare tetai taeake e tukatau ana i te oronga i tana ako, ka akamou ua au ki runga i te karere e kare ko te tu e tuatua ra aia.”

17. Eaa taau ka rave kia akarongo meitaki i ko i te au uipaanga? (Akara katoa i te tutu.)

¹⁷ Teia tetai au ravenga ke atu ei tauturu ia koe kia akarongo meitaki i ko i te au uipaanga (1) Auraka e kaikai maata i mua ake i te uipaanga, kia kore koe e varea e te moe. (2) E aere vave ki te uipaanga kia rauka tetai ngai nooanga noou. (3) E akapapu e kua tamarūia taau phone, kia kore e tamanata atu i tetai ke. (4) E akamanako i te au apiianga ta te taeake ka oronga i roto i tana ako. (5) E tauta i te akara atu i te taeake e oronga ra i te ako e kare ki te au mea e tupu ra. (6) E tata me kore e torōa i tetai tutu kia maara ia koe te au manako puapinga. (7) E akarongo meitaki ki te au irava e tatauia ra e akapeea te reira te turu anga i te manako o te apii. (8) E ui kia koe, ‘Akapeea au me taangaanga i teia au irava ei tauturu i tetai ke i roto i te putuputuanga e te angaanga orometua?’ (9) I mua ake ka raveia ai tetai akaputuputuanga e tetai uruoaanga, e akanoo i tetai tuatau kia akamanako i te tumu irava e te au ako. (10) Pera katoa, i mua ake ka akamata ai te reira, e noo marie ki raro, akarongo ki te au akatangianga imene e te au vitio.

E AKARONGO UA RAI KI TA IEHOVA APII

18. Eaa tatou ka akarongo ua rai i ko i te au uipaanga?

¹⁸ Kia akarongo ua rai tatou i ko i te au uipaanga, no te mea te apii maira a Iehova akapeea tatou me akamareka iaia. (Sala. 23:3; 31:3) Ka anoano tatou ia Iehova kia arataki ia tatou, kia rauka ia tatou i te rave ua rai i te au mea tau. No reira, e akarongo meitaki i ko i te au uipaanga e e taangaanga i te au apiianga. (Luka 8:18) Ka mataora te aronga e akarongo ra kia Iehova i teianei e ka rauka ia ratou te ora mutu kore a te tuatau ki mua.—Sala. 119:​2, 14.