Ka Papetito Ainei Au?—Tuanga 2: Teateamamao Anga no te Papetito

Me te aru ra koe i te au turanga o te Pipiria e te aruaru ra i tetai pirianga oa ki te Atua, e mea meitaki kia papetito koe. Akapeea koe e kite ei kua papa koe no te reira?a

I roto i teia atikara

• Eaa taku ka anoanoia kia kite?

• Eaa taku ka rave?

• Ta toou au oa i karanga

Eaa taku ka anoanoia kia kite?

Na te teateamamao anga no te papetito kare koe e anoanoia kia tamou ngakau i te au tika, mei tetai tarere i te apii. Inara, ka anoanoia koe kia taangaanga i toou manako “e tau ïa” ei akamatutu i toou irinaki e e tuatua mou ta te Pipiria e apii maira. (Roma 12:1) Ei akaraanga:

• Te irinaki ra ainei koe e te vaira te Atua e kua tau kia akamori koe iaia?

  Karanga te Pipiria: “Kia akarongo aia e, e Atua e tikaʼi, e koia tei tutaki mai i te aronga i kimi tikai iaia.”—Ebera 11:6.

  Ui kia koe: ‘Eaa au ka irinaki ei i te Atua?’ (Ebera 3:4) ‘Eaa au ka akamori ei iaia?’—Apokalupo 4:11.

  Anoanoia te tauturu? Akara i te “Creation or Evolution?—Part 1: Why Believe in God?”

• Irinaki ainei koe no ko mai te karere Pipiria i te Atua?

  Karanga te Pipiria: “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra.”—2 Timoteo 3:16.

  Ui kia koe: ‘Eaa au i irinaki ei e kare te Pipiria i te puka ma te au manako tangata?’—Isaia 46:10; 1 Tesalonia 2:13.

  Anoanoia te tauturu? Akara “Akapeea te Pipiria me Tauturu Iaku?—Tuanga 1: Akarakara ki Roto i Taau Pipiria.”

• Irinaki ainei koe te taangaanga ra a Iehova i te putuputuanga Kerititiano ei akatupu i tona anoano?

  Karanga te Pipiria: “Ei [te Atua] te kakā i te ekalesia ia Iesu Mesia, e ope ua atu te au uki ravarai, e tuatatau ua atu.”—Ephesia 3:21.

  Ui kia koe: ‘E manako ana ainei au i taku e apii maira mei te Pipiria e na te tangata te reira me na Iehova?’ (Mataio 24:45) ‘E aere ana ainei au ki te au uipaanga noatu kare toku nga metua e aere (me ka akatika raua ia koe kia aere)?’—Ebera 10:24, 25.

  Anoanoia te tauturu? Akara “Eaa Koe ka Aere ei ki te au Uipaanga i ko i te Are Uipaanga Patireia?”

Eaa taku ka rave?

Kare koe e anoanoia kia kite i te au mea ravarai kia papetitoia. Inara, ka akaari koe e te inangaro tikai ra koe i te “kopae i te kino, e rave i te meitaki.” (Salamo 34:14) Ei akaraanga:

• Te aru ra ainei koe i ta Iehova au turanga?

  Karanga te Pipiria: “Ei akava-ngakau meitaki [toou].”—1 Petero 3:16.

  Ui kia koe: ‘Akapeea au te akaari anga “te mātau i kite ei [toku] ngakau i te meitaki e te kino”?’ (Ebera 5:14) ‘E atianga ainei tetai i toku patoi anga i te taomi anga tau kore a te au oa? E akamaroiroi ana ainei toku au oa kia rave au i te meitaki?’—Maseli 13:20.

  Anoanoia te tauturu? Akara “Akapeea Au me Tereni i Toku Akava Ngakau?”

• Te āriki ra ainei koe i te apainga no taau e rave ra?

  Karanga te Pipiria: “Ka ope takiri rava tatou i te aaki i te tuatua iaia uaorai i te Atua ra.”—Roma 14:12.

  Ui kia koe: ‘Te akakite ra ainei au i te tika kiaku uaorai e ki tetai ke? (Ebera 13:18) ‘Te akakite ra ainei au i toku tarevake, me te uuna ra au i te reira e te akaapa atura i tetai?’—Maseli 28:13.

  Anoanoia te tauturu? Akara “Akapeea Au me Akatikatika i Toku Tarevake?”

• Te akono ra ainei koe i tetai pirianga oa kia Iehova?

  Karanga te Pipiria: “E akavaitata atu ki te Atua, e nana e akavaitata mai kia kotou na.”—Iakobo 4:8.

  Ui kia koe: ‘Akapeea au te akavaitata anga kia Iehova?’ Ei akaraanga, ‘Eaa te maata taku tatau Pipiria?’ (Salamo 1:1, 2) ‘E putuputu ana ainei taku pure?’ (1 Tesalonia 5:17) ‘Taka meitaki ainei taku pure? E oa ainei toku au oa no Iehova?’—Salamo 15:1, 4.

  Anoanoia te tauturu? Akara “Akapeea te Pipiria me Tauturu Iaku?—Tuanga 2: Ka Mataora Taau Tatau Pipiria” e te “Eaa ra Au ka Pure Ei?”

TAUTURU: Ei tauturu ia koe kia teateamamao no te papetito, tatau i te pene 37 o te puka Ui te au Mapu E—Au Pauanga ka Puapinga, Voriumu 2. Akara katoa i te pia pepa apii.