“Te Kō Nei Au i Toku Vaarua”

“Me ka inangaro koe i te kite no runga i te Atua, e piri atu koe ki te Au Kite o Iehova.” Umere au i te akarongo anga i tera tuatua. I tera taime, kua apii ana au ki te Au Kite o Iehova no tetai manga tuatau. Inara, e mārama ai koe eaa taku i rave, ka akamārama atu au i toku oraanga.

Kua anauia au i roto i te oire Quezaltepeque, i El Salvador. Ko au te 6 o te au tamariki e 15. Kua utuutu mai toku nga metua iaku kia akakite i te tika e kia akarongo i te ture. Pera katoa, kua aere ua mai te taeake ko Leonardo tona ingoa, e tetai o te Au Kite o Iehova i te apii i te Pipiria kia matou. Kare ra au i aru ana i tera mataara, kua rave rai au i te mea kino. Toku 14 mataiti, kua akamata au i te piri atu ki toku au oa apii i te inu kava e te kai i te au apinga akakona. Kua akaruke takitai ratou i te apii, e kua piri atu ki tetai pupu akatupu pekapeka, e kua aru katoa au. E peu matau na matou i te aere na runga i te mataara, i te patipati moni e te keikeia, ei tutaki i ta matou au angaanga viivii.

Kua riro mai te pupu akatupu pekapeka ei au oa piri noku. Irinaki au e kia tiratiratu au ki teia pupu. Ei akaraanga, i tetai rā kua tatā tetai tangata kona kava i roto i te pupu, raua ko toku tangata tupu. No te maroiroi i toku tangata tupu, kua mou iaia toku oa e kua ringi i te akava. No toku ākā riri iaia, kua vavai au i te māramarama motoka o toku tangata tupu, ki tetai rakau mamaata kua inangaro au e kia tuku mai aia i toku oa. Kua pati mai toku tangata tupu kia akamutu au, kare ra au i akarongo ana.

I toku 18 mataiti, kua tupu tetai tāʼanga i rotopu i toku pupu akatupu pekapeka e te au akava. Te peʼi anga au i tetai pōmu taku i maani, kua aruru te reira i roto i toku rima​—kare ra au i kite akapeea ra. Taku ua i mārama, kua veruveru toku rima, e oti kua topa au ki raro. Te āra mai anga au i roto i te are maki, kua motu toku rima katau, kua turi toku taringa katau, e kua matapo toku mata katau.

Noatu toku kopapa kinokino, kua oki tika atu au ki teia pupu i muri poto ake toku oki anga ki te kainga mei te are maki. Muri poto mai, kua mou au i te akava, e kua peʼiia au ki roto i te are auri. I roto i te are auri, kua ketaketa atu toku pirianga ki teia pupu akatupu pekapeka. Kua angaanga kapiti matou​—mei te taime e kai maruana matou i te popongi, ki te taime moe i te po.

Iaku i roto i te are auri, kua atoro mai a Leonardo iaku. Te pukapuka anga maua, kua toʼu mai aia ki tetai tattoo i raro i toku pakuivi katau. Ui mai aia e, “kua kite rai koe eaa te aiteanga o tera tattoo?” Pau atu au e, “e tano ei, ko te ainga viivii, apinga akakona, e te rock and roll.” Kua tuatua mai a Leonardo: “Te aiteanga kiaku, e are maki, are auri, e te mate. Kua na roto ana koe i te are maki, teianei tei roto koe i te are auri. Kite koe eaa te ka aru mai.”

Poitirere tikai au no tana i tuatua mai. E tika rai tana. Mei te mea rai e te kō nei au i toku vaarua. Kua pati mai aia me ka inangaro au i te apii i te Pipiria kiaia, e kua āriki au. Na roto i taku au apii, kua akakeuia au kia taui i toku oraanga. Ei akaraanga, te akakite maira te Pipiria e “e kino te tuatua meitaki i te kapiti anga kikino ra.” (1 Korinetia 15:33) Mei reira mai, kua inangaro au i te au oa ou. Ko te tumu teia kare au i aere akaou ki te au uipaanga na te pupu akatupu pekapeka, mari ra kua aere au ki te au uipaanga a te Au Kite o Iehova tei raveia i roto i te are auri. I ko i teia uipaanga na te Au Kite, kua aravei au i tetai tangata ko Andrés tona ingoa, kua papetitoia aia ei Kite no Iehova i roto i te are auri. Kua pati mai aia kiaku kia kaikai kapiti maua i te popongi. Mei reira mai, kare au i kai akaou i te maruana. Mari ra, kua uriuri maua ko Andrés i te Pipiria i te au popongi ravarai.

Kite mai te aronga i roto i teia pupu akatupu pekapeka i taku au tauianga. Tei tupu, kua inangaro tetai ia ratou e pu aia, i te tuatua mai kiaku. Kua mataku tikai au. Kare au i kite eaa tana ka rave me kite aia i toku akakoroanga, no te mea e ngatā tikai i te akaruke i tetai ua atu pupu akatupu pekapeka. Tuatua mai aia e: “Kua kite matou e kare koe e oki akaou mai ana ki ta tatou au uipaanga, e te aere nei koe ki te au uipaanga a te Au Kite o Iehova. Eaa taau ka inangaro?” Akakite au kiaia e te inangaro nei au i te apii ua atu i te Pipiria e te taui i toku oraanga. Poitirere tikai au i tana pauanga, karanga mai aia e ka āriki te pupu akatupu pekapeka i taku ikianga i te mea e te inangaro tikai ra au kia riro mai ei Kite no Iehova. E oti kua tuatua mai aia e: “Me inangaro koe i te kite no runga i te Atua, e piri atu koe ki te Au Kite o Iehova. Mataora matou ia koe. E ikianga meitaki tena. Ka tauturu maata te Au Kite ia koe. I apii ana au i te Pipiria kia ratou i mua ana i Marike, e kua riro mai tetai o toku kopu tangata ei Au Kite no Iehova. Auraka e mataku. E aruaru koe i tera ikianga.” Kua mataku rai au, inara i taua taime ra, kua rekareka toku ngakau. E kua akameitaki au i te Atua ko Iehova. Aite rai toku turanga ki tetai manu rere kua akaoraia mei te ereere, e kua mārama au i ta Iesu tuatua: “Ka kite ïa kotou i te tuatua-mou, e na te tuatua-mou kotou e akarangatira.”​—Ioane 8:​32.

Kua timataia au e toku au oa o mua ana kia kai akaou i te au apinga akakona. E kua tuku au i te au. Inara i muri mai i te pure putuputu anga, kua kopae takiri au i taku au angaanga viivii.​—Salamo 51:10, 11.

Te akaruke anga au i te are auri, kua manako tetai pae e ka oki rai au ki toku tu oraanga o mua ana, kare ra au i akapera ana. Mari ra, kua oki au i te atoro putuputu i te au mouauri i te akaari kia ratou i taku i apii mei te Pipiria. I reira, kua papu toku au oa o mua ana e kua taui toku oraanga. Te mea tangi ra, kare toku au enemi o mua ana i manako akapera.

I tetai rā i roto i te angaanga tutu evangeria, kua koropiniia maua ko tetai taeake e tetai pupu akatupu pekapeka, kua inangaro ratou i te tamate iaku. Ma te tu maru e te ngakau toa, kua akamārama atu toku taeake kia ratou e kare au e piri akaou ana ki te pupu akatupu pekapeka. I taua taime ra, kua tu muteki ua au. Kua pāpā mai e kua akamatakite mai ratou iaku kia kore au e aere akaou ki tera ngai, e oti kua tuku ratou i ta ratou apinga tamaki ki raro e kua tuku ratou ia maua kia aere. Kua taui takiri te Pipiria i toku oraanga. I mua ana, ka mamae ratou iaku. I teia tuatau ra, te aru nei au i te akoanga a te Pipiria i roto ia 1 Tesalonia 5:​15: “Kia matakite, kia kore rava tetai e tutaki i te kino ki te kino i te tangata ravarai; e kimi marie ra i te meitaki, auraka e tivata, i roto ia kotou uaorai e te tangata katoa ra oki.”

Mei te taime i riro mai ei au ei Kite no Iehova, te tauta nei rai au kia akakite ua i te tika. Kare te reira i te mea māmā i te rave. Noatu rai, ma te tauturu a Iehova, te akoanga a te Pipiria, e te tauturu a toku au oa ou, kua puapingaia au. Kare roa au e inangaro kia oki akaou ki toku tu oraanga o mua ana.​—2 Petero 2:​22.

I mua ana, e tangata kino au e te riri. Kua papu iaku e kare au e ora i teia tuatau me ka aru ua au i tera tu oraanga viivii. Kua taui toku oraanga no taku i apii mei te Pipiria. Kua akaruke au i toku tu oraanga viivii o mua ana. E kua apii mai au kia akatupu ua i te au ki toku au enemi o mua ana. (Luka 6:​27) Teianei, te mataora nei au i te au oa te akamaroiroi maira iaku kia akatupu i te au tu meitaki. (Maseli 13:20) E oraanga mataora toku i teianei e te akakoro nei i te tavini i te Atua tei papa ua i te akakore mai i taku au ara.​—Isaia 1:​18.

I te mataiti 2006, kua aere au ki te apii no te aronga tutu evangeria Kerititiano. Tetai au mataiti i muri mai, kua akaipoipo au i tetai vaine manea, e te utuutu nei maua i ta maua tamaine. I teianei, te akapou maata nei au i toku taime i te apii i te au kaveinga Pipiria tei tauturu iaku, ki tetai ke. Te tavini nei au ei tangata pakari, e te tauta nei au kia tauturu i te au mapu kia kore ratou e rave i te au tarevake taku i rave ana. Kare au e kō akaou i toku vaarua, te aruaru nei au i tetai oraanga meitaki a te tuatau ki mua, ta te Atua i taputou i roto i te Pipiria.