UI TE AU MAPU E
Eaa ra Au ka Pure Ei?
I roto i tetai kimikimianga, e 80 patene o te au mapu i Marike e pure ana, inara e apa ua tei pure i te au ra ravarai. Penei ka manako tetai pae ia ratou e: ‘E ravenga ainei te pure kia maru te ngakau, me e mea maata atu?’
Eaa te pure?
Ko te pure, e ravenga no te karangaranga ki Tei Anga i te au mea ravarai. Akamanako ana i te aiteanga o te reira. Noatu e teitei ake a Iehova i te tangata “kare ra aia i atea ke atu ia tatou katoa nei.” (Angaanga 17:27) Te tika, tei roto i te Pipiria teia patianga pumaana: “E akavaitata atu ki te Atua, e nana e akavaitata mai kia kotou na.”—Iakobo 4:8.
Akapeea koe me akavaitata atu ki te Atua?
Tetai mataara ko te pure—koia oki me tuatua koe ki te Atua.
E tetai na roto i te apii Pipiria—koia oki me “tuatua” te Atua kia koe.
Ka riro teia ravenga karangaranga—na roto i te pure e te apii i te Pipiria—ei akatupu i tetai pirianga oa ketaketa ki te Atua.
“Te tuatua kia Iehova—e te karangaranga ki Tei Teitei Rava—e apainga ngateitei roa atu tei orongaia ki te tangata.”—Jeremy.
“Te akakite anga i toku au manako oonu kia Iehova na roto i te pure, ka piri vaitata atu au kiaia.”—Miranda.
Ka akarongo ainei te Atua?
Noatu e te irinaki ra koe i te Atua—e ka pure koe kiaia—penei e mea ngata noou kia āriki e, te akarongo tikai ra aia kia koe. Inara te kapiki ra te Pipiria ia Iehova ko “tei akarongo i te pure ra.” (Salamo 65:2) Te pati katoa ra te reira “e uri i to kotou tumatetenga katoa ki runga iaia.” No teaa ra? “Koia oki te tiaki mai ia kotou.”—1 Petero 5:7.
Akamanako ana: E akapou ana koe i te tuatau kia tuatua putuputu ki toou au oa piri vaitata? Kia pera katoa koe ki te Atua. E pure putuputu kiaia ma te taangaanga i tona ingoa, ko Iehova. (Salamo 86:5-7; 88:9) Ae, te pati maira te Pipiria ia koe “auraka e tukutuku i te pure.”—1 Tesalonia 5:17.
“Na roto i te pure e pukapuka ana maua ko toku Metua i te rangi, e ka riringi au i toku ngakau katoa kiaia.”—Moises.
“Ka akakite au i te au mea ravarai kia Iehova, mei te mea e te tuatua ra au ki toku mami me kore tetai oa piri vaitata.”—Karen.
Eaa taku ka pure?
Akakite te Pipiria: “E akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.”—Philipi 4:6.
Ko te aiteanga ainei e mea MEITAKI kia pure no runga i toou au manamanata? Ae! Te akakite ra te Pipiria: “E tuku koe i taau apainga kia Iehova ra, e nana koe e tauturu mai.”—Salamo 55:22.
E akamaara me pure koe ki te Atua, eiaa e akakite ua i toou au manamanata. “Kare i te pirianga oa meitaki me pati tauturu ua au kia Iehova,” i karanga ai tetai vaine mapu ko Chantelle. “Irinaki au e kia na mua koe i te akameitaki, pera katoa kia maata te tumu ka akameitaki koe iaia.”
Akamanako ana: Eaa te au mea meitaki i roto i toou oraanga taau e mareka ra? Ka rauka ia koe i te akamanako e toru apinga ka akameitaki koe ia Iehova no teia ra?
“Noatu e mea iti ua, mei tetai tiare manea, ka akakeu te reira ia tatou kia pure akameitaki ia Iehova.”—Anita.
“E akamanako meitaki i tetai mea tei angaia taau e mareka ana me kore tetai irava i roto i te Pipiria tei akakeu tikai i toou ngakau, e oti e akameitaki ia Iehova no te reira.”—Brian.