“Kare Au i te Tuikaa Akaou no te Takinga Kino”

TOKU ORA ANGA I MUA ANA

Anauia au i te oire o Calgary i Alberta, Kanata. E pepe rai au, kua tatara toku nga metua, e kua neke maua ko toku mama ki te kainga o toku nga metua ruau. Akaperepere toku nga metua ruau ia maua ko toku mama, e e tamaiti mataora ua au. Te maara nei rai iaku tera tuatau mataora e te ‘au i toku tamarikianga.

E itu oku mataiti, kua kino atu toku oraanga i te akaipoipo akaou anga toku mama i toku papa e kua neke maua ki St. Louis, Missouri, i Marike. Kare i roa, kua kite mai au e e tangata kino toku papa. Ei akaraanga, te oki anga mai au ki te kainga i toku rā mua i te apii, kua apii aia e kua takinokinoia au e te tamariki apii e kare au i rave kino atu ia ratou. E āka riri tona e kua mamae atu tana pāpā anga iaku i to te tamariki apii! Kua akamaara au i te reira e kua ō atu au ki roto i te tā anga mua e itu ua oku mataiti.

Kua taitaia a mama no te tu riri o papa, e kua karo ua raua. Kua akamata au i te kai apinga akakona e te inu kava i toku 11 mataiti. Kua kino atu toku tu riri e e maata te taime kua tā au i te tamariki i runga i te mataara. Te oti anga au i te apii tua rua, kua taui takiri toku tu no te takinga kino.

E 18 oku mataiti, kua piri au ki te angaanga vaeau i roto i te U.S. Marine Corps. Kua tereniia au kia taangaanga i toku tu riri ei ravenga tā tangata. E rima mataiti i muri mai, kua akaruke au i te angaanga vaeau no te apii i te manako e te oraanga tangata ma te akakoroanga kia rauka mai tetai ngai angaanga i roto i te Federal Bureau of Investigation. Kua aere au ki te apii teitei i Marike e kua apii ua atu i Kanata te oki anga au ki toku enua anau.

I ko i te apii teitei, kua tupu te manako oripu ua no te au turanga o te tangata takapini i teianei ao. Kua kite mai au e tu noinoi ua to te tangata, e e puapinga kore te oraanga i roto i teianei ao, pera katoa i te akara anga kare e rapakauanga no te au manamanata a te tangata. Akamata au i te irinaki e kare e rauka i te tangata te akameitaki atu i te turanga o teianei ao.

No te mea kare oku akakoroanga i roto i te oraanga, kua kino takiri te reira. Kua inu maata au i te kava e te kai apinga akakona e kua aruaru i te moni e te oraanga navenave. Kua akamou toku oraanga ki runga i te angaanga tamataora e te piri atu ki tera vaine e ki tera vaine. No toku terenianga i roto i te angaanga vaeau, kare au i mataku ana i te ō atu ki roto i te tā anga. Akanoo au i toku uaorai kaveinga no te tu tika e kua takinga kino i tetai ua atu taku i manako e tu tika kore tona. Inara, ko te tikaanga, kua riro mai au ei tuikaa no te takinga kino.

KUA TAUI TE PIPIRIA I TOKU ORAANGA

Tetai rā, kua kona maua ko toku oa no te kai apinga akakona i toku kainga e te akapapa ra i te oko maruana. I reira kua ui toku oa me kua irinaki au i te Atua. Pau atu au, “Me na te Atua i akatupu i te mamae i teianei ao, kare au e inangaro i te kite iaia!” I tera mai rā, te akamata anga au i taku angaanga ou, kua ui mai tetai oa angaanga e Kite aia no Iehova, “Toou manako, na te Atua ainei i akatupu i te mamae i teianei ao?” Kua poitirere tikai au i tana uianga e kua inangaro au i te kite i te pauanga. E ono marama i muri mai, e maata ta maua uriurianga, e kua akaari mai aia i te au pauanga a te Pipiria ki taku au uianga ngata no te oraanga.

Te vaine i tapaʼoia kia akaipoipo au e tei noo kapiti kiaku i tera tuatau, kare aia i inangaro i te akarongo ki te au mea taku e apii ra. I tetai Tapati, kua akakite au kiaia e kua pati au i te Au Kite ki to maua kainga no tetai apii Pipiria na maua. Tera mai rā, te oki anga au ki te kainga mei te angaanga, kua tari pouroa aia i ta maua apinga i roto i te are e kua akaruke iaku. Kua aere au ki vao e kua aue. Kua pure akatenga au ki te Atua i te pati i tana tauturu. Ko tera te taime mua i taangaanga ai au i te ingoa o te Atua ko Iehova i roto i taku pure.—Salamo 83:18.

E rua rā i muri mai, kua akamata taku apii Pipiria mua ma tetai nga tokorua, e Kite raua no Iehova. Te akaruke anga raua, kua tatau ua atu au i te puka apii Ka Rauka ia Koe te Ora Mutukore i Paradaiso i te Enua Nei, e kua oti iaku te tatau i te puka i tera po.a Kua puta toku ngakau no taku e apii ra no runga i te Atua ko Iehova e tana Tamaiti ko Iesu Karaiti. Apii mai au e e tu tangi aroa to Iehova e ka mamae aia me rokoia tatou e te kino. (Isaia 63:9) Kua pakia toku ngakau i to te Atua aroa noku e no te atinga a tana Tamaiti. (1 Ioane 4:10) Kua kite mai au e e akakoromaki roa to Iehova iaku no te mea “kare rava i anoano e kia mate atu tetai, kia rauka katoatoa ra te tataraara.” (2 Petero 3:9) Kite mai au e te akavaitata ra a Iehova iaku kiaia.—Ioane 6:44.

Kua akamata au i te aere ki te au uipaanga a te putuputuanga i tera epetoma. E rouru roroa toku, e poe taringa e te akara anga tangata akatupu pekapeka. Noatu ra, kua āriki mai te Au Kite iaku mei te kopu tangata rai. Akaari ratou i te tu Kerititiano mou. Mei te mea rai e kua oki au ki te kainga o toku nga metua ruau, tera ra e ngai meitaki atu teia.

Aere ua rai, kua akamata toku oraanga i te taui no te au mea taku e apii ra i roto i te Pipiria. Kua pakoti au i toku rouru, kua akamutu i te au peu ainga tau kore e kua akakore i te kai apinga akakona e te inu maata i te kava. (1 Korinetia 6:9, 10; 11:14) Inangaro au i te akamareka ia Iehova. No reira, me apii au e kare aia e mareka ana i tetai angaanga taku e rave ra, kare au e kimi kotoeanga no taku peu kino. Mari ra, kua tataraara tikai au. ‘Kare au e rave akaou i teia,’ ka karanga au kiaku uaorai. E oti ma te emiemi kore, ka tauta au i te taui i toku aerenga manako e taku e rave ra. Tei tupu, kare i roa ana kua kite mai au i te au akameitakianga no te aru anga i to Iehova au aerenga. Ia Tiurai rā 29, 1989—e ono marama i muri ake i taku apii Pipiria mua—kua papetitoia au ei Kite no Iehova.

KUA PUAPINGAIA AU

Kua taui takiri te Pipiria i toku tu. I mua ana, me akatupu pekapeka tetai tangata kiaku, ka takinga kino atu au iaia. Inara i teianei, ka tauta pakari au “kia noo au ua . . . i roto i te tangata katoa nei.” (Roma 12:18) Kare noku te maroiroi no te rave i teia au tauianga mari ra ka akameitaki au ia Iehova no te mana ririnui o tana Tuatua e tona vaerua tapu i te taui i toku tu.—Galatia 5:22, 23; Ebera 4:12.

Kare au i te tuikaa no te apinga akakona, te takinga kino, e te au peu tau kore, mari ra i teianei ka tauta pakari au kia akamareka i te Atua ko Iehova e te oronga i taku ka rauka kiaia. Kapiti mai ki teia, ka tauturu au i tetai ke kia apii no runga iaia. I nga mataiti i muri ake i toku papetitoanga, kua neke au ki tetai enua ke ei rave i te angaanga tutu aere i te au ngai e anoanoia ra te aronga tutu evangeria. I te au mataiti i aereia, kua rekareka au i te apii i te tangata e manganui e te kite akapeea te Pipiria te taui anga i to ratou oraanga. Rekareka katoa au e kua riro mai toku mama ei Kite no Iehova—tetai tumu, no te au tauianga taku i rave ei akameitaki atu i toku tu e taku au peu.

I te 1999, i El Salvador, kua akaoti au i te apii ta tatou e kapiki ra i teianei ko te Apii na te Aronga Tutu Evangelia. Kua tereni e kua tauturu te apii iaku kia rave meitaki i te angaanga tutu evangeria e kia apii e te tiaki i te putuputuanga. I taua mataiti ra, kua akaipoipo au i taku vaine akaperepere ko Eugenia. Te tavini kapiti nei maua ei aronga tutu aere tamou i Guatemala.

I teia rā, kare au e manako oripu ua i te oraanga, mari ra e rekareka maata toku. Na te taangaanga i te au apiianga Pipiria, kua matara mai au mei te au peu ainga tau kore e te takinga kino e i teianei kua rauka iaku te oraanga tei kī i te aroa mou e te ‘au.